Ukugqashula Ebugebengwini Obuhleliwe “Ngangiyi-yakuza”

“BABA, lapho ubuyela ekhaya, ngicela siye emihlanganweni ndawonye. Uyangithembisa, akunjalo?” Ngathola lencwadi ivela endodakazini yami yesibili lapho ngisejele okwesithathu. Yayivame ukuya emihlanganweni yoFakazi BakaJehova nomkami. Njengoba izincwadi ezivela emkhayeni wami zaziwukuphela komthombo wenduduzo, ngathembisa ukuthi ngangizokwenza njengokwesicelo sayo.

Ngacabanga: ‘Kungani ngiphila ngobugebengu obungihlukanisa nomkhaya wami?’ Ngakhumbula izinsuku lapho ngangisemncane kakhulu. Ubaba washona lapho nginezinyanga ezingu-18 kuphela ubudala, ngakho angimkhumbuli ngisho nokumkhumbula. Umama washada kabili ngemva kwalokho. Izimo zomkhaya ezinjalo zangithinta ngokujulile, futhi lapho ngifunda esikoleni esiphakeme ngaqala ukujwayelana nezigebengu. Ngaba nobudlova futhi ngangivame ukulwa njalo ngemva kwesikole. Lapho ngenza unyaka wesibili esikoleni esiphakeme, ngagqugquzela iqembu labafundi ukuba liyolwa nelinye iqembu. Ngenxa yalokho, ngaboshwa futhi ngathunyelwa esikhungweni sokuqondisa izigwegwe isikhathi esithile.

Ngangena shí ekuphileni ngobudlova. Ngokushesha, ngakha iqembu lamahlongandlebe, futhi sasivame ukuchitha isikhathi ngasehhovisi leqembu lama-yakuza. Lapho ngineminyaka engu-18 ubudala, ngaba ilungu eliphelele lalelo qembu. Lapho sengineminyaka engu-20, ngaboshelwa izenzo ezihlukahlukene zobudlova futhi ngagwetshwa iminyaka emithathu ejele. Okokuqala, ngadonsa isigwebo eNara Juvenile Prison, kodwa ukuziphatha kwami akubanga ngcono. Ngakho ngathunyelwa kwelinye ijele, labantu abadala. Kodwa ngaba mubi nakakhulu futhi ngagcina ngivalelwe eKyoto ejele lezigebengu ezinenkani.

Ngazibuza: ‘Kungani ngiqhubeka ngenza izenzo ezinjena zobugebengu?’ Lapho ngibheka emuva, ngiyaqaphela ukuthi kwakungenxa yokucabanga kwami kobuwula. Ngaleso sikhathi, ngangicabanga ukuthi ukuziphatha okunjalo kwakuwubuqhawe, buveza ubudoda bami. Lapho ngikhululwa ejele ngineminyaka engu-25 ubudala, amalungu eqembu engangikulo ayengibheka njengomuntu obalulekile. Manje kwase kuvuleke ithuba lokuthola isikhundla eqenjini lezigebengu.

Ukusabela Komkhaya Wami

Ngashada cishe ngaleso sikhathi, futhi ngokushesha mina nomkami saba namadodakazi amabili. Nokho, ukuphila kwami akuzange kushintshe. Ngangehla ngenyuka ngiboshwa ngikhululwa—ngangishaya abantu futhi ngiphanga. Isenzakalo ngasinye sangenza ngahlonishwa amalungu eqembu engangikulo futhi ngathenjwa umholi wethu. Ekugcineni, “umfowethu” omdala oyi-yakuza wakhushulelwa esikhundleni esiphakeme eqenjini futhi waba umholi. Ngajabula ngokuba yisekela.

Ngacabanga: ‘Umkami namadodakazi bazizwa kanjani ngendlela yami yokuphila?’ Kumelwe ukuba kwakubabangela amahloni ukuba nobaba nomyeni oyisigebengu. Ngaphinde ngaboshwa lapho ngineminyaka engu-30 kwabuye kwangiphinda lokho lapho sengineminyaka engu-32. Kulokhu, isigwebo seminyaka emithathu ejele sasinzima kakhulu. Amadodakazi ami ayengavunyelwe ukuba angivakashele. Ngangilangazelela ukuxoxa nawo ngiwasingathe.

Cishe ngesikhathi engaqala ngaso ukudonsa lesi sigwebo sokugcina, umkami waqala ukufunda iBhayibheli noFakazi BakaJehova. Nsuku zonke wayengibhalela ngeqiniso ayelifunda. Ngazibuza: ‘Liyini leli qiniso umkami akhuluma ngalo?’ Ngalifunda lonke iBhayibheli lapho ngisejele. Ngakucabangela lokho umkami ayekusho ezincwadini zakhe ngethemba lesikhathi esizayo nangenjongo kaNkulunkulu.

Ithemba labantu lokuphila phakade ePharadesi emhlabeni lalingikhanga ngoba ngangikwesaba ngempela ukufa. Ngangivame ukucabanga ukuthi, ‘Uma ufa, uyisehluleki.’ Lapho ngibheka emuva, ngiyaqaphela ukuthi kwakuwukwesaba ukufa okwakungishukumisela ukuba ngilimaze abanye ngaphambi kokuba bangilimaze. Izincwadi zomkami zangenza ngabona nobuze bomgomo wami wokuthola isikhundla eqenjini lezigelekeqe.

Noma kunjalo, angizange ngishukumiseleke ukufunda iqiniso. Umkami wazinikezela kuJehova futhi waba ngomunye woFakazi bakhe ababhapathiziwe. Nakuba encwadini yami ngangivumile ukuya emihlanganweni yabo, ngangingacabangi ukuba omunye woFakazi BakaJehova. Ngaba nomuzwa wokuthi umkami namadodakazi ami babeqhelile kimi, bengishiyile.

Ukuphuma Ejele

Ekugcineni lwafika usuku lokuba ngikhululwe. Esangweni laseNagoya Prison, kwakunamalungu amaningi eqembu ayezongihlangabeza. Nokho, kuleso sixuku ngangifuna nje kuphela umkami namadodakazi. Lapho ngibona amadodakazi ami, ayesekhule ngempela phakathi naleso sikhathi esiyiminyaka emithathu nezinyanga eziyisithupha, ngakhala izinyembezi.

Ezinsukwini ezimbili ngemva kokuya ekhaya, ngagcina isithembiso engasenza endodakazini yami yesibili futhi ngaya emhlanganweni woFakazi BakaJehova. Ngabamba ongezansi lapho ngibona injabulo yabo bonke ababekhona. LaboFakazi bangamukela ngemfudumalo, kodwa ngazizwa ngingafaneleki. Lapho kamuva ngithola ukuthi labo ababengibingelele babewazi umlando wami wobugebengu, ngamangala. Nokho, ngayibona imfudumalo yabo futhi inkulumo esekelwe eBhayibhelini eyanikezwa yangikhanga. Yayikhuluma ngokuphila kwabantu phakade ePharadesi emhlabeni.

Umcabango wokusindela komkami namadodakazi ePharadesi kodwa mina ngibhujiswe wawungicindezela kakhulu. Ngazindla ngempela ngalokho okwakuzofanele ngikwenze ukuze ngiphile phakade nomkhaya wami. Ngaqala ukucabanga ngokugqashula ekuphileni njengesigebengu, futhi ngaqala ukutadisha iBhayibheli.

Ukugqashula Ekuphileni Njengesigebengu

Ngayeka ukuya emihlanganweni yeqembu futhi ngayeka ukuzihlanganisa nama-yakuza. Kwakungelula ukushintsha indlela yami yokucabanga. Ngangishayela imoto enkulu yaphesheya ukuze nje ngijabule—kwakuyindlela yokuzuza ukuzethemba. Kwathatha iminyaka emithathu ukuba ngithengise imoto yami ngithole evamile. Futhi nganginokuthambekela kokufuna ikhambi elisheshayo ezintweni. Nokho, njengoba ngangifunda iqiniso, ngabona ukuthi kwakufanele ngishintshe. Kodwa njengoba uJeremiya 17:9 esho, “inhliziyo iyakhohlisa ngaphezu kwakho konke, futhi imbi.” Ngangikwazi okulungile kodwa kwakunzima ukusebenzisa engangikufunda. Izinkinga engangibhekene nazo zazinjengentaba enkulu. Ngakhungatheka, futhi kaningi ngacabanga ukushiya phansi isifundo futhi ngiyeke ukucabanga ngokuba omunye woFakazi BakaJehova.

Khona-ke, owayengiqhubela isifundo seBhayibheli wamema umbonisi ojikelezayo owayenesizinda esinjengesami ukuba azonikeza inkulumo yeningi ebandleni lakithi. Esuka e-Akita, eqhele ngamakhilomitha angu-650, weza eSuzuka ezongikhuthaza. Ngemva kwalokho, noma nini lapho ngikhathala bese ngicabanga ukuyeka, ngangithola incwadi evela kuye, engibuza ukuthi ngangisahamba endleleni yeNkosi yini.

Ngaqhubeka ngithandaza kuJehova ukuba angisize ngigqashule zonke izibopho enganginazo nama-yakuza. Ngangiqiniseka ukuthi uJehova wayezowuphendula umthandazo wami. Ngo-April 1987, ngagcina ngikwazile ukuhoxa enhlanganweni yama-yakuza. Njengoba ibhizinisi lami lalingiyisa phesheya nyanga zonke, kude nomkhaya wami, ngashintsha umsebenzi ngenza umsebenzi wokuhlanza. Lokhu kwakungikhulula ngezikhathi zantambama ukuba ngenze imisebenzi engokomoya. Ngokokuqala ngqá, ngathola imvilophu eneholo. Yayilula, kodwa yangijabulisa kakhulu.

Lapho ngiseyisekela enhlanganweni yama-yakuza, ngangimi kahle ngokwezinto ezibonakalayo, kodwa manje nginengcebo engokomoya engapheli. Ngiyamazi uJehova. Ngiyazazi izinjongo zakhe. Nginezimiso engiphila ngazo. Nginabangane beqiniso abakhathalelayo. Eqenjini lama-yakuza, amalungu ayekhathalela ngokuzenzisa, kodwa akekho ngisho noyedwa oyi-yakuza engimaziyo owayengazidela ngenxa yabanye.

Ngo-August 1988, ngabonakalisa ukuzinikezela kwami kuJehova ngobhapathizo lwamanzi, futhi ngenyanga eyalandela, ngaqala ukuchitha okungenani amahora angu-60 ngenyanga ngitshela abanye izindaba ezinhle ezazishintshe ukuphila kwami. Ngiye ngakhonza njengesikhonzi sesikhathi esigcwele kusukela ngo-March 1989 futhi manje nginikezwe ilungelo lokukhonza njengenceku ekhonzayo ebandleni.

Ngakwazi ukulahla zonke izinsalela zokuphila kwami ngiseyi-yakuza. Nokho, yinye esasele. Umdwebo osemzimbeni wami okhumbuza mina kanye nomkhaya wami nabanye ngomlando wami njenge-yakuza. Ngesinye isikhathi, indodakazi yami endala yafika ekhaya ikhala ivela esikoleni, ithi yayingeke iphinde iye esikoleni ngoba abangane bayo bayitshele ukuthi ngiyi-yakuza futhi nginemidwebo emzimbeni. Ngakwazi ukuxoxa namadodakazi ami ngalendaba, futhi asiqonda isimo. Ngibheke phambili osukwini lapho umhlaba uyoba ipharadesi futhi inyama yami iyoba ‘yintsha kuneyomntwana.’ Khona-ke imidwebo esemzimbeni wami kanye nenkumbulo yeminyaka engu-20 ngiyi-yakuza kuyoba izinto zesikhathi esidlule. (Jobe 33:25; IsAmbulo 21:4)—Njengoba ilandiswa uYasuo Kataoka.

[Isithombe ekhasini 11]

Ngilangazelela usuku lapho imidwebo esemzimbeni wami iyosuswa khona

[Isithombe ekhasini 13]

NgiseHholo LoMbuso nomkhaya wami