Kufanele Yini Ngiyeke Ukushayela?

Ingabe ubhekene nesimo esifanayo? Uma kunjalo, yini engakusiza ukuba unqume ukuthi kufanele yini uqhubeke ushayela?

Kwamanye amazwe, abashayeli asebedlule eminyakeni ethile abafuna ukuvuselela izincwadi zabo zokushayela, kumele bahlolwe udokotela noma bathole imvume yakhe. AmaKristu ahlala kulawo mazwe ayayihlonipha leyo mthetho nezinqumo zalabo abagunyazwe uhulumeni. (Roma 13:1) Kodwa kungakhathaliseki ukuthi uhlalaphi, kunezindlela ongakwazi ukubona ngazo ukuthi usakwazi yini ukushayela ngokuphepha.

HLOLA INDLELA OSHAYELA NGAYO

Njengoba iwebusayithi i-National Institute on Aging (NIA) yase-United States isikisela, ungaqala ngokuzibuza le mibuzo elandelayo:

• Ingabe ngikuthola kunzima ukufunda izimpawu zomgwaqo noma ukubona ebusuku?

• Ingabe sengikuthola kunzima ukwenza izinto ngokushesha, okwenza kube nzima ukuba ngijikise ikhanda ukuze ngihlole izibuko zami nezindawo ezingabonakali ezibukweni?

• Ingabe ngikuthola kunzima ukuthatha isinyathelo ngokushesha, njengokususa unyawo lwami kuyi-accelerator ngilubeke emabhulekini?

• Ingabe ngiyatotoba lapho ngishayela ngize ngiphazamise ezinye izimoto?

• Ingabe sengike ngacishe ngenza ingozi izikhathi eziningana noma ingabe imoto yami ipoqokile futhi inemihuzuko ngenxa yokuthi ngishayisa izinto ezimile?

• Ingabe sengike ngamiswa yiphoyisa ngenxa yendlela engishayela ngayo?

• Ingabe ngake ngazumeka ngishayela?

• Ingabe ngiphuza imithi engase iphazamise indlela engishayela ngayo?

• Ingabe umndeni wami noma abangani bami bake bangitshela yini ukuthi bakhathazekile ngendlela engishayela ngayo?

Uma uphendule ngoyebo kowodwa noma kwemibili yale mibuzo, kungenzeka yisikhathi sokuba ucabange ngokwenza ushintsho oluthile. Ngokwesibonelo, ungase unciphise izikhathi oshayela ngazo ikakhulukazi ebusuku. Yihlole njalo indlela oshayela ngayo. Ungacela ilungu lomndeni noma umngani ukuba akutshele ukuthi ucabangani ngendlela oshayela ngayo. Ungase ucabangele nokuphinde ufunde ukushayela ngokuphepha. Kodwa uma uphendule ngoyebo kweminingana yemibuzo engenhla, kungase kube yisikhathi esikahle kakhulu lesi sokuba uyeke ukushayela.a

QONDISWA YIZIMISO ZEBHAYIBHELI

Kungase kube nzima ukubona ukuthi asisashayeli kahle njengasekuqaleni. Indaba yokunquma ukuthi kufanele yini siyeke ukushayela noma cha ingaba nzima kakhulu. Ngakho, yiziphi izimiso zeBhayibheli ezingakusiza ukuba usibone ngokucacile isimo sakho bese wenza isinqumo esihlakaniphile? Cabanga ngalezi ezimbili.

Hlale unesizotha. (IzAga 11:2) Njengoba sikhula amehlo ethu awabe esabona kahle, izindlebe zethu azibe zisezwa kahle, imisipha yethu iba buthaka futhi asibe sisasabela ngokushesha lapho kwenzeka okuthile. Ngokwesibonelo, abantu abaningi bayayeka ukudlala imidlalo ethile njengoba bekhula ngoba bayaqaphela ukuthi njengoba bekhula kulula ngabo ukuba balimale. Kwenzeka okufanayo nasendabeni yokushayela. Ngesizotha umuntu angase anqume ukuyeka ukushayela ngoba ecabangela ukuphepha kwakhe. (IzAga 22:3) Umuntu onesizotha uyolalela lapho abanye beveza ukukhathazeka kwabo ngaye.—Qhathanisa neyesi-2 Samuweli 21:15-17.

Gwema icala legazi. (Dut. 22:8) Imoto ingaba yisikhali esiyingozi uma ingashayelwa ngokuphepha. Umuntu oqhubeka eshayela ngisho noma engasakwazi ukushayela kahle angafaka ukuphila kwakhe nokwabanye engozini. Uma engenza ingozi engabangela ukuba kufe othile, angaba necala legazi.

Uma ubhekene nesinqumo esinzima sokuthi uyeke yini ukushayela, gwema ukucabanga ukuthi ungase ulahlekelwe isithunzi sakho noma ukuthi abanye ngeke besakuhlonipha. UJehova ukuthanda ngenxa yezimfanelo zakho ezinhle ezihlanganisa isizotha, ukuthobeka nokukhathalela ukuphepha kwabanye. Uthembisa ukukusekela nokukududuza. (Isaya 46:4) Akasoze akulahle. Ngakho, mcele akusize usebenzise ukuhlakanipha nezimiso zeBhayibheli njengoba unquma ukuthi kufanele yini uyeke ukushayela.