Abantwana “Bayifa Elivela KuJehova”

YINI efika engqondweni yakho lapho uzwa igama elithi “ifa”? Ungase ucabange ngemali, umuzi noma into ethile eyigugu oyishiyelwe yilungu lomndeni olithandayo. Kungakhathaliseki ukuthi yiliphi ifa olitholayo, liyigugu futhi ngokuqinisekile ufuna ukuliphatha kahle.

IBhayibheli lithi abantwana “bayifa elivela kuJehova.” (IHu. 127:3) Ngokuqinisekile, abazali abangamaKristu babheka abantwana babo njengezipho eziyigugu ezivela kuBaba wabo osezulwini futhi bafuna ukwenza konke abangakwenza ukuze babagcine bephephile futhi benakekelwe kahle ngokwenyama, ngokomzwelo nangokomoya.

Nokho, kuyadabukisa ukuthi abanye abazali namuhla abababheki abantwana babo njengefa elivela kuNkulunkulu. (Isaya 49:15; 2 Thim. 3:​1-3) Abanye abazali kungenzeka bayafuna ngempela ukunakekela abantwana babo, kodwa bakuthola kunzima ukwenza kanjalo ngenxa yezinselele ezihlukahlukene. Yiziphi ezinye zalezo zinselele ezenza kube nzima ngabazali ukuba banakekele abantwana babo? Yini uJehova ayilindele kubazali? Abazali abangamaKristu bangabakhulisa kanjani abantwana babo ngendlela ephumelelayo?

IZINSELELE

• Ukucindezelwa umndeni nomphakathi. Kwamanye amazwe, abazali abanabantwana abaningi bahlonishwa kakhulu emphakathini. Ngakho, labo abashadile bangase bacindezelwe imindeni noma omakhelwane ukuba babe nabantwana abaningi—mhlawumbe abangeke bakwazi ukubanakekela.

• Ukukhathazeka ngekusasa. Emazweni lapho izinga lokushona kwezinsana liphezulu ngenxa yokungondleki kahle nangenxa yezifo nokungabi bikho kodokotela noma izibhedlela ezanele, abanye abashadile baba nabantwana abaningi ukuze baqikelele ukuthi okungenani abanye babo bayakhula baze babe badala. Abanye bangase bakhethe ukuba nabantwana abaningi ukuze baqikelele ukuthi banaye umuntu ozobanakekela lapho sebekhulile. Lokho kuyiqiniso nakakhulu emazweni lapho abantu asebekhulile bengalutholi khona usizo lwezimali oluvela kuhulumeni.

• Ukuhlela umndeni. Kwezinye izindawo, aziziningi izinto zokuvimba inzalo abantu abashadile abangakhetha kuzo. Abanye basaba ukuguliswa yizinto zokuvimbela inzalo ezisezingeni eliphansi ezitholakala emazweni abahlala kuwo. Kanti abanye abakwazi ukusebenzisa izinto zokuvimbela inzalo ngenxa yokuthi zibiza kakhulu.a

YINI UJEHOVA ALINDELE ABAZALI UKUBA BAYENZE?

Nakekelani izidingo zabantwana benu. UJehova uphathise abazali umsebenzi wokunakekela izidingo zabantwana babo abasebancane. Ulindele ukuba abazali bakulungele ukusebenza kanzima ukuze abantwana babo bathole ukudla, izimpahla zokugqoka nendawo yokuhlala. UJehova ulindele nokuba abazali bafundise abantwana babo. Ngakho, abazali abangamaKristu abamane nje bathumele abantwana babo ezikoleni okuhlalwa kuzo (boarding schools). Kunalokho, bayaqikelela ukuthi abantwana babo bahlala nabo ekhaya njengoba bekhula ukuze bathole imfundo yasesikoleni ekahle futhi bakwazi ukubanaka, okwenza abantwana bazizwe bephephile, belondekile futhi bethandwa. Noma kunjalo, uJehova uyacabangela; akalindele ukuba abazali babe yizigwili. Empeleni, uJehova wakhetha ukuba iNdodana yakhe ethandekayo ikhuliswe abazali ababengenayo imali eningi kodwa ababesebenza kanzima.—Math. 13:​55, 56; Luka 2:24.

Isimiso seBhayibheli: “Ngokuqinisekile uma umuntu engabondli abakubo, ikakhulukazi labo abangamalungu omndeni wakhe, uluphikile ukholo futhi mubi kakhulu kunomuntu ongenalo ukholo.”—1 Thim. 5:8.

UJehova uyaqonda ukuthi abazali nabo bangase badinge ukunakekelwa lapho sebekhulile. Empeleni, enye indlela abantwana abangabonisa ngayo ukuthi bayabahlonipha abazali babo ukuba bahlele ukuthi bazobanakekela kanjani lapho sebekhulile. (Eks. 20:12; 1 Thim. 5:4) Nokho, uJehova uyajabula lapho abazali becabanga kakhulu ngokuthi bazobanakekela kanjani abantwana babo kunokucabanga ngokuthi abantwana babo bangase babanakekele kanjani.—2 Kor. 12:14.

Sizani abantwana benu ukuba bafunde ngoJehova. Abazali abangamaKristu bananomsebenzi wokuqeqesha abantwana babo ukuba bathande uJehova futhi bamkhonze. KuJehova, ukuqeqesha abantwana ngokomoya kuyinto ebaluleke kakhulu okumele yenziwe abazali njengoba bekhulisa abantwana babo.—Dut. 6:​6, 7.

Isimiso seBhayibheli: “Qhubekani nibakhulisa [abantwana benu] ngokubaqeqesha nangesiyalo sikaJehova.”—Efe. 6:4.

UJEHOVA UFUNA NIPHUMELELE

Hlelani kusengaphambili. Uma nicabangela ukuba nabantwana, cabangisisani ngezimo zenu. Ngokwesibonelo, nizokwazi yini ukondla, ukugqokisa nokufundisa abantwana abaningi? Uma ningeke nikwazi, xoxani ngokuthi ningakwazi yini ukuba nabantwana abambalwa kunalabo ebenicabangela ukuba nabo ukuze nikwazi ukunakekela abantwana eninquma ukuba nabo ngendlela uJehova afisa nibanakekele ngayo. Yiqiniso ukuthi uJehova uyaqonda ukuthi akuyona yonke into eyenzeka ngendlela obuhlele ngayo ekuphileni. (UmSh. 9:11) Kodwa uyoyibusisa imizamo yenu eqotho yokuba abazali abakahle.

Izimiso zeBhayibheli: “Ngokuqinisekile amacebo okhuthele amenza aphumelele, kodwa bonke abanamawala ngokuqinisekile bazifaka ekuhluphekeni.”—IzAga 21:5.

“Ubani kini othi efuna ukwakha umbhoshongo angahlali phansi kuqala abale izindleko, ukuze abone ukuthi unakho yini okwanele ukuba awuqede?”—Luka 14:28.

Bekani uJehova kuqala emndenini wenu. Yenzani ukukhonza uJehova kuze kuqala emndenini wenu. Uma seninabo kakade abantwana, zimiseleni ukufundisa umntwana ngamunye ukuba athande uJehova. Basizeni ukuba balalele futhi bafunde lapho besemihlanganweni yebandla. Qikelelani ukuthi ninokuKhulekela Komndeni masonto onke. Fundisani abantwana benu ukuthi kushunyayelwa kanjani. Ungalindeli ukuba izingane zakho ezindala noma izihlobo zakho zikwenzele umsebenzi okumele wenziwe nguwe njengomzali. Ukukhulisa abantwana bakho ukuba bathande uJehova kudinga isikhathi nomzamo, kodwa umvuzo mkhulu.

Isimiso seBhayibheli: “Ayikho into engijabulisa kakhulu kunale: ukuba ngizwe ukuthi abantwana bami bayaqhubeka behamba eqinisweni.”—3 Joh. 4.b

Thembelani kuJehova. Kungakhathaliseki ukuthi nicabangela ukuba nabantwana noma seninabo kakade, qinisekani ukuthi imithetho kaJehova ibaluleke kakhulu kunesiko lendawo.

Uma nikhetha ukungabi nabo abantwana abaningi, qinisekani ukuthi uJehova uyoninakekela lapho senikhulile. Ningavumeli ukucindezelwa abanye ukuba kunenze nibheke abantwana benu njengendlela yokuthola “imali ezoninakekela” lapho senikhulile. Akudingeki nibe novalo lokuthi akekho ozoninakekela. UJehova uthembise ukuthi uzoninakekela futhi uhlale ezigcina izithembiso zakhe.—Josh. 23:14.

Izimiso zeBhayibheli: “Thembela kuJehova ngayo yonke inhliziyo yakho, ungathembeli kokwakho ukuqonda. Mqaphele kuzo zonke izindlela zakho, yena uyokwenza izindlela zakho ziqonde.”—IzAga 3:​5, 6.

“Ngake ngaba musha, manje sengikhulile, kodwa angikaze ngimbone olungile eshiywe dengwane, noma izingane zakhe ziswele ukudla.”—IHu. 37:25.

“Ngakho, qhubekani nifuna kuqala uMbuso nokulunga kwakhe, khona-ke zonke lezi ezinye izinto ziyokwenezelwa kini.”—Math. 6:33.

Abantwana bayizipho eziyigugu uJehova aziphathise abazali. Kumele ukuba uJehova ujabula kakhulu lapho abazali abangamaKristu benakekela abantwana babo ngendlela afuna babanakekele ngayo! Ngothando banakekela izidingo zabantwana babo ezingokwenyama, ezingokomzwelo nezingokomoya; bayahlela ukuthi bazoba nabantwana abangaki; ngokwethembeka babeka lokho okufunwa uNkulunkulu kuqala kunesiko lendawo. Ngokwenza kanjalo, abazali abangamaKristu babonisa ukuthi abantwana babo bayisipho esiyigugu—“ifa elivela kuJehova.”