Indlela UJehova Asisiza Ngayo Ukuba Sikhuthazele

1. Kungani kudingeka sikhuthazele, futhi ubani ongasisiza ukuba sikhuthazele? (1 Petru 5:10)

KULEZI zinsuku zokugcina ezinzima, abantu bakaJehova kudingeka bakhuthazele. Abanye bahlushwa yizifo ezingamahlala-khona. Abanye bakhuthazelela ubuhlungu bokushonelwa umuntu abamthandayo. Kanti abanye bashushiswa amalungu omndeni noma izikhulu zikahulumeni. (Math. 10:​18, 36, 37) Qiniseka ukuthi uJehova angakusiza ukhuthazelele noma yibuphi ubunzima obhekene nabo.—Funda eyoku-1 Petru 5:10.

2. NjengamaKristu, yini esenza sikwazi ukukhuthazela?

² Ukukhuthazela kusho ukuphikelela nokuhlale sinethemba lapho sibhekene nobunzima, ushushiso, uvivinyo noma izilingo. NjengamaKristu sikwazi ukukhuthazela ngenxa yamandla avela kuJehova, lowo ongasinika “amandla angaphezu kwavamile,” asikhuthazeli ngamandla ethu. (2 Kor. 4:7) Kulesi sihloko sizoxoxa ngamalungiselelo amane uJehova asinikeze wona ukuze asisize sikhuthazele. Sizobona nokuthi yini esingayenza ukuze sizuze elungiselelweni ngalinye.

UMTHANDAZO

3. Kungani singathi umthandazo uyindlela emangalisayo yokuxhumana noJehova?

³ UJehova wenze ilungiselelo elimangalisayo elingasisiza sikhuthazele. Usenze sakwazi ukukhuluma naye nakuba sinesono. (Heb. 4:16) Cabanga ngalokhu: Singathandaza kuJehova noma nini futhi singakhuluma naye nganoma ngani. Angasizwa noma ngabe sithandaza ngaluphi ulimi noma ngabe sikuphi, ngisho noma sisodwa sihlukanisiwe nabanye abantu noma siboshiwe. (Jona 2:​1, 2; IzE. 16:​25, 26) Uma sicindezeleke kakhulu size siphelelwe amazwi okumchazela indlela esizizwa ngayo, nalapho futhi uJehova uyakuqonda lokho esisuke sifuna ukukusho. (Roma 8:​26, 27) Ngempela, umthandazo uyindlela emangalisayo yokuxhumana noJehova!

4. Kungani singathi ukuthandaza kuJehova simcele ukuba asisize sikhuthazele kuvumelana nentando yakhe?

⁴ EZwini lakhe, uJehova usiqinisekisa ngokuthi “noma yini esiyicelayo evumelana nentando yakhe, uyasizwa.” (1 Joh. 5:14) Singakwazi yini ukucela uJehova ukuba asisize sikhuthazele? Yebo! Ukwenza kanjalo kuvumelana nentando yakhe. Kungani sisho kanjalo? Lapho sikhuthazelela uvivinyo senza uJehova akwazi ukuphendula lowo omklolodelayo, uSathane uDeveli. (IzAga 27:11) Ngaphandle kwalokho, iBhayibheli lithi uJehova uyakulangazelela ‘ukubonisa amandla akhe ngenxa yalabo abanhliziyo yabo iphelele kuye.’ (2 IziKr. 16:9) Ngakho singaqiniseka ukuthi uJehova unamandla nesifiso sokusisiza ukuba sikhuthazele.—Isaya 30:18; 41:10; Luka 11:13.

5. Umthandazo ungasinika kanjani ukuthula kwengqondo? (Isaya 26:3)

⁵ IBhayibheli lithi lapho sithandaza ngokusuka enhliziyweni sitshele uJehova lokho okusikhathazayo, “ukuthula kukaNkulunkulu okudlula konke ukuqonda kuyoqapha izinhliziyo [zethu] nemicabango [yethu].” (Fil. 4:7) Cabanga ngokuthi kusho ukuthini lokho. Abantu abangamkhonzi uJehova babhekana nobunzima futhi bangase bazame izindlela ezihlukahlukene ukuze babe nokuthula kwengqondo. Ngokwesibonelo, abanye basebenzisa uhlobo oluthile lokuzindla ukuze basuse yonke imicabango esengqondweni yabo, kuhlanganise naleyo ebakhathazayo. Ukususa yonke imicabango esengqondweni kuyingozi ngokomoya. (Qhathanisa noMathewu 12:​43-45.) Ngaphandle kwalokho, ukuthula uJehova asinika kona lapho sithandaza kungcono kakhulu kunanoma yiluphi uhlobo lokuthula umuntu angase akuthole lapho ezindla ngale ndlela. Lapho sithandaza kuJehova sibonisa ukuthi sincike kuye ngokuphelele futhi usinika “ukuthula okuhlala njalo.” (Funda u-Isaya 26:3.) Enye indlela uJehova akwenza ngayo lokho ukusisiza sikhumbule amaqiniso aqinisayo esiwafunde eZwini lakhe. Lawo maqiniso enza ingqondo yethu nenhliziyo yethu kuzole ngoba siyazi ukuthi uJehova uyasikhathalela futhi ufuna siphumelele.—IHu. 62:​1, 2.

6. Ungalisebenzisa kanjani ngokugcwele ilungiselelo lomthandazo? (Bheka nesithombe.)

⁶ Ongakwenza. Njengoba ukhuthazelela ukuvivinywa kokholo lwakho, “phonsa umthwalo wakho kuJehova,” uthandazele ukuthula. (IHu. 55:22) Thandazela nokuba akunike ukuhlakanipha okudingayo ukuze ukwazi ukubhekana nenselele obhekene nayo. (IzAga 2:​10, 11) Njengoba umcela ukuba akusize ukhuthazele, ungakhohlwa nokwenza imithandazo yokubonga. (Fil. 4:6) Cabanga ngezindlela uJehova akubonisa ngazo ukuthi uyakusiza njengoba ubhekene novivinyo, umbonge nangokuthi uyakusekela. Ungavumeli uvivinyo obhekene nalo lukwenze ungaziboni izibusiso osuzitholile kakade.—IHu. 16:​5, 6.

IZWI LIKANKULUNKULU

7. Ukutadisha iBhayibheli kungasisiza kanjani ukuba sikhuthazele?

⁷ UJehova usinike iZwi lakhe ukuze lisisize sikhuthazele. IBhayibheli linamavesi amaningi asiqinisekisa ngokuthi uJehova uyasisekela. Cabanga nje ngesibonelo esisodwa. UMathewu 6:8 uthi: “UYihlo uyakwazi enikudingayo ngisho ningakakuceli kuye.” UJesu owasho lawo mazwi futhi wazi uJehova ukwedlula noma yimuphi omunye umuntu. Ngakho, asinaso isizathu sokungabaza ukuthi lapho sibhekene nobunzima uJehova uyazi ukuthi yini esiyidingayo futhi uzosisiza. IBhayibheli linamazwi amaningi afana nalawa angasenza sizimisele nakakhulu ukuba sikhuthazele.—IHu. 94:19.

8. (a) Nikeza isibonelo sesimiso seBhayibheli esingasisiza ukuba sikhuthazele. (b) Yini engasisiza ukuba sikhumbule izimiso zeBhayibheli lapho sizidinga?

⁸ Izimiso zeBhayibheli zingasisiza ukuba sikhuthazele. Phela zinokuhlakanipha okuwusizo okungasisiza senze izinqumo ezihlakaniphile. (IzAga 2:​6, 7) Ngokwesibonelo, iBhayibheli lisikhuthaza ukuba sigxile osukwini ngalunye, kunokuba sizikhathaze ngokungenasidingo ngokuthi yini engase yenzeke noma engase ingenzeki ngosuku olulandelayo. (Math. 6:34) Uma sizijwayeze ukufunda imiBhalo nokuzindla ngayo, cishe siyozikhumbula izimiso esizidingayo lapho sidinga ukuzisebenzisa.

9. Izindaba eziseBhayibhelini zisenza kanjani siqiniseke nakakhulu ukuthi uJehova uzosisiza?

⁹ EBhayibhelini sifunda nangezindaba ezingokoqobo zabantu abafana nathi abathembela kuJehova futhi baluthola usizo lwakhe. (Heb. 11:​32-34; Jak. 5:17) Lapho sizindla ngalezo zindaba, siqiniseka nakakhulu ukuthi uJehova “uyisiphephelo namandla ethu, usizo olutholakala ngokushesha ngezikhathi zokucindezeleka.” (IHu. 46:1) Njengoba sicabanga ngokwethembeka kwezinceku zikaJehova zangesikhathi esidlule, siyakhuthazeka ukuba silingise ukholo lwazo nokukhuthazela kwazo.—Jak. 5:​10, 11.

10. Ungalisebenzisa kanjani ngokugcwele ilungiselelo eliyiZwi likaNkulunkulu?

¹⁰ Ongakwenza. Funda iBhayibheli nsuku zonke, ugcine nohlu lwamavesi owathola ewusizo. Abaningi bathole ukuthi ukuqala usuku ngokufunda umBhalo wosuku kubenza babe nento ekhuthazayo evela eBhayibhelini abazocabanga ngayo usuku lonke. Udade okuthiwa uMariea wakubona ukuba yiqiniso kwalokho ngesikhathi bobabili abazali bakhe benesifo sekhensa. Yini eyamsiza ukuba akhuthazele njengoba ayebanakekela ngezinyanga zabo zokugcina? Uthi, “Njalo ekuseni ngangifunda umBhalo wosuku encwajaneni ethi Ukuhlola ImiBhalo Nsuku Zonke bese ngizindla ngawo. Lokho kwangisiza ukuba nsuku zonke ngicabange ngoJehova nangezinto ezimangalisayo esizifunda eBhayibhelini, kunokuba ngicabange ngami nangesimo esicindezelayo engangibhekene naso.”—IHu. 61:2.

ESIKHOLWA NABO

11. Kungani kukhuthaza ukwazi ukuthi asisodwa njengoba sikhuthazelela uvivinyo?

¹¹ UJehova usinike abafowethu nodadewethu abangamaKristu emhlabeni wonke ukuze basisize sikhuthazele. Ukwazi nje ukuthi “izinhlupheko ezifanayo zehlela yonke inhlangano yabazalwane [bethu] emhlabeni” kusiqinisekisa ngokuthi asisodwa. (1 Pet. 5:9) Ngempela singaqiniseka ngokuthi noma yisiphi isimo esibhekana naso nabanye baye babhekana nesimo esifanayo futhi bakwazi ukusikhuthazelela. Lokho kusho ukuthi nathi singakwazi ukukhuthazela!—IzE. 14:22.

12. Bangasisiza kanjani esikholwa nabo, futhi yini esingabenzela yona? (2 Korinte 1:​3, 4)

¹² Njengoba sikhuthazela, esikholwa nabo bangasikhuthaza. Umphostoli uPawulu wakubona ukuba yiqiniso kwalokho. Wayevame ukubabonga labo ababemsiza ngesikhathi eboshwe endlini, ebabiza ngamagama. Bamduduza uPawulu, bamkhuthaza futhi bamsiza ngokoqobo. (Fil. 2:​25, 29, 30; Kol. 4:​10, 11) Kungenzeka okufanayo nakithi namuhla. Lapho sidinga usizo ukuze sikhuthazele, abafowethu nodadewethu bahlale bekulungele ukusisiza; lapho bedinga usizo nathi sihlale sikulungele ukubasiza.—Funda eyesi-2 Korinte 1:​3, 4.

13. Yini eyasiza udade okuthiwa uMaya ukuba akhuthazele?

¹³ Abafowethu nodadewethu babe yisikhuthazo esikhulu kudade waseRussia okuthiwa uMaya. Ngo-2020 amaphoyisa asesha umuzi wakhe, kamuva waquliswa icala lokuxoxela abanye ngokholo lwakhe enkantolo. UMaya uthi, “Ngesikhathi ngikhandlekile ngokomzwelo, abafowethu nodadewethu babengifonela, bengibhalela imiyalezo nezincwadi, bengiqinisekisa ngokuthi bayangithanda. Bengilokhu ngazi ukuthi nginomndeni omkhulu ongithandayo. Kodwa kusukela ngo-2020 sengiqiniseka nakakhulu ngalokho.”

14. Yini esingayenza ukuze sizuze ekusekelweni esikholwa nabo njengoba sikhuthazela? (Bheka nesithombe.)

¹⁴ Ongakwenza. Njengoba ukhuthazela, hlale useduze nabafowenu nodadewenu abangamaKristu. Unganqikazi ukucela usizo kubadala. Bangaba ‘njengompheme wokucashela umoya, isiphephelo sokucashela isiphepho esinemvula.’ (Isaya 32:​2, mbhw.) Khumbula nokuthi namanye amaKristu akhuthazelela ubunzima. Ukwenzela umuntu odinga usizo isenzo esibonisa umusa kuyokusiza ukuba uhlale ujabule futhi unombono olinganiselayo njengoba ukhuthazelela uvivinyo obhekene nalo.—IzE. 20:35.

ITHEMBA ESINALO NGEKUSASA

15. Ithemba ngekusasa libasize kanjani abathembekile, okuhlanganisa noJesu? (Hebheru 12:2)

¹⁵ UJehova usinike ithemba eliqinisekisiwe ukuze asisize sikhuthazele. (Roma 15:13) Khumbula indlela ithemba uJesu ayenalo elamsiza ngayo wakwazi ukukhuthazelela usuku olunzima kunazo zonke ngesikhathi esemhlabeni. (Funda eyamaHebheru 12:2.) UJesu wayazi ukuthi ukuthembeka kwakhe kwakuyoba nesandla ekulweleni igama likaJehova. Wayekulangazelela ukuphinde abe noBaba wakhe futhi ngokuhamba kwesikhathi akhonze nabafowabo eMbusweni wasezulwini. Ngendlela efanayo, ithemba esinalo lokuphila phakade ezweni elisha likaNkulunkulu lisisiza ukuba sikhuthazelele noma yibuphi ubunzima obubangelwa yizwe likaSathane.

16. Ithemba lamsiza kanjani omunye udade ukuba akhuthazele, futhi ufundani kulokho akusho?

¹⁶ Cabanga ngendlela ithemba loMbuso elamsiza ngayo udade waseRussia okuthiwa u-Alla, owayenomyeni owayeboshiwe evalelwe esitokisini. Lapho lokho kwenzeka, u-Alla wathi: “Ukuthandaza ngethemba lesikhathi esizayo nokuzindla ngalo kungisiza ukuba ngingadikibali kakhulu. Ngiyaqonda ukuthi ubunzima engibhekene nabo buzophela. UJehova uzonqoba futhi nathi sizonqoba.”

17. Singabonisa kanjani ukuthi siyabonga ngethemba esinalo elisekelwe eBhayibhelini? (Bheka nesithombe.)

¹⁷ Ongakwenza. Zinike isikhathi sokucabanga ngekusasa elimangalisayo uJehova asithembise lona. Zibone ngeso lengqondo usezweni elisha likaNkulunkulu, ubone nezibusiso esiyozijabulela. Noma ngabe yiluphi uvivinyo esingase sibhekane nalo manje, luyobonakala “lungolomzuzwana futhi lulula.” (2 Kor. 4:17) Yenza konke ongakwenza ukuze uxoxele abanye ngokholo lwakho. Cabanga ukuthi kumele ukuba kunzima kangakanani ngabo ukubhekana nobunzima baleli zwe likaSathane bebe bengayazi injongo kaNkulunkulu ngekusasa. Ngisho noma uba nengxoxo emfushane nabo, ungabenza bafise ukwazi okwengeziwe ngethemba lethu loMbuso.

18. Kungani singazethemba izithembiso zikaJehova?

¹⁸ Ngemva kokukhuthazelela uvivinyo oluhlukahlukene, uJobe wathi kuJehova: “Sengiyazi ukuthi uyakwazi ukwenza zonke izinto, nokuthi akukho lutho olucabangayo ongeke ukwazi ukulwenza.” (Jobe 42:2) Njengoba nje uJobe afunda, ayikho into engavimba uJehova ukuba afeze injongo yakhe. Lelo qiniso lingasiqinisa njengoba sikhuthazela. Ngokwesibonelo, cabanga ngowesifazane ogulayo odikibele ngenxa yokuthi odokotela abaningi bahlulekile ukumelapha. Kodwa lapho udokotela onesipiliyoni nothenjwayo ethola ukuthi ikuphi inkinga yakhe futhi emchazela ukuthi uzomelapha kanjani, lona wesifazane uyajabula nakuba kusazothatha isikhathi ukuba elapheke. Manje sekulula ukuba akhuthazele ngoba usenethemba—ithemba lokuthi uzoba ngcono. Ngendlela efanayo, ukuqiniseka esinakho ngethemba lePharadesi elizayo kusisiza ukuba sikhuthazele.

19. Yini esiyidingayo ukuze sikwazi ukukhuthazela?

¹⁹ Njengoba sibonile, uJehova usisiza ukuba sikhuthazelele uvivinyo esibhekene nalo ngosizo lomthandazo, iZwi lakhe, esikholwa nabo nethemba esinalo. Uma siwasebenzisa ngokugcwele la malungiselelo, uJehova uzosisiza kubo bonke ubunzima esingase sibhekene nabo, kuze kube yilapho sezingasekho izinhlupheko ezibangelwa yizwe likaSathane.—Fil. 4:13.