Ubunye Bomhlaba—Ingabe Buyoke Butholakale?
“UMA singaphumelela ezizukulwaneni ezimbalwa ezizayo ukuguqula izwe lemibuso ezimele esiphila kulo libe uhlobo oluthile lomphakathi wangempela wezizwe zonke, . . . khona-ke siyobe siyiqede ngokuphumelelayo nempi ebilokhu ikhona kusukela endulo . . . Nokho, uma singahluleka, cishe ngeke kube . . . nempucuko.” Sisho njalo isazi-mlando sezempi uGwynne Dyer encwadini yaso ethi War.
UDyer uthi amakhasi omlando agcwele ukulandisa okuphathelene nezizwe namanye amaqembu anamandla aphendukela empini ukuze axazulule ukungezwani kwawo. Ukungezwani kwawo kwacekela phansi ukuphila kwezigidi zezisulu. Ukuchaza kweNkosi uSolomoni indlela lokhu okwakubathinta ngayo abantu osukwini lwayo kusafaneleka nanamuhla. Yabhala: “Ngase ngibuye ngabona konke ukucindezela okwenziwa phansi kwelanga; bheka izinyembezi zabacindezelwayo; babengenamduduzi. Ohlangothini lwababacindezelayo kwakukhona amandla, kepha bona babengenamduduzi.”—UmShumayeli 4:1.
Namuhla, njengoba isazi-mlando esingenhla sibonisa, ngaphandle kokudabukiswa “izinyembezi zabacindezelwayo,” kunesizathu esengeziwe sokuthola indlela ethile yokuguqula lelizwe elinemibuso ezimele libe uhlobo oluthile lomphakathi wangempela wezizwe zonke: Yona kanye impucuko isengozini! Izimpi zanamuhla zisongela ukubhubhisa zonke izizwe eziphendukela kuzo futhi ngeke kusale nesisodwa esinqobile.
Ingabe Izwe Elinobunye Liseduze?
Akhona yini amathemba omhlaba onobunye? Ingabe umphakathi wesintu ungawanqoba amandla ahlukanisayo asongela ukubhubhisa umhlaba? Abanye bacabanga kanjalo. Umhleli wengosi yezempi ye-Daily Telegraph yaseBrithani, uJohn Keegan, uyabhala: “Naphezu kokudideka nokungaqiniseki, kubonakala kungenzeka ukuba nombono olokozayo wezwe elingenayo impi.”
Yini emenza abe nalombono wethemba? Kungani abaningi bebonakala benethemba naphezu komlando omude wezimpi zesintu nokuhluleka okusobala komuntu ukuzibusa ngokuphumelelayo? (Jeremiya 10:23) Esikhathini esithile esidlule abanye babethi: ‘Isintu siya phambili. Umlando ubonisa isimo senqubekela phambili.’ Ngisho nanamuhla, abaningi bakholelwa ukuthi ngandlela-thile ubuhle umuntu azalwa nabo buyobunqoba ububi. Ingabe lelo ithemba eliqinisekile? Noma ingabe kumane kuwukuzikhohlisa okuyoholela ekudumazekeni okwengeziwe? Sibhekana namaqiniso, encwadini yaso ethi Shorter History of the World, isazi-mlando uJ. M. Roberts sabhala: “Akunakushiwo nakancane ukuthi ikusasa lezwe libonakala liqhakazile. Futhi akukho okubonisa ukuthi ukuhlupheka kwesintu sekuzophela, futhi akukho sisekelo sokukholelwa ukuthi kuzoba njalo.”
Ingabe zikhona izizathu zangempela zokukholelwa ukuthi abantu nezizwe bayokunqoba ngempela ukungathembani nokungezwani okubahlukanisayo? Noma ingabe kudingeka okuthile okungaphezu kwemizamo yabantu? Isihloko esilandelayo siyocabangela lemibuzo.
[Umthombo Wesithombe ekhasini 2]
Background globe on the cover: Mountain High Maps® Copyright © 1995 Digital Wisdom, Inc.