Indlela Ongathuthukisa Ngayo Imithandazo Yakho

1-2. (a) Yini engasivimba ukuba sithandaze kuJehova ngokusuka enhliziyweni? (b) Sazi kanjani ukuthi ngomusa uJehova uyayilalela imithandazo yethu?

INGABE ngezinye izikhathi uba nomuzwa wokuthi lapho uthandaza usho into efanayo noma awuthandazi ngokusuka enhliziyweni? Uma kunjalo, awuwedwa. Ngenxa yokuthi ukuphila kwethu kumatasa, lapho sithandaza singase sithandaze siphuthuma. Noma singase sikuthole kunzima ngisho nokutshela uJehova lokho okusezinhliziyweni zethu ngenxa yokuthi sizizwa singakufanelekeli ukukhuluma naye.

² IBhayibheli lisiqinisekisa ngokuthi okubalulekile kuJehova akukhona ukuthi imithandazo yethu ibe yinkimbinkimbi, kodwa ukuba isuke enhliziyweni. Uyasizwa “isicelo sabamnene.” (IHu. 10:17) Ngomusa ulalela yonke into esiyishoyo lapho sithandaza ngenxa yokuthi usikhathalela ngempela.—IHu. 139:​1-3.

3. Yimiphi imibuzo esizoxoxa ngayo kulesi sihloko?

³ Nokho, singase sizibuze: Kungani singase sithandaze kuJehova ngokuqiniseka? Singathandaza kanjani ngendlela ezosenza sisondelane nakakhulu noJehova? Ukuzindla ngemithandazo esuka enhliziyweni yezinceku zikaJehova eseBhayibhelini kungasisiza kanjani ukuba sithuthukise imithandazo yethu? Yini esingayenza uma sicindezeleke kakhulu kangangokuba siyehluleka ukutshela uJehova indlela esizizwa ngayo? Ake sixoxe ngezimpendulo zale mibuzo.

THANDAZA KUJEHOVA NGOKUQINISEKA

4. Yini engasisiza ukuba sithandaze kuJehova ngokuqiniseka? (IHubo 119:145)

⁴ Lapho siqonda ukuthi uJehova ungumngani oqotho ofuna siphumelele, siyoqaphela ukuthi singathandaza kuye ngokuqiniseka. Umbhali weHubo 119 wazama ukuba nalobo buhlobo obuseduze noJehova. Wayenazo izinkinga ekuphileni kwakhe. Amadoda akhohlakele ayenze izinto ezimbi kuye. (IHu. 119:​23, 69, 78) Ngezinye izikhathi wayedikibala ngenxa yamaphutha akhe. (IHu. 119:5) Noma kunjalo, wayengasabi ukuthululela isifuba sakhe kuJehova.—Funda iHubo 119:145.

5. Kungani kungafanele sivumele imizwa engemihle ukuba isenze singathandazi? Fanekisa.

⁵ UJehova ufuna ngisho nalabo abenze amaphutha amakhulu ukuba bathandaze kuye. (Isaya 55:​6, 7) Ngakho akufanele sivumele imizwa engemihle ukuba isenze singathandazi. Ngokwesibonelo, umshayeli wendiza uyazi ukuthi angaxhumana nabantu abaqondisa ukuhamba kwezindiza uma edinga usizo. Ingabe kufanele angabaze ukuxhumana nabo ngenxa yokuba namahloni okuthi ulahlekile noma wenze iphutha? Akufanele neze angabaze ukwenza kanjalo! Ngendlela efanayo, ngisho noma ngezinye izikhathi sizizwa silahlekile noma senze isono, singathandaza kuJehova ngokuqiniseka.—IHu. 119:​25, 176.

ESINGAKWENZA UKUZE SITHANDAZE NGENDLELA ESENZA SISONDELANE NAKAKHULU NOJEHOVA

6-7. Ukuzindla ngezimfanelo zikaJehova kungasisiza kanjani ukuba sithandaze ngendlela esenza sisondelane nakakhulu naye? Nikeza isibonelo. (Bheka nombhalo waphansi.)

⁶ Lapho sikhuluma noJehova ngokukhululekile, simtshela imicabango yethu ejulile nemizwa yethu ejulile, siyosondelana nakakhulu naye. Ngakho, yini engasisiza ukuba sithandaze ngaleyo ndlela?

⁷ Zindla ngezimfanelo zikaJehova.a Uma silokhu sizindla ngezimfanelo zakhe, siyokhululeka nakakhulu ukuveza lokho esikucabangayo. (IHu. 145:​8, 9, 18) Cabanga ngesibonelo sikaKristine, udade owayenobaba onodlame. Uyachaza: “Ukukhuluma noJehova njengoBaba kwakungelula kimi. Ngangizwa sengathi uJehova ngeke esangithanda ngenxa yamaphutha ami.” Iyiphi imfanelo kaJehova eyamsiza? Uthi: “Uthando lukaJehova oluqotho lungenza ngizizwe ngiphephile. Ngiyazi ukuthi uyohlezi engibambe ngesandla. Ngisho noma ngenza amaphutha, uyoqhubeka engithanda futhi engisiza. Lokhu kungisiza ukuba ngimtshele izinto ezingenza ngijabule ngempela nezingibangela usizi.”

8-9. Yiziphi ezinye zezinzuzo zokucabanga ngalokho ofuna ukukusho ngaphambi kokuba uthandaze? Fanekisa.

⁸ Cabanga ngalokho ozokusho. Ngaphambi kokuba uthandaze, ungase uzibuze imibuzo ethile. Ngokwesibonelo: ‘Yiziphi izinkinga engibhekene nazo njengamanje? Ukhona yini okudingeka ngimthethelele? Ingabe ngibhekene nenselele entsha edinga ukuba uJehova angisize kuyo ukuze ngiyinqobe?’ (2 AmaKh. 19:​15-19) Singase silingise nendlela uJesu asifundisa ukuba sithandaze ngayo ngokucabanga ngalokho esingakucela kuJehova ngokuphathelene negama laKhe, uMbuso waKhe nentando yaKhe.—Math. 6:​9, 10.

⁹ Lapho udade okuthiwa u-Aliska ethola ukuthi umyeni wakhe wayenekhensa yobuchopho embi kakhulu, kwakunzima ngaye ukuba athandaze. Uyakhumbula: “Ngangicindezeleke kakhulu kangangokuba kwakunzima ukucabanga ukuthi ngizothandaza ngithini.” Yini eyamsiza? Uyachaza: “Ngaphambi kokuba ngithandaze, ngizinika isikhashana ukuze ngicabange ngalokho engizokusho futhi lokho kungisize ukuba ngiqikelele ukuthi imithandazo yami ayigxili kimi kuphela. Ukwenza ngale ndlela kungisize ukuba ngizole futhi ngibe sesimweni esikahle lapho ngithandaza.”

10. Kungani kufanele sizame ukungajahi ukusheshe siqede lapho sithandaza? (Bheka nezithombe.)

¹⁰ Ungajahi ukusheshe uqede lapho uthandaza. Ngisho noma imithandazo emifushane ingasenza sisondelane nakakhulu noJehova, siyokwazi ukuveza lokho esikucabangayo uma singajahi ukusheshe siqede lapho sithandaza.b Umyeni ka-Aliska, u-Elijah, uthi: “Ngiyazama ukuthandaza izikhathi eziningi phakathi nosuku futhi ngiye ngasondelana nakakhulu noJehova ngokuzinika isikhathi sokuthandaza ngingajahi ukusheshe ngiqede. UJehova akajahi ukuba ngisheshe ngiqede lapho ngithandaza, ngakho nami ngingakwazi ukuzinika isikhathi esanele sokuthandaza.” Zama lokhu: Thola isikhathi nendawo ezokuvumela ukuba uthandaze, mhlawumbe ezokwenza ukwazi ukuthandaza ngokuzwakalayo ngaphandle kweziphazamiso futhi uzijwayeze ukungajahi ukusheshe uqede.

ZINDLA NGEMITHANDAZO ESUKA ENHLIZIYWENI YEZINCEKU ZIKAJEHOVA ESEBHAYIBHELINI

11. Kusizuzisa kanjani ukuzindla ngemithandazo esuka enhliziyweni yezinceku zikaJehova eseBhayibhelini? (Bheka nebhokisi elithi “Ingabe Uyayiqonda Indlela Ezazizizwa Ngayo?”)

¹¹ Ungase ukuthole kuzuzisa ukuzindla ngemithandazo esuka enhliziyweni, ngezingoma ezingcwele noma ngamahubo ezinceku zikaJehova zangezikhathi zeBhayibheli. Njengoba ucabanga ngendlela izinceku zikaNkulunkulu eziyiveza ngayo imicabango yazo ejulile, uyokhuthazeka ukuba uthulule isifuba sakho kuJehova. Ungase uthole namazwi amasha okudumisa ongawasebenzisa lapho uthandaza. Cishe uyothola nemithandazo yezinceku zikaJehova ezazibhekene nesimo esifana nesakho.

12. Yimiphi imibuzo esingazibuza yona njengoba sizindla ngomthandazo oseBhayibhelini?

¹² Njengoba uzindla ngemithandazo eseBhayibhelini, zibuze: ‘Ubani owayesho lo mthandazo futhi wayebhekene naziphi izimo? Ingabe amazwi ayeshiwo kulo mthandazo ayayiveza indlela engizizwa ngayo? Yiziphi izifundo engingazifunda kuwo?’ Kungase kudingeke wenze ucwaningo olwengeziwe ukuze uphendule le mibuzo, kodwa ngeke uzisole ngokwenza kanjalo. Cabanga ngezibonelo ezimbalwa.

13. Yisiphi isifundo esingasifunda emthandazweni kaHana? (1 Samuweli 1:​10, 11) (Bheka esisekhasini 1.)

¹³ Funda eyoku-1 Samuweli 1:​10, 11. Ngesikhathi uHana esho lo mthandazo, wayebhekene nezinkinga ezinkulu ezimbili. Wayeyinyumba futhi omunye unkosikazi womyeni wakhe wayenza ukuphila kwakhe kube nzima. (1 Sam. 1:​4-7) Uma ubhekene nenkinga engapheli, yini ongayifunda emthandazweni kaHana? Wathola impumuzo ngokuzinika isikhathi sokuthandaza nangokuthulula isifuba sakhe kuNkulunkulu. (1 Sam. 1:​12, 18) Nathi singathola impumuzo lapho ‘siphonsa umthwalo wethu kuJehova’ ngokumchazela indlela esizizwa ngayo ngobunzima esibhekene nabo.—IHu. 55:22.

14. (a) Yini enye esiyifunda esibonelweni sikaHana? (b) Singayithuthukisa kanjani imithandazo yethu ngokuzindla ngemiBhalo? (Bheka umbhalo waphansi.)

¹⁴ Ngemva kweminyaka embalwa kuzelwe indodana kaHana uSamuweli, uHana wayiletha kumPristi Ophakeme u-Eli. (1 Sam. 1:​24-28) Emthandazweni wakhe osuka enhliziyweni, uHana washo ngokuqiniseka ukuthi uJehova uyazivikela futhi azinakekele izinceku zakhe eziqotho.c (1 Sam. 2:​1, 8, 9) Kungenzeka zazingakapheli izinkinga ayebhekene nazo ekhaya, kodwa uHana wagxila endleleni uJehova ayembusise ngayo. Yini esiyifundayo kulokho? Siyozikhuthazelela kangcono izinkinga uma sigxila endleleni uJehova asisekele ngayo kuze kube manje.

15. Lapho sibhekene nokungabi nabulungisa, yini esingayifunda emthandazweni womprofethi uJeremiya? (Jeremiya 12:1)

¹⁵ Funda uJeremiya 12:1. Ngesinye isikhathi ekuphileni kwakhe, umprofethi uJeremiya wayekhathazekile ngenxa yokubona abantu ababi bephumelela. Wayedikibele nangendlela amanye ama-Israyeli ayemphatha ngayo. (Jer. 20:​7, 8) Nathi singazizwa ngendlela efanayo lapho sibona abantu abangathembekile bephumelela noma lapho senziwa inhlekisa. Nakuba uJeremiya amtshela uNkulunkulu izinto ezazimphatha kabi, akazange abungabaze ubuqotho bakhe. Njengoba ayeyibona indlela uJehova ayebayala ngayo abantu bakhe ababengalaleli, kungenzeka waqiniseka nakakhulu ngobulungisa bukaNkulunkulu. (Jer. 32:19) Nathi singamtshela ngokukhululekile izinto ezisiphatha kabi emithandazweni yethu, siqiniseka ukuthi ngesikhathi esifanele uJehova uyobulungisa noma yibuphi ukungabi nabulungisa esibhekana nako manje.

16. Uma sinomuzwa wokuthi asikwazi ukwenza okuthile ngenxa yezimo, yini esingayifunda kumLevi owayedingisiwe? (IHubo 42:​1-4) (Bheka nezithombe.)

¹⁶ Funda iHubo 42:​1-4. Leli culo labhalwa umLevi owayedingisiwe owayengakwazi ukuyokhonza ethempelini namanye ama-Israyeli. Ihubo alibhala liveza indlela ayezizwa ngayo. Nathi singazizwa ngendlela efanayo uma sivaleleke emakhaya ethu noma siboshiwe ngenxa yokholo lwethu. Imizwa yethu ingase ishintshashintshe, kodwa siyobe senza kahle uma sitshela uJehova indlela esizizwa ngayo. Lokho kungasisiza sihlole imicabango yethu futhi sisibheke ngendlela ehlukile isimo esibhekene naso. Ngokwesibonelo, umLevi waqaphela ukuthi wayezoba namathuba amasha okudumisa uJehova. (IHu. 42:5) Wacabanga nangendlela uJehova ayemnakekela ngayo. (IHu. 42:8) Ukuthandaza kuNkulunkulu ngokusuka enhliziyweni kungasisiza sihlole indlela esizizwa ngayo, kusisize nokuba siphinde sizole futhi sithole namandla okukhuthazela.

17. (a) Yini esingayifunda emthandazweni womprofethi uJona? (Jona 2:​1, 2) (b) Amanye amazwi akumaHubo angasisiza kanjani lapho sibhekene nobunzima? (Bheka umbhalo waphansi.)

¹⁷ Funda uJona 2:​1, 2. Umprofethi uJona washo lo mthandazo ngesikhathi esesiswini senhlanzi enkulu. Nakuba ayengamlalelanga uJehova, uJona wayeqiniseka ukuthi uNkulunkulu wayezowuzwa umthandazo wakhe. Emthandazweni wakhe, uJona wasebenzisa amazwi amaningi atholakala kumaHubo.d Cishe wayewazi kahle la maHubo. Ukuzindla ngawo kwamenza waqiniseka ukuthi uJehova wayezomsiza. Ngendlela efanayo, uma sizama ukuwabamba ngekhanda amanye amavesi eBhayibheli, singase siwakhumbule futhi asiduduze lapho sithandaza kuJehova ngezikhathi ezinzima.

QHUBEKA USONDELA KUJEHOVA NGOMTHANDAZO

18-19. Uma ngezinye izikhathi sikuthola kunzima ukuchaza indlela esizizwa ngayo lapho sithandaza, yisiphi isiqinisekiso esisithola kweyabaseRoma 8:​26, 27? Nikeza isibonelo.

¹⁸ Funda eyabaseRoma 8:​26, 27. Ngezinye izikhathi singase sizizwe sikhungathekile ngenxa yokucindezeleka, size singakwazi ngisho nokuchaza indlela esizizwa ngayo. Kodwa sinalo usizo. Ngezikhathi ezinjalo, umoya kaNkulunkulu ongcwele “uyasincengela.” Kanjani? Ngomoya wakhe, uJehova wabangela ukuba imithandazo eminingi ibhalwe eZwini lakhe. Lapho sihluleka ukukusho ngokucacile esikucabangayo, uJehova angase amukele amazwi athile akuleyo mithandazo njengezicelo esifisa ukuzenza kuye futhi angase aziphendule lezo zicelo.

¹⁹ Ukwazi lokho kwasiza udade waseRussia okuthiwa uYelena. Waboshwa ngenxa yokuthi wayethandaza futhi efunda iBhayibheli. UYelena wayecindezeleke kakhulu kangangokuba wayekuthola kunzima ukuthandaza. Uyalandisa: “Ngabe sengikhumbula ukuthi lapho ngikhungathekile futhi ngingazi ukuthi ngithandaze ngithini, uJehova uyocabanga ngemithandazo ephefumulelwe yezinceku zakhe zangesikhathi esidlule . . . ayibheke njengezicelo engingathanda ukuzenza kuye. . . . Lokho kwangiduduza kakhulu phakathi naleso sikhathi esinzima kakhulu.”

20. Yini esingayenza ukuze senze izingqondo yethu zilungele ukuthandaza lapho sicindezelekile?

²⁰ Lapho sicindezelekile, kungaba nzima ukugxilisa ingqondo lapho sithandaza. Ukuze silungise izingqondo zethu, singalalela incwadi yamaHubo erekhodiwe. Singazama nokuyibhala phansi indlela esizizwa ngayo, njengoba kwenza iNkosi uDavide. (IHu. 18, 34, 142; imibhalo engenhla.) Yiqiniso ukuthi ayikho imithetho ebekiwe yokuthi kufanele sikulungiselele kanjani ukuthandaza. (IHu. 141:2) Yenza ngendlela ekusebenzela kangcono.

21. Kungani singatshela uJehova konke okusezinhliziyweni zethu lapho sithandaza?

²¹ Kusiduduza ngempela ukwazi ukuthi uJehova uyayiqonda indlela esizizwa ngayo ngisho nangaphambi kokuba sisho okuthile. (IHu. 139:4) Noma kunjalo, uyajabula lapho esizwa sisho izinto ezibonisa ukuthi siyamethemba. Ngakho unganqikazi ukuthandaza kuBaba wakho osezulwini. Thola isikhuthazo emithandazweni ebhalwe eZwini lakhe. Lapho uthandaza, mtshele konke okusenhliziyweni yakho. Mtshele izinto ezikujabulisayo nezikubangela usizi. NjengoMngani wakho weqiniso, uJehova uyohlale ekhona ukuze akusize!