Ukunqanda Isishayo Sokungalingani
Ngokushesha uMdali uzoletha ukulingana abantu abakulangazelelayo. Kuze kube yileso sikhathi, okungenani singazithatha izinyathelo zokunqanda lesi sishayo sokungalingani esithinta thina nemikhaya yethu. Kunjengoba uNelson Mandela, owayengumongameli waseNingizimu Afrika, aphawula, “okuhlukanisa omunye umuntu komunye, yilokho esikwenzayo ngalokho esinakho, hhayi lokho esikuphiwayo.”
UMLANDO uyawafakazela amazwi akhe. Baningi abesilisa nabesifazane abaye baphiwa okuncane lapho bezalwa, kodwa ngokukusebenzisa, baye baphumelela ngendlela ebahlukanisayo kulabo abalingana nabo okungenzeka babephiwe okwengeziwe kunabo. Ngokuphambene, abanye abantu ababebusiswe ngokucebile ngamathuba amahle kusukela bezalwa, bakusaphaza lokho ababenakho futhi bahluleka ukuwasebenzisa ngokugcwele amakhono abo.
Kusebenzise Ngokugcwele Onakho!
OFakazi BakaJehova bakukhathalela kakhulu ukusiza abantu ngesifundo seBhayibheli ukuze bazuze ulwazi ngezinjongo zikaNkulunkulu. Nokho, bayaqaphela ukuthi ukuze abantu bazuze ngokugcwele ekwazisweni okuseBhayibhelini, kumelwe bakwazi ukufunda. Ngenxa yaleso sizathu, oFakazi BakaJehova baye bafundisa amashumi ezinkulungwane zabantu ukufunda nokubhala, kuhlanganise nabantu abangu-23 000 (ngawo-1990) kwelinye izwe laseNtshonalanga Afrika lilodwa. Ibhekisela enkonzweni ephawulekayo yezenhlala-kahle eyenziwa oFakazi BakaJehova, i-San Francisco Examiner yathi: “Ningababheka njengezakhamuzi eziyisibonelo. Bazikhokha ngenkuthalo izintela, banakekele abagulayo, balwe nokungakwazi ukufunda.”
Ngaphezu kwalokho, ngesifundo esiqhubekayo sokukhuluma obala, oFakazi BakaJehova baye baqeqesha amakhulu ezinkulungwane zabantu ukuba babe izikhulumi ezifanelekayo, bakwazi ukukhuluma ngokushelelayo obala. Phakathi kwalezi zinkulungwane kunabanye ababenezinkinga ezinkulu zokukhuluma. Cabangela indoda ethile yaseNingizimu Afrika eyabhala: “Nganginamalimi amabi kakhulu kangangokuba ngase ngingunkom’ idlayodwa, ngokuvamile ngincike kwabanye ukuba bangikhulumele. . . . Lapho ngingenela iSikole Senkonzo Esingokwasezulwini futhi kudingeka ngifunde iBhayibheli phambi kwezilaleli ezimbalwa . . . , ngangingiza kakhulu kangangokuba angikwazanga ukuqeda isabelo sami ngesikhathi esinikeziwe. Ngemva komhlangano [umeluleki] wanginikeza ngomusa iseluleko esiwusizo. Wasikisela ukuba ngiprakthize ukufunda ngokuzwakalayo ngingedwa. Ngenza kanjalo, ngizinika isikhathi usuku ngalunye, ngifunda ngokuzwakalayo iBhayibheli nomagazini INqabayokulinda.” Le ndoda yathuthuka kahle kangangokuba manje inikeza izinkulumo zeningi emakhulwini, ngisho nasezinkulungwaneni zezilaleli.
Ukujabulela Ukulingana Phakathi Kwabazalwane
Ngokuphathelene nemfundo, ezempilo, ezomnotho nezenhlalo, izimo zoFakazi BakaJehova zihlukene kakhulu. Lokhu kuhlukana kumane kubonisa izimo zezwe ezingaphelele abaphila kuzo. Kodwa ngokuphambene namanye amaqembu enkolo, luye lwaqedwa phakathi kwabo ubandlululo lobuhlanga, ezenhlalo nolwezomnotho.
Lokhu baye bakufeza ngokwenza okusemandleni abo ekusebenziseni lokho abaye bakufunda eBhayibhelini. Baye bazamukela ngomphefumulo wonke izimiso zeBhayibheli ezinjengalezi: ‘UJehova akabukisi okomuntu; umuntu ubheka okusemehlweni, kepha uJehova ubheka okusenhliziyweni.’ (1 Samuweli 16:7) “UNkulunkulu akakhethi, kodwa ezizweni zonke umuntu omesabayo futhi asebenze ukulunga uyamukeleka kuye.” (IzEnzo 10:34, 35) “Ningabuyiseli muntu okubi ngokubi. Yenzani izinto ezinhle emehlweni abo bonke abantu. Uma kungenzeka, ngokusemandleni enu, yibani nokuthula nabantu bonke.”—Roma 12:17, 18; bheka neyoku-1 Thimothewu 6:17-19; Jakobe 2:5, 9.
Benamathela kulezi zimiso zeBhayibheli ezithuthukisa ubunye, oFakazi BakaJehova ababekezeleli nanoma yikuphi ukuphathwa kwabantu ngokungalingani okusekelwe ekuhlukeni ngokohlanga, ezenhlalo noma ngokwezomnotho phakathi kwabo. Ngokwesibonelo, lezi zici azibi nengxenye ekunqumeni ukuthi ubani ozonikezwa amalungelo enkonzo ebandleni lobuKristu. Izikhundla zomthwalo wemfanelo, njengezokufundisa nokwengamela, zinikezwa kuphela ngesisekelo sokufaneleka okungokomoya.—1 Thimothewu 3:1-13; Thithu 1:5-9.
Kubantu abaye bahlupheka ngaphansi kokungalingani okukuleli zwe elinobandlululo, yeka ukuthi kuqabula kanjani ukuba abanye babaphathe njengabazalwane nodade abanokuma okulinganayo phambi koMdali wabo! UMartina angakufakazela lokhu. Ngemva kokuba uyise eshiye umkhaya wakubo, wakhulela emzini ompofu onomzali oyedwa. Wayevame ukukhishwa inyumbazane emphakathini, wayezinyeza, ekuthola kunzima ukuphilisana kahle nabanye. Waba nesimo sengqondo sokunganaki. Nokho, izinto zashintsha ngemva kokuqala ukufunda iBhayibheli futhi eba ngomunye woFakazi BakaJehova. Uthi: “Kusadingeka ngilwe nomcabango ongemuhle, kodwa manje sengikwazi kangcono ukubhekana nale nkinga. Ngiye ngazihlonipha ngokwengeziwe, futhi ngikhuluma ngokuqiniseka okukhudlwana. Iqiniso liye langinika umuzwa wokwethenjelwa. Manje sengiyazi ukuthi uJehova uyangithanda nokuthi kunenzuzo ukuphila.”
Njengeqembu lamaKristu omhlaba wonke, oFakazi BakaJehova emazweni angaphezu kuka-230 bajabulela isilinganiso esithile sokulingana esiyingqayizivele ngempela ezweni lanamuhla. Ingabe ikhona enye inhlangano yenkolo engasho okufanayo futhi ikusekela ngamaqiniso?
Yiqiniso, oFakazi BakaJehova babhekana namaqiniso njengoba enjalo. Bakuvuma ngokungananazi ukuthi njengoba bephakathi kwesimo esingaphelele, ngeke bakuqede ngokuphelele ukungalingani kwabantu njengoba nje nabanye beye bazama ukwenza kanjalo emakhulwini eminyaka—bahluleka. Nokho, bayajabula ngokuthi phakathi kwabo, baye benza okukhulu ekunqandeni lesi sishayo esibulalayo. Futhi ngokholo oluqinile esithembisweni sikaNkulunkulu, balindele ngokulangazela izwe elisha lokulunga lapho ukungalingani kuyoba yinto yesikhathi esidlule, phakade.
Yebo, ngokushesha sonke isintu esilalelayo siyobuyiselwa ekubeni esilinganayo “ngesithunzi nangamalungelo” uMdali waso ayehlose ukuba sikujabulele kwasekuqaleni. Yeka umcabango omuhle! Futhi ngaleso sikhathi uyoba yinto engokoqobo!
[Isithombe ekhasini 7]
OFakazi BakaJehova balwa nokungakwazi ukufunda ngokufundisa amashumi ezinkulungwane zabantu ukufunda nokubhala
[Isithombe ekhasini 8]
Iqiniso leBhayibheli lisiza ekuqedeni ukucwasana kobuhlanga, ezenhlalo nezomnotho