Umhlangano Oyingqophamlando

“EKUPHELENI kwalo mhlangano nizothi, ‘Lo mhlangano ongokwasezulwini waminyaka yonke ubuqopha umlando ngempela!’” Ngala mazwi, uStephen Lett oyilungu leNdikimba Ebusayo YoFakazi BakaJehova wakha ukulangazela okukhulu ezilalelini eziningi. Zazibuthanele umhlangano waminyaka yonke we-126 we-Watch Tower Bible and Tract Society of Pennsylvania, owawungo-October 2, 2010 eHholo LoMhlangano LoFakazi BakaJehova eliseJersey City, eNew Jersey, e-U.S.A. Imaphi amanye amaphuzu avelele alesi senzakalo esiyingqophamlando?

Inkulumo yokuvula kaMfoweth’ uLett kwakuyingxoxo eshukumisayo ngenqola kaJehova yasezulwini echazwe encwadini yeBhayibheli kaHezekeli. Le nqola enkulu nekhazimulayo ifanekisela inhlangano kaNkulunkulu, eqondiswa uJehova ngokuphelele. UMfoweth’ uLett wathi ingxenye yayo esezulwini, eyakhiwa izidalwa zomoya, ihamba ngejubane lombani—ijubane lemicabango kaJehova. Ingxenye esemhlabeni yale nhlangano kaJehova uNkulunkulu nayo ayimile. UMfoweth’ uLett wakhuluma ngezenzakalo ezithakazelisayo ezenzeka engxenyeni ebonakalayo yenhlangano kaNkulunkulu kule minyaka yamuva.

Ngokwesibonelo, amagatsha amaningana ayahlanganiswa, okuyokwenza ukuba abaningi abebekhonza emakhaya aseBethel kulawo mazwe bagxile emsebenzini wokushumayela. UMfoweth’ uLett wanxusa izilaleli ukuba ziqhubeke zithandazela iNdikimba Ebusayo, engabameleli besigaba senceku, ukuba iqhubeke ibonisa ukwethembeka nobuhlakani, noma ukuqonda.—Math. 24:45-47.

Imibiko Nezingxoxo Ezikhuthazayo

UTab Honsberger, oyilungu leKomiti Yegatsha eHaiti, wanikeza umbiko othinta inhliziyo ngokwenzeka ngemva kokuzamazama komhlaba kwango-January 12, 2010, okwabulala abantu abangaba ngu-300 000 kulelo zwe. Waphawula ukuthi abefundisi bebelokhu betshela abantu ukuthi abantu abafa uNkulunkulu wayebajezisele ukungabi nalukholo, wavikela abalungile. Kuyindida lokhu ngoba izinkulungwane zezigebengu ezazisejele zakhululeka lapho izindonga zalo zibhidlizwa ukuzamazama komhlaba. Ngakho, iningi labantu baseHaiti abanhliziyo-ziqotho lithola induduzo lapho lifunda iqiniso ngokuthi kungani izikhathi esiphila kuzo zinezinkinga kangaka. UMfoweth’ uHonsberger wathi omunye umzalwane othembekile waseHaiti owashonelwa umkakhe kuleyo nhlekelele uthi: “Nanamuhla ngisakhala. Angazi ukuthi ngiyoqhubeka ngilila kuze kube nini, kodwa ngiyajabula ngothando engiluboniswa inhlangano kaJehova. Nginethemba futhi ngizimisele ukulihlanganyela nabanye.”

UMark Sanderson, manje oyilungu lomkhaya waseBethel eBrooklyn, wanikeza umbiko ngelasePhilippines. Njengoba ayeke waba ilungu leKomiti Yegatsha kulelo zwe, wayechichima injabulo lapho echaza ukuthi leli zwe libe namanani abamemezeli boMbuso aphakeme angu-32 alandelanayo nokuthi inani lezifundo zeBhayibheli lilidlula kude elabamemezeli bakulelo zwe. Wakhuluma ngoMiguel, umzalwane omzukulu wakhe wayebulewe. UMiguel wasebenza kanzima ukuze kushushiswe futhi kuboshwe umbulali. Kamuva, lapho efakaza ejele, wahlangana nalo mbulali. Nakuba ayethukile, wakhuluma naye kahle nangomusa. Ekugcineni wayiqhubela isifundo le ndoda, yasabela kahle futhi yagcina isimthanda uJehova. Manje isibhapathiziwe. UMiguel usengumngane omkhulu wale ndoda futhi manje uzama ukumsiza lo mfowabo omusha ukuba asheshe aphume ejele.a

Kwabe sekulandela izingxoxo zokwazi abathile kangcono ezaziqhutshwa uMark Noumair, ongomunye wabafundisi eMnyango Wezikole Ezingokwasezulwini. Waxoxa nemibhangqwana emithathu—Alex noSarah Reinmueller, uDavid noKrista Schafer, noRobert noKetra Ciranko. U-Alex Reinmueller, ongumsizi eKomitini Yokunyathelisa, wakhuluma ngendlela alenza ngayo iqiniso laba elakhe lapho ephayona eCanada eneminyaka engu-15 kuphela ubudala, evame ukusebenza yedwa. Lapho ebuzwa ukuthi ubani owaba nethonya elikhulu kuye eBethel, uMfoweth’ uReinmueller wakhuluma ngamadoda amathathu athembekile, wabonisa indlela ngayinye yawo eyamsiza ngayo ukuba akhule ngokomoya. Umkakhe, uSarah, wakhuluma ngobungane bakhe nodade othile owakhuthazela amashumi eminyaka emajele aseShayina eboshelwe ukholo lwakhe. USarah wathi wayefunde ukuncika kuJehova ngomthandazo.

UDavid Schafer, ongumsizi eKomitini Yokufundisa, wancoma ukholo oluqinile unina ayenalo, wakhuluma nangabazalwane ababesebenza ezingodweni abamsiza lapho esemncane ukuba abe iphayona elisizayo. Umkakhe, uKrista, wayechichima injabulo lapho ekhuluma ngethonya amalungu omkhaya waseBethel asekhulile aba nalo kuye ikakhulu lawo ‘ayethembekile kokuncane kakhulu,’ njengoba nje uJesu ayala.—Luka 16:10.

URobert Ciranko, ongumsizi eKomitini Yokubhala, walandisa ngabazali babazali bakhe bobabili, ababedabuka eHungary futhi bengamaKristu agcotshiwe. Esengumfana, wayehlabeka umxhwele lapho esemihlanganweni yesigodi yangawo-1950 futhi yamenza wabona ukuthi inhlangano kaJehova yayinkulu kakhulu kunebandla lakubo. Umkakhe, uKetra, wakhuluma ngendlela afunda ngayo ubuqotho lapho ephayona ebandleni elalihlushwa izihlubuki nezinye izinkinga. Wakhuthazela futhi ekugcineni wabelwa ukuba akhonze njengephayona elikhethekile ebandleni elalinobunye obathinta inhliziyo yakhe.

Ngemva kwalokho kwalandela uManfred Tonak, wanikeza umbiko ngeTopiya. Leli zwe lalikhona ngisho nangezikhathi zeBhayibheli, futhi manje libusiswe ngabamemezeli bezindaba ezinhle abangaphezu kuka-9 000. Iningi labo lihlala enhloko-dolobha i-Addis Ababa noma eduze kwakhona. Ngakho, izindawo eziqhelelene nayo zidinga usizo olukhudlwana. Ukuze kunakekelwe lesi sidingo, kwamenywa oFakazi baseTopiya abahlala kwamanye amazwe, ukuba bavakashe bazoshumayela kwezinye zalezo zindawo eziqhelile. Beza ngobuningi, bakhuthaza oFakazi bendawo futhi bathola abantu abathakazelayo.

Okuvelele kulesi simiso kwaba uchungechunge olukhuluma ngoFakazi BakaJehova eRussia nangezimpi ezingokomthetho abazilwayo. U-Aulis Bergdahl oyilungu leKomiti Yegatsha laseRussia wakhuluma ngomlando wokushushiswa koFakazi eRussia, ikakhulu eMoscow. UPhilip Brumley osebenza eMnyango Wezomthetho egatsheni lase-United States wakhuluma ngezinto ezijabulisayo ezenzeke ezinyangeni zamuva lapho iNkantolo Yamalungelo Abantu YaseYurophu (ECHR) ilalele amacala angu-9 ayebekwe oFakazi. INkantolo yavumelana ngazwi linye ukuthi wonke la macala ayengenasisekelo, kwamaningi awo yaze yanikeza nezizathu ezenza ithi lokho okwakushiwo ngabo kwakungafanele. Nakuba kusazobonakala ukuthi lokhu kuzoba namiphi imiphumela, uMfoweth’ uBrumley wathi banethemba lokuthi isinqumo seNkantolo kula macala sizoba nomthelela emacaleni akwamanye amazwe.

Ngemva kwalezi zindaba ezijabulisayo, uMfoweth’ uLett wamemezela ukuthi i-ECHR ithe singalethula phambi kwayo icala lentela osekuyisikhathi eside liqhubeka, elihilela uhulumeni waseFrance noFakazi BakaJehova. Le Nkantolo ehlonishwa kakhulu yamukela amacala ambalwa kakhulu alethwa kuyona. I-ECHR isiqule amacala angu-39 ahilela oFakazi BakaJehova futhi kwangu-37 ikhiphe isinqumo esivuna thina. UMfoweth’ uLett wakhuthaza bonke abantu bakaNkulunkulu ukuba babeke le ndaba kuJehova uNkulunkulu ngomkhuleko.

Umbiko wokugcina wenziwa uRichard Morlan, umqondisi wensimu eSikoleni Sabadala Bamabandla. Wakhuluma ngomdlandla ngalesi sikole nangamazwi okwazisa avela kubadala asebeye kuso.

Ezinye Izinkulumo Ezanikezwa Amalungu ENdikimba Ebusayo

UGuy Pierce oyilungu leNdikimba Ebusayo wanikeza inkulumo ethinta inhliziyo eyayigxile esihlokweni sonyaka sika-2011 esithi, “Phephela egameni likaJehova.” (Zef. 3:12) Waphawula ukuthi nakuba lesi kuyisikhathi esijabulisa ngezindlela eziningi kubantu bakaJehova, kuyisikhathi futhi esibucayi nesifuna ukuba sisanguluke. Usuku olukhulu lukaJehova luseduze; nokho, abantu bayaqhubeka befuna isiphephelo enkolweni yamanga, ezinhlanganweni zezombusazwe, engcebweni, ekuzigcineni bengenalwazi ngokuqhubekayo ezweni nasezintweni ezifana nalezo. Ukuze sithole isiphephelo sangempela, kudingeka sibize igama likaJehova, okuhilela ukwazi, ukuhlonipha ngokujulile nokumethemba uMnikazi walelo gama futhi simthande ngayo yonke inhliziyo yethu.

UDavid Splane oyilungu leNdikimba Ebusayo walandela ngenkulumo eshukumisayo nethinta inhliziyo enesihloko esithi “Usungenile Yini Ekuphumuleni KukaNkulunkulu?” Waphawula ukuthi ukuphumula kukaNkulunkulu akusho ukungenzi lutho, ngoba uJehova neNdodana yakhe ‘bebelokhu besebenza’ phakathi nalolo suku lokuphumula olungokomfanekiso ukuze baphumelelise injongo kaNkulunkulu ngezinto azidalile emhlabeni. (Joh. 5:17) Pho-ke, singangena kanjani ekuphumuleni kukaNkulunkulu? Ngokwengxenye, impendulo yakhe yathi singangena ngokuyeka isono nemisebenzi esizitshela ukuthi isenza abalungile. Kudingeka sibonise ukholo futhi sihlale sicabanga ngenjongo kaNkulunkulu, senze noma yikuphi ukuzidela ngenxa yayo. Ngezinye izikhathi, lokho kungase kube inselele ngokukhethekile kodwa kudingeka samukele iseluleko futhi sibambisane nesiqondiso esivela enhlanganweni kaJehova. UMfoweth’ uSplane wanxusa izilaleli ukuba zenze konke ezingakwenza ukuze zingene ekuphumuleni kukaNkulunkulu.

Inkulumo yokugcina eyanikezwa u-Anthony Morris weNdikimba Ebusayo, yayinesihloko esithi “Yini Esiyilindele?” Ngomuzwa wokuphuthuma nangemfudumalo enjengekababa, uMfoweth’ uMorris wakhumbuza izilaleli ngeziprofetho okusadingeka zigcwaliseke nezenzakalo bonke abathembekile abazilindele ngokulangazela. Lezi zihlanganisa isimemezelo esithi “Ukuthula nokulondeka!” nokubhujiswa kwenkolo yamanga. (1 Thes. 5:2, 3; IsAm. 17:15-17) UMfoweth’ uMorris waxwayisa ngokuthi lapho sibona ezindabeni izenzakalo ezingagcwalisi lezi ziprofetho kumelwe sigweme ukuthi, “Yi-Armagedoni le.” Wasikhuthaza ukuba sibonise isimo sengqondo sokujabula, sesineke nesokulinda esichazwe kuMika 7:7. Nokho, ngesikhathi esifanayo, wasinxusa sonke ukuba ‘sisondelane’ neNdikimba Ebusayo, nathi ngokwethu sisondelane ngendlela okwenza ngayo amasosha uma engena lapho impi ishisa khona. Wathi: “Kwangathi inhliziyo yenu ingaqina, nonke nina enilindé uJehova.”—IHu. 31:24.

Ekuphetheni, kwanikezwa izaziso ezithile ezithakazelisayo neziyingqopha-mlando. UGeoffrey Jackson weNdikimba Ebusayo wamemezela ukuthi kunohlelo lwe-Nqabayokulinda efundwayo yesiNgisi esenziwe lula oluzozanywa, oluzosetshenziswa yilabo abanolwazi olulinganiselwe lwesiNgisi. UStephen Lett wamemezela ukuthi iNdikimba Ebusayo izohlela ukuba ababonisi bezigodi nomkabo, e-United States, bathole ukuhanjelwa kokweluswa. Ngemva kwalokho, wamemezela ukuthi iSikole Sokuqeqeshelwa Inkonzo sesizobizwa ngokuthi iSikole SeBhayibheli Sabazalwane Abangashadile. Wathi maduze kuzosungulwa esinye iSikole SeBhayibheli Semibhangqwana EngamaKristu. Lesi sikole siyonikeza imibhangqwana ukuqeqeshwa okwengeziwe ukuze isetshenziswe kakhudlwana enhlanganweni kaJehova. UMfoweth’ uLett wamemezela nokuthi iSikole Sababonisi Abajikelezayo Nomkabo neSikole Samalungu AmaKomiti Amagatsha Nomkabo sesizoba amakilasi amabili ngonyaka ePatterson futhi siyohlanganisa nalabo abake baya ngaphambili.

Lesi simiso saba nesiphetho esithinta inhliziyo lapho uJohn E. Barr, oneminyaka engu-97, oyilungu leNdikimba Ebusayo eselinesikhathi eside, enza umthandazo osuka enhliziyweni nobonisa ukuthobeka.b Bonke ababekhona bahamba benomuzwa wokuthi ngempela lolu bekuwusuku oluyingqopha-mlando.

[Imibhalo yaphansi]

[Amazwi acashunwe esihlokweni ekhasini 19]

Izingxoxo zokwazi abathile kangcono zajatshulelwa yibo bonke ababekhona

[Amazwi acashunwe esihlokweni ekhasini 20]

UJehova uye wawubusisa umsebenzi wokushumayela eTopiya