Hlale Unombono Ofanele Ngezinkinga

1-2. Yini okudingeka siyenze ukuze sikwazi ukubhekana nezinkinga esinazo? (Bheka nesithombe.)

INGABE uphathwa ngendlela engenabulungisa, uphikiswa amalungu omndeni noma uyashushiswa ngenxa yokholo lwakho? Ingabe ukhuthazelela ukugula noma izinkinga zokukhula ngeminyaka? Noma ingabe wehlelwe yinto ebuhlungu, mhlawumbe ushonelwe umuntu omthandayo? Njengezimvu zikaJehova eziyigugu eziningi, kungenzeka ukuphila kwakho “kugcwele izinkathazo nosizi.”—IHu. 90:10.

² Ukuze sikwazi ukubhekana nezinkinga, kumele sibe nombono ofanele ngazo. Kuhlanganisani lokho? Singakufanisa ngale ndlela: Izinkinga obhekene nazo zifana neziphazamiso ongase uhlangabezane nazo njengoba ushayela imoto. Kuye ngokuthi ubhekene naluphi uhlobo lwesiphazamiso, kungase kudingeke uye ngakwesobunxele noma ngakwesokudla, wehlise ijubane noma ume isikhashana. Kodwa ukuze uthathe isinyathelo esifanele, kumele usibone ngokucacile leso siphazamiso. Ngeke ukwazi ukusibona uma amawindi akho embozwe yiqhwa noma udaka. Ngendlela efanayo, ukuze sikwazi ukubhekana nezinkinga, kudingeka sizibheke ngendlela uJehova azibheka ngayo. Kulesi sihloko, sizoxoxa (1) ngendlela esingabheka ngayo izinkinga zethu, (2) ngendlela okungasilimaza ngayo ukuba nombono ongafanele ngesimo esibhekene naso (3) nangezinye izinto esingazenza ukuze sihlale sinombono ofanele lapho sehlelwa inkinga ethile.

UKUBA NOMBONO OFANELE NGEZINKINGA

3. Yini okumele siyamukele ngokuphila kuleli zwe elikhohlakele?

³ Ngeke sikwazi ukugwema izinkinga kuleli zwe elikhohlakele. Uma nje sisenesono noSathane esabusa leli zwe, izinkinga zizosithinta. Ngaphezu kwalokho, njengoba ukuphela kwaleli zwe kusondela, siyobhekana nezinkinga eziningi nakakhulu, kungakhathaliseki ukuthi izinhlekelele zemvelo noma ezibangelwe abantu, noma sihlukunyezwa abantu abenza izinto ezimbi. (Math. 24:8; 2 Thim. 3:13) Uma uJehova ubengalungisa lezo zinkinga manje, bekungabonakala sengathi usiza uSathane ukuba alawule leli zwe. Kuleli zwe ngeke zingasithinti ‘izinhlekelele.’—UmSh. 9:​12, mbhw.

4. Yibuphi obunye ubunzima amaKristu abhekana nabo?

⁴ AmaKristu abhekana nobunye ubunzima. UJesu wayevame ukutshela abafundi bakhe ukuthi babeyoshushiswa ngenxa yokholo lwabo. (Math. 24:9; Joh. 16:2) Ukwazi lokho kusisiza ukuba singavumeli ukholo lwethu lunyakaziswe ubunzima obunjengalobo. (1 Thes. 3:​3, 4) Lapho sikhuthazelela uvivinyo ngenxa yokuthi sinokholo oluqinile, singaqiniseka ukuthi sisahamba endleleni eya ekuphileni okuphakade. Ngaphezu kwalokho, sibonisa ukuthi singakuluphi uhlangothi empikiswaneni enkulu ephakathi kukaJehova noSathane. Ukuze ahlasele igama likaNkulunkulu, uSathane uthi abantu bakhonza uNkulunkulu ngenxa yezizathu zobugovu kuphela. Ukuze afakazele lokho akushoyo, uhlasela abantu bakaJehova ngezinto ezinzima kakhulu. (Jobe 1:​9-11) Lapho sikhuthazelela uvivinyo ngenxa yokuthi siyamthanda uJehova, simenza ajabule.—IzAga 27:11.

5. Yini esingayifunda kumShumayeli 7:​13, 14? (Bheka nezithombe.)

⁵ UJehova uyakuvumela ukuba abantu babhekane nezinkinga. Akalokothi enze ngokukhohlakala noma asivivinye ngezinto ezimbi. (Jak. 1:13) Kodwa iNkosi uSolomoni yabhala ukuthi ‘usuku lwenhlekelele’ ‘luwumsebenzi kaNkulunkulu weqiniso.’ (Funda umShumayeli 7:​13, 14.) Njengoba kuye kwenzeke, lapha iBhayibheli libhekisela kuJehova njengowenza okuthile kuyilapho empeleni emane ekuvumela ukuba kwenzeke. USolomoni wasinika iseluleko esihle esingasisiza sibe nombono ofanele ngovivinyo esibhekene nalo. Okokuqala, kudingeka sibhekane namaqiniso ngokuphathelene nokuthi izinto ngeke zihambe kahle ngaso sonke isikhathi njengoba siphila kuleli zwe likaSathane—ngezinye izikhathi siyoba nezinsuku ezinhle, ngezinye sibe nezinsuku ezimbi. Ngosuku oluhle singabonisa ukuthi siyabonga ngobuhle bukaNkulunkulu, sibheke lolo suku njengesipho esivela kuye. Okwesibili, uSolomoni usikhumbuza ukuthi ngeke ‘siqiniseke ngokuzokwenzeka,’ ukuthi usuku luzosilethela izinto ezinhle noma ezibuhlungu. Izinkinga ezingalindelekile zihlasela abantu abalungile nabangalungile.

6. Kungani uJehova engase avumele ukuba sibhekane novivinyo? (Hebheru 12:​7, 11)

⁶ Uma silubheka ngendlela efanele uvivinyo esibhekene nalo, siyobona ukuthi uJehova ufuna sincike kuye, singanciki kithi. UJehova akalokothi angaboni lapho sibhekene novivinyo noma angabi nandaba nosizi esibhekene nalo. Ngisho nalapho esivumela ukuba sihambe “esigodini sethunzi elimnyama,” uyaqhubeka esiqondisa, esiqinisekisa ukuthi uyasithanda, esinika namandla esiwadingayo ukuze sikhuthazele. (IHu. 23:4) Izinkinga zingasisiza nokuba sibone lapho sibuthaka khona bese sithuthukisa ubuntu bethu ngosizo lukaNkulunkulu. (Funda eyamaHebheru 12:​7, 11.) Ngokwesibonelo, uJobe kwakudingeka athuthukise endabeni yokuthobeka. UJehova akalubangelanga uvivinyo lukaJobe, kodwa waluvumela futhi walusebenzisa ukuze asize uJobe afunde izifundo ezibalulekile. (Jobe 42:​1-6) Kodwa kungakhathaliseki ukuthi yini engase isehlele, siyazi ukuthi noma yini uJehova ayivumelayo ukuba yenzeke ngeke isilimaze unomphela. Lapho sikhuthazelela uvivinyo ngokwethembeka, “siyanqoba ngokuphelele.”—Roma 8:​35-39.

7. Kungani ungajabula ngisho nalapho ushushiswa ngenxa yokholo lwakho?

⁷ Singajabula lapho sishushiswa. Uma ushushiswa ngenxa yokholo lwakho, ungacabangi ukuthi uJehova akajabuli ngawe. Kunalokho, ukushushiswa kwakho kubonisa ukuthi ulalela uJehova futhi uyajabula ngawe. (Math. 5:​10-12) Ngokuba nombono ofanele, ungajabula futhi uqhubeke uzihlonipha lapho ushushiswa ngenxa yokuba umKristu, njengoba nje nabaphostoli benza. (IzE. 5:​40-42) Ngaphezu kwalokho, ungase usize umuntu ongeyena uFakazi ukuba afunde iqiniso futhi ‘akhazimulise uNkulunkulu.’ (1 Pet. 2:12) NjengoJosefa, ungaphumelela lapho usabhekene nezinkinga—hhayi nje lapho seziphelile kuphela.—Gen. 39:​3, 23.

8. Yini enye esikhuthaza ukuba sikhuthazelele uvivinyo esibhekene nalo?

⁸ Uvivinyo esibhekene nalo luzophela. Indaba kaJobe isikhumbuza ukuthi ubunzima esibhekene nabo buzophela. Empeleni, “uJehova wabusisa isiphetho sokuphila kukaJobe ukwedlula isiqalo sako.” (Jobe 42:12) Ngendlela efanayo, uJehova uthembisa ukubusisa “isiphetho” sokuphila kwakho, ingxenye yokuphila kwakho eqhubeka kuze kube phakade, ukwedlula isiqalo esifushane sokuphila kwakho esingase sigcwale izinkinga eziningi. Ngempela, lokho kukhuthaza ngamunye wethu ukuba akhuthazele kuze kube sekugcineni!—Math. 24:13.

INDLELA OKUNGASILIMAZA NGAYO UKUBA NOMBONO ONGAFANELE

9. Ukuba nombono ongafanele ngezinkinga zethu, kungasilimaza kanjani?

⁹ Kungakhathaliseki ukuthi sibhekene naziphi izinkinga, kudingeka sibe nombono omuhle ngazo ukuze sigweme ukuzidalela ezinye izinkinga. Ngokwesibonelo, singase sibe nomuzwa wokuthi nguJehova obangele izinkinga zethu. Okwesikhathi esithile, uJobe waba nomuzwa wokuthi nguJehova owayebangele izinkinga zakhe futhi lowo mbono ongafanele wamenza wazama “ukuzibonakalisa elungile kunokuba athi nguNkulunkulu olungile.” (Jobe 32:2) Ngokufanayo, uNawomi waqale wasola uJehova ngokuthi nguye owayembangele usizi. (Ruthe 1:​13, 20, 21) Ukube uJobe noNawomi baqhubeka bekholelwa kuleyo mibono eyiphutha, babeyolimaza ubuhlobo babo noJehova. (IzAga 19:3) Kodwa uJehova wabasiza baba nombono ofanele ngezinkinga zabo futhi wababusisa ngokuba qotho kwabo.

10. Lapho sibhekene novivinyo, yini esingase siqale ukuzibuza yona?

¹⁰ Ngisho noma siqiniseka ukuthi uJehova akalubangelanga uvivinyo esibhekene nalo, singase siqale ukuzibuza ukuthi ingabe usasikhathalela yini. Lowo mbono ongakhi ungasiqeda amandla. (IzAga 24:10) INkosi uDavide nomprofethi uHabakuki babhekana nezinkinga futhi ngezinye izikhathi babezibuza ukuthi ingabe uJehova wayeyilalela yini imithandazo yabo. (IHu. 10:1; Hab. 1:2) Kodwa, abayekanga ukuthandaza. UJehova waqinisekisa lawo madoda athembekile ukuthi wayewasekela futhi uzokwenza okufanayo nakuwe.—IHu. 10:17.

11. Yini engenzeka kithi uma singenawo umbono ofanele ngovivinyo esibhekana nalo?

¹¹ Uma singenawo umbono ofanele ngovivinyo lungase lusimangaze, mhlawumbe sibe nomuzwa wokuthi izinto ezinjengalezi akufanele zenzeke kithi. (1 Pet. 4:12) Abafundi bakaJesu babengaqondi ukuthi kungani kwakufanele abhekane noshushiso olunzima. (Luka 18:​33, 34) Nakuba uJesu ayebatshele ngokucacile ukuthi yini eyayiyokwenzeka kuye, umphostoli uPetru wayengazitsheli ukuthi uJesu wayeyobhekana nobunzima obungako. UJesu wayazi ukuthi ukucabanga okunjalo kwakungase kumphazamise ekwenzeni intando kaJehova, ngakho wamkhuza uPetru. (Marku 8:​31-33) Ngisho nangemva kokufa kukaJesu, kwathatha isikhathi ukuba abafundi bakhe baqonde ukuthi kungani abulawa. Noma kunjalo, uJesu waqhubeka ebathanda futhi ebasiza. Lapho ekhuluma nabo ngemva kokuvuswa kwakhe, wabasiza ukuba babe nombono ofanele ngokuthi kungani kwakudingeka ahlupheke ‘ngokubakhanyisela imiBhalo ngokugcwele.’ (Luka 24:​25-27, 32, 44-48) Ukuzindla ngalokho uJesu ayebafundisa kona, kwakuyosiza abalandeli bakhe balungele ukuphikiswa ababezobhekana nakho maduze. Ukucabanga ngamaqiniso aseBhayibhelini nathi kungasisiza sikulungele ukubhekana nezinkinga.

12. Ukuba nombono ongafanele ngesimo esibhekene naso kungasenza sizizwe kanjani?

¹² Ukuba nombono ongafanele ngesimo esibhekene naso kungasenza sicabange ukuthi sibi kakhulu kunalokho esiyikho ngempela. UJesu wabonisa enye indlela okungenzeka ngayo lokhu emfanekisweni wakhe wezisebenzi zensimu yamagilebhisi. Ezinye izisebenzi zazingajabule ngenxa yokuthi zazicabanga ukuthi zazithole umholo omncane kunalowo okwakufanele ziwuthole, kodwa umnikazi wensimu wathi komunye wazo: “Mfo, angikonanga ngalutho.” (Math. 20:​10-13) Izisebenzi zazikhononda ngoba zazicabanga ukuthi zazithole umholo omncane kunalowo okwakufanele ziwuthole, hhayi ngoba zaziphathwe ngendlela engenabulungisa. Namuhla abanye oFakazi kuye kwadingeka balwisane nemizwa efanayo—ngokwesibonelo, lapho bengakwazanga ukuthola ilungelo lenkonzo elithile noma lapho kuye kwadingeka bayeke ilungelo elithile lenkonzo. Yiziphi izinto eziwusizo esingazenza ukuze sibe nombono ofanele ngesimo esinzima esibhekene naso?

ESINGAKWENZA LAPHO KUPHAKAMA INKINGA

13. Yini engase yenzeke lapho uhlaselwa yinkinga ethile?

¹³ Kungenzeka uyakwazi lokho okufundiswa yiBhayibheli ngokuphathelene nezinkinga. Kungenzeka uye waxoxela nabanye ukuze ubasize babhekane novivinyo. Kodwa lapho izinkinga zihlasela wena, ungase ukuthole kunzima ukuhlale unombono ofanele. Ngokwesibonelo, ungase ube nomuzwa wokuthi uJehova uyakujezisa noma akayilaleli imithandazo yakho. Yiziphi izinto ongazenza ukuze uhlale unombono omuhle?

14. Yini ongayithandazela lapho ubhekene nesimo esibuhlungu? (Filipi 4:13)

¹⁴ Cela uJehova akusekele. Tshela uJehova ngesimo esibuhlungu obhekene naso nangokuthi sikwenza uzizwe kanjani. Lapho uthandaza, ungamtshela ngokuqondile indlela ongafisa akusize ngayo. Ungamcela akuphe umoya ongcwele ukuze ukunike amandla nokuhlakanipha okudingayo ukuze ukhuthazele. Kodwa, khumbula ukuthi uJehova angaphendula umthandazo wakho ngendlela ongayilindele. (Efe. 3:20) Angase asebenzise izingelosi, abafowenu nodadewenu ukuze bakusize. (IHu. 34:7) Ngakho yamukela usizo lukaJehova noma ngabe ukunika lona ngayiphi indlela. Usipha umoya wakhe ongcwele ngesandla esivulekile futhi ungakusiza ubhekane nanoma iyiphi inselele.—Funda eyabaseFilipi 4:13.

15. Yini eyokusiza ukhuthazelele izikhathi ezinzima? (Bheka nesithombe.)

¹⁵ Ungayeki ukwenza izinto ezikwenza usondelane noJehova. Yenza okusemandleni akho ngisho noma ungase ungakwazi ukwenza izinto ngendlela obuzenza ngayo esikhathini esidlule. Kudingeka ugcwalise ingqondo yakho ngemicabango kaNkulunkulu, ikakhulukazi ngezikhathi ‘zokucindezeleka nobunzima.’ (IHu. 119:143) Qhubeka ufunda iBhayibheli nsuku zonke, ulitadishe futhi uzindle ngalo. Shumayela izindaba ezinhle ngezinga ongakwazi ngalo, uye emihlanganweni yebandla futhi ube nengxenye ezintweni ezenziwa kuyo. Hlale uchitha isikhathi nabafowenu nodadewenu. Melana nomuzwa wokufuna ukuzihlukanisa.—IzAga 18:1.

16. Yikuphi ukungabaza ongase ube nakho lapho wehlelwa yinto ebuhlungu, futhi ungakunqoba kanjani? (2 Korinte 10:​4, 5)

¹⁶ Nqoba ukungabaza onakho. Lapho wehlelwa yinto ebuhlungu, kungase kudingeke ususe imicabango onayo ‘embelwe ngokuqinile,’ okuhlanganisa ukungabaza onakho ngawe nangoJehova. (Funda eyesi-2 Korinte 10:​4, 5.) Ungakwazi ukunqoba lokho kungabaza ngokusebenzisa ‘ulwazi ngoNkulunkulu’ olutholakala eBhayibhelini nasezincwadini zenhlangano yakhe. Ngokwesibonelo, ingabe uyakungabaza ukuthi uJehova usajabula ngawe? Tadisha ngezinto umphostoli uPawulu abhekana nazo ekuphileni kwakhe. Phakathi nenkonzo yakhe, wabhekana nezinkinga ezinzima kakhulu; noma kunjalo lezo zinkinga zamenza waqiniseka nakakhulu ukuthi uJehova noJesu babejabula ngaye. (2 Kor. 11:​23-27) Uke uzibuze yini ukuthi ingabe uJehova uwathethelele ngempela amaphutha owawenza esikhathini esidlule? Uma kunjalo, bhala phansi imiBhalo ebonisa ukuthi uJehova uyazithethelela izono zethu. (Isaya 43:25) Yibe usufunda lawo mavesi, uzindle ngawo. (IHu. 119:97) Ingabe into ebuhlungu ekwehlele ikwenze wangabaza isithembiso sikaNkulunkulu sokuvikela izinceku zakhe ezithembekile? Cwaninga ngezihloko ezikhuluma ngokuthi kungani uNkulunkulu evumela ukuhlupheka nangokuthi usisiza kanjani silondoloze ubuhlobo bethu naye kungakhathaliseki ukuthi yini esibhekana nayo. (IHu. 91:​9-12) Funda nangezindaba zabafowethu nodadewethu ababhekana ngokuphumelelayo nezimo ezibuhlungu.a

17. Yini okufanele siyenze lapho sehlelwa yinto ebuhlungu?

¹⁷ Ingabe njengamanje ujabulela usuku oluhle olungenazo izinkinga ezinkulu? Uma kunjalo, mbonge uJehova ulisebenzise kahle lelo thuba lokuzindla ngobuhle bakhe. (UmSh. 7:14) Kodwa lapho wehlelwa yinto ebuhlungu, hlale unombono ofanele uqhubeke umethemba ngokuphelele uJehova. Njengoba wenza kanjalo, uJehova ‘uyokwenza nendlela yokuphuma ukuze ukwazi ukukhuthazela.’ (1 Kor. 10:13) Kodwa kuthiwani ngabafowethu nodadewethu abathandekayo? Singabasiza kanjani lapho behlelwe yizinto ezibuhlungu? Isihloko sethu esilandelayo sizoxoxa ngaleyo ndaba.