Ukukhululwa Yiqiniso

E-UNITED STATES, abantu abangaphezu kwesigidi bavalelwe emajele. Kulaba, abacishe babe izinkulungwane ezintathu bagwetshelwe ukufa. Zicabange ukuleso simo. Ubungazizwa kanjani? Umcabango wekusasa elinjalo uyakhwantabalisa ngempela. Nokho, ngomqondo othile, bonke abantu basesimweni esifanayo. IBhayibheli lithi: “Bonke bonile futhi bayasilela enkazimulweni kaNkulunkulu.” (Roma 3:23) Yebo, njengenzalo ka-Adamu, “siboshwe” yisimo sokuba nesono. (Roma 5:12) Imiphumela yokuvalelwa kwethu siyizwa zonke izinsuku, njengoba kwakunjalo ngomphostoli uPawulu ongumKristu, owabhala: “Ngibona emalungwini ami omunye umthetho olwa nomthetho wengqondo yami futhi ongithumbela emthethweni wesono osemalungwini ami.”—Roma 7:23.

Ngenxa yesimo sethu sokuba nesono, kunjengokungathi ngamunye wethu ungaphansi kwesigwebo sokufa, ngoba iBhayibheli lithi: “Inkokhelo isono esiyikhokhayo iwukufa.” (Roma 6:23) Umhubi uMose wasichaza kahle isimo sethu: “Sineminyaka engamashumi ayisikhombisa kuphela—iminyaka engamashumi ayisishiyagalombili, uma sinamandla; nokho isilethela inkathazo nosizi kuphela; ukuphila kuphela ngokushesha, futhi singabe sisaba khona.”—IHubo 90:10, Today’s English Version; qhathanisa noJakobe 4:14.

UJesu wayecabanga ngokuba kwesintu isigqila sesono nokufa lapho ethi kubalandeli bakhe: “Iqiniso liyonikhulula.” (Johane 8:32) Ngalawo mazwi, uJesu wayenika abalandeli bakhe ithemba lokuthile okukhulu kakhulu kunokukhululeka ekubuseni kwamaRoma—wayebanika intethelelo esonweni nasekufeni! Babeyokunikwa kanjani lokhu? “Uma iNdodana inikhulula,” uJesu ebatshela, “niyokhululeka ngempela.” (Johane 8:36) Yebo, ngokubeka phansi ukuphila kwayo, “iNdodana,” uJesu, yaba umhlatshelo oyisihlawulelo wokubuyisa lokho u-Adamu akulahla. (1 Johane 4:10) Lokhu kwavulela sonke isintu esilalelayo indlela yokukhululwa ebugqilini besono nokufa. INdodana kaNkulunkulu ezelwe yodwa yafa “ukuze wonke umuntu obonisa ukholo kuyo angabhujiswa kodwa abe nokuphila okumi phakade.”—Johane 3:16.

Ngakho iqiniso elingasikhulula ligxile kuJesu Kristu. Labo ababa ngabalandeli bezinyathelo zakhe baba nethemba lokukhululwa esonweni nokufa lapho uMbuso kaNkulunkulu uthatha izintambo ngokugcwele emhlabeni. Ngisho namanje, labo abamukela iqiniso leZwi likaNkulunkulu baba nenkululeko yangempela. Ngaziphi izindlela?

Ukukhululeka Ekwesabeni Abafileyo

Izigidi namuhla ziphila ngokwesaba abafileyo. Ngani? Ngoba izinkolo zazo ziye zazifundisa ukuthi ekufeni umphefumulo uyaphuma emzimbeni futhi udlulele endaweni yemimoya. Yingakho kuyisiko emazweni athile ukuba izihlobo zikamufi zibe nomlindelo oqhubeka imini nobusuku izinsuku eziningana. Ngokuvamile uhlanganisa nokuhlabelela ngamazwi aphakeme nokushaywa kwezigubhu. Abalilayo bakholelwa ukuthi lokhu kuzomjabulisa umuntu oshonile futhi kuvimbele umoya wakhe ukuba ubuye uzohlupha abaphilayo. Izimfundiso zamanga zeLobukholwa ngabafileyo ziye zalibhebhethekisa leli siko.

Nokho, iBhayibheli liveza iqiniso ngesimo sabafileyo. Lisho ngokucacile ukuthi umphefumulo wakho nguwe, hhayi ingxenye yakho ethile eyimfihlakalo eqhubeka iphila ngemva kokufa. (Genesise 2:7; Hezekeli 18:4) Ngaphezu kwalokho, abafileyo abahlushwa esihogweni somlilo, abayona nengxenye yendawo yemimoya engathinta abaphilayo. “Kepha abafileyo,” kusho iBhayibheli, “abazi-lutho, . . . akukho-msebenzi, namcabango, nakwazi, nakuhlakanipha endaweni yabafileyo, lapho uya khona.”—UmShumayeli 9:5, 10.

Lamaqiniso eBhayibheli aye akhulula abantu abaningi ekwesabeni abafileyo. Abasenzi misebenzi ebizayo ukuze bashweleze kokhokho babo, futhi abasakhathazeki ngokuthi abathandekayo babo bahlushwa ngonya ngenxa yeziphambeko zabo. Baye bafunda ukuthi iBhayibheli linikeza ithemba elimangalisayo ngalabo abaye bafa, ngoba lisitshela ukuthi ngesikhathi sikaNkulunkulu esimisiwe, kuyoba khona “uvuko kokubili olwabalungileyo nabangalungile.” (IzEnzo 24:15; Johane 5:28, 29) Ngakho, abafileyo bamane nje baphumule njengamanje, njengokungathi basebuthongweni obukhulu.—Qhathanisa noJohane 11:11-14.

Iqiniso ngesimo sabafileyo nethemba lovuko lingasikhulula ekuphelelweni yithemba okungase kulethwe ukufa. Lelo themba lasekela umbhangqwana oshadile e-United States lapho indodana yawo eneminyaka emine ubudala ifa engozini. “Ekuphileni kwethu kunesikhala esingeke sivaleke size siphinde sibone indodana yethu ngovuko,” kuvuma unina. “Kodwa siyazi ukuthi ubuhlungu bethu bumane nje bungobesikhashana, ngoba uJehova uthembisa ukusula izinyembezi zokudabuka emehlweni ethu.”—IsAmbulo 21:3, 4.

Ukukhululeka Ekwesabeni Ikusasa

Liphetheni ikusasa? Ingabe umhlaba wethu uyongqongqiswa ukhukhulela-ngoqo wenuzi? Ingabe ukucekelwa phansi komhlaba kuyokwenza ukuba kungaphileki kuleplanethi yethu? Ingabe ukuwohloka kokuziphatha kuyoholela esiphithiphithini nasenxushunxushwini? Lokho ukwesaba okungokoqobo kwabaningi namuhla.

Nokho, iBhayibheli liyasikhulula kulokho kwesaba okukhwantabalisayo. Lisiqinisekisa ngokuthi “umhlaba umi phakade.” (UmShumayeli 1:4) UJehova akazange adale iplanethi yethu ukuze nje icekelwe phansi abantu abenza ngokungakhathali. (Isaya 45:18) Kunalokho, uJehova wadala umhlaba ukuze ube ikhaya eliyipharadesi lomkhaya wesintu onobunye. (Genesise 1:27, 28) Injongo yakhe ayishintshile. IBhayibheli lisitshela ukuthi uNkulunkulu ‘uyochitha labo abachitha umhlaba.’ (IsAmbulo 11:18) Ngemva kwalokho, “abathobekileyo [bayodla] ifa lomhlaba,” kusho iBhayibheli, “bathokoze ngokuthula okukhulu.”—IHubo 37:11.

Lesi sithembiso sinokwethenjelwa, ngoba uNkulunkulu akawaqambi amanga. UJehova washo ngokucacile ngomprofethi wakhe u-Isaya ukuthi: “Izwi lami eliphuma emlonyeni wami . . . aliyikubuyela-ze kimi, lingakafezi lokhu engikufunayo, liphumelele kulokhu engilithumele kukho.” (Isaya 55:11; Thithu 1:2) Ngakho-ke, singabheka phambili ngokuqiniseka ekugcwalisekeni kwesithembiso sikaNkulunkulu esilotshwe eBhayibhelini kweyesi-2 Petru 3:13: “Kukhona amazulu amasha nomhlaba omusha esikulindele ngokwesithembiso sakhe, futhi kukho kuyohlala ukulunga.”

Ukukhululeka Ekwesabeni Abantu

IBhayibheli lisinikeza izibonelo ezivelele zabesilisa nabesifazane ababonisa ukungesabi ekuzinikeleni kwabo kuNkulunkulu. Phakathi kwabo kwakunoGideyoni, uBaraki, uDebora, uDaniyeli, u-Esteri, uJeremiya, u-Abigayili noJayeli—uma sibala abambalwa. Laba besilisa nabesifazane abakholekile babonisa isimo sengqondo somhubi owabhala: “Ngiyethemba kuNkulunkulu, angiyikwesaba; umuntu angangenzani na?”—IHubo 56:11.

Ekhulwini lokuqala, umphostoli uPetru noJohane babonisa isibindi esifanayo lapho iziphathimandla zenkolo zibayala ukuba bayeke ukushumayela. Baphendula: “Kodwa thina, asinakuyeka ukukhuluma ngezinto esizibonileyo nesizizwileyo.” Ngenxa yokuma kwabo okuqinile, uPetru noJohane kamuva baboshwa. Ngemva kokukhululwa kwabo ngokuyisimangaliso, baphindela emuva futhi baqhubeka “bekhuluma izwi likaNkulunkulu ngesibindi.” Ngokushesha uPetru nabanye abaphostoli balethwa phambi kweSanhedrini yamaJuda. “Siniyale ngokucacile ukuba ningaqhubeki nifundisa ngesisekelo saleligama,” kusho umpristi ophakeme kubo, “kodwa nokho, bhekani! senigcwalise iJerusalema ngemfundiso yenu.” UPetru nabanye abaphostoli baphendula: “Kumelwe silalele uNkulunkulu njengombusi kunabantu.”—IzEnzo 4:16, 17, 19, 20, 31; 5:18-20, 27-29.

Emsebenzini wabo wokushumayela izindaba ezinhle zoMbuso kaNkulunkulu, oFakazi BakaJehova namuhla bazama ukulingisa intshiseko yamaKristu ekhulu lokuqala. Ngisho nentsha phakathi kwabo ivamile ukuzibonakalisa ingesabi ngokukhuluma nabanye ngenkolo yayo. Cabanga ngezibonelo ezithile.

UStacie, oweve eminyakeni eyishumi nambili, unamahloni ngokwemvelo. Ngenxa yalokho, ukukhuluma nabanye ngenkolo yakhe kwaqale kwaba inselele. Yini ayenza ukuze anqobe amahloni akhe? “Ngatadisha iBhayibheli futhi ngaqiniseka ukuthi ngiyakuqonda engikhuluma ngakho,” kusho yena. “Kwenza izinto zaba lula, futhi ngazethemba kakhudlwana.” Ephephandabeni lendawo kwabhalwa ngedumela elihle likaStacie. Isihloko, esasibhalwe nguthisha wesikole afunda kuso, saphawula: “Kubonakala sengathi inkolo [kaStacie] iye yamnikeza amandla okulwa nezingcindezi eziningi ezizwiwa yintsha eningi. . . . Unomuzwa wokuthi inkonzo kaNkulunkulu kufanele ize kuqala engqondweni yakhe.”

UTommy waqala ukufunda ngeBhayibheli kubazali bakhe lapho eneminyaka emihlanu nje kuphela ubudala. Ngisho nalapho esemncane, wakumela ngesibindi ukukhulekela kweqiniso. Lapho izingane ayefunda nazo ekilasini zidweba imifanekiso yamaholide, uTommy wayedweba izindawo zePharadesi uNkulunkulu alithembisile. Lapho eneminyaka eyeve eshumini nambili, uTommy waphawula ukuthi abafundi abaningi zazibaxaka izinkolelo zoFakazi BakaJehova. Kunokuba afele ngaphakathi ngokwesaba, wacela komunye wothisha bakhe ukuba enze ingxoxo yemibuzo nezimpendulo ekilasini labo ukuze akwazi ukuphendula yonke imibuzo yalo kanyekanye. Kwavunywa, futhi kwanikezwa ubufakazi obuhle.

Lapho eneminyaka engu-17 ubudala, uMarkietta wathola ithuba elihle kakhulu lokukhuluma nabanye ekilasini labo ngenkolo yakhe. “Sanikezwa umsebenzi wokuba senze inkulumo,” kusho yena. “Ngakhetha isihloko sami encwadini ethi Intsha Iyabuza—Izimpendulo Ezisebenzayo.a Ngathatha izahluko ezinhlanu kulencwadi futhi ngabhala izihloko zazo ebhodini. Ngacela ikilasi ukuba lizihlele ngendlela elinomuzwa wokuthi zibaluleke ngayo.” Kwalandela ingxoxo nekilasi. “Ngabonisa ikilasi lencwadi,” kuphetha uMarkietta, “futhi abafundi abaningana bacela ikhophi. Ngisho nothisha wethu wathi uyayifuna.”

Lingakukhulula Iqiniso

Njengoba sibonile, iqiniso eliqukethwe iBhayibheli likhulula abantu abalitadishayo babo bonke ubudala futhi bafake isigijimi salo enhliziyweni. Libakhulula ekwesabeni abafileyo, ekwesabeni ikusasa nasekwesabeni abantu. Ekugcineni, isihlengo sikaJesu siyokhulula isintu esilalelayo esonweni nasekufeni. Yeka injabulo okuyoba yiyo ukuphila phakade emhlabeni oyipharadesi, singasaboshiwe yisimo sethu sokuba nesono esisizuze njengefa!—IHubo 37:29.

Ungathanda yini ukufunda okwengeziwe ngezibusiso uNkulunkulu azithembisile? Uma kunjalo, yini okufanele uyenze? UJesu wathi: “Lokhu kusho ukuphila okumi phakade, ukungenisa kwabo ulwazi ngawe, owukuphela kukaNkulunkulu weqiniso, nangalowo owamthuma, uJesu Kristu.” (Johane 17:3) Ngakho uma ufuna ukuthola inkululeko uJesu ayithembisa abafundi bakhe, kumelwe ufunde ngoJehova uNkulunkulu neNdodana yakhe. Kudingeka wazi ukuthi iyini intando kaNkulunkulu bese uyayenza, ngoba iBhayibheli lithi: “Izwe liyadlula kanjalo nesifiso salo, kodwa lowo owenza intando kaNkulunkulu uhlala kuze kube phakade.”—1 Johane 2:17.

[Umbhalo waphansi]

[Isithombe ekhasini 7]

Ngaphansi koMbuso kaNkulunkulu, isintu siyogcina sikhululiwe esonweni nasekufeni