‘UNkulunkulu Weqiniso’ Uhlale Eyifeza Injongo Yakhe

1. Kungani singaqiniseka ukuthi sivikelekile emangeni kaSathane? (IHubo 31:​2-5)

SIPHILA ezweni elilawulwa uSathane. Ukuqamba amanga, ukungathembeki, nokukhohlisa kuyinto evamile. Kungaba nzima ukwazi ukuthi ubani esingamethemba. Osomabhizinisi bakhohlisa abanye osomabhizinisi abenza umsebenzi ofana nowabo. Abakhangisi bakhohlisa abathengi ngemikhiqizo abayithengisayo. Abanye abantu bathole nokuthi ngisho nabangani babo abaseduze abazigcini izithembiso zabo. Kodwa, kuyaduduza ukwazi ukuthi singamethemba njalo uJehova! ‘UnguNkulunkulu weqiniso.’ (Funda iHubo 31:​2-5.) Akalokothi aqambe amanga—konke akushoyo kuyiqiniso. Singaqiniseka ukuthi noma yini ayishoyo uzoyenza.

2. Sizoxoxa ngani kulesi sihloko?

² Kulesi sihloko, sizoqale sixoxe ngezinye zezizathu zokuthi kungani singamethemba uJehova ngenhliziyo yethu yonke. Sizobe sesixoxa ngokuthi uNkulunkulu weqiniso uzoliqeda kanjani leli zwe elibi likaDeveli nangokuthi yini uNkulunkulu ayenzayo ngisho kwamanje ukuze afeze injongo yaKhe. Lesi sihloko sizosisiza sibe oFakazi BakaJehova abanesibindi nabangesabi.

KUNGANI SINGAMETHEMBA UNKULUNKULU WEQINISO?

3. Kungani singamethemba ngokuphelele uJehova?

³ Singamethemba uJehova ngoba unguMdali. Nguye owenza amazulu nomhlaba futhi unguMthombo wakho konke okuphilayo. (Gen. 1:1; IHu. 36:9; IsAm. 4:11) Uphinde abe uMlondolozi wokuphila. Umhlaba uwudale ngendlela yokuba konke esikudingayo ukuze siqhubeke siphila kuhlale kukhona, njengomoya esiwuphefumulayo namanzi esiwaphuzayo. Nguye okulawula ngokuphelele konke okusemhlabeni nasezulwini noyohlale ekulawula. Ngakho singamethemba ngokuphelele ukuba aqondise ukuphila kwethu nekusasa lethu, uMdali wethu onakho konke ukuhlakanipha namandla.

4. Sazi kanjani ukuthi uJehova uyasithanda?

⁴ Singamethemba uJehova ngoba uyasithanda. UJehova wadala abantu ngoba wayefuna nabo bajabulele isipho esihle esiwukuphila. UJehova wasitshela injongo yakhe ngala mazwi: “Masenze umuntu ngomfanekiso wethu, afane nathi.” (Gen. 1:26) Wasinika inkululeko yokuzikhethela. Wasenzela ikhaya elihle. (IHu. 115:16) Wabusisa nabazali bethu bokuqala ngesabelo esijabulisayo sokushintsha lelo khaya balenze ipharadesi. (Gen. 1:28; 2:15) Wabanika ukudla okuningi okumnandi nezinhlobonhlobo zezitshalo, nezilwane nokunye okuningi, ukuze bakujabulele ukuphila. Ngempela, lezi zinto zifakazela ukuthi “uthando lukaJehova oluqotho . . . luhlala kuze kube phakade.”—IHu. 103:17.

5. (a) UJehova waligcina kanjani izwi lakhe naphezu kwemizamo kaDeveli yokuqeda ngabantu? (b) Yiziphi ezinye izithembiso uNkulunkulu asezigcwalisile? (Bheka ibhokisi elithi “Irekhodi LikaNkulunkulu Lokuthi Uhlale Ekhuluma Iqiniso.”)

⁵ Singamethemba uJehova ngoba uhlale ekwenza lokho akushoyo. UJehova akawudalelanga ‘ize umhlaba kodwa wawubumba ukuze kuhlalwe kuwo.’ (Isaya 45:​18, 19) Ngesikhathi u-Adamu no-Eva bevukela, bathola isigwebo sokufa. Ngakho kwakungase kubonakale sengathi injongo kaNkulunkulu yayisibhuntshile. Kodwa uJehova unguMgcwalisi wazo zonke izithembiso zakhe. (Isaya 46:​10, 11) Injongo yakhe yokugcwalisa umhlaba ngamadoda nabesifazane abalungile ayizange iphazamiseke. Yingakho uJehova avumela u-Adamu no-Eva ukuba babe nezingane. Wanikela nangeNdodana yaKhe ezelwe yodwa njengesihlengo ukuze isindise inzalo ka-Adamu, iyinike nethemba elimangalisayo lokuphila phakade.—Joh. 3:16.

UNKULUNKULU WEQINISO UYAYIFEZA INJONGO YAKHE

6. Yini uJehova ayibikezela ngemva kokuvukela okwenzeka e-Edene?

⁶ Lowo owakhuthaza u-Adamu no-Eva ukuba bavukele uNkulunkulu ‘kwakuyinyoka yokuqala, lowo obizwa ngokuthi uDeveli noSathane.’a (IsAm. 12:9; Gen. 3:​4, 5; Joh. 8:44) UJehova wakhipha isahlulelo ngokumelene naye, esithi, ekugcineni wayeyobhujiswa. (Gen. 3:15) Ngaphambi kokuba lokho kwenzeke, abaningi babeyolandela uSathane futhi benze njengaye. Kodwa, abanye babeyohlale beqotho kuJehova.

7. Obani abalandela uDeveli, futhi siyoba yini isiphetho sabo?

⁷ Labo abalandela uSathane uDeveli yizingelosi ezivukelayo nabantu abavukelayo. Ngenxa yokuthi baphikisa, noma bamelene, nenjongo kaNkulunkulu, bazenza ingxenye yenzalo kaSathane. Kodwa ngesikhathi sikaNkulunkulu esimisiwe, uSathane nalabo abamlandelayo bayobhujiswa.—Dan. 2:44; Roma 16:20.

8. Yini uJesu ayenza ngo-1914? (Bheka nezithombe.)

⁸ Yibuphi ubufakazi obusenza siqiniseke ukuthi injongo kaNkulunkulu yokubhubhisa uSathane nabalandeli bakhe abakhohlakele iyogcwaliseka? Ngo-1914, uJesu walwa noSathane uDeveli namademoni akhe, wabaphonsa phansi emhlabeni. (IsAm. 12:​7-9) Nakuba leyo mpi yenzeka ezulwini, ngokuqinisekile labo abasemhlabeni babhekana nemiphumela yaleyo mpi. IBhayibheli lithi: “Maye ngomhlaba nangolwandle, ngoba uDeveli wehlele kini, ethukuthele kakhulu, azi ukuthi unesikhathi esifushane.” (IsAm. 12:12) Kusukela ngo-1914, uSathane ubelokhu egxile emhlabeni futhi ngenxa yalokho izimo zezwe ziye zaba zimbi nakakhulu. Ngempela, “maye ngomhlaba”! Nokho, maduzane, uJesu ‘uyophelelisa ukunqoba kwakhe’ futhi uSathane nabo bonke abamsekelayo bayobhujiswa. (IsAm. 6:2) UJesu uyolingcwelisa unomphela igama likaJehova. (IHu. 45:​4-6) Bonke abantu bayokwazi ukuthi uJehova unguNkulunkulu weqiniso!—Hez. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

UNKULUNKULU WEQINISO UHLANGANISELA NDAWONYE BONKE ABATHANDA IQINISO

9. Obani uJehova abahlanganisela ndawonye namuhla?

⁹ Okwamanje, uJehova uhlanganisela “ndawonye kuKristu zonke izinto ezisezulwini nezisemhlabeni.” (Efe. 1:10) “Izinto ezisezulwini” zibhekisela kwabagcotshiwe, labo uJehova abakhethe ukuba babuse noKristu ezulwini. ‘Izinto ezisemhlabeni’ zibhekisela kulabo abayophila phakade ePharadesi emhlabeni. Bonke laba bakhulekeli bakaJehova bamatasa ngokusiza abanye babone ukuthi uSathane ungumqambimanga nangokusiza labo abanezinhliziyo eziqotho ukuba bafunde iqiniso ngoJehova.

10. UJehova ubakhulula kanjani abantu emangeni enkolo yamanga? (IsAmbulo 14:​6, 7)

¹⁰ UJehova uhlanganisela ndawonye abathandi beqiniso ngokuthi kwenziwe umsebenzi wokushumayela ngezinga ongakaze wenziwe ngalo emlandweni. (Funda isAmbulo 14:​6, 7.) Nakuba uJehova esebenzisa abantu ukuba batshele abanye izindaba ezinhle, izingelosi zinesandla ekubahlanganiseni ndawonye ebandleni lobuKristu labo abanezinhliziyo eziqotho. Lo msebenzi wokushumayela udalula amanga afundiswa yiBhabhiloni Elikhulu, umbuso wezwe wenkolo yamanga, uDeveli aselisebenzise amakhulu eminyaka ukuba lisakaze amanga ngoJehova. (IsAm. 18:​2, 4) Maduzane, zonke izinkolo zamanga zizobhujiswa ngokuphelele, bonke labo abathanda uNkulunkulu weqiniso bayomnika inkazimulo emfanele ngempela.—IsAm. 17:16.

11. Singababona kanjani abakhulekeli bakaJehova beqiniso?

¹¹ Abathandi beqiniso bavela kuzo zonke izinhlobo zabantu nakuzo zonke izizwe. (IsAm. 7:​9, 10) Ngesikhathi bezwa “izindaba ezinhle,” babona ukuthi babethole iqiniso futhi bakujabulela ukuzihlanganisa nabantu bakaJehova. (Marku 13:10) Njengoba isikhathi siqhubeka, kucaca nakakhulu ukuthi obani abakhulekela uNkulunkulu ngendlela ayamukelayo nokuthi obani abangakwenzi lokho. Umprofethi uMalaki wabikezela: “Niyophinde niwubone umehluko phakathi komuntu olungile nomuntu omubi, phakathi kokhonza uNkulunkulu nongamkhonzi.” (Mal. 3:18) Ngokuziphatha kwazo nangokwenza umsebenzi wokushumayela, izinceku zikaJehova zibonisa ukuthi zikhulekela uNkulunkulu weqiniso.

12. Umsebenzi wokushumayela usiza kanjani ekufezeni injongo kaJehova?

¹² Ngokushumayela ‘izindaba ezinhle zoMbuso,’ silalela umyalo kaJesu, ngesikhathi esifanayo sigcwalisa isiprofetho. (Math. 24:14; 28:​18-20) Ngenxa yalo msebenzi, abantu emhlabeni wonke baba abafundi bakaKristu futhi babheke phambili esikhathini lapho beyokhonza khona uNkulunkulu weqiniso phakade. Kuyilungelo elimangalisa ngempela ukuba nesandla ekufezeni injongo kaJehova!

QINISEKA UKUTHI UJEHOVA UZOKWENZA LOKHO AKUTHEMBISILE

13. Obani ngokukhethekile abayizisulu zikaSathane, futhi kungani?

¹³ USathane uDeveli uthukuthele uyangqangqa ngoba uyazi ukuthi “unesikhathi esifushane” ngaphambi kokuba izwe lakhe libhujiswe. (IsAm. 12:​12, 13) Ushushisa ngokukhethekile abameleli boMbuso kaNkulunkulu, labo “abagcina imiyalo kaNkulunkulu nabanomsebenzi wokufakaza ngoJesu.” (IsAm. 12:17; 14:12) Noma ubani osekela bona nomsebenzi abawenzayo naye uyisisulu sokuhlaselwa uSathane.

14. Yini eyokwenzeka lapho uSathane ehlasela abantu bakaJehova? (Bheka nesithombe esisekhasini 1.)

¹⁴ Ngemva kokubhujiswa kweBhabhiloni Elikhulu, abameleli bakaSathane bayozama ukuhlasela bonke abantu bakaJehova. Lokho kuhlasela kuyoholela empini ye-Armagedoni. (IsAm. 16:​13, 14, 16) UJesu namabutho asezulwini bayokhulula abakhulekeli bakaJehova futhi bayokubhubhisa ngokuphelele konke okuyobe kusele ezweni likaDeveli. (IsAm. 19:​19-21) Bonke abaqambimanga, abantu abakhohlakele nabakhohlisayo ngeke besaba khona. (IsAm. 21:8) Igama likaNkulunkulu weqiniso nokulunga liyolwelwa ngempela.

15. Kungani singaqiniseka ukuthi uJehova uzokwenza lokho akuthembisile ngekusasa? (Isaya 65:​16, 17) (Bheka nesithombe.)

¹⁵ Namuhla kunoqhekeko olukhulu emhlabeni ngezinga elingakaze libe khona ngaphambili. Kodwa ngosizo lukaJehova, izinceku zakhe zihlale zinobunye. UJehova useqalile ukubahlanganisela ndawonye bonke labo abathanda iqiniso. Ayikho into engavimba uJehova ukuba abusise abantu bakhe nomsebenzi abawenzayo. (Funda u-Isaya 65:​16, 17.) Siyaqiniseka ukuthi uzokwenza lokho akuthembisile. Amazwi kamphostoli uPawulu atholakala kweyabaseRoma 8:​38, 39 ayasiqinisekisa: “Nakufa nakuphila nazingelosi nahulumeni nazinto ezikhona manje nazinto ezizayo namandla nakuphakama nakujula nanoma iyiphi enye indalo ngeke kukwazi ukusihlukanisa nothando lukaNkulunkulu olukuKristu Jesu iNkosi yethu.”

16. Kungani umethemba ngenhliziyo yakho yonke uJehova?

¹⁶ Asinaso isizathu sokungamethembi uJehova, uNkulunkulu weqiniso. UnguMdali wethu. Usithanda ngokujulile. Isixuku esikhulu sanda ngokushesha, njengoba abantu abavela kuzo zonke izizwe bezokhulekela uJehova. (Isaya 60:22; Zak. 8:23) Siyazi ukuthi uhlale eyifeza injongo yakhe nokuthi maduzane uzothatha isinyathelo sokuqeda amanga kaSathane nokukhohlisa kwakhe. Nathi njengoDavide, sithandaza sithi: “Makadunyiswe uJehova uNkulunkulu, . . . okunguye yedwa owenza izinto ezimangalisayo. Malidunyiswe kuze kube phakade igama lakhe elikhazimulayo, kwangathi umhlaba wonke ungagcwala inkazimulo yakhe.”—IHu. 72:​18, 19.