Kungani Kufanele Ugcine Ubuqotho?

“O Jehova, ngahlulele . . . ngokobuqotho bami.”—IHU. 7:8.

1, 2. Iziphi ezinye zezimo ezivamile eziba inselele ebuqothweni bomKristu?

CABANGA ngalezi zimo ezintathu: Umfana ugconwa abathile afunda nabo esikoleni. Bazama ukumcasula, ukuze abathuke noma alwe nabo. Ingabe uzoziphindiselela, noma uzozibamba futhi asuke lapho? Indoda eshadile iyodwa ekhaya futhi icwaninga kuyi-Internet. Kuvela ibhokisana kuyi-computer elikhangisa ingosi engcolile. Ingabe izolingeka ukuba iyivule, noma izoqiniseka ukuthi iyigwema ngokuphelele? Owesifazane ongumKristu uxoxa nabanye odade lapho ingxoxo ishintsha iba engakhi futhi iba inhlebo elimazayo ngomunye udade ebandleni. Ingabe uzohlanganyela kuleyo ngxoxo, noma uzozama ukuyishintsha?

² Nakuba lezi zimo zingafani, zinokuthile ezifana ngakho. Zonke zihilela ukulwela ukugcina ubuqotho njengomKristu. Lapho ubhekana nezinkathazo zakho, uhlangabezana nezidingo zakho futhi uzibekela imigomo ekuphileni, uyacabanga yini ngobuqotho bakho? Ekuphileni kwansuku zonke, abantu bacabanga ngokubukeka kwabo, impilo, izinselele zokuziphilisa, izikhathi ezinhle nezimbi phakathi kwabo nabangane babo, mhlawumbe ngisho nangezothando. Singase sizinake kakhulu izinto ezinjengalezo. Nokho, yini uJehova ayikhathalela ngokukhethekile lapho ehlola izinhliziyo zethu? (IHu. 139:23, 24) Ubuqotho bethu.

3. Iliphi ilungelo uJehova asinika lona, futhi sizoxoxa ngani kulesi sihloko?

³ UJehova, uMuphi wazo “zonke izipho ezinhle nazo zonke izipho eziphelele,” uye wapha ngamunye wethu izipho ezihlukahlukene. (Jak. 1:17) Ngenxa yakhe sinezipho ezinjengomzimba, ingqondo, isilinganiso esithile sempilo namakhono ahlukahlukene. (1 Kor. 4:7) Nokho, uJehova akavele asiphoqe ukuba sibonise ubuqotho. Usivumela ukuba sizikhethele ukuthi sizoyihlakulela yini le mfanelo noma cha. (Dut. 30:19) Ngakho, kudingeka sihlole ukuthi buyini ubuqotho. Sizoxoxa nangezizathu ezintathu ezenza le mfanelo ibaluleke kangaka.

Buyini Ubuqotho?

4. Ubuqotho buhilelani, futhi yini esingayifunda emthethweni kaJehova ngemihlatshelo yezilwane?

⁴ Abantu abaningi babonakala benombono ofiphele ngokuthi buyini ubuqotho. Ngokwesibonelo, lapho abezombusazwe beqhosha ngobuqotho babo, ngokuvamile kubonakala besho ukwethembeka. Le mfanelo ibalulekile, kodwa imane nje iyingxenye yobuqotho. NgokweBhayibheli, elithi ubuqotho lihilela ubumsulwa nokungabi nasici ngokokuziphatha. Amagama esiHebheru ahlobene nelithi “ubuqotho” anomsuka wokuba kwento ephile kahle, ephelele noma engenasici. Elinye lala magama lisetshenziswé ngokuqondene nemihlatshelo okwakufanele inikelwe kuJehova. Umhlatshelo wawamukeleka kuphela uma isilwane esasinikelwa sasiphilile noma singenasici. (Funda uLevitikusi 22:19, 20.) UJehova wabasola kakhulu labo ababengawunaki ngamabomu umthetho wakhe ngokunikela ngezilwane eziqhugayo, ezigulayo noma ezingaboni.—Mal. 1:6-8.

5, 6. (a) Iziphi izibonelo ezibonisa ukuthi ngokuvamile sazisa izinto eziphelele? (b) Ingabe kudingeka abantu babe abaphelele ukuze babonise ubuqotho? Chaza.

⁵ Akuyona into engavamile ukufuna nokwazisa into ephelele. Ngokwesibonelo, cabanga ngomuntu ozenzela umtapo wezincwadi othola umqulu oyigugu kakhulu ayesewufune isikhathi eside, kodwa athole ukuthi unamakhasi abalulekile amaningana angekho. Edumele, angase awubuyisele eshalofini. Noma cabanga ngowesifazane ohamba ogwini lolwandle ocosha amagobolondo akhishwa amagagasi olwandle. Ekhangwa izinhlobonhlobo nobuhle bawo, udamane egoba ukuze awahlole. Imaphi awagcinayo? Yilawo aphelele, angachofokile. Ngokufanayo, uNkulunkulu ufuna abantu abanale mfanelo yokuphelela.—2 IziKr. 16:9.

⁶ Nokho, ungase uzibuze ukuthi ukuba qotho kudinga umuntu abe ophelele yini noma cha. Ngenxa yokuthi sinesono futhi asiphelele, singase sithambekele ekuzibhekeni njengabantu abacishe bafane nalowaya mqulu ongaphelele noma igobolondo elichofokile. Ingabe ngezinye izikhathi uzizwa ngaleyo ndlela? Qiniseka ukuthi uJehova akalindele ukuba sibe abaphelele ngomqondo ophelele. Akalokothi alindele okungaphezu kwalokho esingakwazi ukukwenza.a (IHu. 103:14; Jak. 3:2) Noma kunjalo, ulindele ukuba sigcine ubuqotho. Ukhona-ke yini umehluko phakathi kokuphelela nokuba qotho? Yebo. Ngokwesibonelo, ake sithi insizwa ithanda intombi futhi bazoshada. Kuyoba ubuwula ngayo ukulindela ukuba intombi ingawenzi amaphutha. Kodwa, iyobe ihlakaniphile uma ilindela ukuba intombi iyithande ngenhliziyo yayo yonke, okungukuthi, ithande yona yodwa. Ngendlela efanayo, uJehova ‘unguNkulunkulu ofuna ukuzinikela kuye kuphela.’ (Eks. 20:5) Akalindele ukuba sibe abaphelele, kodwa ulindele ukuba simthande ngenhliziyo yethu yonke, sikhulekele yena yedwa.

7, 8. (a) Isiphi isibonelo esabekwa uJesu ngokuqondene nobuqotho? (b) Busho ukuthini ubuqotho ngomqondo osemiBhalweni?

⁷ Singase sikhumbule impendulo kaJesu lapho ebuzwa ukuthi imuphi umthetho obaluleke kunayo yonke. (Funda uMarku 12:28-30.) UJesu akagcinanga nje ngokunikeza impendulo; waphila ngokuvumelana nayo. Wabeka isibonelo esiphelele sokuthanda uJehova ngayo yonke ingqondo, inhliziyo, umphefumulo namandla akhe. Wabonisa ukuthi ubuqotho abuboniswa ngamazwi kuphela, kodwa ngezenzo ezinhle ezishukunyiswa izisusa ezimsulwa. Ukugcina kwethu ubuqotho kudinga ukuba silandele ezinyathelweni zikaJesu.—1 Pet. 2:21.

⁸ Nakhu-ke okushiwo imiBhalo ngobuqotho: ukuzinikela ngenhliziyo yethu yonke kuMuntu oyedwa osezulwini, uJehova uNkulunkulu, entandweni nasenjongweni yakhe eyembuliwe. Ukugcina ubuqotho kusho ukuthi ekuphileni kwethu kwansuku zonke, siyofuna ukujabulisa uJehova uNkulunkulu ngaphezu kwakho konke okunye. Izinto eziza kuqala ekuphileni kwethu ziyobonisa lokho okubaluleke kakhulu kuye. Ake sixoxe ngezizathu ezintathu zokuthi kungani lokhu kubaluleke kangaka.

1. Ubuqotho Bethu Nempikiswano Yobukhosi Bendawo Yonke

9. Ubuqotho bethu buhlobene kanjani nempikiswano yobukhosi bendawo yonke?

⁹ Ilungelo likaJehova lokubusa alixhomekile ebuqothweni bethu. Ubukhosi bakhe bunobulungisa, buyohlala njalo futhi ubusa endaweni yonke. Lokhu akusoze kwashintsha, kungakhathaliseki ukuthi ezinye izidalwa zithini noma zenzani. Nokho, ubukhosi bukaNkulunkulu buye banyundelwa kakhulu emazulwini nasemhlabeni. Ngakho, kudingeka bulwelwe phambi kwazo zonke izidalwa ezihlakaniphile—kuqinisekiswe ukuthi uyakufanelekela ukubusa, ukuthi ukubusa kwakhe kunobulungisa nokuthi ubusa ngothando. NjengoFakazi BakaJehova, siyathanda ukuxoxa ngobukhosi bukaNkulunkulu bendawo yonke nawo wonke umuntu osilalelayo. Nokho, singabonisa kanjani ukuthi simiphi kule mpikiswano? Sibonisa kanjani ukuthi sikhetha uJehova njengoMbusi wethu? Ngokugcina ubuqotho.

10. USathane wathini ngobuqotho babantu, futhi wena uzizwa kanjani ngalokho?

¹⁰ Cabanga ngendlela ubuqotho bakho obuhileleke ngayo. Empeleni uSathane uye wagomela ngokuthi akekho umuntu oyomelela ubukhosi bukaNkulunkulu nangokuthi akekho umuntu oyokhonza uJehova engashukunyiswa uthando olungenabugovu. Phambi koquqaba lwezidalwa zomoya, wathi kuJehova: “Isikhumba ngesikhumba, futhi umuntu uyokhipha konke anakho ngenxa yomphefumulo wakhe.” (Jobe 2:4) Phawula ukuthi ngala mazwi uSathane wayengamangaleli uJobe olungile kuphela, kodwa wayemangalela wonke umuntu. Yingakho iBhayibheli libiza uSathane ngokuthi “ummangaleli wabafowethu.” (IsAm. 12:10) Uklolodela uJehova ngokuthi amaKristu—kuhlanganise nawe—ngeke ahlale ethembekile. USathane uthi ungamlahla uJehova ukuze usindise ukuphila kwakho. Uzizwa kanjani ngalokhu kumangalelwa ngamanga? Ngeke yini wathanda ukuthola ithuba lokubonisa ukuthi uSathane ungumqambimanga? Ngokugcina ubuqotho bakho, ungabonisa ukuthi uSathane unamanga.

11, 12. (a) Iziphi izibonelo ezibonisa indlela izinqumo zethu ezindabeni zansuku ezihlobana ngayo nempikiswano yobuqotho bethu? (b) Kungani ukugcina ubuqotho kuyilungelo?

¹¹ Ngakho, impikiswano yobuqotho bakho yenza ukuba ukuziphatha kwakho kwansuku zonke nalokho okukhethayo kube okubaluleke kakhulu. Ake uphinde ucabange ngezimo ezintathu esikhulume ngazo ekuqaleni. Ikuphi okuyobonisa ubuqotho? Umfana ogconwa afunda nabo ulingeka kakhulu ukuba aziphindiselele, kodwa ukhumbula lesi siyalo: “Ningaziphindiseleli, bathandekayo, kodwa qhelelani ulaka; ngoba kulotshiwe ukuthi: ‘Impindiselo ingeyami; ngizobuyisela mina, kusho uJehova.’” (Roma 12:19) Uvele ahambe. Indoda eshadile esebenzisa i-Internet ingabuka izithombe ezivusa inkanuko, kodwa ikhumbula isimiso esisemazwini kaJobe: “Ngenzé isivumelwano namehlo ami. Ngakho ngingaba kanjani ngonaka intombi?” (Jobe 31:1) Ngokufanayo, le ndoda iyenqaba ukuvumela amehlo ayo ukuba abuke izithombe ezingcolile, igwema lezo zinto njengokungathi ziwushevu. Owesifazane oxoxa nabanye abese ezwa inhlebo engase ilimaze uyazibamba, ekhumbula lesi siqondiso: “Yilowo nalowo kithi makajabulise umakhelwane wakhe ngento ezomakha.” (Roma 15:2) Inhlebo angase ayidlulisele phambili ayakhi. Ingase idicilele phansi igama likadadewabo ongumKristu; futhi ngeke imjabulise uYise osezulwini. Ngakho, ulawula ulimi lwakhe futhi ashintshe indaba.

¹² Esimweni ngasinye kulezi zimo, umKristu wenza ukukhetha empeleni okuthi: ‘UJehova unguMbusi wami. Ngizozama ukwenza okumjabulisayo kule ndaba.’ Ingabe yile ndlela obheka ngayo ukukhetha nezinqumo ozenzayo? Uma wenza kanjalo, ngempela uyokwazi ukwenza ngokuvumelana namazwi athinta inhliziyo asencwadini yezAga 27:11: “Hlakanipha, ndodana yami, wenze inhliziyo yami ijabule, ukuze ngimphendule ongiklolodelayo.” Yeka ukuthi sinelungelo elingakanani lokwenza inhliziyo kaNkulunkulu ijabule! Akufanele yini senze konke esingakwenza ukuze sigcine ubuqotho bethu?

2. UNkulunkulu Uyosahlulela Ngesisekelo Sobuqotho Bethu

13. Okwashiwo uJobe noDavide kubonisa kanjani ukuthi uJehova usahlulela ngesisekelo sobuqotho bethu?

¹³ Siyabona ukuthi ubuqotho busenza sikwazi ukumelela ubukhosi bukaJehova. Ngakho, buyisisekelo uNkulunkulu angasahlulela ngaso. UJobe wayelazi kahle leli qiniso. (Funda uJobe 31:6.) UJobe wayazi ukuthi uNkulunkulu ukala sonke isintu ‘ngesikali esinembile,’ esebenzisa indinganiso yaKhe ephelele yobulungisa ukuze athole izinga lobuqotho bethu. Ngokufanayo, uDavide wathi: “UJehova ngokwakhe uyogweba izizwe. O Jehova, ngahlulele ngokokulunga kwami nangokobuqotho bami obukimi. . . . UNkulunkulu njengoba elungile uvivinya inhliziyo nezinso.” (IHu. 7:8, 9) Siyazi ukuthi uNkulunkulu angabona ekujuleni komuntu ongaphakathi, “inhliziyo nezinso” ezingokomfanekiso. Nokho, kudingeka sikhumbule ukuthi usuke efunani. Njengoba uDavide asho, uJehova usahlulela ngokobuqotho bethu.

14. Kungani kungafanele nanini sicabange ukuthi ukungapheleli nokuba kwethu nesono kuyasivimbela ekugcineni ubuqotho?

¹⁴ Mbone ngeso lengqondo uJehova uNkulunkulu ehlola izinkulungwane zezigidi zezinhliziyo zesintu namuhla. (1 IziKr. 28:9) Bangaki abathola begcina ubuqotho bobuKristu? Uma beqhathaniswa, bambalwa kakhulu! Nokho, akufanele sicabange ukuthi sibuthakathaka kakhulu ukuba singagcina ubuqotho. Kunalokho, sinesizathu esizwakalayo sokwethemba ukuthi nakuba singaphelele, uJehova uyosithola sigcina ubuqotho, njengoba kwenza uDavide noJobe. Khumbula, ukuphelela akuqinisekisi ukuthi siyogcina ubuqotho. Bathathu kuphela abantu abaphelele abake baphila kulo mhlaba, futhi ababili kubo, u-Adamu no-Eva, bahluleka ukugcina ubuqotho. Noma kunjalo, kunezigidi eziningi zabantu abangaphelele eziye zaphumelela ukwenza kanjalo. Nawe ungaphumelela.

3. Bubalulekile Ethembeni Lethu

15. UDavide wabonisa kanjani ukuthi kudingeka sibe qotho ukuze sibe nethemba ngekusasa?

¹⁵ Ngenxa yokuthi uJehova uyosahlulela ngesisekelo sobuqotho bethu, bubalulekile ukuze sibe nethemba ngekusasa. UDavide wayazi ukuthi lokhu kuyiqiniso. (Funda iHubo 41:12.) Wayelazisa ithemba lokukhathalelwa uNkulunkulu phakade. NjengamaKristu eqiniso namuhla, uDavide wayenethemba lokuphila phakade nokuqhubeka esondela eduze kukaJehova uNkulunkulu njengoba emkhonza. Wayazi ukuthi kwakumelwe agcine ubuqotho bakhe ukuze abone ukugcwaliseka kwalelo themba. Ngokufanayo, uJehova uyasisekela, asifundise, asiqondise futhi asibusise njengoba sigcina ubuqotho bethu.

16, 17. (a) Kungani uzimisele ukuqhubeka ugcina ubuqotho bakho? (b) Isihloko esilandelayo sizoxoxa ngamiphi imibuzo?

¹⁶ Ithemba libalulekile ekutholeni injabulo manje. Lingasinika injabulo esiyidingayo ukuze sibhekane nezikhathi ezinzima. Lingavikela nokucabanga kwethu. Khumbula, iBhayibheli lifanisa ithemba nesigqoko sokuzivikela. (1 Thes. 5:8) Njengoba lesi sigqoko sivikela ikhanda lesosha empini, ithemba livikela izingqondo zethu emicabangweni engakhi, efiphele egqugquzelwa uSathane kuleli zwe elidala eliwohlokayo. Ngempela, ukuphila akubi nanjongo uma singenalo ithemba. Kudingeka sizihlole ngokwethembeka, sisinakisise isimo sobuqotho bethu nesethemba elihlobene nabo. Ungakhohlwa ukuthi ngokugcina ubuqotho, usekela ubukhosi bukaJehova futhi ulonda ithemba lakho lekusasa eliyigugu. Kwangathi ungabambelela njalo ebuqothweni bakho!

¹⁷ Njengoba ubuqotho bubaluleke kangaka, kudingeka sicabangele eminye imibuzo. Sibuhlakulela kanjani ubuqotho? Singabulondoloza kanjani? Yini umuntu angase ayenze uma eye wangabugcina ubuqotho bakhe isikhathi esithile? Isihloko esilandelayo sizoyiphendula le mibuzo.

[Umbhalo waphansi]

Ungaphendula Kanjani?

• Buyini ubuqotho?

• Ubuqotho buhlobene kanjani nempikiswano yobukhosi bendawo yonke?

• Kungani ubuqotho buyisisekelo sethemba lethu?

[Izithombe ekhasini 5]

Ukuphila kwansuku zonke kubekela ubuqotho bethu izinselele eziningi