Ingabe Inkolo Ingamandla Okuziphatha Okuhle?

EKUPHENDULENI lombuzo, izigidi zingavumelana noGeorge Bernard Shaw, owabhala: “Inkolo ingamandla amakhulu—iwukuphela kwamandla angempela ashukumisayo emhlabeni.” Ngokuphambene, umbhali oyiNgisi wekhulu le-19 leminyaka uJohn Ruskin, ebhala ngesisekelo sokwethembeka, wabhinqa: “Inkolo yomuntu ophansi ihlala iyinto engajabulisi kuye.” Imuphi umbono ocabanga ukuthi usondele eqinisweni?

Njengobufakazi bamandla enkolo okuziphatha okuhle, omunye angase aphawule othile owaba “umuntu oshintshile” lapho ‘enikezela ukuphila kwakhe kuJesu Kristu.’ Leyo indlela umagazini wezizwe zonke owachaza ngayo “ukuguquka” kukaCharles Colson, owayehilelekile emonakalweni onjengowaseWatergate. Omunye angase aphawule labo abathi inkolo yabo yabasindisa ekuphileni kobufebe noma kokuba imilutha yotshwala. Emazweni angewona awobuKristu, kuye kwasakazwa izigidi zamaBhayibheli, ngokungangabazeki aye asiza abantu abaningi ukuba bathuthukise ukuziphatha ekuphileni kwabo. Ngokusobala, inkolo iye yaba ithonya lokuziphatha okuhle kubantu abanjalo.

Uhlangothi Olubi

Ngakolunye uhlangothi, inkolo kaHitler yayingesona isiphazamiso kuye. Lokhu kwenza abantu abaqotho bamangala ukuthi kungani isicelo esenziwa kuPapa Pius XII sokunquma uHitler ebandleni singaphendulwanga. ICatholic Telegraph-Register yaseCincinnati, eOhio, ngaphansi kwesihloko esithi “Ukhuliswe NjengomKatolika Kodwa Uphambana Nokholo Kusho Incwadi Yocingo Eya Kupapa,” yabika: “Sesenziwe kuPius XII isicelo sokuba uMholi wombuso uAdolph Hitler anqunywe ebandleni.” Ukuba lesinyathelo sasiye sathathwa, ingabe sasiyowuthinta umphumela wempi futhi sisize ekupheliseni ukuhlupheka okukhulu kwabantu? Ngokudabukisayo, upapa akaphendulanga.

Ukukipita kuvame kakhulu kwamanye amazwe obuKatolika eNingizimu-Melika. Futhi eNyakatho-Melika isikhulu sesonto sabhalela umhleli: “Vumela Ubufebe—Buyikhambi Losanta.” (Philadelphia Daily News) Bheka futhi izimo ezikwamanye amazwe obuProthestani lapho ukushintshisana ngabafazi, ubulili bangaphambi komshado, nobulili ngaphandle komshado kuvame khona. Sithola isizathu salokhu siphawulwe esihlokweni sephephandaba esifushanisa indaba: “Abefundisi Abakhulumi Ngobulili Ngaphambi Komshado.” Isihloko sathi: “Abefundisi baseMelika baye bathula ngokuyisono ekushumayeleni ngobulili ngaphambi komshado . . . Besaba ukuthi bazolahlekelwa amanye amalungu abo.” (Telegraph, North Platte, Nebraska) Ngakho-ke ingabe yonke inkolo ingamandla okuziphatha okuhle?

KweLobukholwa, ukuntuleka kwamandla enkolo okuziphatha kusobala kakhulu ngesikhathi sempi. Cabangela lamazwi okuzisholo azwakala emnandi. Ngo-1934 uWalter W. Van Kirk, ngalesosikhathi owayengunobhala womnyango woMkhandlu Kazwelonke WamaSonto KaKristu eMelika, wabhala: “Abashumayeli namalungu esonto baye bamelana ngokuqinile nempi . . . Lokhu kulwela ukuthula kwamasonto kusuka ekukholelweni ukuthi impi imelene ngokuphelele nokushumayela kanye nemisebenzi kaJesu.” (Religion Renounces War) Ngemva kokukhuluma ngamasonto amaningi nabefundisi, lencwadi yaphetha: “Esewonke amasonto aye abonisa ngokusobala ukuthi awasenakubhekwa njengabalekeleli emsebenzini wokubulala nokukhubaza abantu. Abashumayeli . . . bageza izandla zabo ezinegazi lomakhelwane babo, bashiya ubudlelwane noKhesari.”

Nokho, ngokudabukisayo lezozibikezelo ezinhle azibanga yiqiniso. Lapho iMpi Yezwe II igqashuka, akukho ngisho neyodwa yezinkolo eziyinhloko zeLobukholwa eyathatha ukuma okuqinile ‘kokulahla impi.’ Ingabe isonto elisendaweni yakini lakwenza lokho?

Izintango Zokuziphatha Ezigqashukile

Njengoba sesibucabangele obunye bobufakazi kuzo zombili izinhlangothi, awuvumi yini ukuthi sekukonke ezikhathini eziningi, izinkolo ezithandwayo zomhlaba azibanga amandla amakhulu okuziphatha okuhle? Umagazini iLook wathi: “Amasonto . . . ehlulekile ukunikeza ukuhola kokuziphatha, futhi ngenxa yokuthi umthwalo wawo wemfanelo mkhulu kakhulu, ukwehluleka kwawo kubi kakhulu.” IThe Courier-Mail yaseBrisbane, eAustralia, yaphawula ngokwehluleka kwenkolo yeLobukholwa ukubeka umngcele ngokuziphatha okubi kobulili: “Uma kuziwa kubaBhishobhi naseZikhulwini zesonto . . . ukubhala ukuthi ubuhlobo bobulili obungaphandle komshado bungase bube isenzo somusa ‘esimemezela ubukhosi bukaNkulunkulu,’ . . . ukuthi ubufebe abububi bona ngokwabo nokuphinga akukubi ngempela; khona-ke indoda evamile nowesifazane, futhi ikakhulukazi umfana nentombazane, abakuqondi okuhle nokubi. Umphumela wayo yonke lenkulumo-ze yokuZiphatha Okusha uye waba ukugqashuka kwezintango zokuziphatha.”

Cha, sekukonke, izinkolo zezwe aziwona amandla angempela okuziphatha okuhle. Ngokuphambene, kumelwe zilandise ngesimo esibi sezindinganiso zokuziphatha namuhla. Nokho, njengoba inkolo kufanele isho “inkonzo nokukhulekelwa kukaNkulunkulu noma komuntu ongaphezu kwemvelo,” ingabe akumelwe yini ibe amandla okuhle kuwo wonke amazwe etholakala kuwo? Yini entulekayo? Inkolo yakho ingawasebenzisa kanjani amandla anjalo namuhla?