Yamukele Intethelelo KaJehova

1-2. Iyiphi impumuzo engatholwa yizoni eziphendukayo? (Bheka esisekhasini 1.)

INKOSI uDavide yayazi ukuthi kunjani ukuzizwa unomuzwa wecala ngenxa yezono owazenza esikhathini esidlule. (IHu. 40:12; 51:3; umbhalo ongenhla) Yenza amaphutha amakhulu ekuphileni kwayo. Noma kunjalo, yabonisa ukuthi yayiphenduke ngempela futhi uJehova wayithethelela. (2 Sam. 12:13) Ngenxa yalokho, uDavide wayeyiqonda nempumuzo etholakala ngenxa yokuthethelelwa uJehova.—IHu. 32:1.

² NjengoDavide, singakwazi ukujabulela impumuzo etholakala ngenxa yesihe sikaJehova. Kududuza ngempela ukwazi ukuthi uJehova ukulungele ukuthethelela izono zethu uma siphenduka ngempela, sivume izono zethu, senze konke esingakwenza ukuze singaziphindi—ngisho nezono ezinkulu! (IzAga 28:13; IzE. 26:20; 1 Joh. 1:9) Kuqinisa idolo ngempela ukwazi ukuthi lapho uJehova esithethelela kuba njengokungathi asikaze sone!—Hez. 33:16.

3-4. Wayezizwa kanjani omunye udade ngemva kokuba esebhapathiziwe, futhi sizoxoxa ngani kulesi sihloko?

³ Nokho, ngezinye izikhathi abanye bangase bakuthole kunzima ukwamukela ukuthi uJehova ubathethelele. Cabanga ngesibonelo sikaJennifer, owakhulela eqinisweni. Ngesikhathi esemusha, waqala ukwenza izinto ezimbi, waphila ukuphila okumbaxa-mbili. Ngemva kweminyaka ethile kamuva, wabuyela kuJehova futhi wagcina ekufanelekela ukubhapathizwa. Uthi: “Esikhathini esidlule, ngangiphila impilo yokuziphatha kabi ngokocansi, ngiphuza kakhulu, ngangihlale ngithukuthele futhi ngithanda kakhulu imali. Engqondweni yami, ngangazi ukuthi ngemva kokuba sengincenge uJehova ukuba angithethelele futhi sengiphendukile, umhlatshelo kaKristu wawungenza ngihlanzeke. Kodwa enhliziyweni yami ngangingakholwa ukuthi uJehova ungithethelele.”

⁴ Ingabe ngezinye izikhathi ukuthola kunzima ukukholwa ukuthi uJehova uwathethelele amaphutha owawenza esikhathini esidlule? UJehova ufuna siqiniseke ngesihe sakhe, njengoba nje noDavide ayeqiniseka ngaso. Kulesi sihloko, sizoxoxa ngokuthi kungani kudingeka samukele intethelelo kaJehova nokuthi yini engasisiza ukuba senze kanjalo.

KUNGANI KUDINGEKA SAMUKELE INTETHELELO KAJEHOVA?

5. Yini uSathane afuna siyikholelwe? Nikeza isibonelo.

⁵ Ngokwamukela intethelelo kaJehova, singagwema ukubanjwa esinye sezicupho zikaSathane. Khumbula ukuthi uSathane uyokwenza noma yini angayenza ukuze asiyekise ukukhonza uJehova. Ukuze afeze lowo mgomo wakhe, uSathane angase azame ukusenza sikholelwe ukuthi uJehova akasoze azithethelela izono zethu. Cabanga ngesibonelo sendoda yaseKorinte eyasuswa ebandleni ngenxa yokuziphatha kabi ngokocansi. (1 Kor. 5:​1, 5, 13) Kamuva lapho iphenduka, uSathane wayefuna ukuba labo abasebandleni bangayithetheleli—babe nokhahlo kangangokuba bangayamukeli ebandleni. Ngesikhathi esifanayo, uSathane wayefuna le ndoda ephendukile icabange ukuthi uJehova akasoze ayithethelela—‘inqotshwe ukudabuka ngokweqile,’ ize iyeke ukukhonza uJehova. USathane akakawushintshi umgomo wakhe noma amaqhinga akhe. Kodwa “asibona abangenalwazi ngamacebo akhe.”—2 Kor. 2:​5-11.

6. Singayithola kanjani impumuzo ekuhlushweni umuzwa wecala?

⁶ Ngokwamukela intethelelo kaJehova, singathola impumuzo ekuhlushweni umuzwa wecala. Lapho sona, siba nomuzwa wecala. (IHu. 51:17) Yinto enhle leyo. Unembeza wethu ungasenza sithathe izinyathelo ezifanele ukuze silungise izindlela zethu, senze okulungile. (2 Kor. 7:​10, 11) Nokho, uma siqhubeka sinomuzwa wecala isikhathi eside ngemva kokuba sesiphendukile esonweni sethu, singase silingeke ukuba siyeke ukukhonza uJehova. Lapho samukela ukuthi uJehova usithethelele, singayeka ukuba nomuzwa wecala. Ngemva kwalokho, singakwazi ukukhonza uJehova ngendlela afuna simkhonze ngayo—ngonembeza ohlanzekile nangenjabulo enkulu. (Kol. 1:​10, 11; 2 Thim. 1:3) Pho singayenza kanjani inhliziyo yethu yamukele ukuthi uNkulunkulu usithethelele?

YINI ENGASISIZA SAMUKELE INTETHELELO KAJEHOVA?

7-8. UJehova wazichaza kanjani kuMose, futhi lokho kusiqinisekisa ngani? (Eksodusi 34:​6, 7)

⁷ Cabanga ngendlela uJehova azichaze ngayo. Ngokwesibonelo, phawula lokho uJehova akusho kuMose eNtabeni iSinayi.a (Funda u-Eksodusi 34:​6, 7.) Kuzo zonke izinto uJehova ayengazisho ngezimfanelo zakhe nezindlela zakhe, wakubona kufaneleka ukuba azichaze ‘njengoNkulunkulu onesihe nozwela.’ Ingabe uNkulunkulu onjalo ubeyomgodlela intethelelo yini umkhulekeli wakhe ophenduke ngempela esonweni sakhe? Ubengeke alokothe akwenze lokho! Ukwenza kanjalo bekuyosho ukuthi akanasihe futhi unenhliziyo elukhuni—okuyisimo sengqondo uJehova angasoze asibonisa.

⁸ Singaqiniseka ukuthi uJehova akasoze enza ngendlela ehlukile kunaleyo azichaza ngayo, ngoba unguNkulunkulu weqiniso. (IHu. 31:5) Ngakho singakukholwa lokho akushoyo. Uma ukuthola kunzima ukuyeka ukuba nomuzwa wecala ngenxa yezono owazenza esikhathini esidlule, zibuze: ‘Ngiyakukholelwa yini ukuthi uJehova unesihe nozwela ngempela futhi ngeke ahlale angasithetheleli noma yisiphi isoni esiphendukile? Uma ngikukholelwa lokho akufanele yini ngikwamukele ukuthi nami ungithethelele?’

9. Kusho ukuthini ukuthethelelwa kwezono zethu? (IHubo 32:5)

⁹ Zindla ngalokho uJehova aphefumulela ababhali beBhayibheli ukuba bakusho ngentethelelo yakhe. Ngokwesibonelo, cabanga ngendlela umbhali weBhayibheli uDavide ayichaza ngayo intethelelo kaJehova. (Funda iHubo 32:5.) UDavide wathi:“Wena wasithethelela isono sami.” Igama lesiHebheru elihunyushwe ngokuthi “thethelela” lingasho “ukuphakamisa,” “ukususa” noma “ukuthwala.” Lapho ethethelela uDavide, kwakunjengokungathi uJehova ususe umthwalo osindayo ayewuthwele. UDavide wabe esethola impumuzo ekuhlushweni umuzwa wecala owawufana nomthwalo osindayo kuye. (IHu. 32:​2-4) Nathi singathola impumuzo efanayo. Lapho siphenduka ngobuqotho ezonweni zethu, akudingeki siqhubeke sithwele umthwalo osindayo, owukuhlushwa umuzwa wecala ngenxa yezono zethu, uJehova asuke esewuphakamisile wawususa kithi.

10-11. Amazwi athi “uhlale ukulungele ukuthethelela” asitshelani ngoJehova? (IHubo 86:5)

¹⁰ Funda iHubo 86:5. Lapha uDavide uthi uJehova ‘uhlale ekulungele ukuthethelela.’ Ikhuluma ngala mazwi kaDavide, enye incwadi ehlaziya iBhayibheli ithi ngoJehova: “[UNkulunkulu] ‘uyathethelela’—‘unjalo nje.’” Kungani uJehova enguNkulunkulu othethelelayo? Ingxenye elandelayo yaleli vesi iyachaza: “Uthando lwakho oluqotho kubo bonke abakubizayo luyachichima.” Njengoba sifundile esihlokweni esidlule, uthando oluqotho lwenza uJehova abathande ngokujulile abakhulekeli bakhe abathembekile futhi lolo thando alusoze lwaphela. Ngenxa yothando lwakhe oluqotho, ‘uyozithethelela ngokukhululekile’ zonke izoni eziphendukayo. (Isaya 55:​7, mbhw.) Uma ukuthola kunzima ukwamukela intethelelo kaNkulunkulu, ungase uzibuze: ‘Ngiyakukholelwa yini ukuthi uJehova uyathethelela—ukuthi uhlale ekulungele ukuthethelela bonke labo abaphendukayo abamcela ukuba ababonise isihe? Akufanele yini-ke ngamukele ukuthi wangithethelela ngesikhathi ngikhala kuye ngimcela ukuba angibonise isihe?’

¹¹ Kungasiduduza ukwazi ukuthi uJehova ukuqonda ngokuphelele ukuthi sinesono. (IHu. 139:​1, 2) Lokhu kuvezwe ngokucacile kwelinye ihubo likaDavide, nalo elingasisiza samukele intethelelo kaJehova.

UNGAKUKHOHLWA LOKHO UJEHOVA AKUKHUMBULAYO

12-13. NgokweHubo 103:​14, yini uJehova ayikhumbulayo ngathi, futhi lokho kumenza asiphathe kanjani?

¹² Funda iHubo 103:14. UDavide uthi uJehova ‘uyakhumbula ukuthi siluthuli.’ Ngalawo mazwi, uDavide uchaza esinye sezizathu esenza uJehova akulungele ukuthethelela abakhulekeli bakhe abaphendukayo: Uyazi ukuthi sinesono. Ukuze sikuqonde kangcono lokhu, ake sihlole amazwi kaDavide.

¹³ UDavide uthi uJehova “uyakwazi ukwakheka kwethu.” Wabumba u-Adamu “ngothuli lomhlabathi” futhi uyazi ukuthi abantu benziwe kanjani nokuthi yini abayidingayo—ngokwesibonelo, kudingeka badle, balale, baphefumule. Ngisho nabantu abangenasono bayazidinga lezi zinto. (Gen. 2:7) Kodwa ngenxa yokuthi u-Adamu no-Eva bona, ukwenziwa ngothuli kwasho nokuthi sizalwa sinesono futhi kumele silwe nesifiso sokwenza izinto ezingalungile. Njengenzalo yabo, sazuza isono njengefa esisenza sithambekele ekwenzeni izinto ezingalungile. UJehova akagcini nje ngokwazi ukuthi sinesono; uDavide uthi uJehova ‘uyakhumbula’ ukuthi sinesono. Igama lesiHebheru elisetshenziswe lapha lingasho ukuthatha isinyathelo esihle. Singase sifingqe incazelo yamazwi kaDavide ngale ndlela: UJehova uyaqonda ukuthi ngezinye izikhathi siyowenza amaphutha; lapho lokho kwenzeka, usibonisa isihe futhi asithethelele uma ebona ukuthi siphenduke ngempela.—IHu. 78:​38, 39.

14. (a) UDavide uyichaza kanjani indlela uJehova asithethelela ngayo? (IHubo 103:12) (b) Isibonelo sikaDavide siyibonisa kanjani indlela uJehova asithethelela ngayo ngokuphelele? (Bheka ibhokisi elithi “Indlela UJehova Athethelela Ngayo Izono Zethu Futhi Azikhohlwe.”)

¹⁴ Inkulu kangakanani intethelelo kaJehova? (Funda iHubo 103:12.) UDavide uthi lapho uJehova esithethelela, izono zethu uzibeka kude le “njengokuqhelelana kwempumalanga nentshonalanga.” Impumalanga nentshonalanga kuhlale kuqhelelene kakhulu; lezo zindawo ezimbili azisoze zahlangana. Lokho kusitshelani ngezono uJehova azithethelelayo? Enye incwadi echaza leli vesi ikufanisa ngale ndlela: “Uma isono sibekwa kude kangako, singaqiniseka ukuthi kumele ukuba inkumbulo yaso isuke ingasekho ngokuphelele. Lokhu kusho ukuthi lapho uJehova ethethelela izono zethu kunjengokungathi uziqhelisa kude kakhulu nathi. Uziqhelisa kude kangangokuba ayikho into eyomenza aphinde acabange ngezono zethu noma asikhumbuze zona noma asisole ngazo noma asijezise ngazo.”—Hez. 18:​21, 22; IzE. 3:19.

15. Yini esingayenza uma silokhu sihlushwa umuzwa wecala ngenxa yamaphutha esawenza esikhathini esidlule?

¹⁵ Amazwi kaDavide atholakala kumaHubo 103 angasisiza kanjani ukuba samukele intethelelo kaJehova? Uma silokhu sihlushwa umuzwa wecala ngenxa yezono esazenza esikhathini esidlule, singase sizibuze: ‘Ngiyakukhohlwa yini lokho uJehova akukhumbulayo—okuwukuthi, ngiyakhohlwa yini ukuthi uyazi ukuthi nginesono futhi uzosithethelela isoni esiphendukayo esinjengami? Ngiyakukhumbula yini nalokho uJehova akhetha ukukukhohlwa—okuwukuthi, ngiyazikhumbula yini izono asengithethelele zona nangasoze aphinde angisole ngazo noma angijezisele zona?’ UJehova akagxili ezonweni esazenza esikhathini esidlule. Nathi akufanele sigxile kuzo. (IHu. 130:3) Lapho samukela intethelelo kaJehova, siyokwazi ukuzithethelela ngamaphutha esawenza esikhathini esidlule, siqhubeke sikhonza uJehova ngenjabulo.

16. Fanekisa ubungozi bokuqhubeka sinomuzwa wecala ngenxa yezono esazenza esikhathini esidlule. (Bheka nesithombe.)

¹⁶ Cabanga ngalesi sibonelo. Ukuqhubeka ulokhu unomuzwa wecala ngenxa yezono zangesikhathi esidlule kufana nokuzama ukushayela imoto ulokhu ubheka isibuko esikubonisa ngemuva. Kuhle ukusibheka leso sibuko ngezikhathi ezithile; ungakwazi ukugwema izingozi ezingaqhamuka ngemva kwakho. Kodwa ukuze uye phambili ngokuphepha, kumele ugxile emgwaqweni ophambi kwakho. Ngendlela efanayo, kungaba wusizo ukucabanga ngamaphutha esawenza esikhathini esidlule ngezikhathi ezithile; singafunda kuwo futhi sizimisele nakakhulu ukuba singawaphindi. Kodwa uma silokhu sigxile kuwo, umuzwa wecala ungasivimbela ukuba sikhonze uNkulunkulu ngendlela ebesingamkhonza ngayo manje. Kunalokho, kwangathi singaqhubeka sigxile emgwaqweni ophambi kwethu. Sisendleleni eya ekuphileni ezweni elisha uNkulunkulu asithembise lona, lapho ‘singeke sisazikhumbula’ khona izinkumbulo ezimbi.—Isaya 65:17; IzAga 4:25.

QHUBEKA UQINISEKISA INHLIZIYO YAKHO

17. Kungani kudingeka siqhubeke siqinisekisa izinhliziyo zethu ukuthi uJehova uyasithanda futhi uhlale ekulungele ukusithethelela?

¹⁷ Kudingeka siqhubeke siqinisekisa izinhliziyo zethu ukuthi uJehova uyasithanda futhi uhlale ekulungele ukusithethelela. (1 Joh. 3:19) Kungani? Kungenxa yokuthi uSathane ngeke ayiyeke imizamo yakhe yokusenza sikholelwe ukuthi uJehova akasithandi futhi akasoze asithethelela. Kunoma yikuphi, umgomo wakhe uyafana—ufuna ukusenza siyeke ukukhonza uJehova. Singalindela ukuthi uSathane uyokwenza ngezinga elikhulu lokho ngoba uyazi ukuthi unesikhathi esifushane. (IsAm. 12:12) Akumele simvumele ukuba anqobe!

18. Yini ongayenza ukuze uqinisekise inhliziyo yakho ukuthi uJehova uyakuthanda futhi uhlale ekulungele ukukuthethelela?

¹⁸ Ukuze uqiniseke nakakhulu ukuthi uJehova uyakuthanda, sebenzisa amacebiso okukhulunywe ngawo esihlokweni esidlule. Ukuze uqinisekise inhliziyo yakho ukuthi uJehova ukuthethelele, cabanga ngendlela uJehova azichaze ngayo. Zindla ngalokho aphefumulela ababhali beBhayibheli ukuba bakusho ngentethelelo yakhe. Ungakhohlwa ukuthi uyaqonda ukuthi unesono futhi uzokubonisa isihe. Khumbula nokuthi lapho ethethelela, uthethelela ngokuphelele. NjengoDavide owayeqiniseka ngesihe sikaJehova, nawe uyokwazi ukusho ngokuqiniseka ukuthi, “Ngiyabonga Jehova ngokuthethelela ‘isono sami’!”—IHu. 32:5.