Ungakhathali Ekwenzeni Okuhle
“Masingakhathali ekwenzeni okuhle, ngokuba siyakuvuna ngesikhathi esifaneleyo, uma singadangali.”—GALATHIYA 6:9.
1. Isiphi isabelo uJesu asinikeza abalandeli bakhe?
YEKA umsebenzi omuhle amaKristu awenzayo njengengxenye yokukhulekela kwawo! Uhlanganiswe kulomyalo ocacile: “Ngalokho hambani nenze izizwe zonke abafundi, nibabhapathize . . . , nibafundise ukugcina konke enginiyale ngakho; bhekani, mina nginani izinsuku zonke kuze kube sekupheleni kwezwe.” (Mathewu 28:19, 20) KwakunguJesu Kristu ngokwakhe owanikeza abafundi bakhe isabelo sokufeza lowomsebenzi wokufundisa emhlabeni wonke.
2. (a) Kungani singasho ukuthi ukwenza abafundi kwakuwumsebenzi obalulekile futhi omuhle? (b) Umsebenzi wokwenza abafundi ufeza ziphi izinjongo?
2 Njengoba isabelo sokwenza abafundi kwakungenye yezinkulumo zikaJesu zokugcina azikhuluma kubafundi bakhe bokuqala engakenyukeli ezulwini, ingabe kwakungesona yini isabelo esibaluleke kakhulu? Yebo, ngoba ukusigcwalisa kwakuyosindisa ukuphila. (1 Thimothewu 4:16) Lokho kusenza sibe umsebenzi omuhle. Unikeza imfundo enhle yeBhayibheli kulabo abanaka isigijimi soMbuso, futhi umsebenzi wokushumayela uxwayisa noma yibaphi abangasabeli. (Luka 10:10, 11) Ngakho, ukwenza kwabo lomsebenzi kubonakalisa amaKristu eqiniso njengoba kwenza ukuvumelana kwawo nazo zonke ezinye izimfundiso zikaJesu.—Johane 8:31.
3. (a) Abafundi bakaJesu basabela kanjani esibonelweni sakhe somuntu siqu nomyalo? (b) Yisiphi isimo uJesu asakha kubafundi bakhe?
3 NjengoMfundisi oMkhulu, uJesu wabekela abalandeli bakhe isibonelo esihle kakhulu. Wafundisa obala futhi wenza abafundi ‘ngokushumayela ivangeli lombuso.’ (Mathewu 9:35) Ekumlingiseni, abalandeli abasha nabo baba abenzi babafundi, ngoba umfundi weqiniso yilowo “owamukela nosiza ekusakazeni izimfundiso zomunye.” Ekuqaleni, umsebenzi wabo wokwenza abafundi wawulinganiselwe kumaJuda nakulabo ababehlubuke ezinkolweni zabo. Nokho, naphezu kokusabela kokuphikiswa kuleyonsimu, ingabe abalandeli bakaJesu bawufeza umyalo wokuthi “yanini kakhulu” ‘ningayeki’? Phela, yebo, baya “ezimvini ezilahlekileyo zendlu kaIsrayeli” kwaze kwaba yilapho abezizwe bokuqala beba amakholwa ngo-36 C. E. (Mathewu 10:5, 6; IzEnzo 5:42) Kwakuthiwa abafundi ‘bagcwalise iJerusalema ngesifundiso [sabo].’ (IzEnzo 5:28) Abazange bawuyeke umsebenzi wabo omuhle. Kunalokho, bawufeza ngokwethembeka kwaze kwaba sekugcineni.
“Insimu Yizwe”
4. Abalandeli bakaJesu baphishekela isabelo sabo esandisiwe benasiphi isimo?
4 UJesu wabonisa ukuthi insimu yayiyohlanganisa “izizwe zonke.” (Mathewu 28:19) Emfanekisweni wokuhlwanyela imbewu yoMbuso, wathi: “Insimu yizwe.” (Mathewu 13:38) Ngakho, amaKristu ayeyoba “ngofakazi” bakhe boMbuso kuyo yonke indawo. Futhi kulesikhathi ‘babeyoya kakhulu’ “kuze kube-sekugcineni komhlaba.” (IzEnzo 1:8) Umphostoli uPawulu “wakhathalela izwi,” futhi singaqiniseka ukuthi namanye amaKristu ayelikhathalela ngokufanayo.—IzEnzo 18:5.
5. UJesu wabonisa kanjani ukuthi wayelindele ukuba abafundi bakhe babe matasa kakhulu nomsebenzi wokufakaza kuze kube sekupheleni kwalesimiso samanje?
5 UJesu walindela ukuba umsebenzi wokufakaza ugcine amaKristu ematasa kakhulu kuze kube sekupheleni kwalesimiso sezinto samanje. Lokhu kuboniswa yilokho akubikezela ngenkonzo yobuKristu nensimu eyayizoyihlanganisa. UJesu wathi: “Lezi zindaba ezinhle zombuso ziyoshunyayelwa kuwo wonke umhlaba owakhiwe ngenjongo yobufakazi kuzo zonke izizwe; khona-ke ukuphela kuyofika.”—Mathewu 24:14, NW.
6. Umsebenzi wokushumayela ngoMbuso uyokwenziwa isikhathi eside kangakanani, futhi Iokhu kufanele kusithonye kanjani isimo sethu ngakuwo?
6 Ngenkathi uJesu enikeza lomyalo wokuhileleka emsebenzini wokushumayela ngoMbuso nokwenza abafundi emhlabeni wonke, wayazi ukuthi umsebenzi onjalo ngolunye usuku wawuyofinyelela umvuthwandaba wawo, njengoba wenza ngensimu yamaJuda. Kodwa wawuyofeza injongo yawo. Njengoba asho: “Khona-ke ukuphela kuyofika.” Ngakho, kuze kube sekupheleni, oFakazi BakaJehova ngokuqiniseka nangenjabulo bayaqhubeka emsebenzini abawabelwe. Lokho kubasiza ukuba baqhubeke kulomsebenzi osukwini lwethu kuze kube yilapho uqedwa khona.
Indlela Yokwenza Lomsebenzi
7. Isiphi isihloko esasivelele enkonzweni kaJesu neyabafundi bakhe?
7 UJesu wafundisa abafundi bakhe bokuqala indlela yokwenza inkonzo yabo yasobala. Basabela ngentshiseko emyalweni wakhe wokuthi “hambani.” Lapho ebaqeqeshela umsebenzi wabo wokufakaza, uJesu wathi: “Ekuhambeni kwenu shumayelani nithi: Umbuso wezulu ususondele.” (Mathewu 10:7) Lokho kwanikeza isigijimi sabo isihloko esifanayo soMbuso esasivelele enkonzweni yakhe. Sasiyokuba izindaba ezinhle kubantu abanhliziyoziqotho. Lapho abalandeli bakaJesu sebeqale umsebenzi wabo, ingabe uJesu wayeka? Cha, akayekanga, ngoba “kwathi ukuba uJesu aqede ukuyala abafundi bakhe abayishumi nambili, wamuka lapho ukuyofundisa nokushumayela emizini yabo.”—Mathewu 11:1.
8. (a) Abamemezeli boMbuso babeyolisebenzisa kuphi futhi kanjani ikhono labo lomsebenzi? (b) Kungani kungokufanelekile ukuyisa izindaba ezinhle ekhaya lomuntu? (c) Yiziphi izinzuzo ezikhona ekubingeleleni umninikhaya ngokufanele?
8 Labamemezeli boMbuso babezolisebenzisa kuphi futhi kanjani ikhono labo lokwenza lomsebenzi? UJesu wabatshela: “Ekungeneni kwenu endlini niyibingelele.” (Mathewu 10:12) Ukuya ekhaya lomuntu nezindaba ezinhle kwenza umninikhaya abe nesithunzi, kumnikeza ithuba lokubhekana nesigijimi soMbuso emabaleni omuzi wakhe. Akukhona nje kuphela ukuthi izindlela zokubingelela ezijwayelekile nezamukelekayo ziyizindlela zenhlonipho nezifanelekile zokuqalisa ingxoxo kodwa futhi kunenzuzo engatholakala lapho ukubingelela kobungane nokomusa kuguqula ukuhambela okungamenyiwe kukwenza okwamukelekayo. (Qhathanisa noMathewu 28:9; Luka 1:28.) Isimo sezwi nempendulo yomuntu osemnyango futhi kusitshela okwengeziwe ngesimo sakhe. Udinga ukukuqaphela lokho ngaphambi kokuqhubekela phambili ngoba ulwazi olunjalo lwenza kube lula ukuba ufanelanise amazwi akho nezidingo zomninikhaya.—Qhathanisa nezEnzo 22:1, 2; 23:6.
9. Yini ebonisa ukuthi akusibo bonke abayokuzwa isigijimi soMbuso ngokwazisa, futhi kwakumelwe kube yini ukusabela kulabo abangabonisi isithakazelo kuso?
9 UJesu wabazisa abafundi bakhe ukuthi akubona bonke abantu ensimini ababeyosabela kahle. Wathi: “Nakumuphi umuzi noma umuzana eniyakungena kuwo, cingani ofaneleyo.” Uma bonke babeyokwamukela isigijimi soMbuso, sasingenakuba khona isizathu sokusebenzisa amazwi athi “cingani.” Kwakumelwe basabele kanjani kulabo abangasibonisi isithakazelo esigijimini? “Yilowo nalowo ongayikunamukela engawezwa amazwi enu, anothi niphuma kuleyondlu noma kulowomuzi, nivuthulule uthuli ezinyaweni zenu,” bahambe ngokuthula futhi bashiyele izindaba kuJehova ukuba ahlulele.—Mathewu 10:11, 14.
Isimo Namuhla
10. Yini eye yashiwo ngomsebenzi wokushumayela ngoMbuso woFakazi BakaJehova?
10 Ekuvumelaneni ngokwethembeka nokuthunywa kobuKristu, oFakazi BakaJehova bahlanganisa umhlaba ngesigijimi soMbuso. Kanjalo, uA. P. Wisse, intatheli yaseNetherlands, waphawula: “Bahlukile kwabanye abantu. Ngokwengxenye ukwehluka kwabo kungenxa yokushumayela kwabo ivangeli ngentshiseko. Ababheki ubuKristu beqiniso njengenkolo enezindlu zamasonto, nabefundisi labo ngamunye enendawo yakhe emisiwe nenkolo yakhe ingafuni okuningi kuye ngaphandle kokulalela. Bakhuluma kunoma ubani oyolalela ngesibindi esifana nesikaPawulu.” Intshiseko enjalo ngenkonzo ngokuqinisekile iye yabusiswa uJehova uNkulunkulu.
11, 12. (a) Yimiphi imiphumela eye yakhiqizwa enkonzweni eminyakeni yamuva? (b) Njengoba sanda ngamanani, yini eyenzekayo ensimini ekhona esishumayela kuyo? (c) Yimiphi imibuzo ephakanyiswayo?
11 Abamemezeli boMbuso abangaphezu kwezi-3 000 000 manje basebenza ngentshiseko emazweni angama-210. Sibona ukwanda okuhle kwabafundi abasha—njengoba abayizi-1 246 204 baye babhapathizwa eminyakeni eyisikhombisa edlule. Isibusiso sikaJehova emzamweni wenkuthalo sisobala. (Isaya 60:8-10, 22) Ingani, okungenani emazweni angama-40 neziqhingi, kunoFakazi oyedwa kulezo nalezozakhamuzi ezingama-300 noma ngaphansi, noma oyedwa cishe emikhayeni eyi-100! Ngaphezu kwalokho, kwezinye izindawo zamazwe anjalo njengeCanada neGuadeloupe, isilinganiso siwuFakazi oyedwa kubantu abangama-45 noma abangama-50 ensimini yebandla—imizi eyi-15 kuphela noma ngaphansi ngommemezeli ngamunye ukuba ayihambele! Amaningi kulamasimu ayahlanganiswa inyanga ngayinye. Ngisho nasemazweni anesilinganiso esiphakeme, ezinye izindawo zasemadolobheni zihlanganiswa ngokuphindaphindiwe emsebenzini wethu wokufakaza. ESeoul, eRepublic yaseKorea, amanye amasimu asemadolobheni asetshenzwa njalo ngezinsuku ezinhlanu! Njengoba sanda ngamanani, futhi njengoba oFakazi abaningi ngokwandayo bethatha umsebenzi wamaphayona avamile nasizayo, siyohambela amakhaya omakhelwane bethu ngokuphindwaphindwe kaningi. Ingabe lokho kuletha izinkinga?
12 Kumelwe kuvunywe ukuthi zikhona izinkinga kwezinye izindawo, kokubili koFakazi BakaJehova nakulabo ababahambelayo. Okunezela kulezozinkinga isimo sokunganaki esandayo phakathi kwabantu emazweni amaningi. Nokho, njengoba sanda ngamanani, ingabe kancane kancane siyayeka ukwenza umsebenzi wethu omuhle? Ingabe siphetha ngokuthi umsebenzi wethu cishe sewenziwe futhi kakade sesiye ‘sacinga’ bonke abayosabela futhi babe abafundi? Ingabe wena ngokomuntu siqu uyakhathala futhi mhlawumbe ukhungatheke lapho uhambela abantu abafanayo abangasabeli? Yini engenziwa ukuze silondoloze izinga lethu elihle lenkuthalo?
Ukulondoloza Isimo Sengqondo Esifanele
13, 14. (a) Kufanele sisibheke kanjani isimo esandayo sensimu esetshenzwa ngokuphindaphindiwe? (b) Kungani singenakudunyazwa yilabo ‘abangasabeli’? (c) Singasilandela kanjani isibonelo sabaphostoli ekubhekaneni nalabo abacasukela ukuhambela kwethu?
13 Ikhambi lihlanganisa ikakhulukazi isimo sethu njengofakazi bakaJehova. Okokuqala nje, ngaso sonke isikhathi masibe nethemba lokuhle. Ukuhlanganiswa kwensimu ngokuphindaphindiwe ngokwengeziwe ngenxa yesilinganiso esiphakeme sabamemezeli kubantu bendawo kwakumelwe kwenzeke ezindaweni eziningi njengoba umsebenzi wethu ufinyelela umvuthwandaba wawo. Kodwa ingabe asikuthandazelanga yini lokhu? (2 Thesalonika 3:1) Lokhu esikubonayo manje kufanele kusenze sijabule futhi kufanele kusiqinisekise ukuthi siseqophelweni lokugcina lomsebenzi wokwenza abafundi! UMbuso uyashunyayelwa, njengoba uJesu abikezela. Futhi ngisho nasezindaweni lapho abantu bengafuni ‘ukuzwa amazwi ethu,’ bayaxwayiswa ngalomsebenzi wethu wokushumayela ngoMbuso. Khumbula, ngaphandle kokwenza abafundi, simemezela izindaba ezinhle ukuze “kube ubufakazi.”—Mathewu 10:14; 24:14.
14 Ngaphezu kwalokho, kungokulindelekile ukuthi inani elandayo liyosinqaba isigijimi soMbuso njengoba isiphelo sisondela. Izibikezelo zicacile, nokuhlangenwe nakho kokubili okukaJesu noPawulu kuyasiqinisekisa ukuthi babeyoba khona labo ‘ababengayikusabela’ nalabo izinhliziyo zabo ‘zingayikwamukela.’ Ngakho, okwamanje kumelwe siqaphele ukuba singabi abangasabeli ekuthunyweni kwethu. Ngisho nakulabo abangasabeli, kudingeka siye “ngokuphindaphindiwe.” (Isaya 6:9-11; Mathewu 13:14, 15; IzAga 10:21) Yiqiniso, kudinga isibindi ukuya kaningi kubantu abakucasukelayo ukuhambela kwethu. Nokho, akukho simo sensimu nomaphi okufanele sithi kithina, ‘Thula ungasakhulumi.’ Kunalokho, njengabaphostoli, kufanele sithandazele isibindi ukuze “siqhubeke sikhuluma”—naphezu kokucasuka noma inzondo—kuze kube yilapho umsebenzi usufeziwe.—IzEnzo 4:18-20, 24-31, NW.
15. Yisiphi isikhuthazo esinikezwayo kwabaseGalathiya 6:9, futhi kufanele siwuthonye kanjani umbono wethu wokuhambela omakhelwane bethu nezindaba ezinhle?
15 Ngokuyisisekelo, kunezinhlobo ezimbili kuphela zabantu kuwo wonke amasimu ethu—yilabo abanesithakazelo okwamanje nalabo abangenaso. Ngakho-ke, sidinga ukuqhubeka nomsebenzi ‘wokucinga abafaneleyo.’ Ukwenza lokhu kuphakathi kweminye yemisebenzi eminingi emihle okudingeka siyiveze njengamaKristu ukuze sibonise uthando lwethu ngoJehova nokwethembeka kwethu kuye. Ngakho-ke, “masingakhathali ekwenzeni okuhle, ngokuba siyakuvuna ngesikhathi esifaneleyo, uma singadangali.” (Galathiya 6:9) Njengoba manje sesisondele eduze kakhulu ekupheleni kwalesimiso, akusona isikhathi sokukhathala noma sokudangala ekuvakasheleni omakhelwane bethu ngezindaba ezinhle zoMbuso. UJehova akakasho ukuthi umsebenzi usuphelile.
Isizathu Sokuba Kudingeke ‘Siqhubeke Sikhuluma’
16. (a) Yiziphi ezinye zezimo ezingashintsha ukusabela kwabantu ensimini? (b) Yiziphi izibonelo zoshintsho ekusabeleni endaweni yakini ongazinikeza?
16 Siyosizwa futhi ukuba silondoloze isimo esihle uma sikhumbula ukuthi ukwethembeka kuJehova kuboniswa imisebenzi yokushumayela ngoMbuso ngentshiseko. Ngaphezu kwalokho, amasimu aqhubeka eshintsha ngezindlela ezihlukahlukene. Abantu bayathutha, noma izimo zabo zingase zishintshe. Kungenzeka babengenaso isithakazelo esikhathini esagcina ngaso ukubahambela, kodwa ukulahlekelwa umsebenzi, ukufa kothandekayo, ushintsho olukhulu emzabalazweni ophakathi kwemibuso emikhulu, ukugula okungathi sína—lezi nezinye izinguquko zingasho ukuthi bayoba abasabelayo esikhathini esilandelayo uma sibahambela. Abanye, lapho bezwa ukuthi umngane noma othandekayo wabo usengomunye woFakazi BakaJehova, bangase bafune manje ukukhuluma nathi ukuze bathole lokho esikukholelwayo okungenzeka kuye kwaletha lolushintsho.
17. Abanye manje basabela kanjani esigijimini soMbuso? Nikeza noma iziphi izibonelo zendawo yakini.
17 Futhi, khumbula ukuthi labo abaye bakhula eminyakeni yamuva manje sebenemikhaya, babheka ukuphila ngokungathi sina, futhi baye babuza imibuzo engaphendulwa iZwi likaNkulunkulu kuphela. Ngokwesibonelo, omunye umama osemusha wamemela oFakazi ababili ekhaya lakhe futhi wathi: ‘Njengentombazanyana, ngangingaqondi neze ukuthi kungani umama exosha oFakazi futhi abatshele ukuthi akanasithakazelo, kanti nanifuna ukuxoxa ngeBhayibheli nje kuphela. Nganquma engqondweni yami ukuthi lapho sengikhulile, ngashada, futhi ngaba nomuzi wami, ngiyobacela oFakazi BakaJehova ukuba bangene futhi bangichazele iBhayibheli.’
18. Ukushintsha kwesimo senkolo kuyithinta kanjani insimu esishumayela nesifundisa kuyo?
18 Ingabe uye waphawula ukuthi abanye abantu ababengeke bakhulume nathi eminyakeni eminingi futhi ababecabanga ukuthi “basindisiwe” manje basibuza imibuzo eqotho? Ngani? Kuye kwenzeka ushintsho ekucabangeni kwabo okungokwenkolo. Bathi baye basanguluka ekuluthweni futhi bashaqiswa ukuvezwa kokuziphatha okubi, imisebenzi yezombangazwe, nokusaphazwa kwezimali zesonto okwenziwa abanye babavangeli bethelevishini abavelele ababebathemba ngaphambili. Ngokunokwenzeka, kuyoba nabengeziwe balaba njengoba izimo phakathi kweBabiloni Elikhulu ziqhubeka ziwohloka kuze kube sesikhathini sokubhujiswa kwalo.—IsAmbulo 18:1-8.
19, 20. Yini ebonisa ukuthi kungani kungafanele sizizwe sidumazekile ngokuphindela kaningi kubantu abenqaba isigijimi?
19 Kunoma yikuphi kwalokhu, akufanele sidumazeke uma abantu abaningi bengasamukeli. Ngemva kokuba sesihambile, ngokunokwenzeka basale becabanga ngathi. ECanada omunye umninikhaya owavakashelwa oFakazi ababili wakwenza kwacaca ukuthi akanasithakazelo. Kamuva, waqala ukucabanga ngalokho ababekushilo futhi wafuna ukubathola ukuze baphendule imibuzo eyaphakama engqondweni yakhe. Wangena emotweni yakhe futhi wahamba ebafuna ehla enyuka nemigwaqo yendawo yakubo kodwa wahluleka ukubathola. Ingabe wayeka? Cha, wema endlini yomngane wakhe ukuze abuze ukuthi babengekho yini lapho. Babengafikanga, kodwa lomngane wathi kwakukhona uFakazi ayesebenza naye futhi wayezomxhumanisa lona owesifazane othakazelayo nalowoFakazi. Umphumela waba ukuvakasha okuphindaphindiwe ekhaya lalomuntu othakazelayo, lapho amemela khona abangane, omakhelwane, izihlobo, nasebenza nabo. Abantu abangaba yi-15 babeba khona ngezinye izikhathi, futhi kwahanjiswa izincwadi namaBhayibheli okungaba ama-430 kanye nomagazini abayizi-2 015.
20 Abaningi bayakwazisa ukuhambela kwethu. Encwadini eyayiya ehhovisi legatsha leWatch Tower Society, omunye wesifazane wathi: “Ngiyanibonga ngokuba niye nagxilisa ukuzinikezela okukhulu ezinhliziyweni zabantu bokholo lwenu. Ngiyanibonga ngokungivakashela . . . nokuhlanganyela uthando lweNkosi nabanye. Lesosenzo esincane senza okukhulu kakhulu kwabanye. . . . Ngisho nakuba abanye bengase babe nonya, abanye banganaki, nabanye bamukele, . . . ngempela kwenza umahluko omkhulu ukuba nothile okuvakashelayo ezokukhumbuza ngezinto ezingokomoya. Ngithola lokhu kuyinto enhle, ukukhuluma ngeNkosi komunye nomunye.” Kwenye incwadi, umninikhaya wasicela ukuba ‘singakhathali ngabantu,’ kungakhathaliseki ukuthi basiphatha kanjani. “Kepha masingakhathali ekwenzeni okuhle, ngokuba siyakuvuna ngesikhathi esifaneleyo, uma singadangali.” (Galathiya 6:9) Lomsebenzi unokuvunyelwa kukaJehova nesibusiso, futhi ukuhlanganyela kwethu kuwo kubonakalisa uthando lwethu ngaye nangomakhelwane wethu. (Mathewu 22:37-39) Ngakho-ke masiwufeze lomsebenzi kuze kube sekupheleni.—Qhathanisa uFilipi 1:6.
21. (a) Ngokunokwenzeka, yikuphi lapho okungenani ingxenye yenselele yokuphindela emasimini asetshenzwa ngokuphindaphindiwe ikhona? (b) Yini esizoxoxa ngayo esihlokweni esilandelayo?
21 Kumelwe sibhekane neqiniso lokuthi kungase kungabi abantu ngaso sonke isikhathi abakwenza kubonakale kunzima ukusebenza insimu yethu ngokuphindaphindiwe. Ngezinye izikhathi yithi ngokwethu. Ingabe siqala insimu sinemibono engemihle, sinomuzwa wokuthi siyabazi bonke abantu nokuthi kuyoba yini ukusabela kwabo kithina? Lokhu kungasithonya isimo sethu futhi ngokunokwenzeka nesimo sezwi lethu kanye nokubonakala kobuso. Ingabe sisasebenzisa izindlela ezifanayo nokuhlelwa kwamazwi esasikusebenzisa eminyakeni eminingi edlule? Manje njengoba insimu ishintsha, lokho okuye kwaba nempumelelo kungase mhlawumbe kungabafinyeleli abanye ‘abafanelekayo.’ Mhlawumbe sidinga isingeniso esisha nendlela entsha yokubheka umsebenzi wethu. Ngokulandelayo, ake sibone lokho esingakwenza ukuze ‘singakhathali kodwa sivune ngesikhathi esifaneleyo.’
Ingabe Ungachaza?
◻ Kungani kungafanele ‘sikhathale’ ekuhambeleni omakhelwane bethu ngezindaba ezinhle?
◻ Ubani owasitshela ukuba senze abafundi ngendlela esenza ngayo, futhi ziyini izici ezibalulekile zaleyondlela?
◻ Yisiphi isimo esiye sakhula emasimini amaningi, futhi yini eyosisiza ukuba sibe nesimo sengqondo esifanele ngalesosimo?
◻ Kungani kufanele ‘siqhubeke sikhuluma’ izindaba ezinhle ‘singayeki’?
[Ibhokisi ekhasini 14]
‘ASIYIKUKHATHALA’ EKUSHUMAYELENI NGOMBUSO UMA SIKHUMBULA:
◻ Lowo owasinikeza lesisabelo nesiyalezo sendlela esingawenza ngayo lomsebenzi
◻ Ukuthi isibusiso sikaJehova siphezu kwalokho osekwenziwe kakade emhlabeni wonke
◻ Ukugcina isimo esifanele naphezu kwanoma yibaphi ‘abangasabeli’
◻ Ukuthandazela ‘ukuqhubeka sikhuluma’ njengoba kwenza abaphostoli