Funda ‘KuNkulunkulu Wenduduzo Yonke’

1. Kungani kufanele siduduze abanye?

SONKE sibhekene nosizi “ngenxa yezilingo ezihlukahlukene,” ngakho ngezinye izikhathi siyayidinga induduzo nesikhuthazo. (1 Pet. 1:6) Njengoba nje nathi sikujabulela ukududuzwa abanye, kufanele sisheshe ukududuza labo ababhekene nosizi. (Math. 7:12) UJehova, “uNkulunkulu wenduduzo yonke,” uyasibonisa ukuthi ‘singabaduduza kanjani abanye ababhekene nanoma yiluphi uhlobo lwesilingo.’ Singalingisa isibonelo sakhe ngokuthi ‘siduduzane.’ (2 Kor. 1:​3, 4; 1 Thes. 4:18) Lokho asikwenzi ngoba nakhu kumele sikwenze, kodwa sikwenza ngoba sithanda abafowethu nodadewethu. Kulesi sihloko, sizoxoxa ngokuthi (1) kusho ukuthini ukududuza abanye njengoba kuchazwe eBhayibhelini, (2) singabaduduza kanjani abanye, nangokuthi (3) yini esingayenza lapho sidinga induduzo.

UKUDUDUZA ABANYE NJENGOBA KUCHAZWE EBHAYIBHELINI

2. EBhayibhelini igama elithi “duduza” lingaba naziphi izincazelo ezihlukahlukene?

² EBhayibhelini, igama lesiGreki elithi “duduza” lingasho izinto eziningi kuye ngomongo wendaba. Lingasho “ukukhuthaza” noma “ukuncenga.” (Roma 12:8.) Ngokwezwi nezwi, leli gama lisho “ukubizela umuntu eceleni.” Ngakho singambona ngeso lengqondo umngani ephuthuma eya kumngani wakhe ozwa ubuhlungu, ukuze amsize nganoma yiluphi uhlobo losizo aludingayo. Kungakhathaliseki ukuthi lowo mngani umnika luphi usizo, induduzo yangempela iba nomphumela ofanayo—lowo ozwa ubuhlungu uyakhuthazeka athole namandla.

3. UBarnaba wasibekela kanjani isibonelo esihle endabeni yokududuza abanye? (Bheka nesithombe.)

³ Cabanga ngesibonelo esiseBhayibhelini. UmKristu okuthiwa uJosefa wayenekhono elihle kakhulu lokukhuthaza nokududuza abanye, kangangokuba abaphostoli bambiza ngokuthi uBarnaba, okusho ukuthi “iNdodana Yenduduzo.” (IzE. 4:36) Lelo gama lalimfanela kakhulu kangangokuba iBhayibheli alizange liphinde limbize ngegama lakhe ayeqanjwe ngalo. Izikhathi eziningi uBarnaba wakwenza lokho okwakushiwo yigama lakhe ngokusiza labo ayekholwa nabo lapho bedinga usizo. Ngokwesibonelo, lapho umfundi uSawulu owayesanda kuguquka efika eJerusalema, wayefuna ukuhlangana nabafundi. Kodwa, amaKristu ayemesaba ngenxa yedumela lakhe lokushushisa abafowabo nodadewabo. Kodwa, uBarnaba wayemethemba uSawulu futhi wamethula kubaphostoli.—IzE. 9:​26-28.

SINGABADUDUZA KANJANI ABANYE?

4. Iyiphi enye indlela engcono kakhulu yokududuza abanye? (Roma 1:​11, 12)

⁴ Bavakashele uma kungenzeka. UJehova usebenzisa izinceku zakhe ukuze ziduduze abanye. Ngokwesibonelo, ngesikhathi umprofethi u-Eliya ecindezelekile, uJehova wasebenzisa ingelosi ukuba imkhuthaze. (1 AmaKh. 19:​4-7) Umphostoli uPawulu naye wakubona ukubaluleka kokuvakashela abafowabo ngokoqobo ukuze abakhuthaze. (Funda eyabaseRoma 1:​11, 12.) Lapho uvakashele othile ukuze umduduze, chitha isikhathi naye kunokuba uxoxe naye isikhashana. (1 Kor. 16:7) Kodwa uma ungeke ukwazi ukuvakashela umuntu odinga induduzo, usengakwazi ukumfonela, ukumbhalela incwadi, ikhadi noma imeseji ukuze umqinise. Uzomvumela yini uJehova akusebenzise ukuze ududuze abanye?

5. Yiziphi izinselele esingalindela ukubhekana nazo?

⁵ Njengoba izinsuku zokugcina ziba bucayi nakakhulu, singalindela ukubhekana nezinselele eziningana lapho sizama ukududuza abafowethu nodadewethu ngokoqobo. Ngesikhathi uPawulu eboshiwe eRoma, u-Onesiforu owayengowase-Efesu wamcinga nakuba lokho kwakumbeka engozini yokuboshwa, noma ngisho eyokubulawa. (2 Thim. 1:​16-18) ERussia, oFakazi babonise umoya ofanayo lapho abafowethu nodadewethu beshushiswa ngenxa yokholo lwabo. Lapho kuqulwa amacala oFakazi, abafowabo nodadewabo baba khona enkantolo ukuze babasekele, ngisho noma ukwenza kanjalo kungabeka inkululeko yabo engozini. Kungani ungazilungiseleli ukulingisa isibonelo sabo sokubonisa isibindi ngokutadisha indlela abantu bakaNkulunkulu basendulo nabangosuku lwethu abasekelane ngayo futhi bajabula ngisho noma beshushiswa?

6. Singamlingisa kanjani uJehova njengoba siduduza abanye? (Bheka nesithombe.)

⁶ Balalele. Ngesikhathi umprofethi u-Eliya enomuzwa wokuthi ukuphila kwakhe kwakusengozini, wathululela isifuba sakhe kuJehova. UNkulunkulu wethu onothando wamlalela u-Eliya njengoba ayemtshela izinto ezazimkhathaza, ngisho noma ayazi kakade ukuthi yini eyayimkhathaza. UJehova wamlalela ngesineke u-Eliya ngisho nalapho ayephindaphinda izinto ezifanayo! (1 AmaKh. 19:​9, 10, 14) UJehova wamvumela nomprofethi uHabakuki ukuba asho izinto ezazimkhathaza nayengaqiniseki ngazo, ezisho ngendlela eyayingase ibonakale sengathi akalihloniphi igunya likaNkulunkulu. (Hab. 1:​2, 3) Nanamuhla, uJehova uyayilalelisisa imithandazo yethu, ngisho noma azi kakade ukuthi yini esiyidingayo. Singalingisa uJehova ngokubalalelisisa nangokubabonisa inhlonipho abafowethu nodadewethu lapho bekhuluma. ‘Shesha ukubalalela’ njengoba bekhuluma, ugweme ukubangena emlonyeni noma ukubacasukela, ngisho noma kubonakala sengathi bakhuluma ngokhahlo noma baphindaphinda into eyodwa.—Jak. 1:19; UmSh. 7:9.

7. Singathola kanjani ukuthi yini umuntu ocindezelekile ayidingayo?

⁷ Thola ukuthi yini umuntu ayidingayo. Asikwazi ukufunda izinhliziyo njengoba kwenza uJehova, ngakho ukuphela kwendlela esingathola ngayo ukuthi umuntu udinga simduduze kanjani ukuba simlalelisise. Ungazitsheli ukuthi uyazi ukuthi yini umuntu ayidingayo ngenxa yokuthi wena uyazi ukuthi yini obuyoyidinga ukube ubusesimweni esifana nesakhe. Asifani singabantu. Ngakho zinike isikhathi, ulalelisise, ubuze imibuzo ezosiza umuntu aveze indlela azizwa ngayo.—IzAga 20:5.

8. UJesu wabaduduza kanjani oMarta noMariya ngemva kokushona kukaLazaru? (Bheka nezithombe.)

⁸ Cabanga ngendlela uJesu aduduza ngayo uMarta noMariya ngemva kokushona komfowabo uLazaru. Bobabili laba besifazane bashonelwa umuntu ofanayo; kodwa, uJesu wabaduduza ngezindlela ezingafani. Ngemva kokukhuluma noMarta, uJesu wamxoxela amaqiniso athile ngovuko, wamsiza ukuba aqinise ukholo lwakhe kulelo lungiselelo lothando. Kodwa lapho uMariya efika kuye ekhala, kubonakala sengathi uJesu akashongo lutho kuye ngovuko. Kunalokho, wakhala kanye noMariya, wabe esebuza ukuthi babembekephi uLazaru. (Joh. 11:​20-35) Yini esiyifundayo? Lapho siduduza abantu abezwa ubuhlungu, kumele siqonde ukuthi yini abayidingayo kunokuba sizame ukubaduduza ngendlela efanayo bonke.

9. Singalisebenzisa kanjani iBhayibheli ukuze siduduze abanye? (Roma 15:​4, 5)

⁹ Sebenzisa iBhayibheli. Lapho ududuza umuntu “ngenduduzo evela emiBhalweni,” ungasiza lowo muntu abe nethemba. (Funda eyabaseRoma 15:​4, 5.) Lelo themba, limenza aduduzeke nakakhulu futhi akhuthazeke. (Isaya 40:31) Ungalithola kanjani ivesi leBhayibheli ongakhuthaza ngalo umuntu? Abanye bagcina uhlu lwamavesi abangawasebenzisa lapho bewadinga, njengalawo angaphansi kwesihloko esithi “INduduzo,” esisencwadini ethi ImiBhalo Ewusizo Ekuphileni KwamaKristu. Cela uJehova akusize usebenzise iZwi lakhe ngendlela ekahle newusizo ukuze ukwazi ukududuza abanye. Umoya wakhe ungakusiza ukhumbule imiBhalo efanelekayo lapho uyidinga.—Joh. 14:26.

10. Kungani kumele sikhulume ngendlela enomusa lapho sizama ukukhuthaza othile?

¹⁰ Khuluma ngendlela enomusa. Igama lesiGreki elisetshenziswe egameni elithi “duduza” lingahunyushwa nangokuthi “khuthaza” noma “ncenga.” Ngezinye izikhathi kungase kudingeke umkhuthaze noma umncenge umuntu omduduzayo ukuze ashintshe indlela acabanga ngayo. Uma kuze kudingeke wenze kanjalo, cabangisisa ngaphambi kokuba ukhulume ukuze amazwi akho amelaphe lowo muntu kunokuba amlimaze. (IzAga 12:18) UJehova wasibekela isibonelo esihle kakhulu ngesikhathi ekhuluma no-Eliya, owayenombono oyiphutha ngokubaluleka komsebenzi wakhe nangokuthi bangakanani abantu ababeyizihlubuki kwa-Israyeli. Ngomusa uJehova wasiza u-Eliya ukuba alungise indlela acabanga ngayo ngaphandle kokumtshela ukuthi lokho ayekusho kwakuyiphutha. (1 AmaKh. 19:​15-18) Nawe ungakwazi ukwenza okufanayo uma unomusa futhi ucabangisisa ngalokho ozokusho. Lapho unikeza izinkulumo noma uphendula emihlanganweni yobuKristu, hlale ukhuluma ngendlela enomusa neyakhayo njengoba uzama ukukhuthaza nokuqinisa abafowenu nodadewenu.

11. Ngokuvamile yini abayidingayo labo abacindezelekile? (1 Johane 3:18)

¹¹ Basize ngokoqobo abanye. Ngokuvamile labo abacindezelekile badinga okungaphezu kwamazwi enduduzo. (Funda eyoku-1 Johane 3:18.) UBarnaba wasibekela isibonelo esihle ngesikhathi edayisa isiqephu sendawo, wabe esenikela ngemali ayeyithole lapho ukuze asize abafowabo nodadewabo ababesanda kubhapathizwa ababedinga usizo. (IzE. 4:​36, 37) Namuhla, amaKristu esikholwa nawo amaningi alingisa isibonelo sakhe esihle ngokubasiza ngokoqobo labo abadinga usizo. UGabriela wasePoland, wayekhungathekile ngesikhathi izikhukhula zicekela phansi umuzi wakhe. Uthi: “Ngangithuke ngempela futhi ngangikhathazekile, ngokunjalo nangabazali bami ababehlala nami. Ngangizibuza ukuthi ngangiyobhekana kanjani nalesiya simo. Kodwa, abafowethu basemabandleni angomakhelwane beza bazolungisa umuzi wethu ngosuku olulodwa, nokwakuwumsebenzi omkhulu. Lokho okwenzeka kwangenza ngaqiniseka nakakhulu ukuthi uJehova uqondisa abantu bakhe ukuba baduduze labo abasosizini.”

12. Ungawasiza kanjani amaKristu okanye nawo lapho ukhuthazelela uvivinyo?

¹² Khuthazelela uvivinyo obhekene nalo. UPawulu watshela abaseThesalonika ukuthi waduduzeka futhi wathola amandla lapho ezwa ngokukhuthazela kwabo ngokwethembeka. Wayazi ukuthi lokho akwenza ukuze abasize kwaba wusizo kubo. (1 Thes. 3:​5-8) UPawulu, naye wayenethemba lokuthi wayezobaduduza abafowabo ngokukhuthazelela uvivinyo ayebhekene nalo—ngisho nalabo ababengakaze bahlangane naye. (Kol. 2:​1, 2) Ngendlela efanayo, lapho amaKristu esikanye nawo ebona indlela uJehova asisekela ngayo lapho sibhekene novivinyo, nawo ayakhuthazeka kakhulu.

13. Yini okumele siqhubeke siyenza njengoba sikhuthaza abanye?

¹³ Yiba nesineke. Abafowethu nodadewethu abadikibele bangase bangayamukeli ngokushesha imizamo yethu yokubaduduza. Kodwa imiBhalo isiyala ukuba ‘siqhubeke sikhuthazana.’ Inkulumo ethi ‘siqhubeke sikhuthazana’ ichaza isenzo esiqhubekayo. (1 Thes. 5:11) Yiba nesineke njengoba uqhubeka ududuza labo abadinga ukusekelwa. (1 Thes. 5:14) Yiqiniso ukuthi ngezinye izikhathi ngamunye wethu uyoyidinga induduzo. Yini esingayenza lapho kufika izikhathi ezinjalo?

LAPHO UDINGA INDUDUZO

14-15. Yini okufanele siyenze lapho sibhekene nezikhathi zokucindezeleka noma sikhungethwe yizinkathazo?

¹⁴ Thandaza kuJehova. Mcele akududuze lapho ubhekene nezikhathi zokucindezeleka noma ukhungethwe yizinkathazo. (IHu. 94:19) Lapho uthandaza umthululela isifuba sakho, mtshele ngokuqondile indlela ozizwa ngayo. (IHu. 62:8) Yiqiniso ukuthi uJehova usuke eyazi kakade indlela ozizwa ngayo ngisho nangaphambi kokuba uthandaze. Kodwa, ukumtshela imicabango yakho ejulile emthandazweni wakho osuka enhliziyweni kubonisa ukuthi unokholo kuye. UJehova akalokothi angawuphenduli umthandazo womuntu onokholo kuye, ngisho noma engase awuphendule ngendlela lowo muntu angayilindele. (Marku 11:24) EyabaseFilipi 4:​6, 7 iyasinxusa: “Izicelo zenu zitsheleni uNkulunkulu . . . ukuthula kukaNkulunkulu okudlula konke ukuqonda kuyoqapha izinhliziyo zenu nemicabango yenu.”

¹⁵ Cela usizo kwabanye. Tshela umngani ovuthiwe indlela ozizwa ngayo, noma uthululele isifuba sakho kumdala omethembayo. Abafowenu nodadewenu bangaba umthombo wenduduzo, kodwa bangase bangazi ukuthi uzizwa kanjani noma ukuthi yini oyidingayo ngaphandle kwalapho ubatshela. (IzAga 14:10) Ungabacela bakulalele futhi bakubonise umusa njengoba ubachazela indlela ozizwa ngayo, noma ubacele bakutshele umBhalo noma isihloko esibaduduzile.

16. Yini engase yenzeke lapho abanye bezama ukukukhuthaza, kodwa yini okufanele uyikhumbule?

¹⁶ Yiba nesineke futhi uthethelele. Abafowenu nodadewenu bangase benze amaphutha njengoba bezama ukukukhuthaza. Ngokwesibonelo, bangase benze noma basho into ekwenza uzizwe kabi nakakhulu, engakwenzi uzizwe ungcono. Uma lokho kwenzeka, babekezelele. (1 Kor. 13:​4, 7) Khumbula namazwi akuJakobe 3:​2, athi: “Uma umuntu engakhubeki ngezwi, lowo uyindoda ephelele.” Gxila ezisuseni ezinhle zabafowenu nodadewenu. Khumbula ukuthi “umoya uyafisa, kodwa inyama ibuthakathaka.”—Math. 26:41.

17. Yini okufanele sizimisele ukuyenza?

¹⁷ Sonke siyayidinga induduzo nesikhuthazo futhi sizokudinga nakakhulu njengoba izinsuku zokugcina ziya ziba bucayi nakakhulu, nanjengoba izitha zikaNkulunkulu zisiphikisa ngonya nakakhulu. Masizimisele ukwenza konke esingakwenza ukuze siduduzane.