Shumayela Unomuzwa Wokuphuthuma!
1. Isiphi iseluleko sikaPawulu esidinga ukunakwa osukwini lwethu?
1 “Shumayela izwi, ube kulo unomuzwa wokuphuthuma.” (2 Thim. 4:2) Kungani lesi seluleko sikaPawulu sibaluleke kangaka osukwini lwethu? La mazwi angakuthinta kanjani ukuphila kwethu nokwabanye?
2. Kungani sikukhuthalele ukufuna labo abangakazizwa izindaba ezinhle?
2 Ukuphila Kuhilelekile: Izigidi zabantu emhlabeni jikelele zidinga ukuzwa izindaba ezinhle ezingaholela ensindisweni. (Roma 10:13-15; 1 Thim. 4:16) Baningi abanhliziyo ziqotho abaye batholakala ensimini esetshenzwa njalo. Uma siya ngezinsuku ezihlukahlukene noma ngezikhathi ezingafani phakathi nosuku, singase sithole omunye umuntu. Lokhu kufuna ngenkuthalo kungasishiya sinonembeza ohlanzekile futhi singenalo icala legazi.—IzE. 20:26.
3. Singasisebenzisa kanjani isikhathi sethu ngokuhlakanipha enkonzweni?
3 Nakuba ayebhekene nokuphikiswa okunobudlova, amaKristu ekhulu lokuqala ‘agcwalisa iJerusalema lonke ngemfundiso yawo.’ (IzE. 5:28) Ingabe nathi sizimisele ‘ukunikeza ubufakazi obuphelele’ ngendlela efanayo? (IzE. 10:42) Lapho sisenkonzweni, ingabe sisisebenzisa ngokuhlakanipha isikhathi? Uma sisalinde abanye abenza izimpindelo, ingabe sithatha isinyathelo sokukhuluma nabantu abadlulayo?
4. Ukushumayela ngokuphuthuma kusisiza kanjani ekuhlaleni sisangulukile?
4 Kusenza Siphaphame Kakhudlwana: Njengoba isiphelo sesimiso sezinto sesisemnyango, kufanele sihlale siphapheme, sizigcine sisangulukile. (1 Thes. 5:1-6) Uma sihlale sikhuluma ngethemba lethu loMbuso, sigwema ukusindwa yilesi simiso sezinto. (Luka 21:34-36) Ngakolunye uhlangothi, njengoba sigcina usuku lukaJehova ‘luseduze engqondweni,’ sishukunyiselwa ukuba sandise ingxenye yethu emsebenzini wokushumayela osindisa ukuphila.—2 Pet. 3:11, 12.
5. Inhlonipho yethu ngokuphila isishukumisa kanjani enkonzweni?
5 Lapho sishumayela ngokuphuthuma, siveza umbono kaJehova ngokuphila: “Akafisi ukuba kubhubhe namunye kodwa ufisa ukuba bonke baphenduke.” (2 Pet. 3:9; Hez. 33:11) Sengathi singazimisela ukuthola abaningi ngangokunokwenzeka ensimini yethu, konke kube udumo kuJehova!—IHu. 109:30.