Hlakanipha—Funa “Ukuqondisa Okunekhono”
Ukuphila kuye kwafaniswa nohambo lwasolwandle. Nokho, ukuhlakanipha kwabantu kaningi kubonakale kulinganiselwe ekusizeni abantu ukuba baphumelele kulolu hambo lokuphila. Abaningi baye baphukelwa umkhumbi ezivunguvungwini zokuphila. (IHu. 107:23, 27) Kungani lesi sifaniso sifaneleka?
Endulo, ukuhamba olwandle kwakuyinselele eyayidinga ukuba ube nokuhlangenwe nakho. Kwakuyikhono elalivame ukufundwa ematilosini angomakad’ ebona, mhlawumbe kukaputeni. (IzE. 27:9-11) Imidwebo eminingi yasendulo igcizelela ukubaluleka kwendima kakaputeni ngokumveza eyisidlakela kunabanye. Ukuhamba olwandle kwakudinga ukuba abahamba olwandle bafunde ngezinkanyezi, umoya nezinye izinto ezazibasiza bazi ukuthi bakuphi. IBhayibheli lichaza amatilosi athile ‘njenganekhono,’ lisebenzisa igama elingase lisho “ukuhlakanipha.”—Hez. 27:8.
Ukubhekana nezinkinga zokuphila namuhla kungabonakala kunzima kakhulu njengokuhamba olwandle ezikhathini zasendulo. Yini engasisiza?
SINGAKUTHOLA KANJANI “UKUQONDISA OKUNEKHONO”?
Unalesi sifaniso engqondweni esifanisa ukuphila nohambo lwasolwandle, cabangela leli qiniso leBhayibheli: “Umuntu ohlakaniphile uyolalela amukele imfundo eyengeziwe, nomuntu onokuqonda nguye ozuza ukuqondisa okunekhono.” (IzAga 1:5, 6) Igama lesiHebheru elihunyushwe ngokuthi “ukuqondisa okunekhono” lingase lichaze izenzo zomphathi womkhumbi wasendulo. Linomqondo wokukwazi ukuhola nokuqondisa ngekhono.
Nakuba kudinga umzamo, singakuthola “ukuqondisa okunekhono” futhi sifunde “ukuhamba” ngokuphumelelayo olwandle lokuphila. Njengoba izAga zibonisa, kumelwe sivumele “ukuhlakanipha,” “ukuqonda” ‘nokuqondisisa’ kusebenze ndawonye. (IzAga 1:2-6; 2:1-9) Kumelwe sizikhandle sifune ukuqondisa kukaNkulunkulu ngoba ngisho nababi bangakwazi ‘ukuqondisa’ kodwa bekwenza ngezinjongo ezimbi.—IzAga 12:5.
Ngakho-ke, kubalulekile ukuba sibe ngabafundi abakhuthele beZwi likaNkulunkulu. Ngokwenzenjalo, singathola ulwazi oluyigugu ngoJehova nangalowo ombonakalisa ngendlela engcono kakhulu, uJesu Kristu. (Joh. 14:9) Emihlanganweni yobuKristu sithola izeluleko eziningi ezihlakaniphile. Ngaphezu kwalokho, singafunda kokuhlangenwe nakho kwabanye, kuhlanganise nokwabazali bethu.—IzAga 23:22.
CABANGA KUSENGAPHAMBILI FUTHI UHLELE
“Ukuqondisa okunekhono” kubaluleke ngokukhethekile lapho ngokomfanekiso sizithola sisolwandle oluthukuthele. Ukungaqiniseki ngalokho okumelwe sikwenze esimweni esibucayi kungasikhwantabalisa futhi kuphumele enhlekeleleni.—Jak. 1:5, 6.
Kuyathakazelisa ukuthi igama elihunyushwe ngokuthi “ukuqondisa okunekhono” liyasetshenziswa ngokubhekiselwe nasempini. Siyafunda: “Ngokuqondisa okunekhono [ngokusebenzisa amasu ahlelwe ngekhono, i-Revised English Bible] uyokulwa impi yakho, futhi ngobuningi babeluleki kukhona insindiso.”—IzAga 20:18; 24:6.
Njengomhleli wempi, senza kahle ngokuzicabangela kusengaphambili izinto ezingaba ingozi engokomoyeni lethu. (IzAga 22:3) Ngokwesibonelo, kungase kudingeke unqume ukuthi uwamukele yini umsebenzi omusha noma isikhundla emsebenzini. Ngokulindelekile, uyocabangela iholo, isikhathi ozosichitha lapho uya noma ubuya emsebenzini, nezinye izinto. Nokho, kunamanye amaphuzu okumelwe uwakhumbule: Ingabe lolu hlobo lomsebenzi luzovumelana nezimiso zeBhayibheli? Izikhathi zokusebenza, njengamashifu, ziyoyithinta kanjani imisebenzi yami yobuKristu?—Luka 14:28-30.
ULoretta, ongomunye woFakazi BakaJehova, wayesebenza kahle enkampanini yokudla. Lapho inkampani isizothutha, wathenjiswa isikhundla esiphakeme kuleyo ndawo entsha futhi abaphathi benkampani bathi kuye: “Leli yithuba elingandele muntu futhi sesitholile nokuthi likhona neHholo LoMbuso eduze.” Kodwa uLoretta wayefuna ukwenza ukuphila kwakhe kube lula ukuze akhonze uMdali ngokugcwele. Wabona ukuthi umsebenzi omusha wawuyomshiya enesikhathi esincane semisebenzi yobuKristu. Ngakho wesula emsebenzini, yize umphathi wenkampani amtshela ukuthi wayewukuphela kwesisebenzi ababengethande neze ukulahlekelwa yiso. ULoretta, osekhonze njengephayona elivamile iminyaka engaba ngu-20, uyaqiniseka ukuthi imiphumela emihle ayithola yayihlobene ngokuqondile nokuhlela kwakhe ‘ngokuqondisa okunekhono,’ yebo, ngokuvumelana neseluleko esiseZwini likaNkulunkulu. Waqinisa ubuhlobo bakhe noJehova futhi uye waba nelungelo lokusiza abaningi ukuba bamukele iqiniso leBhayibheli.
Ngokuqinisekile, “ukuqondisa okunekhono” kuyadingeka emkhayeni. Ukukhulisa izingane kuwumsebenzi othatha isikhathi eside futhi lokho esikukhethayo ngokuphathelene nezinto ezingokomoya noma ezingokwenyama kunomthelela ekusaseni lawo wonke umkhaya. (IzAga 22:6) Ngokwesibonelo, abazali abangamaKristu bangase bazibuze: ‘Ingabe izingxoxo nesibonelo sethu kufundisa izingane zethu amagugu angokomoya ayozisiza ukuba zenze ngokuhlakanipha lapho sezikhulile? Ingabe indlela yethu yokuphila izisiza ukuba ziqonde ukuthi zinganeliseka kanjani ngokuphila okulula nangokugxila enkonzweni yazo yobuKristu?’—1 Thim. 6:6-10, 18, 19.
Impumelelo yangempela ayinqunywa imigomo yezinto ezibonakalayo noma izikhundla okuyizinto ezivame ukuphishekelwa yizwe. INkosi uSolomoni yayikuqonda lokhu. Yaphefumulelwa ukuba ibhale: “Kuyobahambela kahle labo abesaba uNkulunkulu weqiniso, ngoba babemesaba.” (UmSh. 8:12) Ngokuqinisekile, lokho kufakazela ukuthi kuwukuhlakanipha ukufuna “ukuqondisa okunekhono” okusekelwe futhi okuvumelana neZwi likaNkulunkulu.—2 Thim. 3:16, 17.
[Isithombe ekhasini 30]
Ukuze kugcizelelwe indima yabo, okaputeni babevame ukuvezwa beyizidlakela kunamanye amatilosi
[Umthombo]
Su concessione del Ministero per i Beni e le Attività Culturali. It is forbidden to reproduce or duplicate this image in any way or by any means.