Izwe Elingenabo Ubugebengu—Kanjani?
EMHLABENI wonke kulwiswana nobugebengu obuhleliwe. I-U.S.News & World Report yathi: “Kuye kwaba nentuthuko ephawulekayo ekulweni namaQembu Ezigelekeqe esikhathini esifushane, ngokuyinhloko ngenxa yomthetho owodwa, i-Racketeer Influenced and Corrupt Organizations Act, noma i-RICO.” Lomthetho uvumela ukuboshwa kwezinhlangano zobugebengu ngenxa yochungechunge lwezenzo zokuphanga ezifanayo, hhayi nje izenzo ezingahlobene. Lokhu kanye nokwaziswa okutholakala ngezingcingo ezifihliwe nasemalungwini ayizimpimpi afuna ukuboniswa umusa kuye kwaba nengxenye ekuphumeleleni kokulwa namaQembu Ezigelekeqe e-United States.
E-Italy nakhona iziphathimandla zimelene ngokuqinile namaqembu ezigebengu. Ezindaweni ezinjengaseSicily, eSardinia naseCalabria, lapho kudlange khona ubugebengu obuhleliwe, kuye kwakhishwa amabutho empi ukuba agade izakhiwo zomphakathi nezindawo ezibalulekile ukuze kunqandwe ukuhlasela kwezigebengu. Uhulumeni uthi lokhu kunjengempi yombango. Njengoba abaholi abadumile bamaqembu ezigebengu bevalelwe ejele futhi kumangalelwe nowayengungqongqoshe ngenxa yokusebenzelana kwakhe neQembu Lezigelekeqe, kunemiphumela ethembisayo e-Italy.
EJapane uhulumeni wavimbela ama-yakuza lapho ushaya umthetho i-Anti-Organized Crime Law ngo-March 1, 1992. Ngaphansi kwalomthetho, lapho nje inhlangano yezigebengu ibhekwa njengobugebengu obuhleliwe, ivinjelwa ezenzweni ezingu-11 zokuphanga ngobudlova, kuhlanganise nokufuna imali yokuvala umuntu umlomo, ukuhlanganyela emaqenjini okuvikela nasekulamuleni izingxabano ukuze ithole imali. Ngokushaya lomthetho, uhulumeni uhlose ukuvala yonke imithombo yemali yamaqembu ezigebengu. Lomthetho uye wazikhinyabeza izinhlangano zezigebengu. Amanye amaqembu aye ashabalala, kanti umholi othile wezigebengu wazibulala—ngokunokwenzeka ngenxa yokuqina komthetho.
Ngempela, ohulumeni nezinhlangano ezishaya umthetho zilwa ngokuzikhandla nobugebengu obuhleliwe. Noma kunjalo, lapho ibika ngengqungquthela yamajaji nezikhulu zamaphoyisa ezivela kuwo wonke umhlaba eyaqhutshwa ngo-1994, i-Mainichi Daily News yathi: “Ubugebengu obuhleliwe bukhula ngamandla futhi buyaceba cishe kuzo zonke izingxenye zomhlaba, buzuza izindodla zemali engaba ama-dollar ayisigidi sezigidi [amaRandi ayizigidi zezigidi ezingu-4,67] ngonyaka.” Ngokudabukisayo, imizamo yomuntu yokuqeda amaqembu obugebengu emhlabeni ilinganiselwe. Esinye isizathu salokhu siwukuthi ezimweni eziningi abomthetho abasheshi futhi abasithathi isinyathelo esiqondile. Kubantu abaningi, kubonakala sengathi imithetho ivikela isigebengu, hhayi isisulu. IBhayibheli lathi eminyakeni engu-3000 edlule: “Ngenxa yokuba ububi obenziwayo bungahlulelwa masinyane, ngalokho izinhliziyo zamadodana abantu phakathi kwawo zigcwele ukwenza okubi.”—UmShumayeli 8:11.
Ukushiya Izinhlangano Zezigebengu
Ngaphandle kokulwa ngokuqondile nobugebengu obuhleliwe, ohulumeni baye bazama ukusiza labo abangaphakathi ukuba baphume emaqenjini obugebengu. Ukwenza kanjalo akulula. Ngokwesisho sakudala, “okuwukuphela kwendlela yokushiya iQembu Lezigelekeqe ithuna.” Ukuze ilungu lishiye inhlangano yama-yakuza, kudingeka likhokhe izindodla zemali noma linqunywe ucikicane noma ingxenye yawo. Okunezela ekwesabeni okuhilelekile lapho eshiya iqembu lezigebengu, owayeyilungu kufanele abhekane nobunzima bokuphila ukuphila okuqondile. Ngokuvamile izicelo zakhe zomsebenzi ziyachithwa. Nokho, kwamanye amazwe kunezingcingo zosizo zamaphoyisa zokusiza amalungu amaqembu azama ukushiya phansi futhi anobunzima bokuthola imisebenzi emihle.
Ukuze libhekane nokucindezela kweqembu lezigebengu nokubandlululwa umphakathi, ilungu leqembu kudingeka libe nesisusa esinamandla sokuphila ngobuqotho. Lingashukunyiswa yini? Kungaba ukuthanda umkhaya walo, ukufisela ukuphila ngokuthula, noma isifiso sokwenza okulungile. Nokho, isisusa esinamandla kakhulu sibonakala kahle endabeni kaYasuo Kataoka esihlokweni esilandelayo.
UYasuo Kataoka ungomunye wabantu abaningi abaye bakushintsha ngokuphelele ukuphila kwabo. Izimfanelo zobulwane ababenazo ziye zathathelwa indawo ubuntu obusha “obadalwa ngokwentando kaNkulunkulu ngokulunga kweqiniso nokwethembeka.” (Efesu 4:24) Manje, abantu ababenjengezimpisi baphila ngokuthula phakathi kwezakhamuzi ezimnene, ezinjengamawundlu, futhi basiza ngisho nabanye!—Isaya 11:6.
Gqashula Emoyeni Wezwe
Njengoba kushiwo esihlokweni esandulelayo, akukhona nje ukuthi wonke amaqembu ezigebengu angaphansi kwegunya elilodwa elingabonakali likaSathane uDeveli kodwa lonke izwe lingaphansi kwakhe. Abantu abakuqapheli ngisho nokukuqaphela lokhu, kodwa uSathane uye wahlela izwe ukuze lifeze izifiso zakhe zobugebengu. Njengoba amaqembu ezigebengu enikeza ingcebo nesimo somkhaya-mbumbulu, uSathane ufeza indima yombusi onomusa ngokunikeza abantu ingcebo, injabulo nomuzwa wobumbano. Nakuba ungase ungakuqapheli, kungenzeka ukuthi uye wakhohliswa amacebo akhe amabi. (Roma 1:28-32) IBhayibheli lisitshela ukuthi “ubungane nezwe buwubutha noNkulunkulu.” (Jakobe 4:4) Akulondekile ukwakha ubuhlobo nalelizwe, elingaphansi kwethonya likaSathane. UMdali wendawo yonke unebutho lezingelosi ezingaphansi kukaJesu Kristu eselilungele ukubamba uSathane namademoni akhe ukuze lisuse ithonya labo elibi emhlabeni.—IsAmbulo 11:18; 16:14, 16; 20:1-3.
Khona-ke, ungaphuma kanjani ngaphansi kwethonya lezwe likaSathane? Hhayi ngokuphila njengonkom’idla yodwa kodwa ngokugqashula esimweni sengqondo nendlela yokucabanga ebusa izwe namuhla. Ukuze wenze kanjalo, kuyomelwe ulwe namaqhinga kaSathane okukusabisa futhi umelane nezisusa azisebenzisayo ukuze agcine abantu ogibeni lwakhe. (Efesu 6:11, 12) Lokhu kuyohilela ukuzidela, kodwa ungagqashula njengoba kuye kwenza abanye uma uzimisele futhi uma ulwamukela usizo olunikezwa oFakazi BakaJehova.
Yini eyolandela ngemva kwesinyathelo sikaNkulunkulu sokususa ubugebengu kulelizwe elineziyaluyalu? “Inzalo yababi iyachithwa,” kusho iBhayibheli, bese linezela: “Abalungileyo bazakudla ifa lomhlaba, bahlale kuwo njalonjalo.” (IHubo 37:28, 29) Khona-ke, ngeke kusabakhona isizathu sokwesaba labo ababenezimfanelo zobulwane, ngoba bayobe beguqulwe “ukumazi uJehova,” okuyogcwalisa umhlaba.—Isaya 11:9; Hezekeli 34:28.
Namuhla ushintsho olunjalo seluyenzeka kakade, njengoba kubonisa indaba elandelayo yowayeyilungu lama-yakuza eJapane.
[Isithombe ekhasini 10]
Ezweni elisha likaNkulunkulu, bonke bayojabulela umsebenzi wezandla zabo