Ukusiza Umkhaya Wesikholwa Kanye Nabo EBosnia
OFAKAZI BAKAJEHOVA abahlanganyeli ezimpikiswaneni zezombangazwe. (Johane 17:16) Nokho, ngokulandela iseluleko sikaPawulu sokwenza okuhle “ikakhulukazi emkhayeni wesikholwa kanye nabo,” bawasiza ngokushesha amaKristu abakholwa kanye nawo asezindaweni ezikhungethwe impi. (Galathiya 6:10, Beck) Njengoba ubusika bango-1993-94, babusondela, oFakazi base-Austria naseCroatia bafaka ukuphila kwabo engozini ukuze bayosiza umkhaya wabakholwa kanye nabo eBosnia. Nanku umbiko wabo.
Kusukela ngo-March kuze kube u-October 1993, yayingekho indlela yokuthumela usizo eBosnia. Nokho, ekuqaleni kuka-October iziphathimandla zabonisa ukuthi kungenzeka ukuba kuthunyelwe izimpahla. Lokhu kwakusazoba umsebenzi oyingozi, ngoba impi yayisashisa kuzo zonke izingxenye zaseBosnia.
Nokho, ngoLwesibili, ngo-October 26, 1993, amaloli ethu aphuma eVienna ethwele amathani angu-16 okudla nezinkuni zokubasa ekuyisa kumaKristu esikanye nawo eBosnia. Sasifake amabheji ethu omhlangano ukuze sizibonakalise.
Lapho sifika emngceleni waseCroatia naseBosnia, saqhutshwa sayiswa esikhungweni samasosha lapho amaloli ethu aseshwa ngokuphelele khona. Isicelo sethu sokudabula endaweni yaseSerbia sanqatshwa. Savunyelwa kuphela ukudlula maphakathi neBosnia—khona kanye enkundleni yempi!
Ingabe Imizamo Yethu Yabhuntsha?
Njengoba amasosha ayesiphelezela ayesihola esisusa kwesinye isikhungo sokuhlola esiyisa kwesinye, sasizwa ukuqhuma okuvimbanisa izindlebe kwezinqola zempi nezibhamu. Ebusuku, sadabula emahlathini siphelezelwa izinqola zempi ezimbili ne-jeep. Amaloli ethu atotoba kancane anqamula enkundleni yempi! Konke kwahamba kahle kwaze kwaba sekuseni lapho izinhlamvu zazidlula phezu kwamakhanda ethu saze sayocasha ngalé kwegquma elithile. Ngemva kwesikhashana ukudubula kwakhawuka, nathi saqhubeka nohambo lwethu.
Uma sifika ekamu, isikhulu esiphethe sasibuza ukuthi singobani nokuthi sifunani. “Lomsebenzi wenu ngeke uze uphumelele,” sisho ngemva kokuba sesisitshele injongo yethu. “Ngeke nize niphume kulelikamu, ngisho ukuthi khwasha nje. Indlala ibhokile lapha ezweni kangangokuba abantu bazonihlasela bantshontshe impahla yenu.” Sasicebisa ngokuthi sijike siphindele emuva.
Ingabe imizamo yethu “yayingeke ize iphumelele”? Sasimane sichitha isikhathi sethu yini uma silindele ukuthi singadlula endaweni ekhungethwe impi nendlala kodwa silondoloze impahla nempilo yethu? Kwakudingeka kwenziwe isinqumo esingathi sína. Sase sikuzwile kakade ukuqhuma kwezibhamu namabhomu okuvimbanisa izindlebe. Njengoba lobobusuku sabuchitha namasosha, sabona ukuthi wona abulungele ubunzima bempi. Ayegqoke amavesti angangenwa nhlamvu futhi ehlome ephelele. Ngisho nompheki wayebelethe isibhamu esinguntuluntulu emhlane. Kodwa thina sasizigqokele amayembe, othayi, namabheji omhlangano! Kwakuwukuhlakanipha yini ukuba siqhubeke?
Ukufika ETravnik
Kwakubonakala sengathi ukuphela kwethemba lethu kwakuzoba ukuxoxa nelinye lamaqembu alwayo kulempi. Ngakusasa ekuseni sabuza omunye wesifazane osemusha ukuthi ikomkhulu okukanise kulo amasosha aleloqembu likuphi. “Akukude,” esho. “Nqamulani ehlathini nje, nizothola isakhiwo esasikade siyisibhedlela.” Sasimagange sifuna ukuhamba. Amasosha amangala ngokuthi sasingalinga siphume ekamu singahlomile.
Lesisakhiwo esasikade siyisibhedlela sasibhidlike saphela, kodwa kwakukhona isikhulu esasithola. Savuma ukusisiza, sasicebisa ngokuthi siyokhuluma nomphathi waso kuqala. Sasithatha ngemoto yaso nayo eyayiboqokile sadlulisa okonyazi enkundleni yempi. Sama kwesinye isakhiwo lapho samukelwa khona isikhulu esiphethe sasingenisa endlini emnyama.
“Izolo ebusuku besifuna ukunidubula,” sisho. “Nifunani?”
“Thina singoFakazi BakaJehova, sifuna ukuyisa izimpahla zosizo kubafowethu.”
Sabamba ongezansi—futhi sahlabeka um-xhwele—ngenxa yokuthi kwase kungamasonto amaningi kungekho maloli osizo ayeke alubhada eBosnia. Ngemva kokuseshwa ngokuphelele, sanikezwa incwadi yemvume. Ngayizolo kusihlwa sasikade sicabanga ukuthi yayingekho indlela yokuqhubeka nohambo lwethu, kodwa manje sase singaqhubeka singaphelezelwa muntu!
Sadabula emahlathini, sisuka kwenye indawo yokuhlola siya kwenye, kanti kwezinye izikhathi sasidlula lapho impi ibambene khona ngezihluthu. Naphezu kwaleyongozi, safika ngokuphepha eTravnik. Elinye isosha elezwa ukuthi sesifikile lagijima laya kwenye indlu lapho abafowethu babebuthene khona. “Abantu bakini sebefikile namaloli!” lisho. Ungacabanga ngenjabulo ababa nayo. Sathatha ukudla sakuyisa kuleyondlu, sathi ukuxoxa kancane, kodwa-ke sabe sesiqhubeka nendlela yethu. Kwase kuhlwa, futhi ngaphambili sasisamelwe indlela esabekayo yamakhilomitha angu-32.
Siqhubekela EZenica
Imoto yamasosha yasiphelezela emahlathini ngesivinini esikhulu. Abanye babethi ngeke sifike eZenica, kodwa safika. Kwakusengathi lelodolobha lisitshekelwe ifu elimnyama. Umgwaqo wawungakhanyi futhi kungekho zimoto. IZenica yayivinjezelwe nxazonke, okwakubangela indlala enkulu nokukhungatheka.
Njengoba sasidlula ngomgwaqo, sabona isimanga—odade ababili abangamaKristu befakaza! Sathola ukuthi ngosuku olwandulelayo emhlanganweni wabo, abazalwane base benqume ukuya emahlathini beyofuna ukudla, ngenxa yokuthi kwase kuphelile. Sasifike ngesikhathi! Sehlisa impahla kwelinye lamaloli ngehora lesine ekuseni, ngesikhathi kungakabikho muntu emgwaqweni.
Ngosuku olulandelayo sathintana nomunye ujenene, owamangala kakhulu ngokuthi sasize safika eZenica. Sabe sesibuza ukuthi singadlulela yini endaweni yethu elandelayo, eSarajevo.
“Sekuyizinyanga engekho oke walubhada lapho,” kusho lojenene. Wagcina esinikile imvume yokuba sinqamule izintaba. “Kodwa ngithi kini, kunzima,” esixwayisa. “Angikholwa kahle ukuthi amaloli enu azofika.”
Lojenene wayengakhulumi ihaba. Kwathi nje lapho sekusele amakhilomitha angu-40 sifike eSarajevo, kwadingeka sigege ngenye indlela engamakhilomitha angu-140 sinqamule emahlathini! Ngeke silukhohlwe lolohambo olwathatha izinsuku ezintathu nobusuku obubili izikhathi eziningi sihamba ngesivinini samakhilomitha amahlanu kuphela ngehora sisuka eZenica siyojika eSarajevo siya eJablanica. “Umgwaqo” kwakuyindledlana nje eyayenziwe izimoto zempi. Sasidlula emadwaleni nasemigodini eyesabekayo. Ezikhathini eziningi sasihamba singakhanyisile, futhi kwaze kwaba kabili amaloli ethu ecishe eshelela abheke ezansi negquma. Elinye iloli lempi elalilandela amaloli ethu lake lathi ukukhanyisa imizuzwana futhi ladutshulwa ngokushesha nje. Ngezinye izikhathi kwakudingeka silungise amabhuloho onakele namathayi.
Njengoba sasifika emaphethelweni aseSarajevo, sacela ukukhuluma nojenene ophethe. Ngesikhathi sisalindile, emgwaqweni sabona iloli lithwele izidumbu eziyishumi nesaka elalinamakhanda; amasosha athile ayexoxa ngokubuyiswa kwalezozidumbu—kwakuwumbukwane onyantisayo ngempela, owasenza safisa ukufika kosuku lapho impi iyophela khona.—Isaya 2:4.
Ngehora leshumi ekuseni, omunye wethu wagcina evunyelwe ukuba ayoxoxa nojenene nezikhulu zakhe eziphezulu endlini emnyama, eyayikhanyiswe ngekhandlela kuphela.
“Ningobani nina?” kubuza ujenene.
“Thina singoFakazi BakaJehova. Sifuna ukuletha ukudla koFakazi esikanye nabo baseSarajevo.”
“Niyazi yini ukuthi kunoFakazi BakaJehova abaningi eSarajevo?”
“Yebo, kungakho silapha.”
Lojenene wabe esesho igama likaFakazi othile. “Niyamazi?”
“Yebo, ungumngane wethu.”
“Ungumngane wami nami,” kusho ujenene. “Sasifunda naye esikoleni. Kusukela aba uFakazi, sengimazisa ngisho nakakhudlwana. Nina unenzele okuningi. Ake usitshele okunye ngoFakazi BakaJehova.”
Emva kwalokho kwaba nengxoxo eyathatha ihora lonke, okwathi lapho iphela kwahanjiswa omagazini nezincwajana ezingaphezu kweshumi. Ngemva komhlangano wesibili, ujenene wavuma ukwenza amalungiselelo akhethekile ukuze izimpahla zosizo zifike kubazalwane baseSarajevo.
Lona kwakungewona umsebenzi omncane nje. Cishe abantu abangu-30, kuhlanganise nabangebona oFakazi, baqubula imithwalo enesisindo esingamakhilogremu angu-27 emunye. Basebenza kusukela ngo-8 ebusuku kwaze kwaba ngu-5 ekuseni izinsuku ezimbili ezihlukene—ingqikithi yamahora angu-18. Omunye umdala walandisa ngendlela omakhelwane bakhe ababemangele ngayo ngemizamo yosizo kangangokuba baguqa kanye nabazalwane bebonga uJehova! Yebo, nabo bakuthola ukudla.
Cabanga nje ngenjabulo yabazalwane bethu lapho bethola amakhilogremu angu-11 000 empahla yosizo! Isimo sasidabukisa. Kulelozwe, ikhilogremu likafulawa lalibiza ama-DM angu-450 nangu-1 000 (R1 090 no-R2 400). Isaka lezinkuni lalibiza cishe ama-DM400 (R945), nelitha le-diesel lalibiza ama-DM30 (R70).
Kwakusengathi ngaleyo naleyo ngozi esasibhekane nayo endleleni, manje sase sithola umvuzo. Sajabula ngokubona injabulo yabazalwane lapho bethola lezizimpahla zosizo. Kwakungokuhlangenwe nakho bona—kanye nathi—esingeke sakukhohlwa. Kodwa manje kwase kudingeka sicabangele inselele yokuphindela emuva.
Ukuphindela Emuva
“Sizophindela kanjani emuva?” sibuza ujenene.
“Ngendlela enize ngayo,” ephendula.
Sasikhathele, singasenawo uphethiloli owanele, futhi singasenawo amathayi abheke ingozi. Laqala ukuna, futhi sasingeke sikwazi ukuhamba odakeni. Sabuza ujenene ukuthi singaya yini ngaseningizimu.
“Impi ishisa phansi lapho,” esho. “Ngisho negundane alidabuli.” Nokho, ngemva kwesikhashana wabuye wacabangisisa. “Ake nizame,” esho. “Empeleni nikwazile ukuzofika lapha.”
Kwadingeka ukuba sishiye elinye iloli bese uphethiloli walo siwuhlukanisela lawa amanye amaloli amathathu. Saphuma kwesikabhadakazi sayongena emahlathini futhi.
Uhambo lwethu olubuyayo nalo lwalunezalo izinkinga. Sahlangana neloli lamasosha lilele ngohlangothi, livimbe ingxenye yebhuloho okwakumelwe siwele kulo. Sabona ukuthi uma singakhipha elinye lamasondo alo, ingaba khona indledlana yokudlula.
Sazikhalela kwelinye isosha elalihlomile. “Singalikhipha yini lelisondo sibuye siliphindisele uma sesiwelile ebhulohweni?”
“Nike nalithinta nje lelosondo, lesisibhamu sami sizodla umuntu,” kuphendula isosha, liciba ngesikhali salo.
Sabona ukuthi kungaba ngcono uma singenza ikhofi bese nesosha silipha inkomishi. Amahora ambalwa salixoxela ngemihlangano yesigodi yezizwe zonke yango-1991, njengowawuseZagreb. Ngemva kwalokho, isimo salo sathi ukudamba, lasivumela nokuba silikhiphe isondo.
EJablanica, omunye wethu wakhuluma nomunye umphathi mayelana nendlela esasifuna ukuhamba ngayo. Wayengakukholwa ayekuzwa. “Nifuna ukudlula eSigodini saseNeretva?”
Wayekhathazeke ngakhona. Amaqele aseSigodini saseNeretva aphethwe amasosha ahlukene. Ahleze edubulana. Cishe amakhilomitha angu-16, umgwaqo uyingozi. “Kunjalo phela,” kusho ujenene, “kodwa manje nina nithi nifuna ukudlula khona?”
Ngemva kokucabangisisa ngaloludaba, ujenene wathi singahamba—kodwa kuphela uma sizophelezelwa izikhulu. Nokho, lezozikhulu zazimathintanyawo ngokuhamba nathi! Ekugcineni, sacela ukuba bathinte naleli elinye iqembu balitshele ngokudlula kwethu. Sasizodlula singaphelezelwa muntu ngakusasa ekuseni.
Sabhala amaloli ethu ngamagama amakhulu athi sithwele okokusiza abantu. Ngemva kokwenza umkhuleko, saqonda kulesosigodi. Savuma ukuthi uma bedubula, sasingeke silenyuse ijubane bese sibangela izinsolo.
Sawela ibhuloho sawelela kolunye uhlangothi lomfula sayodlula esigodini esilandelayo sidlula izidumbu zezilwane namaloli nezinqola zempi eziqhunyiswe amabhomu. Ngokungazelelwe sabona amabhomu agqitshwayo ezihlalele emgwaqweni, enza singakwazi ukudlula. Sashaya ihutha yeloli kwaze kwalunguza amasosha amabili ngalé kwedwala elithile. “Ningobani nina? Nifunani?” ebuza.
Ngemva kokuzichaza, sabuza ukuthi angasiphenyela yini indlela emgwaqweni, avuma. Ekugcineni safika ohlangothini olungaphesheya.
Amasosha alapho amangala ngokusibona. Aphuma ecathama ezindaweni ayecashe kuzo, eza emalolini izibhamu ezibhekise ngqó kithina. Sawabonisa amaphepha ethu emvume kanye nezigqebhezana zezinombolo zamaloli, esasikade sizikhiphe ngenxa yezizathu zokulondeka ngesikhathi sidlula endaweni yempi.
“Akekho obenilindele,” kusho elinye isosha. “Nidlule kanjani?”
Ngokuphambene nesicelo sethu, akekho kulezizikhungo owayetsheliwe ngokuza kwethu! Lesisikhulu saqhubeka: “Izibhamu zethu bese zihlohliwe, futhi besesizoqala ukudubula nje.”
Sababuza ukuthi kungani bengakwenzanga lokho.
“Impela angazi,” kuphendula lelisosha. “Ngicabanga ukuthi bekudalelwe ukuba kube njalo. Kodwa-ke ngesikhathi sinihlola ngezipopolo zethu, sibone amagama athi ‘okokusiza abantu,’ asangabe sisazi ukuthi sizonenzani. Ngakho-ke nifike niphephile.” Kamuva sakhuleka kuJehova ngokusuka enhliziyweni ngokusivikela kwakhe.
Nakuba izimo zabo zibucayi, umoya wabafowethu nodadewethu baseBosnia uhlaba umxhwele. Bahlanganyela izinto ezibonakalayo abanazo kanye namazwi amaningi okholo nesikhuthazo. EZenica, kunoFakazi abakhuthele abangu-40, kuhlanganise namaphayona akhethekile amabili, amaphayona asizayo angu-11, nabasanda kubhapathizwa abangu-14. OFakazi abangu-65 namaphayona asizayo amane asasele edolobheni laseSarajevo aqhuba izifundo zeBhayibheli ezingu-134. LaboFakazi basebenzisa isilinganiso samahora angu-20 inyanga ngayinye bekhuluma nabanye ngezindaba ezinhle zoMbuso kaNkulunkulu.
Ngempela, oFakazi bakaJehova bakha umkhaya wabakholwayo womhlaba wonke. Ngokuzithandela bafaka ukuphila kwabo engozini ukuze basize labo abayizihlobo zabo okholweni—ngisho nalabo abangakaze bababone ngaphambili. Ngani? Ngoba bayabathanda. UJesu Kristu wathi: “Ngalokho bonke bayakukwazi ukuthi ningabafundi bami‚ uma nithandana.” (Johane 13:35) Ngokuqinisekile lokhu kuye kwaba njalo ngomkhaya wesikholwa kanye nabo eBosnia.
[Ibalazwe/Izithombe ekhasini 24]
(Ukuze ubone ukuthi indaba ihlelwe kanjani, bheka encwadini)
Adriatic Sea
AUSTRIA
SLOVENIA
HUNGARY
CROATIA
BOSNIA
Travnik
Zenica
Sarajevo
SERBIA
[Izithombe]
Ukuyisa usizo eBosnia naseHerzegovina
[Isithombe ekhasini 26]
Ukuzama ukudlula elolini eliwile