Imibiko Evelele Yonyaka Odlule

NAPHEZU kwezimo zezwe ezicindezelayo, oFakazi BakaJehova baye bajabulela omunye unyaka onezithelo enkonzweni yabo engcwele. Ngesibusiso sikaNkulunkulu, iqiniso lezindaba ezinhle ‘lithela izithelo futhi liyanda ezweni lonke.’ (Kol. 1:5, 6) Siyaqiniseka ngokuthi umbiko walo nyaka uzokukhuthaza futhi ukuqinise ukholo.

ILUNGISELELO ELISHA LAMAPHAYONA ASIZAYO

Kwaba nenjabulo enkulu lapho amaphayona asizayo enikezwa ithuba lokukhetha phakathi kokusebenza amahora angu-30 noma angu-50 ngo-April. Abaningi ababengakwazi ukuhlanganyela kulesi sici senkonzo ngaphambili balibamba ngazo zombili leli thuba. Izinkulungwane zabamemezeli zangena ezinhlwini zamaphayona asizayo okokuqala ngqá, futhi abaningi ababeke baphayona bakujabulela ukuphinde baphayone. Ngaphezu kwalokho, abamemezeli abaningi abangakwazanga ukuphayona benza umzamo wokwandisa inkonzo yabo. Waba yini umphumela?

Iningi lamagatsha labika ukwanda kwamanani okukudlula kude okweminyaka eyandulele. Emhlabeni wonke, bangu-2 657 377 abamemezeli ababa amaphayona asizayo—inani eliphindwe kahlanu kunelangonyaka owandulele! Amaphesenti angu-80 omkhaya waseBethel emhlabeni wonke—abazalwane nodade abangu-16 292 kwabangu-20 290—ahlanganyela kuleli lungelo lenkonzo. Akuthokozisi yini ukwazi ukuthi izinceku zikaJehova zenza umsebenzi omkhulu ekushumayeleni ngo-April kunezake zawenza kunoma iyiphi enye inyanga emlandweni?

Ngemva nje konyaka kube nokuzamazama komhlaba okwabulala abantu abangu-300 000 eHaiti, kwabikwa amanani aphakeme amasha emsebenzini wokushumayela ngo-April. Abamemezeli abangu-6 185 kwabangu-17 009 baba amaphayona asizayo. Umkhankaso okhethekile wokuhambisa incwajana ethi Lapho Ufelwa Othandekayo, esanda kukhululwa ngesiCreole saseHaiti, yanikeza abantu ababesosizini induduzo nethemba ababelidinga kakhulu.

Abafowethu nodadewethu baseNigeria babhekana nenselele engavamile ngo-April. Ngezinsuku ezine zokhetho (ezintathu kuzo kwakuyiMigqibelo), uhulumeni wathi abantu abangehli benyuka phakathi kuka-7:00 ekuseni no-5:00 ntambama ngaphandle kwabahanjiswa ukhetho. Ngisho kunjalo, umoya wokuphayona awuphelanga. “Sinibhalela ngenjabulo enkulu nezinhliziyo ezigcwele ukwazisa ngesikhathi esimnandi esibe naso kule nyanga,” kubhala elinye ibandla. Kwelinye, abamemezeli ababhapathiziwe abangu-92 kwabangu-127 baba amaphayona asizayo, kuhlanganise nabo bonke abadala nezinceku ezikhonzayo. EBethel, abangu-555 emkhayeni wabangu-688 baba amaphayona asizayo.

Bayinqoba Inselele. UJeannette, ohlala ezintabeni zaseBurundi, ubelokhu efisa ukuphayona, kodwa unesifo senhliziyo esimvimbela ukuba ahambe ibanga elide noma akhuphuke imimmango. Wajabula lapho ezwa ukuthi amahora alindeleke emaphayoneni asizayo ngo-April ancishisiwe. Ukuze bamsize anelise isifiso sakhe sokuphayona, abadala bamhlelela ukuba ashumayele ensimini eseduze kwakwakhe. Ngaphezu kwalokho, amaphayona nabamemezeli babeza nezifundo zabo kwakhe bafundele khona. Ekupheleni kwenyanga, uJeannette wayejabule ngoba wayeqale izifundo zeBhayibheli ezine. Uthi, “Ngingathanda ukuphinde ngiphayone futhi ngiyaqiniseka ngokuthi uJehova uzongisiza.”

Esiqhingini saseGrenada, intokazi eyisithulu yaphayona naphezu kokukhubazeka okwenza kube nzima ngayo ukuhamba. Ithi, “Kwakuyinselele ngempela ukuhamba ibanga elide ngiyogibela ibhasi ukuze ngiye ensimini.” Ngaphezu kwalokho, lo dade wayengasebenzi futhi wathandaza enxusa uJehova ukuba amsize. Ngokuvumelana nemithandazo yakhe, waziphilisa ngokuthengisa izinto ayezikhilosha nezinto zokuhloba ayezenza ngezandla. Wathi, “Ngihlanganyele ngokugcwele ekushumayeleni futhi ngikuzwile ukusekela nesikhuthazo sabafowethu. Kungenze ngajabula kakhulu!”

UToshi, udade waseJapane oneminyaka engu-101, wathatha ubuphayona obusizayo ngo-April ngaphandle kokuzindela. Nakuba engakwazi ukuphuma esakhiweni ahlala kuso, ushumayela ngokubhala izincwadi nangokuxoxa nabantu abamsizayo abeza egunjini lakhe. “Ngenxa yokuthi angizwa kahle,” kuchaza uToshi, “ngikhulumela phezulu. Ngakho nabanye abantu abaseduze bayangizwa.”

UFelix waseCosta Rica, okhubazeke imilenze nezingalo, wanquma ukuba iphayona elisizayo. Wayezophayona kanjani? Wabekelwa itafula ngaphandle komuzi wakhe ukuze ashumayeze abantu abadlula ngendlela. Ekupheleni kwenyanga wayekhandlekile kodwa eqabulekile ngokomoya futhi ejatshuliswe ukuqala izifundo zeBhayibheli ezine.

Abamemezeli abaningi abasha nabo babemagange ukuhlanganyela emsebenzini okhethekile ngo-April. Ngokwesibonelo, eSpain, uSandra oneminyaka engu-11 nomfowabo oneminyaka engu-7, u-Alejandro, babefuna ukwandisa inkonzo yabo. Beshukunyiswe intshiseko yebandla nesibonelo senkuthalo sabazali, baba nesifiso sokukhonza njengamaphayona asizayo. Nokho, babengakwenza kanjani njengoba bengabhapathiziwe? Bobabili babhala phansi isimiso sesikhathi ababezosichitha ensimini esilingana nesabazali, balungiselela inkonzo ngokuprakthiza izingeniso ngobusuku bokuKhulekela Komkhaya. Abazali babo babecabanga ukuthi bazokhathala phakathi nenyanga. Kodwa laba bamemezeli ababili abasha abazange. Ngo-April 30, umkhaya wonke wawusuwuhlanganisile umgomo wamahora angu-30, ngaphandle kuka-Alejandro, owayesadinga amathathu. Ngakho ngosuku lokugcina waphuma noyise ukuze awuhlanganise. Yeka indlela ababejabule ngayo ngokuba nesikhathi esimatasa nesanelisayo njengomkhaya onobunye!

“Ngangithandaza nsuku zonke,” kulandisa uJean, “ngicela ukuba mina nomyeni wami, uPhilip, sikwazi ukushumayela amahora angu-30.” Nokho uPhilip, owayeke wakhonza njengombonisi wesigodi kwaze kwaba yilapho ehlatshwa isifo sokuvuvukala kwemithambo yobuchopho, wayelaliswe esibhedlela saseSpain, engakwazi kunyakaza ngisho nakukhuluma. Ukuphela kwendlela ayekhuluma ngayo kwakuwukucwayiza, ecwayiza kanye uma ethi yebo, acwayize kabili uma ethi cha.

“Lapho ngimtshela ngokuba iphayona elisizayo,” kuqhubeka uJean, “watshengisa ukuthi naye angathanda ukuba yilo.” Kodwa wayezophayona kanjani?

Phakathi nezinyanga ezazandulele, uJean noPhilip babeshumayeze iziguli, izihlobo ezazivakasha nezisebenzi zasesibhedlela. “Ngo-April sahlela ukushumayela khona egunjini lasesibhedlela ihora elilodwa ngosuku lapho uPhilip engalele futhi engakwazi ukuhlanganyela engxoxweni ngokucwayiza.”

Nokho ngo-March, uPhilip wayiswa egunjini ayezoba yedwa kulo. Noma kunjalo, yena no-Jean bakwazi ukunamathela esimisweni sabo, baxoxa nezisebenzi zasesibhedlela imizuzu embalwa phakathi nosuku. Omunye wabahlengikazi owamukela incwadi ethi Lifundisani Ngempela IBhayibheli? wabheka uPhilip emehlweni wamthembisa ukuthi uzobuya ngakusasa azofunda imiBhalo. Lapho ebuya, uJean wamcela ukuba afunde uJohane 17:3, wamcela nokuba asho ukuthi umuzwa kanjani. Njengoba belokhu bexoxa, uPhilip wayebonisa ngokucwayiza ukuthi umhlengikazi unembile noma cha. Ngisho nalapho lo mhlengikazi engasebenzi egunjini likaPhilip, wayeza kuye amqinisekise ngokuthi uyamcela uJehova ukuba amsize asondele kuYe.

Izinceku zikaJehova zibheka lo msebenzi omkhulukazi njengendlela yokubonisa uthando ngomakhelwane, ukwazisa ngomhlatshelo kaJesu Kristu nokuzinikela kuYise osezulwini. Zibheke phambili ngokulangazela ku-March 2012, lapho zizophinde zithole ithuba lokusebenza amahora angu-30 noma angu-50.

IZIKOLE EZIFUNDISA IZINDLELA ZIKAJEHOVA

Inhlangano kaJehova iye yasithatha ngokungathí sina isiprofetho esilotshwe ku-Isaya 2:3: “Wozani sikhuphukele entabeni kaJehova, endlini kaNkulunkulu kaJakobe; uzosifundisa izindlela zakhe.” Ngokwesibonelo, ngesikhathi kuviva iMpi Yezwe II, isigaba senceku ethembekile neqondayo sabona ukuthi abantu bazo zonke izizwe basadinga ukufundiswa uJehova ngaphambi kokuphela kwesimiso sezinto sikaSathane. Ngakho, kwenziwa amalungiselelo okuqhuba izikole ezinjenge-Watchtower Bible School of Gilead neSikole Senkonzo Esingokwasezulwini. Muva nje, iNdikimba Ebusayo yenze ezinye izinguquko ezikoleni ezihlukahlukene eziqeqeshela amakhono akhethekile.

Ngo-October 2010, iSikole Sokuqeqeshela Inkonzo saqanjwa ngokuthi iSikole SeBhayibheli Sabazalwane Abangashadile. Abazalwane abangashadile abakhonza njengabadala nezinceku ezikhonzayo bazoqhubeka bebhalisa kulesi sikole esithatha izinyanga ezimbili. Kuze kube manje, bangu-37 445 abazuze kule mfundo emhlabeni wonke, abaningi bakhonza njengamaphayona, abajikelezi, izithunywa zevangeli namalungu aseBethel.

ISikole SeBhayibheli Semibhangqwana EngamaKristu esisha sezinyanga ezimbili saqala ngo-July 2011 futhi okwamanje siqhutshelwa ePatterson, eNew York. Imibhangqwana ekhuluma isiNgisi ingafanelekela ukubhalisa uma ineminyaka ephakathi kuka-25 no-50, inempilo enhle, isineminyaka okungenani emibili ishadile futhi ibisenkonzweni yesikhathi esigcwele eminyakeni emibili elandelanayo eyandulele futhi indoda isikhonze njengomdala noma inceku ekhonzayo iminyaka emibili elandelanayo. Kusukela ngo-2012, amakilasi eSikole SeBhayibheli Semibhangqwana EngamaKristu azoqhutshelwa ezindaweni manje ezisetshenziselwa iSikole SeBhayibheli Sabazalwane Abangashadile.

ISikole SeBhayibheli Semibhangqwana EngamaKristu siklanyelwe ukuqeqesha ngokukhethekile imibhangqwana eshadile ukuba isetshenziswe ngokugcwele uJehova nenhlangano yakhe. Iningi labaphothule kuso lizokhonza njengamaphayona avamile lapho kunendingeko enkulu khona ezweni lakubo. Nokho, idlanzana lizokwabelwa njengamaphayona akhethekile esikhashana, abanye baze baqeqeshelwe umsebenzi wokujikeleza. Abambalwa bangase banikezwe izabelo kwamanye amazwe uma befaneleka futhi bezenza batholakale.

Labo ababhalisela lesi sikole kufanele kube abantu abavuthiwe ngokomoya abanomoya wokuzidela. Abafundisi abafundisa eSikoleni SeBhayibheli Sabazalwane Abangashadile yibona abazofundisa kulesi sikole esisha, ngokuyinhloko befundisa izinto ezifanayo. Amakilasi ambalwa azoqhutshwa nabazalwane kuphela, omkabo baye ensimini. Ukwaziswa okwengeziwe nalokho okulindeleke kulabo abafisa ukubhalisa kuyonikezwa emihlanganweni eyoqhutshwa emihlanganweni yesigodi.

INdikimba Ebusayo yenze izinguquko kuyi-Watchtower Bible School of Gilead. Kusukela ekilasini le-132 elaqala ngo-October 24, 2011, kuzoqeqeshwa kuphela imibhangqwana kakade esenkonzweni ekhethekile yesikhathi esigcwele, njengezithunywa zevangeli ezingakayi eGileyadi, amaphayona akhethekile, abajikelezi namalungu aseBethel. Uma umbhangqwana ukwazi ukukhuluma nokubhala kahle isiNgisi, iKomiti Yegatsha ingagunyaza ukuba uye kuso.

Abaphothule eGileyadi bazonikezwa izabelo ezizoqinisa insimu futhi zikhuthaze ukuhleleka nasegatsheni njengezithunywa zevangeli, abajikelezi noma amalungu aseBethel. Labo abazokwabelwa ensimini bazosetshenziswa ezindaweni ezinabantu abaningi lapho bengafeza lukhulu khona ensimini nasebandleni. AmaKomiti Amagatsha angaqhubeka ebacela abaphothule eGileyadi uma kunesidingo esikhethekile ensimini akuyo. Angagunyaza nezikhonzi ezifanelekayo ezisenkonzweni ekhethekile yesikhathi esigcwele ensimini yegatsha akulo ukuba ziye eSikoleni SaseGileyadi. Kwezinye izimo, amaKomiti Amagatsha angacela ukuba labo abaye esikoleni baphindele kulelo zwe lapho bephothula.

ISikole Samalungu EKomiti Yegatsha Nomkawo sizoqhutshwa kabili ngonyaka ngesiNgisi ePatterson. Ngezinye izikhathi, kuzomenywa namalungu eKomiti Yezwe. Amalungu eKomiti Yegatsha aseke aya kulesi sikole azomenywa ukuba aphinde aye okwesibili futhi azokuya nabazalwane abazobe beqala ukuya kuso. Amakhosikazi amalungu eKomiti Yegatsha azokuya kwamaningi amakilasi nabayeni bawo. Nokho, amakilasi athile athinta izinqubo zenhlangano azoqhutshwa nabazalwane kuphela, omkabo banakekele izabelo ezihlukahlukene zaseBethel.

Ngaphezu kwalokho, kuzoqhutshwa amakilasi amabili eSikole Sababonisi Abajikelezayo Nomkabo ePatterson unyaka ngamunye. Amakilasi azoqhutshwa e-United States manje ahlanganisa abazalwane abake baya kuso ngaphambili; bakha ingxenye yekilasi ngalinye. Amakhosikazi ababonisi abajikelezayo azokuya kwamaningi amakilasi.

Abantu bakaNkulunkulu abajabuli yini ngokuzuza emfundweni evela uJehova? UJesu ngokwakhe wathi: “Kulotshiwe kubaProfethi ukuthi, ‘Bonke bayofundiswa uJehova.’” (Joh. 6:45; Isaya 54:13) Siyaqiniseka ngokuthi lezi zinguquko zizofaka umfutho emsebenzini ophuthumayo wokushumayela izindaba ezinhle emhlabeni wonke owakhiwe ngaphambi kokuba ukuphela kufike.

UKUZAMAZAMA KOMHLABA OKUKHULU EJAPANE

Imibiko yezindaba emhlabeni wonke isitshele ngezigigaba zezinhlekelele zemvelo ezihlanganisa ukuzamazama komhlaba, ama-tsunami, iziphepho, izivunguvungu, izikhukhula, imililo nokuqhuma kwezintabamlilo. Nakuba singenakuzilandisa zonke izinhlekelele zamuva, isibindi oFakazi BakaJehova ababhekana ngaso nobunzima obunjalo sibonakala kahle kubafowethu baseJapane.

EJapane, ngoLwesihlanu ngo-March 11, 2011, ngo-2:46 ntambama, kwaba nokuzamazama komhlaba okulinganiselwa ku-9,0. Ama-tsunami agadla ngemva kwalokho acekela phansi amadolobha nezindawo eziningi ngasogwini lwePacific. Kwafa abantu abangaba ngu-20 000 abanye bangatholakala. Endaweni eyayihlaselwe yile nhlekelele, kwabhidlika amaHholo OMbuso amane, amanye amane onakala. Izindlu zabafowethu ezingu-235 zakhukhuleka noma zonakala kakhulu, ezingaphezu kwenkulungwane zadinga ukulungiswa.

Lokhu kuzamazama nama-tsunami kwasishaya kabi kabi isikhungo esiphehla ugesi wenuzi kwaze kwadedeleka nezinhlayiya ezikhipha imisebe eyingozi. Uhulumeni wayala ukuba izakhamuzi ziphume lapho, futhi lathi lishona, izindawo eziningi zase zikhal’ ibhungane. Abafowethu nodade nabo baphoqeleka ukuba bahambe, amabandla amabili anyamalala kanjalo.

Phakathi koFakazi BakaJehova abangaphezu kuka-14 000 basezindaweni ezazicekelwe phansi, abangu-12 balahlekelwa ukuphila kwabo, abahlanu balimala kabi; ababili abakatholakali. Abaningi abasinda balahlekelwa izindlu, izinto zabo futhi abaningi balahlekelwa abathandekayo babo.

“Ngafaka umama wami okhubazekile emotweni, sahamba saya endaweni yokukhosela,” kuchaza uKiyoko wase-Ofunato. “Ngabe sengizwa iphunga lomusi. Ngaphuma emotweni ngabona igagasi elikhulu limboza umuzi wakithi. Leli gagasi laliqonde kithi! Ngasiza umama ukuba eqe uthango lukajantshi. Imoto yethu yahamba namanzi siyibhekile.”

Ngemva kokuzamazama komhlaba, insizwa enguKoichi yazama ukuya ekhaya e-Ishinomaki, eqhele ngamakhilomitha amahlanu ukusuka olwandle. Nokho, lapho isondela yabona yonke indawo imbozwe amanzi. “Njengoba ngangingenaso isikebhe, angikwazanga ukufika ekhaya.” Ngemva kwamasonto amathathu, yathola uyise esefile, ngemva kwamathathu yathola nonina, naye efile.

Lapho nje kuphela ukuzamazama komhlaba, uMasaaki waseShichigahama wanquma ukuyopaka imoto yakhe eHholo LoMbuso, eliqhele ngekhilomitha ukusuka olwandle. Uyakhumbula: “Ngathola udade naye owayebalekele ehholo. Ngangizitshela ukuthi ama-tsunami ngeke ahambe ibanga elide kangako. Kungakabiphi, le ndawo yayisimbozwe amanzi amnyama! Izimoto zethu zantanta phezulu. Ngavula ifasitela ngaphuma emotweni, ngema phezu kwayo, kodwa imoto kadadewethu yakhukhuleka! Ngacela uJehova ukuba amsize.

“Lalikhithika futhi ngimanzi nté ngibulawa nangamakhaza. Ukukhithika kwanqamuka kodwa amakhaza ayeshubisa umnkantsha. Masinyane kwahwalala. Izinkanyezi zazikhanya bhá futhi zizinhle. Ngema phezu kwemoto, eyayintanta emanzini abanda mpó. Babekhona nabanye ababevinjezelwe amanzi bemi ezinqwabeni zemfucumfucu noma ophahleni lwezakhiwo. Ngangizibuza ukuthi kazi kuzosa ngisaphila yini. Ukuze ngizikhuthaze, ngazikhumbuza inkulumo yeningi engangisanda kuyinikeza emasontweni amabili ayandulele. Yayinesihloko esifanelekayo: ‘Ungalutholaphi Usizo Ezikhathini Zokucindezeleka?’ Ngemva kwalokho, ngacula okuwukuphela kwengoma engangiyazi ngekhanda: ‘UBaba, UNkulunkulu Wami, Nomngane.’ Ngangilokhu ngiyiphindaphinda. Njengoba ngicula, ngacabanga ngenkonzo engiyenzele uJehova, kwehla izinyembezi.

“Othile endlini engaphesheya komgwaqo wangimemeza, ‘Kuhamba kahle? Ngizokuza ngizokusiza!’” Le ndoda eyayimemeza yayenze isikejana ngezingodo ezazintanta futhi ihlenga abantu kule ndawo. Yasiza uMasaaki ukuba angene kwenye indlu ngefasitela lesitezi sesibili. Kamuva kwamthokozisa ukuzwa ukuthi lo dade owayekwenye imoto naye usindile.

Wawulindelwe ngenjabulo umshado kaKohei noYuko owawuzoba seHholo LoMbuso LaseRikuzentakata ngoMgqibelo, ngomhla ka-12 ku-March. Ngemva kokubhalisa ngokomthetho ehholo lomphakathi ngoLwesihlanu, kwazamazama umhlaba. UKohei wezwa isixwayiso kwabezindaba nge-tsunami eyayizogadla ngakuleli dolobha, waphuthuma waya endaweni ephakeme. Uyakhumbula, “Lonke idolobha lalithe ngci yinkungu. Kwakungabonakali lutho ngaphandle kwezakhiwo ezimbalwa ezinkulu. Ngangilokhu ngikhathazeke ngamalungiselelo antambama, kodwa kwasheshe kwangikhanyela ukuthi kukhulu okwenzekile.”

UKohei noYuko bachitha uMgqibelo besiza abazalwane ebandleni. UKohei uthi: “Sathola izimpahla zosizo zivela kwamanye amabandla. Ngajabula ukuzwa umkami esho indlela ajabule ngayo ngokuchitha isikhathi namandla ethu sisiza abafowethu. Ngambonga uJehova ngokungipha inkosikazi enhle kanje. I-tsunami yakhukhula umuzi wethu omusha, imoto nazo zonke izinto esasinazo. Kodwa ngiyalwazisa uthando lobuzalwane esaboniswa lona.”

Usizo Olungokwenyama, Olungokomoya Nolungokomzwelo. Igatsha laseJapane lahlela ngokushesha amaKomiti Asiza Ezinhlekeleleni futhi lalokhu lithumela abameleli begatsha endaweni eyayihlaselwe inhlekelele. Ngo-May, lapho kufika ababonisi ababehambele igatsha laseJapane, uGeoffrey Jackson no-Izak Marais basendlunkulu yomhlaba wonke, nabo bahlangana nabafowethu nodade kwenye yezindawo ezazicekelwe phansi. Kwaba nomhlangano okhethekile wamabandla ayethintekile, kwaxhunywa ngocingo abazalwane abangaba ngu-2 800 emaHholo OMbuso angu-21 ukuze baqinisekiswe ngokuthi abazalwane emhlabeni wonke bayabathanda futhi bayabakhathalela.

AmaKomiti Asiza Ezinhlekeleleni nezinye izisebenzi zokuzithandela zibe matasa ekuthumeleni izimpahla eziwusizo. Izidingo eziphuthumayo kwakungukudla, amanzi nophethiloli. Amakomiti anika usizo ahlela nokuthumela izingubo ezingosayizi abahlukahlukene emabandleni ayevelelwe inhlekelele. Kwamiswa izinsimbi okwakuzolengiswa kuzo izingubo kanye nezibuko ezindaweni okwakuqhutshelwa kuzo imihlangano, kwaba sengathi kusezitolo zezingubo.

Abafowethu nodade babengeve bejabule ngokubona indlela uJehova ayezinakekela ngayo izidingo zabo ezingokwenyama nezingokomzwelo! Baqiniswa nakakhulu emihlanganweni yobuKristu. “Imihlangano inginika ukuthula kwengqondo,” kubhala udade wasendaweni eyayihlaselwe inhlekelele. “Ingigcina ngiphilile ngokomoya.”

Isigijimi Sethemba. Abafowethu baseJapane abapholisanga maseko ekuhlanganyeleni induduzo eseZwini likaNkulunkulu nomakhelwane ababekhungathekile. Abamemezeli basedolobheni elalingathintwanga inhlekelele banquma ukushumayela emgwaqweni bebeke ibhodi elikhulu elibhalwe ukuthi, “Konakelephi? Impendulo iseBhayibhelini.” Abantu abaningi baba nesithakazelo, abafowethu bahambisa izincwadi ezingu-177 ezithi Okufundiswa IBhayibheli ngosuku olulodwa nesigamu.

Ezindaweni ezazihlaselwe isiphepho, oFakazi baqale baya kubantu ababafundelayo nasezimpindelweni, babe sebeya komakhelwane beyobaduduza. U-Akiko uthi, “Lapho ngifundela omunye umninikhaya uMathewu 6:34, wakhala. Kwangicacela ukuthi unezinkinga eziningi. Lapho ngimchazela ukuthi iBhayibheli liyasisiza sibe nokuthula kwengqondo, wavuma ngokushesha futhi wangibonga. Lokhu kuye kwavuselela ukwazisa kwami ngamandla emiBhalo okushukumisa izinhliziyo zabantu.”

Enye indoda yathi, “Ziningi izinkolo, kodwa nina niwukuphela kwabantu abeza kithi, ngisho nasesikhathini esibucayi kangaka.” Enye yasho ngenhlonipho, “Kuyamangaza ukuthi niyaqhubeka nomsebenzi wenu njengokuvamile nakuba kubheda kanje.” Omunye umdala wathi: “Abaningi basamukela. Babethi, ‘Ningabokuqala ukufika la ekhaya selokhu kwavela inhlekelele. Sicela niphinde nibuye.’”

INGUQULO YEZWE ELISHA NGEZILIMI EZINGU-106!

ULwesihlanu lwango-July 15, 2011 lusakhunjulwa eLatvia naseLithuania futhi lwaluyingqopha-mlando emlandweni wabantu bakaNkulunkulu khona. Enkulumweni eyayilalelwe kuwo womabili la mazwe, uStephen Lett weNdikimba Ebusayo wakhulula INguqulo Yezwe Elisha YemiBhalo YamaKristu YesiGreki ngesiLatvia nangesiLithuania, lezi zilimi zahlanganisa isibalo sezilimi eziyikhulu le nguqulo etholakala ngazo. Phakathi neminyaka engu-7 edlule, iNdikimba Ebusayo iye yagxila kakhulu ekuhunyushweni kweBhayibheli. Ngenxa yalokho, INguqulo Yezwe Elisha manje inyatheliswa ngezilimi eziphindwe kabili kunango-2004, futhi abahumushi emhlabeni wonke bayaqhubeka bezikhandla ekuhumusheni iBhayibheli ngezilimi ezengeziwe.

Njengoba ungase ucabange, abafowethu bakujabulela kakhulu ukuthola iBhayibheli ngolimi abaluncela. “Ukuba neBhayibheli kuhle,” kusho umzalwane waseCentral African Republic, “kodwa ukuliqonda ngolimi lwakho kuyinto ongeke uyenane ngalutho. INguqulo Yezwe Elisha yesiSango ifinyelela inhliziyo. Uma ngifunda amaVangeli, ngikwazi ukubabona ngeso lengqondo abantu engifunda ngabo futhi ngiqonde imizwa yabo.” Intokazi yaseTopiya yaveza indlela abaningi abazizwa ngayo, yathi: “Ngiswele amazwi okubonga. Ngangivame ukuthandaza kuJehova ngimcele ukuba asinike INguqulo Yezwe Elisha ngolimi lwethu. Namuhla usinikezile!”

AMANQAMPUNQAMPU AVELA EMHLABENI WONKE

Isiqhwaga Siyathuliswa ERussia. Udade osekhulile ogama lakhe linguVera, wayenezinkinga iminyaka eminingi nomakhelwane wakhe ongabathandi oFakazi BakaJehova. Lo mlisa wayemsongela futhi ethuka izinhlamba phambi kwabazukulu bakaVera ababevame ukumvakashela. Ekhumbula amazwi akweyabaseRoma 12:18, uVera wayebeka umoya phansi njalo angaphikisani naye. Ngo-January 2011, lo mlisa wavele wabhoka ngolaka. Esabela ukuphila kwakhe, uVera wakhuluma nephoyisa elalike lamvakashela ngo-March 2010 lihamba nelinye. Ayezohlola ukuthi uVera noFakazi ayehlangana nabo kwakhe abahlangene yini ngokulwela ukwenza izinguquko emphakathini. Kulokhu, iphoyisa labona ukuthi ubani kahle-hle owuhlupho. Lathethisa lo mlisa, lamhlawulisa amaRandi angu-800 ngenxa yezinsongo zakhe. Ngemva kwalokho, uVera akaphindanga wahlushwa umakhelwane wakhe. Wabhala incwadi yokubonga wayithumela emaphoyiseni. Wamangala lapho isikhulu samaphoyisa simbhalela simphendula. Sasimbonga ngokukhuluma kahle ngephoyisa elalimsizile. Sabhala nalokhu: “Amazwi akho okwazisa abonisa ukuthi uyasethemba, kuyilapho iningi labantu namhlanje likhuluma kabi ngamaphoyisa.” UVera uthi leliya phoyisa selimvakashela njalo lizohlola ukuthi konke kuhamba kahle yini.

‘Umuntu Kadoti’ ETurkey. Abantu ababili ababesanda kuqala ukufundelwa baya emhlanganweni wesigodi. Babhala: “Kwakusengathi siyaphupha. Bonk’ abantu babemamatheka, benobungane futhi benomusa. Ngesikhathi sekhefu, sathi ukuhambahamba futhi asizizwanga silahliwe. Kwabe sekuqhamuka lo mzalwane owayesifundela. Wayephethe ipulasitiki yezibi. Sazama ukumbalekela ngoba sicabanga ukuthi umsebenzi wakhe ukubutha izibi futhi sasingafuni ukwaziwa ngokuthi singabangane bomuntu obutha udoti. Ngakho sabaleka sangena esixukwini. Sathi, ‘Sifundelani nje nomuntu kadoti kunokuba sifundelwe umuntu onikeza izinkulumo?’

“Njengoba siqhubeka sifunda, sathola ukuthi lo ‘muntu kadoti’ osifundelayo uyilungu leKomiti Yegatsha futhi ukhonza ehhovisi legatsha loFakazi BakaJehova. Sathuthuka futhi sanikezela ukuphila kwethu kuJehova, saqonda ukuthi umfowethu wayethobekile, eziphatha ‘njengomncane.’ (Luka 9:48) Sisazisa ngempela isifundo esibaluleke kakhulu esasifunda emhlanganweni wokuqala esaya kuwo!”

Amanga E-Armenia. Umkhankaso wokunyundela oFakazi BakaJehova osubhebhethekile waqalwa abezindaba ngemva kokuba kuqanjwe amanga kwathiwa insizwa yimbe eyabulala abazali bayo eSevan ingomunye woFakazi BakaJehova. Masinyane abezindaba batshelwa ukuthi lokho okwakushiwo kungamanga. Noma kunjalo, abafowethu baqhubeka benyundelwa, futhi kwakhishwa umbiko okhethekile kuyithelevishini kugonyelwa ngokuthi le nsizwa inguFakazi KaJehova. OFakazi BakaJehova babizwa ngamagama ayiziswana nahlambalazayo, futhi kulolu hlelo kwakubhalwe amagama athi “Ababulali BakaJehova Abanonya Abangamagwala.” Kwaze kwabangela nokuba abantu babaphathe kabi oFakazi lapho bebavakashele. Ngenxa yalokhu, inzondo ngoFakazi BakaJehova yanda kuleli zwe. Kwabhalwa incwadi yesikhalo ngalesi siteshi sethelevishini, saphoqwa ukuba sihoxise lokhu kwaziswa okungamanga, sixolise, sikhiphe nesinxephezelo ngokuhlambalaza igama nedumela lethu elihle. Lapho kunyatheliswa i-Ncwadi Yonyaka Ka-2012, lesi siteshi sasingakakuhoxisi lokhu kwaziswa, nakuba sasikade sesiqalile ukuxazulula lesi simo ngomoya omuhle.

Onjiniyela Abancane BaseVenezuela. Izingane zasenkulisa eSan José de Guaribe zazidlula ngasesakhiweni seHholo LoMbuso njalo ekuseni. Nsuku zonke zazima khona zibukele zimangazwe yilokho ezazikubona lapho. Ngelinye ilanga ekilasini, uthisha wazibuza ukuthi zifuna ukuba yini uma sezikhulile. Wamangala lapho eziningana zithi zifuna ukuba “onjiniyela njengoFakazi BakaJehova”! Befuna ukuzibonela, lo thisha nomunye bathatha lonke ikilasi baya esakhiweni. Lapho befika, abafowethu esakhiweni babonisa lezi zivakashi isakhiwo. Izingane zazijabulile, ikakhulu ngoba kwakuthiwe azigqoke omakalabha abanemibala emihle. Othisha babenemibuzo eminingi, ngakho kwanikezwa ubufakazi obuhle.

Inani Lomagazini Abanyatheliswa ECanada Liyakhula. Ukuze imishini yenhlangano isetshenziswe ngokugcwele, iNdikimba Ebusayo yathi igatsha laseCanada alinyathelisele amabandla aseBermuda, eGuyana, eCanada, e-United States naseziqhingini eziningana zaseCaribbean INqabayokulinda ne-Phaphama! Ngakho, ekuqaleni konyaka wenkonzo ka-2011, igatsha laseCanada lanyathelisa omagazini abaliphinda izikhathi ezingu-12 inani lomagazini elalibanyathelisa. Manje iCanada inyathelisa omagazini ngezilimi ezingu-30, okuyingxenye eyodwa kwezine yabo bonke omagazini abanyatheliswa emhlabeni wonke.

Kumenywa Uwonk’ Uwonke EFinland. INdikimba Ebusayo yavuma ukuba kuhlelwe umkhankaso okhethekile ogxile koFakazi BakaJehova nesigijimi abaye basishumayela eFinland iminyaka eyikhulu. Abafowethu basakaza ngentshiseko i-Phaphama! ka-August 2010 eyayinesihloko esithi “OFakazi BakaJehova—Bangobani?” Baxoxa kamnandi nabantu abaningi ngomsebenzi wethu. Ekupheleni kuka-August, abafowethu bahlela ukuba kumenywe uwonk’ uwonke ehhovisi legatsha. Wonke umkhaya waseBethel wahlanganyela ekuchazeni umsebenzi owenziwa khona. Kwabekwa amashadi nezithombe ezibonisa izivakashi umsebenzi wethu. Amanye amalungu aseBethel agqoka izingubo zakudala, abonisa indlela izingqwembe ezazisetshenziswa ngayo ukuze kumenyelwe abantu ezinkulumweni zeningi ngawo-1940 kuya ko-1950. Iminyango eminingana yayilungiselele izinto ezincane eziyisikhumbuzo eyayizozinika izivakashi. Kweza abantu abangaba ngu-1 500. Ngemva kwalokho, amaphephandaba, umsakazo nethelevishini konke kwakhuluma kahle ngomsebenzi wethu.

Iziyaluyalu ECôte d’Ivoire. Unyaka wenkonzo ka-2011 waqala kubhekwe phambili ekutheni kuzoba nokwanda, njengoba abamemezeli abangu-8 656 babeqhuba izifundo zeBhayibheli ezingu-23 019. Nokho, ngasekupheleni kuka-November 2010, imibango yokhetho yadala iziyaluyalu nezibhelu kuleli. Impi eyasuka ngemva kwalokho yafinyelela enhloko-dolobha yase-Abidjan ngo-March, yaqhubeka kwaze kwaba u-April 2011, yabangela ukuba uquqaba lwezakhamuzi zakuleli dolobha nasezweni lonke lufuduke. Phakathi kwalolu quqaba kwakunabafowethu abaningi ababaleka ngezinyawo bashiya imizi nezinto zabo.

Phakathi nalesi sikhathi sobunzima, ukungathathi hlangothi kwabafowethu kwakuvame ukuba isivikelo. Kwesinye isehlakalo, amasosha angena esikoleni athola othisha namakhansela enomhlangano. Bonke bayalwa ukuba balale phansi futhi bakhiphe izinto zabo eziyigugu. Lapho umfowethu ebanika isikhwama sakhe sensimu esasigcwele izincwadi zethu, amasosha asheshe abona ukuthi unguFakazi KaJehova. Ambuyisela isikhwama, imali nocingo lwakhe, athi: “Awulona usongo kithi.”

UKUNIKEZELWA KWAMAGATSHA KUKHAZIMULISA UNKULUNKULU

Ngo-December 18, 2006 kwaqalwa umsebenzi wokwakha egatsheni laseChile kwanezelwa isakhiwo esisha samahhovisi esinezitezi ezimbili, isakhiwo sokuhlala esinezitezi ezintathu kwakhuliswa nendawo yokugcina izincwadi. Ngo-October 16, 2010, kwaba khona abangu-5 501 enkulumweni yokunikezela eyanikezwa uDavid Splane weNdikimba Ebusayo ngeSpanishi.

Ngo-February 19, 2011 kwakunabangu-210 ekunikezelweni kwehhovisi lezwe elinwetshiwe laseBurkina Faso. Inkulumo yanikezwa uJohn Kikot wasendlunkulu yomhlaba wonke. Umsebenzi wokushumayela kuleli zwe wawuqondiswa igatsha laseCôte d’Ivoire kwaze kwaba u-May 2011 lapho iBurkina Faso isiqondiswa igatsha laseBenin. Ukuziphatha okuhle esakhiweni kwaletha udumo olukhulu egameni likaJehova. “Kwakungekho ukuklabalasa,” kusho isisebenzi senkampane ethile enkulu. “Asikaze sisebenze endaweni enabantu abanomoya ophansi nabajabule njengalaba.”

Kwakunentokozo enkulu lapho kunikezelwa izakhiwo ezintsha zegatsha laseHong Kong ngo-August 27, 2011. La mahhovisi amasha asesitezi se-19 esakhiweni esinezitezi ezingu-37 esibheke iVictoria Harbor. (Aboniswe ngezansi.) UStephen Lett weNdikimba Ebusayo wanikeza inkulumo yokunikezela ezilalelini ezingu-290 ezazihlezi endlini yokudlela, emahhovisi nasendaweni okupakishwa kuyo izincwadi. Amahhovisi amasha azoba usizo kakhulu emnyango Wabahumushi, Wenkonzo, We-Audio/Video, Wezokuthenga, Wokupakisha Izincwadi Nowezimali.

UMBIKO WEZOMTHETHO

Umprofethi othembekile uJeremiya wayenesizathu esihle sokuba nethemba lokuthi uNkulunkulu uMninimandla onke wayengeke nanini amshiye. UJehova wathi, “Siyolwa nawe, kodwa ngeke sikunqobe. Ngoba nginawe, ukuze ngikusindise futhi ngikukhulule.” (Jer. 15:20) Njengoba imibiko elandelayo ibonisa, izinceku zikaJehova zanamuhla nazo ziye zalubona usizo nokusekela kwakhe lapho zifeza umsebenzi wokushumayela ngisho nalapho ziphikiswa.—Math. 24:9; 28:19, 20.

E-Armenia UVahan Bayatyan, onguFakazi KaJehova, wagwetshwa iminyaka emibili nesigamu ejele ngoba enqaba ukuba isosha ngenxa kanembeza. Ngemva kokulahlwa icala ezinkantolo zase-Armenia, icala lakhe ladluliselwa eNkantolo YaseYurophu Yamalungelo Abantu (European Court of Human Rights [ECHR]). Ngo-October 27, 2009, amajaji angu-7 e-ECHR amlahla ngecala avuna i-Armenia. Nokho, ijaji elasiphikisa lesi sinqumo seNkantolo lathi “asivumelani nemithetho yamanje yaseYurophu endabeni yokwenqaba ngenxa kanembeza.” Ngenxa yokungathí sina kwaleli cala, i-ECHR yalidlulisela eMkhandlwini Omkhulu onamajaji angu-17.

Ngo-July 7, 2011, emajajini angu-17, angu-16 athi i-Armenia yephule ilungelo likaMfoweth’ uBayatyan lokulalela unembeza wakhe. INkantolo yaphawula nokuthi “akunasizathu sokuba ingabaze ukuthi ukwenqaba kukammangalelwa ukuba isosha kubangelwa izinkolelo abambelele kuzo ngokuqinile, ezimvimbelayo futhi zikulahle ngokuphelele ukuba azibophezele ekubeni isosha.” Sethemba ukuthi lesi sinqumo esiyingqopha-mlando sizokwenza ukuba ekugcineni kudedelwe abafowethu abangu-69 ababoshiwe e-Armenia, nabafowethu abamangalelwe ngecala elifanayo e-Azerbaijan naseTurkey.a

EBulgaria Ngo-April 17, 2011, abantu abangaphezu kwekhulu, okuhlanganisa abesifazane, izingane nasebekhulile, babekhumbula ngokuthula iSikhumbuzo sokufa kukaKristu eHholo LoMbuso eBurgas. Ngaphandle, iviyo elithukuthele lamadoda angaba ngu-60 laqala ukujikijela oFakazi ababemi emnyango ngamatshe amakhulu. La madoda abe esengena ngendlov’ iyangena eHholo LoMbuso, kodwa abafowethu bawavimba. Khona manjalo kwabizwa amaphoyisa, kodwa awasheshanga ukufika. OFakazi abambalwa balimala, abahlanu kwadingeka bayiswe esibhedlela nge-ambulense. Naphezu kwalokhu kuhlaselwa, saba khona iSikhumbuzo. Lesi senzo sasihlukile endleleni oFakazi BakaJehova abaphathwa ngenhlonipho ngayo eBulgaria futhi siye sabangela ukuba kukhulunywe kahle ngabo emphakathini. INdikimba Ebusayo yahlela ukuba amagatsha angu-13 aveze lolu daba emanxuseni aseBulgaria akulawo mazwe. Kusukela lapho, uhulumeni waseBulgaria uye wasigxeka lesi senzo futhi umshushisi wakuleli ubabeke icala abangu-8 balezi zigilamkhuba.

ENingizimu Korea OFakazi BakaJehova abangaphezu kuka-800 basaboshiwe eNingizimu Korea ngoba ngenxa kanembeza, benqaba ukuba amasosha ngenxa yezinkolelo zabo. Kusukela ngo-1950, oFakazi BakaJehova abangaphezu kuka-16 000 baye bagwetshwa iminyaka engaphezu kuka-31 000 ejele ngenxa yokwenqaba ukuba amasosha. Kungani izinsizwa eziningi kangaka zingazange ziyekethise?

Ngayinye enqabayo ukuba isosha izenzela isinqumo sayo siqu ishukunyiswa unembeza. Ngokwesibonelo, lapho equliswa icala, uKim Ji-Gwan wachaza: “Ngithintwe ngokujulile izimfundiso zeBhayibheli ezinjengethi ‘abantu ngeke besayifunda impi’ nethi ‘thanda umakhelwane wakho njengoba uzithanda.’ Ngifunde nokuthi uthando olubuswa izimiso lungasishukumisela ukuba sithande izitha zethu. Ngenxa yale miBhalo neminye nangenxa yezinkolelo zami eziqinile, nginqume ukwenqaba ukuya empini.”—Isaya 2:4; Math. 5:43, 44; 22:36-39.

Okwamanje, izinsizwa eNingizimu Korea azivunyelwe ukwenza omunye umsebenzi wasebusosheni uma zingafuni ukuya empini. Ukuze kulungiswe le nkinga, kwadluliselwa amacala ayishumi eNkantolo Yomthetho-sisekelo YaseKorea. Ngo-November 11, 2010, inkantolo yalalela izikhalazo ezihlanganisa nokuthi ukungasunguli kweKorea umsebenzi ohlukile wabantu abenqaba ngenxa kanembeza akukona yini ukwephulwa kwamalungelo ezakhamuzi zaseKorea.

Phakathi naleso sikhathi, ngo-March 24, 2011, iKomiti Yenhlangano Yezizwe Yamalungelo Abantu (United Nations Human Rights Committee [UNHRC]) yakhipha isinqumo sokuthi iNingizimu Korea yephule imithetho egcinwa umhlaba wonke yamalungelo abantu lapho ifaka ejele oFakazi BakaJehova abayikhulu ngoba benqabe ngenxa kanembeza. (Laba bazalwane abayikhulu babethumele icala lokuboshwa kwabo kuyi-UNHRC.) Ngaphezu kwalokho, isinqumo esivuna uMfoweth’ uBayatyan soMkhandlu Omkhulu we-ECHR (bheka umbiko wase-Armenia emakhasini 34-35) sathunyelwa eNkantolo Yomthetho-sisekelo YaseKorea ukuze sicatshangelwe njengoba kulindelwe isinqumo samacala ayishumi asele. Noma kunjalo, ngo-August 30, 2011, iNkantolo Yomthetho-sisekelo yazishaya indiva izinqumo ze-UNHRC, yanamathela eMthethweni Wokubuthelwa Ebusosheni (Military Service Law) nasekutheni labo abenqaba ngenxa kanembeza baqhubeke beboshiwe. Ephawula ukuthi kunokungqubuzana phakathi koMthetho Wokubuthelwa Ebusosheni nomthetho-sisekelo endabeni yenkululeko yokulalela unembeza, amajaji amabili kwangu-9 asiphikisa lesi sinqumo futhi athi akusungulwe isimiso sezinye izinkonzo zomphakathi.

ETurkey Ngo-July 31, 2007, abafowethu bajabula ngokuqashelwa ngokomthetho njengenhlangano yenkolo. Nakuba zisekhona izinselele mayelana nokungathathi hlangothi nokusetshenziswa kwamaHholo OMbuso, izithakazelo ezingokomoya ziqhubekela phambili kuleli. Ngo-April 26, 2011, uMnyango Kazwelonke Wezemfundo weRepublic YaseTurkey wakhipha isiqondiso esigunyaziwe sokuthi ‘oFakazi BakaJehova abaphoqelekile ukuba baye emakilasini enkolo esikoleni.’ Lo Mnyango wathi “nakuba oFakazi BakaJehova bengazamukeli izinkolelo ezithile ezivamile zobuKristu—bangamaKristu.” Lesi sinqumo siyizindaba ezithokozisayo kubafowethu nodade abasebancane abaye bafeyiliswa esikoleni eminyakeni edlule ngoba benqaba ukuya emakilasini enkolo.

E-United States Ngo-May 2011, iNkantolo Yamacala Adlulisiwe eKansas yasivuna ecaleni lika-Mary D. Stinemetz ne-Kansas Health Policy Authority. Inkantolo yathi ukwenqaba kombuso ukugunyaza ukuhlinzwa kukaDade Stinemetz ngaphandle kwegazi kwelinye izwe kuwukwephulwa kwamalungelo akhe njengesakhamuzi nawomthetho-sisekelo. Njengoba uhlobo lokuhlinzwa ayeludinga lwalungatholakali eKansas, inkantolo yathi umbuso awugunyaze ukuba ahlinzwe kwelinye izwe. Lokhu kunqoba akukona nje okukaDade Stinemetz kuphela kodwa nokwabanye abamemezeli e-United States abathola ukwelashwa okuxhaswa uhulumeni.

Ngo-August 10, 2011, iNkantolo Ephakeme YaseKansas yasekela isinqumo esanikeza uMonica McGlory, omunye woFakazi BakaJehova, imvume yokuhlala nendodana yakhe. Uyise wengane wayeyilwela ethi uDade McGlory akufanele ahlale nendodana yabo ngoba (1) uzokwenqaba ukuba impontshelwe igazi, (2) uhamba nayo enkonzweni yendlu ngendlu, futhi (3) uyihlukanisa noyise kanye nomphakathi ngokuyifundisa nge-Armagedoni.

INkantolo Ephakeme eKansas yavumelana nezimiso zomthetho-sisekelo ezakhishwa ngo-1957, yathi: “Inkululeko engokwenkolo enikezwa umthetho-sisekelo kufanele ihlonishwe, futhi izimfundiso ezingokwenkolo akufanele futhi akumelwe zibhekwe njengesisekelo sokunquma ukuthi ingane izohlala nobani.” Mayelana nendaba yokumpontshelwa igazi, inkantolo yathi: “Asikwazi ukunquma amacala [okuthi ingane izohlala nobani] ngokusekelwe engozini noma ekuguleni esicabanga ukuthi kungaqhamuka esikhathini esizayo okungase kudinge [ukumpontshelwa igazi].”

EFrance Kwakunenjabulo enkulu ngo-June 30, 2011, lapho i-ECHR ikhipha isinqumo esivuna iNhlangano YoFakazi BakaJehova YaseFrance. Lokhu kwakungemva komshuduliswano weminyaka engu-16 nezomthetho owasuswa intela emba eqolo yamaphesenti angu-60 eyayifunwa eminikelweni eya egatsheni. OFakazi bawukuphela kwenhlangano yenkolo enkulu ebilokhu itheliswa ngale ndlela. Isiyonke imali uhulumeni waseFrance obufuna oFakazi BakaJehova bayikhokhe ingaphezu kwamaRandi angu-638 000 000, inani elilidlula kude le elempahla yeNhlangano. Ngemva kokuba izinkantolo eFrance zisamukele lesi sinqumo, icala ladluliselwa kuyi-ECHR ngo-February 2005.

Ngo-June 30, 2011, amajaji angu-7 e-ECHR athi uma iFrance ivunyelwa ukuba ithelise oFakazi BakaJehova kanje, lokho kuyobavimbela ngokuqondile ukuba bakhulekele ngenkululeko. INkantolo yavuma ukuthi oFakazi BakaJehova nabo banawo amalungelo okwavunyelwana ngawo eMhlanganweni WaseYurophu Wamalungelo Abantu. Lesi sinqumo esiwumhlahlandlela sizoba usizo olukhulu emizamweni yokufuna inkululeko yokukhulekela nakwamanye amazwe angaphansi kwe-ECHR, njenge-Armenia, iBulgaria, iGeorgia neRussia. Okunye okuphawulekayo ukuthi kube ngokokuqala ngqa ukuba uhulumeni waseFrance utholwe unecala lokwephula isinqumo esathathwa eMhlanganweni WaseYurophu mayelana nenkululeko engokwenkolo. Uhulumeni waseFrance awuzange ukhalaze ngalesi sinqumo.

ERussia Ngo-June 10, 2010, oFakazi BakaJehova baqoph’ umlando lapho i-ECHR ibavuna ecaleni elalihilela uhulumeni waseRussia loFakazi BakaJehova BaseMoscow neRussia. Nakuba uhulumeni waseRussia wacela ukudlulisela icala eMkhandlwini Omkhulu WeNkantolo onamajaji angu-17, ngo-December 13, 2010 amajaji oMkhandlu Omkhulu asichitha leso sicelo, okwenza isinqumo sangomhla ka-10 ku-June sangashintsha. Leso sinqumo sasithi uhulumeni waseRussia “unesibopho esingokomthetho . . . sokuba uyeke ukwephula imithetho iNkantolo ewuthole unecala kuyo futhi uwulungise ngangokusemandleni awo umonakalo owenzile.” Nokho, kuze kube manje, lo hulumeni awukakwenzi lokhu. Kunalokho uthole izindlela ezintsha zokuhlukumeza nokuphazamisa oFakazi ukuze bangakhulekeli ngenkululeko.

Ngokwesibonelo, entathakusa yango-August 25, 2011, amaphoyisa asesha imizi engu-19 yabafowethu eTaganrog ashaqa izincwadi zethu, ama-computer nemibiko yebandla. Lesi senzo kubonakala sihlobene nesinqumo esasikhishwe iRussian Federation Supreme Court esasithi iNhlangano YoFakazi BakaJehova eTaganrog ayivalwe nokuthi izincwadi zethu ezingu-34 ziyeqisa. Ngenxa yezinqumo zezinkantolo zaseRussia, uhulumeni ufake izincwadi zethu ezingu-63 ohlwini olubizwa ngokuthi iFederal List of Extremist Materials.

Ngaphezu kwalokho, kuye kwaseshwa imizi yabazalwane, bashaywa, baboshwa futhi bagqunywa emajele izikhathi ezingaba ngu-950. Iziphathimandla zaseRussia zivule amacala angu-11 zimangalela abafowethu futhi amaHholo OMbuso amaningi aye acekelwa phansi. Iziphathimandla zafaka ngisho namakhamera emzini womkhaya othile, zalalela izingxoxo zocingo futhi zabeka iso kuma-akhawunti e-e-mail abaningi ukuze zikuhlomele kangcono ukubamangalela ngokuqondene nomthetho wokuqeda amavukela-mbuso.

Elinye lamacala abamangalelwa ngalo elika-Aleksandr Kalistratov oneminyaka engu-35 waseGorno-Altaysk, okwathiwa “ubhebhezela inzondo nobutha ngenkolo” ngaphansi komthetho wokuqeda amavukela-mbuso oye wagxekwa abaningi abasekela amalungelo abantu. Phakathi nokuqulwa kwecala, okwaqala ngo-October 7, 2010 kwaze kwaba u-March 18, 2011, akekho noyedwa kofakazi abangu-71 abaphenywa enkantolo owakwazi ukuveza ububi obenziwe u-Aleksandr—noma ngisho isisusa esingesihle. Inkantolo yazitadisha kanzulu izincwadi nezimfundiso zoFakazi BakaJehova, kwathi ngo-April 14, 2011, ijaji lakhipha isinqumo esithi akanacala. Nokho, umshushisi wakhalaza ngalesi sinqumo, ngakho ngo-May 26, 2011, iNkantolo Ephakeme e-Altay Republic yaphindisela leli cala enkantolo encane ukuze liqulwe ijaji elisha. Ngakho njengoba uMfoweth’ uKalistratov atholwa engenacala, manje amacala akhe asequlwa kabusha, futhi lokho kungase kuholele ekutheni alahlwe icala njengevukela-mbuso.

Ngokuvamile, icala elinjengaleli lokumangalelwa ngokwenza umsebenzi owusongo lenze umphakathi wawubuka ngelinye iso umsebenzi wethu edolobheni elincane laseGorno-Altaysk. OFakazi kuleyo ndawo, nabo abasengozini yokuquliswa amacala, babhekane kanjani nalezi zimo?

“Phakathi nalesi sikhathi esibucayi, iBhayibheli libe usizo kakhulu,” kusho udade Inna. “Abafowethu nodade banjengomkhaya futhi ngizizwa ngisondelene nakakhulu noJehova kunanini ngaphambili!” Nakuba ezinye zezincwadi zethu zivinjelwe, kuqalwe izifundo eziningi ngeBhayibheli kuphela. Inani labamemezeli e-Altay Republic lande ngamaphesenti angu-24. Amahora abawasebenze ensimini ande ngamaphesenti angu-33. Inani lababekhona eSikhumbuzweni linyuke ngamaphesenti angu-16 kunelangonyaka odlule futhi laliphinda kabili elabamemezeli ezweni lonke!

Njengamanje, oFakazi BakaJehova eRussia badlulisele kuyi-ECHR amacala amasha angu-13 amangalela uhulumeni waseRussia. Elinye lawo liphikisa isinqumo seNkantolo Ephakeme sango-December 8, 2009, elinye liphikisa isinqumo seNkantolo Ephakeme e-Altay Republic eyathi izincwadi zethu ezingu-18 ziyeqisa.

[Umbhalo waphansi]

[Amazwi acashunwe esihlokweni ekhasini 14]

“Kulotshiwe kubaprofethi ukuthi, ‘Bonke bayofundiswa uJehova’”

[Amazwi acashunwe esihlokweni ekhasini 25]

“Ngiswele amazwi okubonga”

[Ibhokisi ekhasini 12]

Abakusho Ngokuba Amaphayona Asizayo:

• “Ngakwazi ukuba iphayona elisizayo okokuqala ngqá ekuphileni kwami. Ngiswele amazwi okubonga ngaleli thuba!”

• “Asive sibonga ngaleli lungiselelo elisha. Lisinikeze injabulo enkulu.”

• “Lena kwakuyingqopha-mlando ebandleni lakithi.”

• “Ukuba namaphayona asizayo amaningi kangaka kube negalelo emoyeni wokuthula nobunye ebandleni.”

• “Yebo, kumelwe ukuba i-Armagedoni isisondele!”—Umuntu ongeyena uFakazi owaphawula umsebenzi wethu omkhulu ngo-April.

[Ibhokisi ekhasini 43]

‘KHAMULUKANI NGENJABULO’

LELI ZWE elilawulwa uSathane othukuthele libhekene nomaye omkhulu. (IsAm. 12:12) Ngokuphambene, izinceku zikaJehova ‘zikhamuluka ngenjabulo ngenxa yesimo esihle senhliziyo.’ (Isaya 65:13, 14) Ngaphandle kokuyekethisa, ziyaqhubeka zimema abaningi ngangokunokwenzeka ukuba bakhulekele uNkulunkulu weqiniso, zazi ukuthi “bonke abaphephela [kuJehova] bayojabula; bayokhamuluka ngenjabulo kuze kube nini nanini.”—IHu. 5:11.

[Ishadi/Amagrafu ekhasini 26]

(Ukuze ubone ukuthi indaba ihlelwe kanjani, bheka encwadini)

ITHOLAKALA NGEZILIMI EZINGU-106

Isi-Albania Isi-Amharic

Isi-Arabhu Isi-Azerbaijani

Isi-Armenia Isi-Azerbaijani (sesiCyrillic)

IsiBemba IsiCambodia

IsiBhunu Isi-Estonia

IsiBulgaria Isi-Ewe

IsiCebuano IsiFiji

IsiChewa IsiGun

IsiCroatia IsiHaiti sesiCreole

IsiCzech IsiHiligaynon

IsiDanishi IsiHindi

IsiDashi IsiHiri Motu

Isi-Efik IsiKannada

IsiFinishi IsiKazakh

IsiFulentshi IsiKikaonde

IsiGeorgia IsiKiribati

IsiGreki IsiLatvia

IsiHungary ULimi Lwezandla LwaseBrazil

Isi-Igbo ULimi Lwezandla LwaseColombia

Isi-Iloko ULimi Lwezandla Lwase-Italy

Isi-Indonesia ULimi Lwezandla LwaseMelika

IsiJalimane ULimi Lwezandla LwaseMexico

IsiJapane ULimi Lwezandla LwaseRussia

IsiKinyarwanda IsiLithuania

IsiKirghiz IsiLozi

IsiKirundi IsiLuganda

IsiKorea IsiLuvale

IsiLingala IsiMalayalam

IsiMacedonia IsiMyanmar

IsiMalagasy IsiNepali

IsiMalta IsiPangasinan

IsiNgisi IsiPapiamento (sesiCuraçao)

IsiNorway IsiPunjabi

IsiNtaliyane IsiSango

Isi-Ossetia IsiSranantongo

IsiPedi IsiTamil

IsiPholishi IsiThai

IsiPutukezi IsiTok Pisin

IsiRashiya IsiTonga

IsiRomania IsiTongan

IsiSamoa IsiTumbuka

IsiSerbia Isi-Ukraine

IsiSerbia (sesiRoma) Isi-Uzbek

IsiShayina (Esenziwe Lula) IsiVietnam

IsiShayina (Esivamile)

IsiShona

IsiSinhala

IsiSlovakia

IsiSlovenia

ISpanishi

IsiSuthu

IsiSwahili

IsiSwidi

IsiTagalog

IsiTsonga

IsiTswana

IsiTurkey

IsiTwi (sesi-Akuapem)

IsiTwi (sesi-Asante)

IsiXhosa

IsiYoruba

IsiZulu

[Amagrafu]

◀ 76% ◁ 24%

Ngo-2011, cishe amaphesenti angu-76 abantu emhlabeni ‘ayeseneNguqulo Yezwe Elisha’ (iphelele noma ingaphelele) ngolimi aluncela

110

100

90

80

70

60

50

40

30

20

10

0

1950 1955 1960 1965 1970 1975 1980 1985 1990 1995 2000 2005 2010

[Igrafu ekhasini 8]

(Ukuze ubone ukuthi indaba ihlelwe kanjani, bheka encwadini)

Emhlabeni Wonke, Bangu-2 657 377 Abamemezeli Ababa Amaphayona Asizayo

2,5 (IZIGIDI)

2,0

1,5

1,0

0,5

0

2008 2009 2010 2011

[Ibalazwe ekhasini 35]

(Ukuze ubone ukuthi indaba ihlelwe kanjani, bheka encwadini)

UNITED STATES

FRANCE

BULGARIA

TURKEY

ARMENIA

AZERBAIJAN

RUSSIA

SOUTH KOREA

[Isithombe ekhasini 6]

Phezulu: Amaphayona nabamemezeli beza nezifundo zabo kwaJeannette baziqhubele khona. (Bheka ikhasi 9)

[Isithombe ekhasini 7]

Amaphayona avamile nasizayo eMadrid, eSpain, aya ensimini

[Isithombe ekhasini 10]

UToshi ushumayeza umnakekeli ekhaya lasebekhulile

[Isithombe ekhasini 11]

U-Alejandro noyise eSant Celoni, eBarcelona, eSpain, ngosuku lokugcina lwenyanga

[Isithombe ekhasini 13]

I-Watchtower Educational Center ePatterson, eNew York, e-U.S.A.

[Isithombe ekhasini 18]

IHholo LoMbuso LaseRikuzentakata, eJapane

[Isithombe ekhasini 22]

Phezulu: Izisebenzi zokuzithandela zikhipha imfucuza endlini yomzalwane eShibata, eMiyagi

[Isithombe ekhasini 22]

Kwesobunxele: Ilungu leKomiti Yegatsha linikeza inkulumo endlini yomzalwane eRikuzentakata

[Isithombe ekhasini 22]

Ezansi: Izisebenzi zokuzithandela ziphekela izihambeli zomhlangano okhethekile endaweni eyayivelelwe inhlekelele

[Isithombe ekhasini 24]

Inguqulo yesiLithuania neyesiLatvia

[Izithombe ekhasini 31]

Uphawu olwaqoshwa ngaseYankee Stadium, eNew York, e-U.S.A.

[Isithombe ekhasini 32]

Izisebenzi esakhiweni sehhovisi laseBurkina Faso

[Isithombe ekhasini 32]

Ihhovisi laseBurkina Faso

[Isithombe ekhasini 32]

Igatsha laseChile

[Izithombe ekhasini 33]

Izakhiwo ezintsha zegatsha eHong Kong

[Isithombe ekhasini 34]

INkantolo YaseYurophu Yamalungelo Abantu, eStrasbourg, eFrance

[Izithombe ekhasini 38]

Abafundi baphethe amaripoti abo. Bajabule ngoba abasaphoqelelwe ukuya ekilasini lezenkolo

[Isithombe ekhasini 41]

OFakazi bashumayela eGorno-Altaysk, eRepublic of Altay