Methembe UMbusi Wendawo Yonke

1. Yiziphi izinhlekelele ezehlela uJobe?

UJOBE, indoda yasendulo enokholo, walahlekelwa yizinto eziningi kakhulu: izingane zakhe, ingcebo yakhe futhi wagula kakhulu. Ngaphezu kwalokho, idumela lakhe elihle lamosheka. Amadoda ayethi angabangani bakhe asho izinto eziningi eziqeda amandla. Ngisho nomkakhe amthandayo wayecindezeleke kakhulu kangangokuba waze wamncenga ukuba ‘athuke uNkulunkulu afe.’ (Jobe 2:9; 15:​4, 5; 19:​1-3) Lezi zinhlekelele ezehlela uJobe zazingamenza angabe esamethemba uNkulunkulu weqiniso, zimenze angabaze ukuthi uJehova wayezobavikela labo abamthandayo nabamkhonzayo.

2-3. Yini esingase siqale ukuzibuza yona, futhi yini esizoyifunda encwadini kaJobe?

² Ngezinye izikhathi nathi sibhekana nezimo ezinzima, ezingakuvivinya ngempela ukwethembela kwethu kuJehova. Siphila ‘ezikhathini ezibucayi okunzima ukubhekana nazo.’ (2 Thim. 3:1) Lapho sibhekana novivinyo lulandelana singase sikhungatheke, sibe nomuzwa wokuthi ngeke sikwazi ukulukhuthazelela. Ukubhekana nezimo ezinjengalezo kwenze abanye bazibuza ukuthi uJehova ubakhathalela ngempela yini.

³ Uma wake wazizwa ngaleyo ndlela, ungapheli amandla. UJobe wafunda ukuthi uJehova uyabakhulula labo abaqotho kuye. Nathi singafunda ukumethemba ngokuphelele uBaba wethu osezulwini. Ukuze sifinyelele lowo mgomo, ake sihlole incwadi kaJobe, sibone ukuthi isenza kanjani siqiniseke ngala maphuzu amabili ayinhloko: Elokuqala, uJehova yena yedwa unguMbusi Wendawo Yonke. Elesibili, uNkulunkulu wethu onguMninimandla Onke angakwazi ukulawula izenzakalo zezwe ukuze aqikelele ukuthi injongo yakhe iyafezeka nokuthi unika abantu bakhe lokho abakudingayo ukuze bahlale benobuhlobo obuhle naye.

USATHANE WANGENA KANYE NAWO

4. Ubani owayesemhlanganweni owawusezulwini okukhulunywa ngawo encwadini kaJobe?

⁴ Ngolunye usuku, “amadodana kaNkulunkulu weqiniso” ahlangana phambi kukaJehova ezulwini. Ukulandisa kube sekuthi: “NoSathane wangena kanye nawo.” (Jobe 1:6) Kulapha eBhayibhelini la eqala ukuchazwa khona njengomphikisi kaJehova oyinhloko, “uSathane,” noma “uMphikisi.” Ngalesi sikhathi, uSathane wayengaseyona indodana kaNkulunkulu ethembekile. Wayeseyisitha sikaJehova nesomndeni kaJehova osezulwini nosemhlabeni. UJehova wabonisa ukuthi uSathane wayengaselona ilungu lomndeni waKhe osezulwini lapho esho amazwi akuGenesise 3:15. Ngakho uSathane akaseyona ingxenye ‘yowesifazane’—umndeni kaJehova wezidalwa zomoya—owayezoveza ‘inzalo.’

5. Yini esiyifundayo ngokuhlola lokho okwashiwo emhlanganweni owawusezulwini?

⁵ UJehova wenza ukuba lokho okwashiwo kulowo mhlangano owawusezulwini kubhalwe eBhayibhelini. Amazwi kaSathane akwenza kucace ukuthi ungumnyundeli ononya. (Jobe 1:9; qhathanisa nesAmbulo 12:10.) Ukuthi uJehova wenza ukuba kubhalwe eBhayibhelini lokho okwenzeka ezulwini, kusenza siqiniseke ukuthi usebenzisa igunya lakhe eliphakeme ngendlela engenaphutha, enobulungisa. Kusibonisa nokuthi uMninimandla Onke nguye onqumayo ukuthi yini abanye abangayenza noma abangeke bakwazi ukuyenza.

NGUJEHOVA ONEGUNYA LOKUNQUMA OKUZOKWENZEKA NOKUNGEKE KWENZEKE

6. UJehova wabonisa kanjani ukuthi wayenalo lonke igunya emhlanganweni owawusezulwini? (Jobe 1:​7, 8)

⁶ Funda uJobe 1:​7, 8. NguJehova owayenquma ukuthi yini eyayenzeka kulowo mhlangano. Wabuza uSathane: “Ingabe uyiqaphelile inceku yami uJobe?” Yebo, uJehova wayazi kahle ukuthi uSathane wayemqaphelile uJobe othembekile futhi wayefuna ukumhlasela. Ake sibone ukuthi uJehova wayezowasebenzisa kanjani amandla akhe amakhulu ukuze asize uJobe.

7. NgokukaJobe 1:​10, 11, uSathane wayethi kungani abantu bekhonza uJehova?

⁷ Funda uJobe 1:​10, 11. UJehova unguMbusi wendawo yonke onguMninimandla Onke futhi usebenzisa igunya lakhe namandla akhe ngendlela ayibona ifanele. (Jer. 32:17; Dan. 4:35) Noma kunjalo, uSathane wathi uJehova wawasebenzisa kabi amandla akhe. Empeleni, wayethi uNkulunkulu wenzela abantu izinto ezithile ukuze bamkhonze, njengoJobe. Wayesho nokuthi labo abakhonza uJehova bamkhonza kuphela ngenxa yalokho abangakuthola kuye. Yini uJehova abe eseyenza?

8-9. Yimiphi imingcele ecacile uJehova ayibekela uSathane, futhi kungani? (Jobe 1:12) (Bheka nesithombe.)

⁸ Funda uJobe 1:12. UJehova wanika uDeveli ithuba lokufakazela lokho ayekusho—kodwa wambekela imingcele ethile. UNkulunkulu wamtshela ngokucacile uSathane: “Ungeluleli isandla sakho [kuJobe]!” Phambi kwawo wonke umuntu owayekhona kulowo mhlangano, uJehova wabekela uSathane imingcele okwakungafanele ayeqe lapho ehlasela uJobe. USathane kwakudingeka alalele umyalo kaJehova, wayengenawo amandla okwenza okungale kwalokho uJehova ayemvumele ukuba akwenze. Kusenjalo nanamuhla. Ngakho uJehova wasebenzisa igunya lakhe namandla akhe ukuze avikele uJobe nedumela laKhe.

⁹ Imizamo kaSathane yokuqala yokuhlasela uJobe ayiphumelelanga nhlobo. UJobe waqhubeka ethembekile kuBaba wakhe osezulwini. (Jobe 1:22) Kodwa, uMphikisi wayengakaqedi ukuvivinya uJobe.

10. Kungani uJehova avumela uSathane ukuba aqhubeke avivinye uJobe? (Jobe 2:​2-6)

¹⁰ Funda uJobe 2:​2-6. Kulokhu uSathane wayiqinisa imizamo yakhe yokuyekisa uJobe ukukhonza uJehova. USathane wayethi nakanjani uJobe wayezomthuka uNkulunkulu ukuze asindise ukuphila kwakhe. Ukuze alungise le ndaba, uJehova wamvumela uDeveli ukuba ahlasele leyo ndoda ethembekile. Kodwa uJehova waphinde wabekela uSathane imingcele, wathi: “Ungambulali!” Yayingekho into uSathane ayengayenza ngaphandle kokuhlonipha imingcele ayebekelwe yona. Nalapha futhi, siyabona ukuthi oPhezukonke nguye owayenegunya ngesikhathi uJobe evivinywa ngoba uSathane wayengakwazi ukweqela ngale kwemingcele uJehova ayembekele yona.

UJEHOVA UQEDA UKUHLUPHEKA KUKAJOBE

11. Ngemva kokuba uJehova eqede ukuhlupheka kukaJobe, wamvuza kanjani uJobe? (Jobe 42:​10-13)

¹¹ Funda uJobe 42:​10-13. Kwaba sobala ukuthi uJobe wayezohlala ethembekile, futhi uJehova akabange esamvumela uSathane ukuba ahlasele uJobe. UJehova wakuqeda ukuhlupheka kwenceku yakhe ethembekile. Nalapha futhi, uMphikisi wayengenawo amandla okuvimba isinqumo sikaJehova. USathane wayengasavumelekile ukuba aqhubeke eyihlasela ngokuqondile inceku kaJehova eyigugu uJobe.

12. Nikeza isibonelo salokho okwenzeka kulabo abathembela emandleni kaJehova okusindisa.

¹² Phakathi nezinsuku zokugcina, abantu abaningi bawabonile amandla kaJehova okusindisa. Ngokwesibonelo, ngo-1945 kwakunoFakazi BakaJehova abangu-230 abasinda ohambweni lokufa lwamaNazi olusuka ekamu lokuhlushwa. Babhala la mazwi ayizwi lesinqumo ngokuphathelene nezinto ezithusayo ababhekana nazo: “Inkathi ende enzima yokuvivinywa iphelile futhi labo abaye balondolozwa, njengokungathi bahlwithwa esithandweni somlilo, abanalo ngisho nephunga lomlilo. . . . Ngokuphambene nalokho, bagcwele amandla avela kuJehova.” Benezela: “Sinesifiso esisodwa kuphela . . . [ngemva] kokuba semgodini wamabhubesi, ukuba sivunyelwe ukuba sikhonze uJehova . . . kuze kube phakade. Lokho kukodwa kuyoba umvuzo wethu omkhulu kunayo yonke.”—Qhathanisa noDaniyeli 3:27; 6:22.

13. Yini ongaqiniseka ngayo lapho ubhekene novivinyo? (Bheka nezithombe.)

¹³ Nathi ngezinye izikhathi sibhekana nezinto ezisenza sizwe sengathi siphonswe emgodini wamabhubesi. (1 Pet. 5:​8-10) Ngezinye izikhathi singase sizwe sengathi siphelelwa amandla, sizibuze ukuthi ingabe uvivinyo esibhekene nalo luyoke luphele yini. Ngezikhathi ezinjalo, ukukhumbula lokho okwenzeka kuJobe kungasisiza. Singaqiniseka ngokuphelele ukuthi uJehova unawo amandla okuqeda ukuhlupheka kwethu—kungakhathaliseki ukuthi ukuqeda manje noma ezweni elisha elizayo. Ukhethe isikhathi ayoqeda ngaso leli zwe elibi futhi uma sekushaye leso sikhathi ngeke alivumele ukuba liqhubeke likhona!

UJEHOVA UYAZITHANDA IZINCEKU ZAKHE EZIQOTHO

14-15. UJehova uzizwa kanjani ngokuvuza izinceku zakhe eziqotho? (Jobe 14:15) (Bheka esisekhasini 1.)

¹⁴ Funda uJobe 14:15. UBaba wethu osezulwini unobuhlobo obukhethekile nalabo abaqotho kuye. Bayigugu kakhulu kuye kangangokuba uma kwenzeka befa uyobavusa baphinde baphile. Uyoqeda ubuhlungu obubangelwa ukufa.—Isaya 65:17.

¹⁵ Nakuba uJobe aqhubeka ephila ezweni elibuswa uSathane, incwadi enokwethenjelwa iBhayibheli isitshela ukuthi uJehova wamelapha uJobe, wambusisa ngisho nangezinto eziningi kakhulu kunalezo ayenazo ngaphambi kokuvivinywa kwakhe. Lezo zinto ambusisa ngazo zazimane zibonisa lokho uJehova ayokwenzela uJobe esikhathini esizayo. UJehova wabonisa ukuthi ufuna izinceku zakhe eziqotho zijabule ngokuphelele futhi ziphile kamnandi. Empeleni, uJehova uyonika bonke labo abaqotho kuye ithuba lokujabulela ukuphila okungenazinkinga epharadesi emhlabeni. (IsAm. 21:​3, 4) NjengoMbusi wendawo yonke, unesifiso sokwenza kanjalo. Kusiduduza ngempela ukwazi lokho lapho kudingeka sikhuthazelele uvivinyo!

16. Yisiphi esinye isizathu esinaso sokwethemba uJehova njengoMbusi Wendawo Yonke?

¹⁶ Ngemva kokuphila isikhathi eside, ekugcineni uJobe washona. Kodwa uJehova unguMbusi Wendawo Yonke, uMninimandla Onke, onamandla ngisho nawokuvusa umuntu oshonile. (Dut. 32:39) Ngakho akekho ongamvimba ukuba avuse labo abathandayo futhi lokho kuyokwenzeka ngesikhathi esikhethwe nguye.—Roma 8:​38, 39.

METHEMBE NGOKUPHELELE UJEHOVA

17. Yini ebonisa ukuthi imizamo kaSathane yokuqeda ngabantu bakaJehova ayiphumelelanga?

¹⁷ Indaba kaJobe eseBhayibhelini isinika izizathu eziqinile zokumethemba ngokuphelele uJehova. Sibonga ngempela ngokuthi imizamo kaSathane yokuqeda ngabantu bakaJehova ayiphumelelanga! Namuhla, izinceku zikaJehova ezithembekile ezingaba yizigidi ezingu-9 ziwubufakazi bokuthi uMbusi Wendawo Yonke unamandla. Izikhathi eziningi, sibonile ukuthi izikhali ezenzelwe ukulwa nezinceku zikaJehova aziphumeleli. (Isaya 54:17) Ohulumeni abanamandla nabaholi benkolo bahlulekile ukuqeda ngabantu bakaJehova ababonakala bengenamandla okuzivikela. Ayikho into engasivimba ukuba sitshele abantu iqiniso ngoJehova futhi siveze ukuthi uSathane ungumqambimanga nombulali. Ngisho nokufa imbala ngeke kusivimbe ngoba uJehova uyovusa noma ubani ofa eqotho kuye.—Hos. 13:14.

18. Kungani singaqiniseka ukuthi uJehova uyoba nathi noma ngabe yini eyenzekayo esikhathini esizayo?

¹⁸ Njengoba sizindla ngendaba kaJobe eyenzeka ngempela, siqinisa ukholo lwethu ekutheni uJehova uyoba nathi noma ngabe yini eyenzekayo esikhathini esizayo. Phakathi nosizi olukhulu, abantu bakaNkulunkulu bayobonakala bengenamandla okuzivikela futhi kuyobonakala sengathi uSathane nabameleli bakhe banamandla kunabo. Kodwa njengasosukwini lukaJobe, uJehova uyosebenzisa amandla akhe amakhulu futhi ngeke amvumele uSathane ukuba abangele umonakalo ongenakulungiseka kubantu bakhe. Sisondela ngokushesha isikhathi uJehova ayoqeda ngaso ukuhlupheka uSathane akubangele abantu. UDeveli namademoni akhe bayovalelwa kwalasha iminyaka engu-1 000. (Luka 8:31; IsAm. 20:​1-3) Ekugcineni, uSathane nabo bonke abamsekelayo bayobhujiswa. (IsAm. 20:10) Njengoba uJehova abikezela, ikhanda likaSathane liyochotshozwa. Uyobhujiswa ngokuphelele angaphinde abe khona.—Gen. 3:15; Roma 16:20.

19. Yimuphi umvuzo olindele labo abamethemba ngokuphelele uJehova? (Bheka nesithombe.)

¹⁹ Abakhulekeli bakaJehova beqiniso bayalilangazelela izwe elisha elizoba khona maduzane, lapho abantu beyophinde babe yimiqemane baphile ukuphila okujabulisayo. Ukuphila kuyobe kungcono kakhulu kunalokho esingase sikucabange. UJehova uyathembisa: “Bheka! Ngenza konke kube kusha.” (IsAm. 21:5) Kuyosho ukuthini lokho? Ngokokuqala ngqa eminyakeni eyinkulungwane, abantu bayophila ezweni elingasenayo inkohlakalo, inzondo nethonya elibi likaSathane namademoni akhe. Kuyoba mnandi ngempela lokho! Ngeke uphinde uqwashe ebusuku ngenxa yokuthi ukhathazwa yizinto ezenzeka kuleli zwe elidala. Labo abayosinda e-Armagedoni bayobona isimangaliso sokwelashwa kwabantu emhlabeni wonke. Ngaphezu kwalokho, abantu esibathandayo asebashona bayovuswa. Siyokwazi ukuphila ngendlela uBaba wethu osezulwini ayefuna siphile ngayo!

20. Yini ozimisele ukuyenza?

²⁰ Njengoba ngesibindi sisazobhekana nolunye uvivinyo kulezi zinsuku zokugcina, masizimisele ukumethemba ngokuphelele uJehova nokusekela ukubusa kwakhe. Kwangathi singabonisa ukuthi siyamthanda uBaba wethu osezulwini, sifakazele nokuthi uSathane ungumqambimanga. Ngempela, singaqiniseka ukuthi siyoba nekusasa elijabulisayo ngaphansi kokubusa koMbusi wethu uJehova, okulangazelelayo ukuvuza izinceku zakhe ezithembekile ngendlela emangalisayo!