Ukuhalalisela Izwe Elisha LikaNkulunkulu Lenkululeko
“[UNkulunkulu] azesule izinyembezi zonke emehlweni abo; ukufa akusayikuba-khona; nokudabuka, nokukhala, nobuhlungu akusayikuba-khona.”—ISAMBULO 21:4.
1, 2. Ubani kuphela ongaletha inkululeko yeqiniso, futhi yini esingayifunda ngaYe eBhayibhelini?
UMLANDO uye wafakazela ukuba yiqiniso kwalokho umprofethi uJeremiya akusho: “Indlela yomuntu ayikuye uqobo; akukuyo indoda ukuba ihambe, iqondise izinyathelo zayo.” Ubani kuphela ongaziqondisa ngokufanele izinyathelo zomuntu? UJeremiya waqhubeka wathi: “Ngilaye, Jehova.” (Jeremiya 10:23, 24) Yebo, uJehova kuphela ongaletha inkululeko yeqiniso ezinkingeni ezihlupha umkhaya wesintu.
2 IBhayibheli liqukethe izibonelo eziningi zekhono likaJehova lokuletha inkululeko kulabo abamkhonzayo. “Konke okwalotshwa ngaphambili kwalotshelwa ukufundiswa kwethu, ukuze ngokubekezela nangenduduzo yemibhalo sibe-nethemba.” (Roma 15:4) Izahlulelo zikaJehova ekukhulekeleni kwamanga nazo zalotshwa, futhi lezi zisebenza ‘njengesixwayiso kithi, osekufikile phezu kwethu ukugcina kwezikhathi.’—1 Korinte 10:11, qhathanisa neNW.
Ukhulula Abantu Bakhe
3. UJehova walibonisa kanjani ikhono lakhe lokukhulula abantu bakhe eGibithe?
3 Isibonelo sekhono likaNkulunkulu lokukhipha isahlulelo ekukhulekeleni kwamanga nokukhulula labo abenza intando yakhe senzeka lapho abantu bakhe bezikhathi zasendulo babesebugqileni eGibithe. UEksodusi 2:23-25 uthi: “Ukukhala kwabo kwenyukela kuNkulunkulu ngobugqila babo. UNkulunkulu wezwa ukububula kwabo.” Ebonakalisa ngendlela esabekayo ubukhulu bakhe phezu konkulunkulu bamanga baseGibithe, uNkulunkulu uMninimandla onke waletha izinhlupho eziyishumi kulesosizwe. Inhlupho ngayinye yayiklanyelwe ukuba ihlazise unkulunkulu othile waseGibithe, ibonisa ukuthi babengabamanga futhi babengenakubasiza abaseGibithe ababebakhulekela. Kanjalo uNkulunkulu wakhulula abantu bakhe futhi wabhubhisa uFaro namabutho akhe oLwandle Olubomvu.—Eksodusi, izahluko 7 kuya ku-14.
4. Kungani kwakungekhona ukungenzi ubulungisa ngoNkulunkulu ukuba akhiphe izahlulelo zakhe kwabaseKhanani?
4 Lapho uNkulunkulu engenisa uIsrayeli eKhanani, izakhamuzi zalo ezikhulekela amademoni zabhujiswa futhi lelozwe lanikezwa abantu bakaNkulunkulu. NjengoMbusi Wendawo Yonke, uJehova unelungelo lokukhipha izahlulelo zakhe ezinkolweni ezingcolile. (Genesise 15:16) Futhi ngokuphathelene nenkolo yaseKhanani, iBible Handbook kaHalley ithi: “Ukukhulekelwa . . . konkulunkulu baseKhanani kwakuhlanganisa amadili okuphuza eqisa kakhulu; amathempeli abo ayeyizikhungo zobubi. . . . AmaKhanani ayekhulekela phambi konkulunkulu bawo ngokuzitika ngokuziphatha okubi, okwakunjengomkhuba ongokwenkolo; bese kuba ngokubulala abantwana bawo abangamazibulo, njengomhlatshelo kubo labonkulunkulu. Kubonakala sengathi, ngezinga elikhulu, izwe laseKhanani lase liphenduke uhlobo oluthile lweSodoma neGomora ngesilinganiso sesizwe sonke.” Uyanezela: “Ingabe impucuko enokungcola okunyanyeka kanjalo nobulwane yayinalo ilungelo lokuqhubeka ikhona? . . . Abavubukuli abamba emanxiweni amadolobha aseKhanani bayamangala ngokuthi uNkulunkulu akawabhubhisanga ngokushesha kunokuba enza.”
5. Ukukhulula kukaNkulunkulu abantu bakhe basendulo kusebenza kanjani njengesibonelo sesikhathi sethu?
5 Lokhu kulandisa kokuthatha kukaNkulunkulu isinyathelo ngokumelene nokukhulekela kwamanga, ekhulula abantu bakhe besivumelwano, futhi ebanikeza izwe lesithembiso kusebenza njengesibonelo sezinto ezizayo. Kukhomba esikhathini esizayo esiseduze kakhulu lapho uNkulunkulu ezochoboza izinkolo zamanga zalelizwe nabasekeli bazo futhi aholele izinceku zakhe zosuku lwanamuhla ezweni elisha lokulunga.—IsAmbulo 7:9, 10, 13, 14; 2 Petru 3:10-13.
Inkululeko Yeqiniso Ezweni Elisha LikaNkulunkulu
6. Yiziphi ezinye zezici zenkululeko emangalisayo uNkulunkulu ayozinikeza ezweni elisha?
6 Ezweni elisha, uNkulunkulu uyobusisa abantu bakhe ngazo zonke izici ezinhle zenkululeko ayeyihlosele umkhaya wesintu. Kuyoba nenkululeko ekucindezelweni ezombangazwe, ezomnotho, nenkolo yamanga. Kuyoba nenkululeko esonweni nokufa, abantu benethemba lokuphila phakade emhlabeni. “Abalungileyo bazakudla ifa lomhlaba, bahlale kuwo njalonjalo.”—IHubo 37:29; Mathewu 5:5.
7, 8. Yini eyojatshulelwa ekuzuzeni kabusha impilo ephelele ezweni elisha?
7 Ngokushesha ngemva kokuba lelozwe elisha selifikile, abantu abahlala kulo bayobuyiselwa ngokuyisimangaliso empilweni ephelele. UJobe 33:25 uthi: “Inyama yakhe ibentsha kuneyomntwana, abuyele emihleni yobusha bakhe.” UIsaya 35:5, 6 uyathembisa: “Khona amehlo ezimpumputhe ayakuvulwa, zivuleke nezindlebe zezithulu. Khona unyonga luyakutshekula njengendluzele, nolimi lwesimungulu luyakuhuba.”
8 Labo kinina abanokugula okungokomzimba ngenxa yokuguga noma impilo ebuthakathaka, ake nizicabange nisezweni elisha nivuka usuku ngalunye ninempilo nobungqabavu. Imibimbi yenu iye yaphela futhi kwavela isikhumba esibushelelezi, esinempilo—singasekho isidingo sezimonyo zesikhumba. Amehlo enu afiphele noma angaboni eye abuyiselwa ekuboneni okuphelele—singasekho isidingo sezibuko. Ukuzwa okugcwele sekubuyiselwe—nilahla lezozinsiza-kuzwa. Imilenze ekhubazekile manje isiqinile futhi iphelele—nilahla lezozindondolo, izinduku, nezihlalo zabakhubazekile. Ukugula akusekho—nilahla yonke leyomithi. Kanjalo, uIsaya 33:24 uyabikezela: “Abakhé khona abayikusho ukuthi: Ngiyagula.” Uthi futhi: “Bayakuthola ukujabula nokuthokoza, kubaleke usizi nokububula.”—Isaya 35:10.
9. Impi iyopheliswa kanjani phakade?
9 Akekho oyophinde abe umhlatshelo empini. “[UNkulunkulu] uphelisa ukulwa kuze kube-semikhawulweni yomhlaba; uyaphula umnsalo, anqume umkhonto, izinqola zempi azishise ngomlilo.” (IHubo 46:9) Izikhali zempi azisayikuphinde zivunyelwe uMbusi woMbuso kaNkulunkulu, uKristu Jesu, lowo uIsaya 9:6 ambiza ngokuthi “iNkosi yokuthula.” Ivesi 7 liyanezela: “Umbuso uyakuba-mkhulu, ukuthula kungabi-nakuphela.”
10, 11. Ukuthula okuphelele kuyosho ukuthini ngomhlaba?
10 Yeka isibusiso okuyoba yiso ngesintu, nangalomhlaba, ukuba ukhululeke ezikhalini zempi! Phela, esikhathini samanje, izikhali ezazisetshenziswa ezimpini ezidlule zisalokhu zibhubhisa abantu. Ezweni elilodwa, eFrance, ochwepheshe abangaphezu kuka-600 abathena amabhomu amandla baye bafa kusukela ngo-1945 lapho besusa iziqhumane ezasala ezimpini ezidlule. Inhloko yesikhungo sabathena amabhomu amandla lapho yathi: “Sisathola izimbumbulu zombayimbayi ezisasebenza zangeMpi yeFrance nePrussia ka-1870. Kunamachibi agcwele amabhomu anobuthi eMpi Yezwe I. Ngezikhathi ezithile, umlimi oshayela ugandaganda unyathela isiqhumane sokubhubhisa izinqola zempi sangeMpi Yezwe II futhi siqhume, kube sekuphelile ngaye. Lezizinto zikuyo yonke indawo.” Eminyakeni emibili edlule iNew York Times yaphawula: “Kuleminyaka engu-45 kusukela ekupheleni kweMpi Yezwe II, [abathena amabhomu amandla] baye basusa emhlabathini [waseFrance] izinhlamvu zombayimbayi ezineziqhumane eziyizigidi ezingu-16, amabhomu angu-490 000 neziqhumane zangaphansi kwamanzi ezingu-600 000. . . . Izigidi [zamahektare] zisalokhu zibiyelwe, zinenqwaba yezikhali ezifika emadolweni futhi zizungezwe ngezaziso ezixwayisa ngokuthi: ‘Ungathinti. Kuyabulala!’”
11 Yeka ukuthi izwe elisha liyohluka kanjani! Wonke umuntu uyoba nendlu enhle, inala yokudla, nomsebenzi onomvuzo, onokuthula wokuguqula wonke umhlaba ube yipharadesi. (IHubo 72:16; Isaya 25:6; 65:17-25) Abantu, nomhlaba, abasayikuphinde bacekelwe phansi ngezigidi zeziqhumane. Izwe elisha elinjalo liyilokho uJesu ayecabanga ngakho lapho ethi kothile owayebonise ukholo kuye: “Uzakuba-nami eParadisi.”—Luka 23:43.
Imfundo Yomhlaba Wonke Enikeza Ukuphila
12, 13. Yimuphi umsebenzi wokufundisa womhlaba wonke uJesu noIsaya abawubikezelela isikhathi sethu?
12 Lapho umuntu efunda ngezwe elisha likaNkulunkulu, ufunda nokuthi osukwini lwethu, uJehova uye waveza ibandla lomhlaba wonke elihlelelwe ukukhulekela kweqiniso. Liyoba isisekelo sezwe elisha, futhi uNkulunkulu uyalisebenzisa manje ekufundiseni abanye ngezinjongo zakhe. Lenhlangano yobuKristu yenza umsebenzi wokufundisa womhlaba wonke wohlobo nobukhulu okungakaze kubonwe ngaphambili. UJesu wabikezela ukuthi lokhu kwakuyokwenziwa. Wathi: “Lelivangeli lombuso liyakushunyayelwa ezweni lonke, kube-ngubufakazi ezizweni zonke, andukuba kufike ukuphela.”—Mathewu 24:14.
13 UIsaya wakhuluma futhi ngalomsebenzi wokufundisa womhlaba wonke: “Kuyakuthi ngezinsuku ezizayo [esikhathini sethu] intaba yendlu kaJehova [ukukhulekelwa kwakhe kweqiniso okuphakanyisiwe] iqiniswe . . . nezizwe zonke ziyakugobhozela khona. Abantu abaningi bayakuhamba, bathi: Wozani sikhuphukele entabeni kaJehova . . . uyakusifundisa izindlela zakhe, sihambe emikhondweni yakhe.”—Isaya 2:2, 3.
14. Singababona kanjani abantu bakaNkulunkulu namuhla?
14 Ngakho, umsebenzi womhlaba wonke wokufakaza ngoMbuso kaNkulunkulu uwubufakazi obuqinile bokuthi siseduze nokuphela kwalesimiso esibi nokuthi inkululeko yeqiniso iseduze. Labo abahambela abantu bephethe isigijimi sethemba sezwe elisha likaNkulunkulu bachazwe kuzEnzo 15:14 ‘njengabantu begama [likaNkulunkulu].’ Obani abaphethe igama likaJehova futhi abanikeza ubufakazi emhlabeni wonke ngoJehova nangoMbuso wakhe? Irekhodi elingokomlando lekhulu lama-20 leminyaka liyaphendula: oFakazi BakaJehova kuphela. Namuhla bafinyelela ngaphezu kwezigidi ezine emabandleni angaphezu kuka-66 000 emhlabeni wonke.—Isaya 43:10-12; IzEnzo 2:21.
15. Ngokuphathelene nezindaba zezombangazwe, singazibona kanjani izinceku zikaNkulunkulu zeqiniso?
15 Obunye ubufakazi bokuthi oFakazi BakaJehova bagcwalisa iziprofetho eziphathelene nomsebenzi wokushumayela ngoMbuso buphawulwe kuIsaya 2:4: “Bayakukhanda izinkemba zabo zibe-ngamakhuba, nemikhonto yabo ibe-ngocelemba; isizwe asiyikuphakamisela isizwe inkemba, zingabe zisafunda ukulwa.” Ngakho labo abenza umsebenzi womhlaba wonke wokushumayela ngokubusa koMbuso kaNkulunkulu kumelwe ‘bangabe besafunda ukulwa.’ UJesu wathi kumelwe ‘bangabi ingxenye yezwe.’ (Johane 17:16, qhathanisa neNW.) Lokhu kusho ukuthi kumelwe bangathathi-hlangothi ezindabeni zezombangazwe, bangahlanganyeli ezimpikiswaneni nasezimpini zezizwe. Obani abangeyona ingxenye yezwe futhi abangasafundi ukulwa? Nalapha futhi, irekhodi elingokomlando lekhulu lama-20 leminyaka lifakazela ukuthi: oFakazi BakaJehova kuphela.
16. Umsebenzi kaNkulunkulu wokufundisa womhlaba wonke uyokwenziwa ngenkuthalo kangakanani?
16 Umsebenzi wokufundisa womhlaba wonke woFakazi BakaJehova uyoqhubeka ngisho nangemva kokuba uNkulunkulu elethé lelizwe lamanje elibi ekupheleni kwalo. UIsaya 54:13 uthi: “Bonke abantwana bakho bayakuba-ngabafundi bakaJehova.” Lokhu kufundisa kuyoba okwenkuthalo kangangokuba uIsaya 11:9 uyabikezela: “Umhlaba uyakugcwala ukumazi uJehova njengamanzi asibekela ulwandle.” Ukufundiswa okuqhubekayo ngeke kudingeke ngenxa yalabo abayosinda ekupheleni kwalelizwe elidala kuphela kanye nabantwana abangase bazalwe ezweni elisha kodwa futhi kuyodingeka nangenxa yezinkulungwane zezigidi zabantu ababuyela ekuphileni ngovuko. Ekugcineni, wonke umuntu ophila emhlabeni uyofundiswa ukusebenzisa inkululeko yakhe yokuzinqumela ngendlela efanele ngaphakathi kwemingcele yemithetho kaNkulunkulu. Uyoba yini umphumela? “Abathobekileyo bazakulidla ifa lomhlaba, bathokoze ngokuthula okukhulu.”—IHubo 37:11.
Inkululeko Enkulu Ngisho Kwamanje
17. Yini uMose atshela abantu bakaNkulunkulu basendulo ukuba bayenze?
17 Lapho AmaIsrayeli asendulo esesemngceleni weZwe Lesithembiso, uMose wakhuluma nawo wathi: “Nginifundisile izimiso nezahlulelo njengokungiyala kukaJehova uNkulunkulu wami ukuthi niyakwenza kanjalo phakathi kwezwe eningena kulo ukulidla. Ngalokho manizigcine, nizenze, ngokuba lokhu kungukuhlakanipha kwenu nokuqonda kwenu emehlweni ezizwe eziyakuzizwa zonke lezizimiso, zithi: Impela lesisizwe esikhulu singabantu abahlakaniphileyo nabaqondileyo. Ngokuba yisiphi isizwe esikhulu esinonkulunkulu oseduze naso njengoJehova uNkulunkulu wethu, enjalo nanini lapho simbiza, na?”—Duteronomi 4:5-7.
18. Yiziphi izici zenkululeko enkulu abazitholayo ngisho kwamanje labo abakhonza uNkulunkulu?
18 Namuhla izigidi zabantu abakhulekela uJehova nazo zisemngceleni wezwe lesithembiso—izwe elisha. Ngenxa yokuthi balalela imithetho kaNkulunkulu, baseduze naye futhi bavelele kunabo bonke abanye abantu. Kakade uNkulunkulu useye wabakhulula emiqondweni yenkolo yamanga, ekubandlululeni izinhlanga, ekusebenziseni izidakamizwa ngokungemthetho, ekushisekeleni ubuzwe, empini, nasemqeda-zweni wezifo ezithathelwana ngobulili. Ngaphezu kwalokho, uye wabahlanganisa ebuzalwaneni bothando bezizwe zonke obungenakwephulwa. (Johane 13:35) Abakhathazekile ngekusasa kodwa ‘bayajabula ngokwenama kwenhliziyo.’ (Isaya 65:14) Yeka inkululeko enkulu abayijabulelayo ngisho kwamanje ngokukhonza uNkulunkulu njengoMbusi!—IzEnzo 5:29, 32; 2 Korinte 4:7; 1 Johane 5:3.
Ukukhulula Abanye Ezinkolelweni Zamanga
19, 20. Abantu bakhululwa kanjani imfundiso yeBhayibheli ephathelene nesimo sabafileyo?
19 Abantu abaningi oFakazi BakaJehova ababashumayezayo nabo bayeza bezothola lenkululeko. Ngokwesibonelo, emazweni okuqhutshwa kuwo ukukhulekelwa kokhokho, oFakazi BakaJehova bazisa abanye ukuthi akukho-ndawo lapho abafileyo bephila khona futhi abanakubalimaza abaphilayo. OFakazi babhekisela kumShumayeli 9:5, othi “abaphilayo bayazi ukuthi bayakufa, kepha abafileyo abazi-lutho.” Babhekisela futhi nakumaHubo 146:4, athi lapho umuntu efa, “[ubuyela] emhlabathini wakhe; ngalona lolosuku amacebo akhe ayaphela.” Ngakho iBhayibheli libonisa ukuthi awukho umoya oyisipoki noma umphefumulo ongafi ongelapha noma ongesabisa abaphilayo. Ngakho-ke, asikho isidingo sokuchitha imali esetshenzelwe kanzima kukhokhelwa izinkonzo zezinyanga noma abapristi.
20 Ulwazi olunjalo oluqondile lweBhayibheli lukhulula abantu ezimfundisweni zamanga zesihogo somlilo nesihlanzo. Lapho abantu befunda iqiniso leBhayibheli lokuthi abafileyo abezwa lutho, njengokungathi basebuthongweni obujulile, ababe besakhathazeka ngokuthi yini eye yenzeka kwabathandekayo babo abafile. Kunalokho, babheka phambili esikhathini esimangalisayo umphostoli uPawulu akhuluma ngaso lapho ethi: “Kuyakuba-khona ukuvuka kwabafileyo, okwabalungile nokwabangalungile.”—IzEnzo 24:15.
21. Ngokungangabazeki obani abayohlanganiswa phakathi kwalabo abavusiwe, futhi ngokunokwenzeka bayosabela kanjani?
21 Ovukweni abafileyo bayobuyela ekuphileni emhlabeni okhululwe phakade ekufeni okwazuzwa njengefa kuAdamu. Akungabazeki ukuthi abavusiwe bayohlanganisa nabantwana abanikelwa konkulunkulu baseKhanani, njengoMoloki, izinsizwa ezanikelwa konkulunkulu bama-Aztec, nezigidi ezingenakubalwa ezanikelwa kunkulunkulu wempi. Yeka ukuthi bayomangala futhi bajabule kanjani labo ababeyizisulu zezinkolelo zamanga! Khona-ke abanjalo abavusiwe bangamemeza ngenjabulo: “Ziphi izifo zakho, kufa, kuphi ukuchitha kwakho, ndawo yabafileyo, na?”—Hoseya 13:14.
Funa UJehova
22. Uma sifuna ukuphila ezweni elisha likaNkulunkulu, yini okudingeka siyikhumbule?
22 Ingabe uyafuna ukuphila ezweni elisha likaNkulunkulu lokulunga, lapho kuyoba nenkululeko yeqiniso? Uma kunjalo, khona-ke wathathe ngokungathi sína amazwi akwezesi-2 IziKronike 15:2: “UJehova unani, uma ninaye; uma nimfuna, uyakufunyanwa yinina; kepha uma nimshiya, uyakunishiya nani.” Futhi khumbula ukuthi imizamo yakho eqotho yokufunda ngoNkulunkulu nokumthokozisa ngeke angayinaki. AmaHeberu 11:6 athi uNkulunkulu “ungumvuzi walabo abamfunayo.” Futhi eyabaseRoma 10:11 ithi: ‘lowo okholwa nguye akayikujabhiswa.’
23. Kungani kufanele sihalalisele izwe elisha likaNkulunkulu lenkululeko?
23 Eduzane nje kunezwe elisha likaNkulunkulu lenkululeko yeqiniso. Lapho “okudaliweyo kuyakukhululwa ebugqileni bokubhubha, kube-ngukukhululeka kwenkazimulo yabantwana bakaNkulunkulu.” Futhi “[uNkulunkulu uyozesula] izinyembezi zonke emehlweni abo; ukufa akusayikuba-khona; nokudabuka, nokukhala, nobuhlungu akusayikuba-khona.” (Roma 8:21; IsAmbulo 21:4) Khona-ke zonke izinceku zikaJehova ziyophakamisa amakhanda azo futhi zilihalalisele ngenjabulo izwe elisha likaNkulunkulu lenkululeko ngokumemeza, ‘Siyakubonga, Jehova, ngenkululeko yeqiniso ekugcineni!’
Ubungaphendula Kanjani?
◻ UJehova walibonisa kanjani ikhono lakhe lokukhulula abantu bakhe?
◻ Yiziphi izici zenkululeko emangalisayo eziyoba khona ezweni elisha likaNkulunkulu?
◻ UJehova ubafundisa kanjani abantu ukuze bathole ukuphila?
◻ Yiziphi ezinye zezici zenkululeko abantu bakaNkulunkulu abazijabulelayo ngisho kwamanje ngokukhonza uJehova?
[Isithombe ekhasini 10]
UJehova wabonisa ubukhulu bakhe phezu konkulunkulu bamanga baseGibithe, wakhulula abakhulekeli bakhe
[Izithombe ekhasini 12, 13]
Namuhla, izinceku zikaNkulunkulu zeqiniso zibonakala ngokwenza umsebenzi wakhe wokufundisa womhlaba wonke nangokuphatha igama lakhe