Siyomkhokhela Kanjani UJehova?
SISABELA kanjani lapho othile eba nesithakazelo sangempela, nesifudumele kithi, mhlawumbe enza okuthile ngokwenzuzo yethu? Umusa nokuphana ngokuvamile kubangela ukusabela okuthile, akunjalo? Khona-ke, injani imizwa yethu ngakuNkulunkulu wethu, uJehova, ngomusa wakhe wothando ongaguqukiyo?
Kulula kakhulu, njengoba sijahwa ukucindezela kokuphila kwansuku zonke, ukukuthatha kalula ukuphana kukaJehova, ngezinye izikhathi size senze nanjengokungathi asibongi ngempela. Ngakho-ke, senza kahle ngokuhlaba ikhefu futhi sicabangele umbuzo womhubi: “Ngiyakubuyiselani kuJehova ngazo zonke izenzo zakhe ezinhle kimina na?” (IHubo 116:12) Siyosabela kanjani?
Izinzuzo Ezivela KuJehova
Ngaphandle kwesipho sikaJehova seZwi lakhe iBhayibheli, yeka ukuthi besiyoba ngabalahleke kanjani! Emakhulwini eminyaka adlule amadoda nabesifazane abanesibindi bafaka ukuphila kwabo engozini ukuze babe nalencwadi futhi bayifunde, futhi sesiyazi ukuthi kungani. Amadoda esaba uNkulunkulu abelokhu enokwazisa ngomBhalo ophefumlelwe, azi ukuthi uyinzuzo kangakanani ‘ekufundiseni, nasekusoleni, nasekuqondiseni nasekuyaleni ekulungeni.’—2 Thimothewu 3:16.
Nokho, siyazi ukuthi ukuze ‘sipheleliselwe yonke imisebenzi emihle,’ sidinga okwengeziwe kunolwazi nje lweBhayibheli. (2 Thimothewu 3:17) Inzuzo ilethwa ekuphileni kwethu ngamandla omoya ongcwele kaNkulunkulu, futhi leliqiniso lilethwa ekunakekeleni kwethu amazwi kaJehova athinta inhliziyo ngomprofethi wakhe uIsaya: “Manje uJehova uNkulunkulu ungithumile kanye noMoya wakhe. Usho kanje uJehova uMhlengi wakho, oNgcwele kaIsrayeli, uthi: NginguJehova uNkulunkulu wakho okufundisile okukusizayo, okuholile ngendlela omelwe ukuhamba ngayo. Sengathi nga ulalele imiyalo yami! Khona ukuthula kwakho kwakuyakubanjengomfula, nokulunga kwakho njengamaza olwandle.” (Isaya 48:16-18) Ngomoya wakhe ongcwele, kuhlanganise neZwi lakhe, uJehova usifundisa okusisizayo, futhi umphumela uwukuthula nokulunga.
Ngaphezu kwalokho, amandla kaJehova ayisiphekupheku asebenza ngokuphumelelayo ukuze sizuze ngoba uhlaka lumisiwe, inhlangano yasemhlabeni, leyo umoya ongcwele osebenza ngayo. Kweyoku-1 Korinte isahluko 12, uPawulu ufanisa ibandla lobuKristu nomzimba futhi evesini 7 uthi: “Kepha yilowo nalowo uphiwa okubonakalisa uMoya kube-ngokokusiza.” Uqhubeka abonise indlela esizuza ngayo ngokuba ingxenye yenhlangano kaNkulunkulu yasemhlabeni.
Eminyakeni engaba mihlanu ngemva kokuba ebhale lawomazwi, waloba incwadi yakhe eya ebandleni lase-Efesu achaza kabanzi kuyo izinzuzo zokuzihlanganisa nalelolungiselelo lasemhlabeni. Nakuba akusho ekuqaleni kwakusebenza kumaKristu agcotshiwe, ingabe labo ‘besixuku esikhulu’ namuhla nabo ‘bapheleliselwe umsebenzi wokukhonza,’ ngokomoya beba ‘abapheleleyo ebudodeni,’ beqinisiwe okholweni, ‘bangabe besaba yizingane,’ futhi ‘ngothando, bakhulele ngakho konke kuye oyinhloko, uKristu’? (IsAmbulo 7:9; Efesu 4:12-16) Sonke sinesizathu esihle sokubonga.
Inceku ethembekileyo neqondayo, ehlanganiswe nebandla lobuKristu emsebenzi wayo ungukusondla ngokomoya, ingobunye futhi ubufakazi bokuthi uJehova uyasisiza. (Mathewu 24:45, 46) Manje silapha esikhathini esabikezelwa sokuba khona kweNkosi. Ingabe “inceku” iyawenza umsebenzi wayo? Naphezu kokungathembisi ‘kwalezinsuku zokugcina,’ ingabe sinethemba? Ingabe sinenjongo efanelekile ekuphileni? (2 Thimothewu 3:1-5; Roma 5:5; 1 Thimothewu 4:10) Yebo! Futhi ithemba lethu aliyona nje into engenzeka kodwa iqiniso langempela elakhelwe okholweni, lolo ngokufanayo olusekelwe ebufakazini obuqinile.—Heberu 11:1.
Khona-ke, ngokusobala, uJehova, uMuphi wethu oMkhulu, usinikeze okuningi okumelwe sibonge ngakho. Ngokunengqondo kuphakama umbuzo:
Ngiyomkhokhela Ngani UJehova?
Okokuqala, kumelwe sivume ukuthi uJehova akadingi lutho kithi. Nguye othi, “Ngelami isiliva, ngelami igolide,” ngokufanayo “nezinkomo zasezintabeni eziyizinkulungwane.” (Hagayi 2:8; IHubo 50:10; Jobe 41:11) Lokhu kusho ukuthi ngeke sikwazi “ukuthenga” uthando lukaNkulunkulu; kodwa sikhuthazwa ukuba sinikele kuye ngokuzithandela. (Qhathanisa neyoku-1 IziKronike 29:14.) Nokho, kunezimo ezithile ekuvunyelweni kwethu ukudela izipho kuJehova.
“Ngiyakusondela kuJehova nginantoni, ngikhothame kuNkulunkulu ophezulu, na? Ngiyakufika ngiphethe iminikelo yokushiswa, nginamathole amnyaka munye, na? UJehova uyakwenamela izinkulungwane zezinqama nezinkulungwane eziyishumi zemifula yamafutha na? Ngiyakunika izibulo lami ngenxa yesiphambeko sami, isithelo sesisu sami ngenxa yesono senhliziyo yami, na? Ukutshelile, muntu, okuhle; uJehova ufunani kuwe, kungabi-ngukwenza ukulunga kuphela nokuthanda umusa, uhambe noNkulunkulu wakho ngokuthobeka, na?”—Mika 6:6-8.
Siyafunda kulokhu ukuthi izimfuneko zikaJehova zinengqondo ngaso sonke isikhathi, ziyafinyeleleka ngaso sonke isikhathi. Ngokungaphezulu, uJesu waveza imfuneko yokuqala yokuthi ubuhlobo bethu kokubili noJehova kanye nabazalwane bethu kumelwe bube obulungile ukuze iminikelo yethu yamukeleke. (Mathewu 5:23, 24) Ngemva kokubeka isisekelo esihle, singabona manje ukuthi sonke sinokuthile esingakunikeza uJehova, sibonga ukulunga kwakhe kithi.
Singakusebenzisa Kanjani Esinakho?
Kudinga isikhathi, umzamo, futhi ngezinga elithile nemali, kodwa yeka ukuthi kuyilungelo kanjani ukumelela uJehova emsebenzini wokushumayela! Lomhlatshelo wokudumisa ungokuthile sonke esingakunika uJehova. Nansi indlela omunye umdala oyiphayona onabantwana abancane abathathu azizwa ngayo:
“Ukuhlanganyela elungelweni lenkonzo yesikhathi esigcwele kufanele noma yikuphi ukuzinikela komuntu siqu—nokwengeziwe—ngoba kuyindlela ephumelela kangcono kakhulu yokunikeza uBaba wethu wasezulwini udumo. Futhi, kungenza ngikwazi ukumbonga ngezinga elithile ngomusa wakhe ongafanele awubonisa kimi siqu.”
Umkakhe uyanezela: “Kuyilungelo langempela ukusiza umyeni wami ukuba aphayone. Kwenza wonke umkhaya ube nengxenye enkulu enkonzweni, futhi ukubona isandla sikaJehova sothando sisinakekela ngendlela engokomoya nengokwenyama kwenza sifune ukumdumisa ngokwengeziwe.”
IWatch Tower Society iye yasakaza amaBhayibheli nezincwadi zeBhayibheli ngokuzithandela iminyaka engaphezu kwekhulu futhi yazinyathelisa ngemishini yayo yokunyathelisa kusukela ngo-1920. Isikhathi nomzamo wezisebenzi zokuzithandela ezisebenza eBethel wokukhiqiza zonke izincwadi esinazo namuhla, kuhlanganise nalowo wabamemezeli bebandla namaphayona wokuzihambisa, ngokomphumela uba umnikelo owengeziwe emsebenzini obalulekile wokushumayela.—Mathewu 24:14.
Futhi, amaKristu asemazweni ami kahle ngokwezomnotho ayajabula ngokwazi ukuthi izipho zawo zomusa eziyimali, ezithunyelwa ehhovisi legatsha leWatch Tower Society ezweni lakubo, zisiza abaningi babazalwane bawo kwezinye izingxenye zomhlaba ukuba basebenzise sonke isikhathi sabo ekushumayeleni nasekwenzeni abafundi. Izithunywa zevangeli ezivela eWatchtower Bible School of Gilead, ababonisi besifunda nabesigodi, namaphayona akhethekile bonke basizwa yileminikelo yokuzithandela ukuba baqhubeke enkonzweni yabo yesikhathi esigcwele.
Mhlawumbe akunakwenzeka ngawe ukuba ukhonze eBethel noma njengelungu leSimiso Sezisebenzi Zokuzithandela Zokwakha Zezizwe Zonke. Kodwa mhlawumbe unemali engasekela labo abenza lomsebenzi kodwa abaswela “inala” yemali yokuzigcina bekulomsebenzi. Ngakho-ke ukulinganisa okuwusizo kungenzeka, njengoba kuchazwe kweyesi-2 Korinte 8:14. Izincwadi ezihambisana neminikelo enjalo ziye zahlanganisa okulandelayo okuvela komunye udade osekhulile owabhala:
“Ngithokoza kakhulu ngazo zonke izibusiso uJehova anginikeza zona, futhi ngithandazela njalo imisebenzi yokwakha nenhlangano.”
Omunye udade wathi: “Ngincamela ukuba lemali encane yenze okuhle okungokwasezulwini kunokuba ihlale ebhange elizowa ngokushesha!”
Umzalwane wazikhulumela ngalamazwi: “Ukuseluleka kukaJehova ukuba sisebenzise esinakho ekumdumiseni kuyindlela yesivikelo sangempela kwezentengiselwano ezinobugovu, ‘uphiko lwesithathu’ lwesimiso sezinto sikaSathane. Ngicela ukuthatha lelithuba ukuba ngisho ukuthi ngikujabulela kanjani ukunikela okuthile ekusheshiseni ukwanda uJehova asinikeza khona, futhi ngiyambonga ngokwenza kube nokwenzeka ukuba ngisetshenziswe.”
Izipho Ezivela Kwabakhulile Nabancane
Kuyakhuthaza ukufunda ngokuzimisela kokwethembeka kwasebekhulile, labo, nakuba benethemba lokusinda ekupheleni kwalesimiso, abaqiniseka ngokwenza iNcwadi Yefa efanelekile, ukuthi umsebenzi woMbuso uyozuza, uma kwenzeka befa. Amanye amazwi atholakala kubabi bamafa, ekhulumela isimo esihle sabenzi bezincwadi zamafa abanjalo, ahlanganisa:
“Umuntu onomusa kubo bonke, ekuphileni kwakhe konke . . . ubethanda uJehova nendalo yakhe.”
“Ngaso sonke isikhathi, into abeyikhathalela kuqala izithakazelo zoMbuso.”
“Ufinyelele umvuzo wakhe wasezulwini ngemva kwenkonzo yakhe yokwethembeka yeminyaka engama-70 . . . njalo ubefuna ukuqhubekisela phambili iqiniso ngempahla yakhe.”
Siyakujabulela futhi ukuzwa ezivela kwabancane, abazimisele ukusebenzisa izinto zabo ezibonakalayo emsebenzini kaJehova. Enye incwadi eyamukelwa ehhovisi IeNhlangano eBrithani yayivela kummemezeli osafunda isikole. Walandisa ukuthi wayezuze umklomelo wokuqala emncintiswaneni wokubhala indaba. Wathumela yonke imali yomklomelo. Izincwadi zeNhlangano zaziwukuphela komthombo athatha kuwo indaba yakhe eyayikhulumela “Isibopho SomKristu,” kanjalo waba nomuzwa wokuthi ngokomthetho imali ekaJehova.
Ngemva kokubuza ukuthi uyomkhokhela ngani uJehova, umlobi weHubo 116 uqhubeka ngokuthi emavesini 13 no-14: “Ngiyakuthatha indebe yensindiso, ngibize igama likaJehova. Izithembiso zami kuJehova ngiyakuzigcwalisa, yebo, nasebusweni babantu bakhe bonke.” Ngokwazisa isipho esihle sensindiso esivela kuJehova ngeNdodana yakhe, sizizwa sishukunyiselwa, njengoba kwenza umhubi, ukuba sithembele kuYe futhi sigcine izithembiso zethu kuYe.
UJehova usisize kakhulu, futhi noma yini esingamenzela yona ibonakala incane uma kuqhathaniswa. Khona-ke, yeka ukuthi kufaneleka kanjani ukuba njengesibonakaliso sokubonga, senze konke esingakwenza, ngazo zonke izindlela! “Ngiyakunikela kuwe umnikelo wokubonga, ngibize igama likaJehova.”—IHubo 116:17.
[Ibhokisi ekhasini 26]
INDLELA ABANYE ABANIKELELA NGAYO UMSEBENZI WOMBUSO
◻ IZIPHO: Iminikelo yokuzithandela yemali ingathunyelwa ngokuqondile eWatch Tower Bible and Tract Society of Pennsylvania, 25 Columbia Heights, Brooklyn, New York 11201, noma ehhovisi legatsha leNhlangano elisendaweni yakini. Impahla enjengezindlu nezindawo, kuhlanganise namatshe ayigugu noma ezinye izinto ezibalulekile, nakho kunganikelwa. Incwadi emfushane ebonisa ukuthi okunjalo kungumnikelo oqondile kumelwe ihambisane naleminikelo.
◻ ILUNGISELELO LOMNIKELO ONEMIBANDELA: Imali inganikwa iWatch Tower Society ngendlela yokuyigcinela umniniyo, ngelungiselelo lokuthi uma kwenzeka kuba nesidingo somuntu siqu, iyobuyiselwa kumniniyo.
◻ UMSHUWALENSE: IWatch Tower Society ingabhaliswa njengendlalifa yomshuwalense kungaba owokuphila noma owomhlalaphansi/wokuguga. INhlangano kumelwe yaziswe nganoma yimaphi alamalungiselelo anjalo.
◻ IMPAHLA EGCINIWE: Ama-akhawunti emali egcinwe ebhange angagcinelwa iNhlangano. Uma lokhu kwenziwa, siza wazise iNhlangano. Izimpahla, imali ebambisiwe, nendawo nakho kunganikelwa ngaphansi kwelungiselelo lokuzuzisa onikelayo phakathi nesikhathi sokuphila kwakhe. Lendlela isusa izindleko nokungaqiniseki kobufakazi bencwadi yefa, kuyilapho iqinisekisa ukuthi iNhlangano iyothola impahla uma kuvela ukufa.
◻ IZINCWADI ZEFA: Indawo noma imali ingabhaliswa ngeWatch Tower Society njengefa ngokusebenzisa incwadi yefa ebhalwe ngokomthetho. Ikhophi kumelwe ithunyelwe eNhlanganweni. (ENingizimu Afrika izincwadi zefa kufanele zibhaliswe ngeJehovah’s Witnesses of South Africa.)
Ukuze uthole ukwaziswa okwengeziwe neseluleko ngokuphathelene nezindaba ezinjalo, bhalela iTreasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, noma ihhovisi legatsha leNhlangano elisendaweni yakini.