Ingabe “Uhlelo Lwezwe Elisha” Lomuntu Luseduze?
1. Isifiso senkululeko eyengeziwe engokombangazwe siye saboniswa kanjani eminyakeni yamuva?
NAMUHLA, izigidi zabantu zisebugqileni enkolweni yamanga, futhi abaningi bakhetha ukuqhubeka ngaleyondlela. Ngesikhathi esifanayo, abaningi ngokwengeziwe bafuna ngenkani inkululeko engokombangazwe. Izenzakalo ezingavamile eminyakeni embalwa edlule eMpumalanga Yurophu nakwezinye izindawo ziye zabonisa ukuthi abantu bafuna izinhlobo ezikhululeke kakhudlwana zikahulumeni. Ngenxa yalokho, abaningi bathi inkathi entsha yenkululeko iseduze. Umongameli waseUnited States wayibiza ngokuthi “uhlelo lwezwe elisha.” Ngempela, abaholi bezwe kuyo yonke indawo babethi iMpi Yomshoshaphansi nokuncintisana ngezikhali sekudlulile nokuthi inkathi entsha yokuthula isiqalile ukubonakala esintwini.—Qhathanisa neyoku-1 Thesalonika 5:3.
2, 3. Yiziphi izimo ezilwisana nenkululeko yangempela?
2 Nokho, ngisho nakuba imizamo yabantu ibingaphumela ekubeni nezikhali ezimbalwa kakhudlwana nasezinhlotsheni ezikhululeke kakhudlwana zokubusa, ingabe inkululeko yeqiniso ibiyoba khona ngempela? Cha, ngenxa yezinkinga ezethusayo ezikhona kuzo zonke izizwe, kuhlanganise nezibusa ngentando yeningi, lapho amanani abampofu anda khona futhi izigidi zizabalazela ukuqhubeka ziphila ngokwezomnotho. Umbiko weZizwe Ezihlangene uthi naphezu kwezintuthuko kwezesayensi nakwezokwelapha, nsuku zonke emhlabeni wonke isilinganiso sabantwana abangu-40 000 bayafa ngenxa yokungondleki kahle noma ngenxa yezifo ezingase zivinjelwe. Isazi esithile kulomkhakha sathi: “Ubumpofu sebunezici ezilisongela ngempela ikusasa lesintu.”
3 Ngaphezu kwalokho, abantu abengeziwe kunanini ngaphambili baba izisulu zobugebengu obuqhubeka buba nonya ngokwengeziwe. Inzondo engokohlanga, engokombangazwe, nengokwenkolo ihlukanisa amazwe amaningi. Kwezinye izindawo isimo asihlukile kulesosikhathi senkathi ezayo esichazwe kuZakariya 14:13, lapho abantu ‘beyoxakeka khona futhi besabe kangangokuba wonke umuntu uyosukela umuntu oseduze kwakhe futhi amhlasele.’ (Today’s English Version) Ukusebenzisa kabi izidakamizwa nezifo ezithathelwana ngobulili kukuyo yonke indawo. Izigidi zabantu zingenwe yingculaza; eUnited States kuphela, abangaphezu kuka-120 000 kakade sebeye bafa ngenxa yayo.
Ukugqilazwa Isono Nokufa
4, 5. Kungakhathaliseki inkululeko ekhona namuhla, yiluphi uhlobo lobugqila olubambe wonke umuntu?
4 Nokho, ngisho noma ngabe bezingekho lezozimo ezimbi, abantu bebeyolokhu bengenayo inkululeko yeqiniso. Bonke bebeyolokhu besebugqileni. Kungani kunjalo? Ngokwesibonelo: Kuthiwani uma umashiqela othile ubengagqilaza bonke abantu abasemhlabeni futhi ababulale bonke? Empeleni, yilokho okwenzeka esintwini lapho abazali bethu bokuqala behlubuka kuNkulunkulu futhi begqilazwa ukubusa okucindezelayo kukaDeveli.—2 Korinte 4:4.
5 Lapho uNkulunkulu edala abantu, wayehlose ukuba baphile emhlabeni phakade bephelele, epharadesi, njengoba uGenesise izahluko 1 no-2 ebonisa. Kodwa ngenxa yokuhlubuka kukakhokho wethu uAdamu kuNkulunkulu, sonke singaphansi kwesigwebo sokufa kusukela nje lapho sizalwa: “Isono sangena ezweni ngamuntu munye [uAdamu, inhloko yomkhaya wesintu], nangesono kwangena ukufa, ngokunjalo ukufa kwafikela abantu bonke.” Njengoba iBhayibheli lisho, “ukufa kwabusa.” (Roma 5:12, 14) Ngakho kungakhathaliseki ukuthi ingakanani inkululeko esingase sibe nayo ngokomuntu siqu, sonke sisebugqileni besono nokufa.
6. Kungani kuye kwaba nentuthuko encane ebudeni bokuphila komuntu kusukela kwalotshwa iHubo 90:10?
6 Ngaphezu kwalokho, ukuphila esinakho manje kulinganiselwe kakhulu. Ngisho nakulabo abanenhlanhla, kungamashumi eminyaka ambalwa kuphela. Ngalabo abaneshwa, kuyiminyaka embalwa kuphela, noma ngaphansi. Futhi ukuhlola okusha kuthi: “Isayensi nezokwelapha kuye kwanweba ubude bokuphila komuntu kwafika emngceleni wakho ongokwemvelo.” Lokhu kungenxa yokuthi isimiso sethu sofuzo sinokungapheleli nokufa okwakhelwe kuso ngenxa yesono sika-Adamu. Yeka ukuthi kudabukisa kanjani ukuthi lapho siphila size sibe neminyaka engu-70 noma engu-80, lapho kufanele sibe abahlakaniphe ngokwengeziwe nabakwazi kangcono ukujabulela ukuphila, imizimba yethu iyawohloka futhi sigcine sesiwuthuli!—IHubo 90:10.
7. Kungani abantu bengeke babe umthombo wenkululeko yeqiniso esiyifunayo nesiyidingayo?
7 Luhlobo luni lokubusa komuntu olungavimbela lokhu kugqilazwa isono nokufa? Alukho nolulodwa. Azikho izikhulu zikahulumeni, ososayensi, noma odokotela kunoma iyiphi indawo abangasikhulula eziqalekisweni zokugula, ukuguga, nokufa, futhi akukho-muntu ongaqeda ukungalondeki, ukungabi nabulungisa, ubugebengu, indlala, nobumpofu. (IHubo 89:48) Kungakhathaliseki ukuthi abantu bangase babe nezisusa ezinhle kangakanani, akunakwenzeka ngabo ukuba babe umthombo wenkululeko yeqiniso esiyifunayo nesiyidingayo.—IHubo 146:3.
Ukusetshenziswa Kabi Kwenkululeko Yokuzinqumela
8, 9. Yini eyabeka isintu esimweni saso samanje esidabukisayo?
8 Umkhaya wesintu ukulesimo esidabukisayo ngenxa yokuthi uAdamu noEva basebenzisa kabi inkululeko yabo yokuzinqumela. Eyokuqala kaPetru 2:16 ithi, ngokweJerusalem Bible: “Ziphatheni njengabantu abakhululekile, futhi ningalokothi nisebenzise inkululeko yenu njengezaba zokwenza okubi.” Ngakho, kuyacaca ukuthi uNkulunkulu wayengahlosile ukuba inkululeko yomuntu ibe engalinganiselwe. Kwakufanele isetshenziswe ngaphakathi kwemingcele yemithetho kaNkulunkulu, eyayilungile futhi eyayizozuzisa wonke umuntu. Futhi leyomingcele yayibanzi ngokwanele ukuba ivumele inkululeko enkulu yomuntu siqu yokuzikhethela, ukuze ukubusa kukaNkulunkulu kungalokothi kube okucindezelayo.—Duteronomi 32:4.
9 Nokho, abazali bethu bokuqala bakhetha ukuzinqumela ngokwabo lokho okwakulungile nalokho okwakungalungile. Njengoba baphuma ngamabomu ekubuseni kukaNkulunkulu, wakuhoxisa ukubasekela kwakhe. (Genesise 3:17-19) Ngaleyondlela baba abangaphelele, okwaphumela ekuguleni nasekufeni. Esikhundleni senkululeko, isintu saba sebugqileni besono nokufa. Futhi saba ngaphansi kwentando yababusi abangabantu abangaphelele, futhi ngokuvamile, abanonya.—Duteronomi 32:5.
10. UJehova uye wazisingatha kanjani izindaba ngothando?
10 UNkulunkulu uye wavumela abantu ukuba benze lokhu kuhlola benenkululeko abayicabangela njengephelele isikhathi esilinganiselwe kuphela. Wayazi ukuthi imiphumela yayiyobonisa ngokungenakungatshazwa ukuthi ukubusa komuntu ngaphandle kukaNkulunkulu akunakuphumelela. Njengoba inkululeko yokuzinqumela, esetshenziswa ngokufanele, iyigugu kangaka, uNkulunkulu ngothando lwakhe uye wakuvumela isikhashana lokho okuye kwenzeka kunokuba ahoxise isipho senkululeko yokuzinqumela.
‘Indoda Ayinakuqondisa Izinyathelo Zayo’
11. Umlando uye wakusekela kanjani ukunemba kweBhayibheli?
11 Irekhodi lomlando liye labonisa ukunemba kwencwadi kaJeremiya isahluko 10, amavesi 23 no-24, ethi: “Akukuyo indoda ukuba ihambe, iqondise izinyathelo zayo. Ngilaye, Jehova.” Umlando uye wabonisa futhi ukunemba kwencwadi kamShumayeli 8:9, ethi: “Lapho umuntu ebusa omunye kube-ngukulimala kwakhe.” Yeka ukuthi kuyiqiniso kanjani! Umkhaya wesintu uye wasuka kwenye inhlekelele waya kwenye, isiphetho sabo bonke saba ithuna. Umphostoli uPawulu wasichaza ngokunembile isimo lapho ethi, njengoba kulotshwe kwabaseRoma 8:22: “Siyazi ukuthi konke okudaliweyo kuyabubula kanyekanye kunezinseka kuze kube-manje.” Yebo, ukukhululeka emthethweni kaNkulunkulu kuye kwasho inhlekelele.
12. Ithini eminye imithombo yezwe ngenkululeko ephelele?
12 Incwadi ethi Inquisition and Liberty yaphawula ngenkululeko ngalendlela: “Ukuzibusa, ngokwakho, akuyona ngempela into enhle: akuyona into okungaqhoshwa ngayo ngaphandle kokuba kucaciswe ngokwengeziwe. Eqinisweni, kungase kube ngolunye lwezinhlobo ezimbi kakhulu zobugovu . . . Umuntu akasona isidalwa esizibusa ngokuphelele, futhi akanakukufisa ngisho nokukufisa ukuba yiso, ngaphandle kwalapho engenangqondo.” Futhi iNkosana uPhilip waseNgilandi wake wathi: “Inkululeko yokuzitika kukho konke esikufunayo nasemzwelweni ingase ikhange, kodwa okuhlangenwe nakho kufundisa ngokuphindaphindiwe ukuthi, inkululeko engenakho ukuzibamba . . . nokuziphatha okungenakho ukucabangela abanye kuyindlela eqiniseke kakhulu yokubhubhisa izinga lokuphila lomphakathi, kungakhathaliseki ukuthi ucebe kangakanani.”
Ubani Owazi Kangcono?
13, 14. Ubani kuphela onganikeza inkululeko yeqiniso emkhayeni wesintu?
13 Ubani owazi kangcono ukuthi ikhaya kufanele lihlelwe kanjani—ingabe abazali abanothando, abanekhono, nabanokuhlangenwe nakho noma ingabe abantwana abancane? Impendulo isobala. Ngokufanayo, uMdali wabantu, uBaba wethu wasezulwini, uyakwazi okungcono kakhulu ngathi. Uyazi ukuthi umphakathi wesintu kufanele uhlelwe futhi ubuswe kanjani. Uyazi ukuthi inkululeko yokuzinqumela kufanele iphathwe kanjani ukuze ilethele wonke umuntu izinzuzo zenkululeko yeqiniso. NguNkulunkulu ongumninimandla onke kuphela, uJehova, owaziyo ukuthi angawukhipha kanjani umkhaya wesintu ebugqileni bawo futhi anikeze inkululeko yeqiniso kubo bonke.—Isaya 48:17-19.
14 EZwini lakhe, kwabaseRoma 8:21, uJehova wenza lesithembiso esishukumisayo: “Okudaliweyo kuyakukhululwa ebugqileni bokubhubha, kube-ngukukhululeka kwenkazimulo yabantwana bakaNkulunkulu.” Yebo, uNkulunkulu uthembisa ukukhulula umkhaya wesintu ngokuphelele esimweni sawo samanje esidabukisayo. Isihloko esilandelayo sizoxoxa ngendlela lokhu okuzokwenzeka ngayo.
Ubungaphendula Kanjani?
(Ukubukeza amakhasi 3 kuya ku-8)
◻ Kungani abantu benomuzwa onamandla ngenkululeko?
◻ Kungaziphi izindlela abantu beye bagqilazwa kuwo wonke umlando?
◻ Kungani uJehova eye wavumela ukusetshenziswa kabi kwenkululeko yokuzinqumela isikhathi eside kangaka?
◻ Ubani kuphela ongaletha inkululeko yeqiniso kuso sonke isintu, futhi ngani?
[Isithombe ekhasini 7]
Isikhathi sokuphila komuntu sifana kakhulu naleso esashiwo eminyakeni engu-3 500 edlule kumaHubo 90:10
[Umthombo]
Courtesy of The British Museum