Dongo Dirowa i Tic me Pwony—Kit me Cako Kwano Baibul ki Ngat Mo i Nyim Doggolane ki Brocuwa me Kwena Maber Mua ki Bot Lubanga!

Gin Mumiyo Pire Tek: Me loko dano wek gudok lulub kor Yecu, omyero wabed lupwonye me Lok pa Lubanga. (Mat. 28:19, 20) Wan ducu watwero bedo lupwonye mucwiny me lok ada ka watiyo ki jami tic ma kimiyowa. Brocuwa me Kwena Maber Mua ki Bot Lubanga! kiyubo me konyowa me pwonyo lok ada bot jo mukene. Adada, watwero tic kwede me cako kwano Baibul ki rwod ot ki i nyim doggolane i limwa me acel.

Tem Timo Kit Man i Dwe-ni:

Leg Lubanga wek idong miti me kwano Baibul ki dano. Dok bene, leg Jehovah wek okonyi me cako kwano Baibul ki ngat mo ki me doko lapwony mucwiny.—Pil. 2:13.
I kare me kwanwu macalo jo me ot nyo piri keni, kwany kare me pwonyo kit me cako lok man maber. I nge meno nongo dong itwero lok ki tekcwiny kun icako kwan ki ngat mo i nyim doggolane ka itye i tic me pwony.