Indlela Yokuhlela Umtapo Ongokwasezulwini

USHEREZADE, intombazanyana ehlakaniphile yaseSpain, wayeneminyaka emine lapho uthisha wabo etshela ikilasi ukuba lifake imibala ezithombeni zika-“Father Christmas.” Zisuka nje, uSherezade wacela ukuba yena angahlanganyeli. Wachaza ukuthi unembeza wakhe wawungenakumvumela ukuba akwenze lokho.

Emangazwe yilokho kwenqaba, uthisha wamtshela ukuthi kwakumane nje kufana nokufaka imibala esithombeni sikanodoli nokuthi akukho lutho olungalungile kulokho. USherezade waphendula: “Uma kumane kuwunodoli, kungcono ngizidwebele mina unodoli uma ungenankinga ngalokho.”

Kwesinye isehlakalo ikilasi latshelwa ukuba lifake imibala efulegini lesizwe. USherezade waphinde wacela ukuthi yena amane enze okunye. Ukuze achaze ukuthi kungani, waxoxela uthisha indaba kaShadiraki, uMeshaki no-Abedi-Nego.—Daniyeli 3:1-28.

Esikhathini esingeside kusukela lapho lothisha washayela unina kaSherezade ucingo ezwakalisa ukumangala kwakhe. “Sekuyizikhathi eziningana indodakazi yakho ikhuluma nami ngonembeza wayo,” esho. “Wake wayibona into enjalo? Intombazanyana engangaye ingichazela ukuthi kungani unembeza wayo uyihlupha! Bheka lapha, mina angihambisani nalokho oyifundisa khona, kodwa mangisho ukuthi uyaphumelela ngempela. Futhi ngifuna wazi ukuthi ngiyethulela isigqoko indodakazi yakho.”

Intombazanyana eneminyaka emine ingawuzuza kanjani unembeza oqeqeshwe ngeBhayibheli? Unina, uMarina, uyachaza ukuthi uSherezade unomtapo ongokwasezulwini othi yena ekamelweni lakhe lokulala. Lomtapo uhlanganisa amakhopi akhe siqu e-Nqabayokulinda, awadwebele, izincwadi zakhe zokushumayela, nazo zonke izincwadi ze-Watchtower Society esezakhishwa selokhu azalwa. Akuthanda kakhulu emtatsheni wakhe amakhasethi e-Ncwadi Yami Yezindaba ZeBhayibheli, awalalela njalo ebusuku lapho ebheke encwadini yakhe. Yilezizindaba zeBhayibheli ezamenza wakwazi ukwenza izinqumo okukhulunywe ngazo ngenhla.

Umtapo ongokwasezulwini ohlelwe kahle ungakusiza yini wena nabantwana bakho? Kungani umtapo wasekhaya udingeka?

“Umtapo Awuyona Into Yezikhumukane”

“Umtapo awuyona into yezikhumukane, kodwa ungenye yezinto eziyisidingo ekuphileni,” kusho uHenry Ward Beecher. Ngokungangabazeki, cishe sonke sinayo eyodwa ‘yalezizinto eziyisidingo ekuphileni,’ nakuba singazi. Kanjani? Ngenxa yokuthi ngisho nakuba singase singabi nalutho olunye ngaphandle kweBhayibheli, sinawo umtapo wohlobo oluthile.

IBhayibheli ngempela liwumtapo ongokwasezulwini oyedlula yonke. Ekhulwini lesine, uJerome wasungula inkulumo yesiLatini ethi Bibliotheca Divina (Umtapo Waphezulu) ukuze achaze leliqoqo eliphelele lezincwadi eziphefumlelwe esizibiza ngokuthi iBhayibheli. UJehova wasinikeza lomtapo ongcwele ukuze sithole usizo olusebenzayo, imfundo, nesiqondiso. Uyinto okungamelwe siyithathe kalula. Khona kanye ukuba nalo lonke iBhayibheli kusho ukuthi sinomtapo omkhulu ukwedlula iningi lezinceku zikaNkulunkulu zangezikhathi zasendulo.

Ngesikhathi kusatholakala imibhalo yesandla ebizayo kuphela, ambalwa, uma ekhona, amakhaya ayengaziqhayisa ngokuba nalo lonke iBhayibheli. Ngesikhathi uPawulu efisa ukutadisha imiBhalo phakathi nokuboshwa kwakhe kokugcina eRoma, kwadingeka acele uThimothewu ukuba amlethele eminye yemiqulu yase-Asia Minor—cishe izingxenye ezithile zemiBhalo yesiHeberu. (2 Thimothewu 4:13) Nokho, amasinagoge ayenawo amaqoqo athile emiqulu, futhi bobabili uJesu Kristu nomphostoli uPawulu bayisebenzisa ngokunenzuzo lemitapo emsebenzini wabo wokushumayela. (Luka 4:15-17; IzEnzo 17:1-3) Ngokujabulisayo, imiBhalo isitholakala kalula manje kunasekhulwini lokuqala.

Ngenxa yokusungulwa kwemishini yokunyathelisa, namuhla cishe zonke izinceku zikaNkulunkulu—kungakhathaliseki ukuthi zikhuluma luphi ulimi—ziyakwazi ukulithola lonke iBhayibheli ngentengo ephansi. Sinelungelo eliyingqayizivele futhi lokuwunezela “lomtapo” ongcwele. Sekuyiminyaka engaphezu kwekhulu, ‘inceku ethembekileyo neqondayo,’ imatasa inikeza ukudla okungokomoya ngesikhathi sakho.—Mathewu 24:45-47.

Kodwa ngeke kwenzeke ukuba sikusebenzise ngokuyinzuzo lokhu kwaziswa okuyigugu uma singahleli umtapo ongokwasezulwini womuntu siqu. Kungenziwa kanjani lokho? Yebo, isinyathelo sokuqala siwukuthola izincwadi ezidingeka kulowomtapo. Kuwufanele umzamo, ngenxa yokuthi uyosenza sikwazi ukusheshe sithole ukwaziswa okushaya emhloleni esikudingayo ukuze sisingathe izinkinga futhi siphendule imibuzo yeBhayibheli.

Iziphi Izincwadi Engizidingayo?

Wake wazibuza yini ukuthi ungayixazulula kanjani inkinga yokukhulumisana emshadweni wakho noma ukuthi ungabasiza kanjani abantwana bakho ukuba benqabe izidakamizwa? Ungamsiza kanjani umngane ocindezelekile? Ungachaza yini ngokucacile ukuthi ibuphi ubufakazi esinabo bokuthi uNkulunkulu ukhona nokuthi kungani evumela ububi? Isilo esibomvu sesAmbulo isahluko 17 simelelani?

Lemibuzo kanye neminye engenakubalwa ingaphenduleka uma unomtapo owanele ongokwasezulwini. I-Watchtower Society iye yakhipha izincwadi, izincwajana, nezihloko zomagazini ezihlanganisa uhlu oluphelele lwezihloko ezingokomBhalo. Ngaphezu kwalokho, lezizincwadi zikhuluma ngezindaba zomkhaya, zakhe ukholo lwethu kuNkulunkulu naseBhayibhelini, zisenze sikwazi ukuthuthukisa amakhono ethu okushumayela, futhi zisisize ukuba siqonde iziprofetho zeBhayibheli.

Iningi lezincwadi ezinyatheliswe iNhlangano kuleminyaka engu-20 edlule zisekhona namanje. Uma usanda kungena eqinisweni, kungaba yinzuzo ukuba uthole zonke izincwadi ezikhona ngolimi lwakho. Izincwadi eziwumthombo wokwaziswa ezivelele, njenge-Insight on the Scriptures kanye ne-Comprehensive Concordance, nazo ziye zanyatheliswa ngezilimi eziningana. Nokho, ukuzitholela lezizincwadi kumane nje kuseyisinyathelo sokuqala.

Hlela Umtapo Wakho!

Ukwazi ukuthi incwadi ethile unayo ndawo-thile kungenye into, kodwa ukuthola leyo oyidingayo kungenye. Uma kuzodingeka sichithe isikhathi esiningi sifunana nencwadi ethile esiyidingayo, kungenzeka kakhulu siphelelwe isithakazelo kuleyondaba. Ngakolunye uhlangothi, uma izincwadi zethu sizihlele kahle, zisendaweni efinyeleleka kalula, sizokhuthazeka ukwenza ukucwaninga komuntu siqu.

Uma kungenzeka, kuyasiza ukuba nazo zonke izincwadi ezingokwasezulwini ndawonye. Kungenziwa amashalofu ezincwadi, futhi ngokuvamile ngendlela engabizi, uma singenakukwazi ukuthenga asenziwe kakade, futhi akudingeki ukuba athathe indawo enkulu. Kubalulekile futhi ukuba lowomtapo ufinyeleleke kalula. Izincwadi ezithukuswe emagumbini afihlekile ngokuvamile zimane nje zilale uthuli.

Isinyathelo esilandelayo siwukuhlela izincwadi. Isikhashana esincane esisetshenziswa ekuhleleni lezozincwadi ngendlela enengqondo siletha imiphumela.

Kuthiwani uma abaningi emkhayeni wakini bengebona oFakazi bakaJehova? Nakuba ungase ungakwazi ukuhlela umtapo ngendlela obungathanda ngayo, ekamelweni lakho ungase ube neshalofu lezincwadi eliqukethe okungenani ezithile zezincwadi ezingokomBhalo.

Umtapo Ongokwasezulwini Ungasiza Ekwakheni Ingokomoya

Lapho nje izincwadi zethu sezihlelekile, sidinga isimiso esithile esizosisiza ekutholeni ukwaziswa. Inkumbulo yethu ingase ingajwayelani kangako nokuqukethwe incwadi ngayinye esemtatsheni wethu ongokwasezulwini. Noma kunjalo, konke ukwaziswa okusemtatsheni kungafinyeleleka kalula. Uma itholakala ngolimi lwethu, i-Watch Tower Publications Index ingasenza sikwazi ukuthola ukwaziswa okuqondile cishe kunoma isiphi isihloko ngesikhashana nje.

UJulián, osekhonze iminyaka eminingi njengephayona elikhethekile nanjengomdala, uyachaza ukuthi i-Index iye yaba usizo ekufundiseni indodana yakhe enguthumbu ukuba yenze isifundo somuntu siqu. “UJairo, oneminyaka eyisikhombisa ubudala, wake wafika ekhaya evela esikoleni ngelinye ilanga wayesengibuza, ‘Baba, iNhlangano iye yathini ngama-dinosaur?’ Savele saqonda ngqó kuyi-Index sase sibheka igama elithi ‘dinosaurs.’ Cishe ngokushesha sathola izihloko ze-Phaphama! zokuqala eziwuchungechunge mayelana naleyondaba. [February 8, 1990] Ngalo lolosuku, uJairo waqala ukulufunda. Useyazi ukuthi umtapo wethu ongokwasezulwini unokwaziswa okunosizo cishe okumayelana nanoma iyiphi indaba. Mina ngokwami, ngineqiniso lokuthi uma abantwana bethu befunda ukuwusebenzisa kahle umtapo ongokwasezulwini, ubasiza ukuba bakhule ngokomoya. Bafunda ukucabanga, futhi ngaphezu kwalokho, bathola ukuthi isifundo somuntu siqu singajabulisa.”

UFausto, uyise kaSherezade okukhulunywe ngaye ekuqaleni, ukholelwa ukuthi kufanele uqale ngokushesha ngangokunokwenzeka ukuqeqesha abantwana ukuba basebenzise umtapo ongokwasezulwini. “Sesiyambonisa kakade uSherezade, manje oseneminyaka eyisithupha, indlela yokusebenzisa i-Index,” echaza. “Njengoba elijabulela ithemba lePharadesi lasemhlabeni, saqala ngokumbonisa igama elithi ‘paradise’ kuyi-Index sase sibheka izihloko eziku-Nqabayokulinda ezibonisiwe. Ngokuvamile sasimane simbonise izithombe. Nokho, ngalendlela wafunda ukuthi i-Index iyisihluthulelo sokuthola ukwaziswa emtatsheni wethu wasekhaya. Ukuthi ulithole kahle iphuzu sabona lapho ebuya esikoleni ngolunye usuku enombuzo omayelana nemikhosi yama-Ista. ‘Kungani singabheki okuthile kuyi-Index?’ ebuza unina.”

Kungakhathaliseki ukuthi sibadala kangakanani, iBhayibheli lisikhuthaza ukuba ‘sivivinye konke‚ sibambisise okuhle.’ (1 Thesalonika 5:21) Lokhu kudinga ukuba sihlole lokho imiBhalo ekushoyo. (IzEnzo 17:11) Uma sinomtapo ongokwasezulwini ohlelekile, ukucwaninga okunjalo kungajabulisa. Isikhathi ngasinye esiwusebenzisa ngaso ngokuphumelelayo umtapo wethu ekulungiseleleni inkulumo, ukuthola iseluleko esisebenzayo mayelana nokusingatha inkinga ethile, noma ukufuna ukwaziswa okuthakazelisayo, kuyogcizelela kithina ukubaluleka okusebenzayo komtapo wethu.

Abazali bakaSherezade bathi: “Emkhayeni wamaKristu, umtapo ongokwasezulwini awuyona nakancane into yezikhumukane!”

[Ibhokisi ekhasini 30]

UNGAZIHLELA KANJANI IZINCWADI ZAKHO?

Ayikho imithetho engunqamula-juqu yokuthi ungazihlela kanjani izincwadi zakho. Nokho, lamaqoqo alandelayo anengqondo abonisa enye indlela ongahlela ngayo izincwadi zakho ngokwalokho ezikuqukethe.

1. Izincwadi eziqukethe ukuhlaziywa kwevesi nevesi kwezingxenye ezithile zeBhayibheli

(Izibonelo: Umuntu Omkhulu Kunabo Bonke Owake Waphila, IsAmbulo—Umvuthwandaba Waso Omkhulu Useduze!, “The Nations Shall Know That I Am Jehovah”—How?, “Intando Yakho Mayenziwe Emhlabeni”)

2. Izincwadi eziphathelene nokuphila komkhaya

(Izibonelo: Ukwenza Ukuphila Komkhaya Wakho Kujabulise, Intsha Iyabuza—Izimpendulo Ezisebenzayo, INcwadi Yami Yezindaba ZeBhayibheli)

3. AmaBhayibheli Nezincwadi Eziwumthombo Wokwaziswa

(Izibonelo: I-New World Translation of the Holy Scriptures—With References, amanye amaBhayibheli, ama-Watch Tower Publications Index, i-Comprehensive Concordance, i-Insight on the Scriptures, i-Kingdom Interlinear Translation of the Greek Scriptures, isichazamazwi esihle)

4. Izincwadi ezisetshenziswayo njengamanje eSifundweni Sencwadi Sebandla naseSikoleni SeNkonzo EsingokwaseZulwini

5. Amakhasethi nama-video

6. Imiqulu ye-Nqabayokulinda ne-Phaphama!

7. Umlando woFakazi BakaJehova

(Izibonelo: Ama-Yearbook of Jehovah’s Witnesses, OFakazi BakaJehova—Abamemezeli BoMbuso KaNkulunkulu)

8. Izincwadi nezincwajana ezingangomagazini esizisebenzisa njalo enkonzweni yethu

(Izibonelo: Ungaphila Phakade EPharadesi Emhlabeni, Ukubonisana NgemiBhalo, Jabulela Ukuphila Emhlabeni Phakade, Ukufuna Kwesintu UNkulunkulu, Ubunye Ekukhulekeleni Okuwukuphela KukaNkulunkulu Weqiniso)

[Isithombe ekhasini 31]

USherezade kakade usengumfundi omuhle weBhayibheli

[Isithombe ekhasini 31]

Nakuba esemncane, lomfanyana usebenzisa umtapo ongokwasezulwini