Isimemo Esiqondile
1. Uzoqala nini umkhankaso wokumemela abantu emhlanganweni wesifunda?
1 Uma ubuhlelela umndeni noma abangane isidlo esikhethekile, esidinga umzamo omkhulu nemali eningi ukusilungiselela, cishe ubuyoba nomdlandla lapho ubamema. Ngokufanayo, kwenziwe umsebenzi omningi ukuze kulungiselelwe idili elingokomoya esizoba nalo emhlanganweni wesifunda ozayo. Emasontweni amathathu ngaphambi komhlangano wethu, uJehova usinika ilungelo lokumemela abanye kulo mhlangano. Yini ezosisiza sihambise izimemo ngentshiseko?
2. Yini ezosishukumisela ukuba sihlanganyele ngokugcwele kulo mkhankaso?
2 Ukwazisa indlela esizuza ngayo emfundweni eqabulayo uJehova asilungiselela yona emihlanganweni yethu kuzosishukumisela ukuba sihlanganyele ngokugcwele kulo mkhankaso. (Isaya 65:13, 14) Kufanele sikhumbule nokuthi umkhankaso wethu waminyaka yonke uba nemiphumela emihle. (Bheka ibhokisi elithi “Uba Nemiphumela Emihle.”) Abanye abantu esibamemayo bazoba nathi emhlanganweni nakuba abanye bengeke. Nokho, kungakhathaliseki ukuthi bangaki abazosabela, ukuzikhandla kwethu phakathi nalo mkhankaso kudumisa uJehova futhi kubonisa umusa wakhe.—IHu. 145:3, 7; IsAm. 22:17.
3. Zizosakazwa kanjani izimemo?
3 Zonke izindikimba zabadala kufanele zizinqumele ukuthi zingazisakaza kanjani izimemo kabanzi, kuhlanganise nokuthi kumelwe yini zishiywe emizini engenabantu noma zihanjiswe lapho kufakazwa obala ensimini yebandla. Ngezimpelasonto omagazini kufanele bahanjiswe nezimemo lapho kufaneleka. Lapho usuphelile lo mkhankaso, yeka ukuthi siyojabula kanjani ngokuthi sihlanganyele ngentshiseko kuwo nokuthi baningi abantu abahlanganyele nathi kuleli dili elingokomoya esililungiselelwe uJehova!