Yimuphi Umsebenzi Oyowukhetha?
INGABE usemusha futhi usesikoleni? Uma kunjalo, ngokunokwenzeka ubusisiwe ngezinto ezinenzuzo ezilethwa ubusha—impilo enhle namandla amakhulu nobungqabavu. Ukuphila kwakho kuphambi kwakho njengomgwaqo ongasetshenziswa njalo. Uyokusebenzisa kanjani lokho kuphila eminyakeni ezayo?
Njengoba ucabanga ngekusasa lakho, akungabazeki ukuthi kuphakama imibuzo engqondweni yakho. Ingabe kumelwe ngiye eyunivesithi futhi ngifune umsebenzi wokuba udokotela, ummeli, noma usosayensi? Ingabe iphupho lokuthuthukela empumelelweni nasekuqashelweni ngokwezimali liyangithakazelisa? Ingabe ngizoba umuntu odumile njengengcweti yezemidlalo noma ukudweba? Noma, njengomusha ozinikele kuJehova uNkulunkulu, ingabe kumelwe ngikhethe inkonzo yesikhathi esigcwele njengomsebenzi wokuphila kwami, ngaleyondlela ‘ngikhumbula uMdali wami ezinsukwini zobusha bami?’—UmShumayeli 12:1.
Izihloko zamaphephandaba nezomagazini ngokuvamile ziqokomisa ukuphila kwabantu abadumile njengokuthakazelisayo nokuhle, kodwa yini oyaziyo ngokuphila kwesikhonzi sesikhathi esigcwele? Ingabe kuyisicefe noma kuyisidina? Noma ingabe ngempela kuyathakazelisa futhi kuyajabulisa? Ukucabangela okuhlangenwe nakho okuthile kokuphila okungokoqobo kwalabo asebeneminyaka eminingi besenkonzweni yesikhathi esigcwele kungakusiza ukuba wenze isinqumo.
Isizathu Esenza Bakhetha Inkonzo Yesikhathi Esigcwele
Lapho kusalwiwa impi eVietnam, uHarry wayeseYunivesithi yaseHawaii, efundela ukuba uthisha wezomlando. Wayetadisha futhi iBhayibheli noFakazi BakaJehova. Njengayefunda nabo abaningi, wahileleka ekubhikisheni kwabafundi kwangaleso sikhathi okwakuvamile, waqala ukusebenzisa imilaliso, futhi wathola iLSD ithakazelisa ngokukhethekile. Ngolunye usuku ekuseni wavuka ekamelweni lakhe wahlangana namabhodlela otshwala afile asakazeke phansi, izinqamu zikagwayi, namadoda nabesifazane begcwele phansi. UHarry wayesayikhumbula kancane impikiswano nephoyisa eyayiphathelene nemvume yokuphequlula nokusongelwa ngokuxoshwa ngumninindlu okwenzeka emva kwalokho. Kwakukulelizinga lapho anquma khona ukuba ayeke ukutadisha iBhayibheli uma kungenjalo ahlanze ukuphila kwakhe. Ngokuhlakanipha, wakhetha lokhu kokugcina.
Njengoba uHarry wayandisa ulwazi lwakhe lweBhayibheli, umgomo wokuphishekela imfundo yaseyunivesithi nomsebenzi wokufundisa kwalahlekelwa ukukhanga kwakho. Washiya ekholiji, wathola umsebenzi oyitoho, wabhapathizwa, ngokushesha wafanelekela ukuba yiphayona—umshumayeli wesikhathi esigcwele. Ngalokho uHarry wagxila kulomsebenzi omusha, ogcwele inselele nokuhlangenwe nakho okuqabulayo nokuthakazelisayo.
Ngemva kokukhonza njengamaphayona akhethekile, uHarry nomkakhe babelwa njengezithunywa zevangeli ‘eziqhingini zamadwala’ ezinhle zaseBelau eNtshonalanga Pacific, lapho besakhonza khona. Kunjani ukuphila kwezithunywa zevangeli kuleziqhingi?
Ukufakaza Ngesikebhe
Ukufakaza okuningi eziqhingini zaseMicronesia kwenziwa ngesikebhe nangezinyawo. UHarry nomkakhe, uRene, bakhumbula ngesikhathi befakaza okokuqala ngqa ngesikebhe esiqhingini esingaphandle. UHarry uyakhumbula, “Sahlala emzini owawuqhele ngamakhilomitha amaningi ukusuka ezansi emfuleni ogwingcizayo owawudabula emihlumeni ecinene nasehlathini elicinene kangangokuthi amacembe alo aluhlaza ayephephezela emakhanda ethu. Uma sisuka lapho sasihlala khona, sasihamba emfuleni, sima ukuze sishumayele kubantu ababehlala ogwini lomfula. Ngolunye usuku, sekuzokuhlwa, sasivela enkonzweni yasensimini futhi sijahe ukwenyuka emfuleni siye ekhaya kungakahlwi. Ngokungazelele uRene wamemeza. Ngaphenduka ngokushesha futhi ngabona amanzi exhaphaza nomsila omude wesilwane esihuquzelayo ungena emanzini. Kwakuyingwenya yamanzi anosawoti—isilwane esikhulu kunazo zonke emhlabeni. Siyabonga ngokuthi safika ekhaya silondekile futhi siphilile. Nakuba kwakuyisikhathi sokuba siyogeza emfuleni, ngemva kokubona leyongwenya enkulu, sakubona kulondekile ukubophela intambo ebhakedeni bese sikhelela amanzi okugeza esikebheni sethu.”
Njengoba amadolobhana amaningi nezindlu kungafinyeleleki ngemoto noma ngesikebhe, izithunywa zevangeli zichitha amahora amaningi zihamba ezindleleni ezisemahlathini amahle anokhukhunathi ukuze zifinyelele abantu abanobungane, abathobile. UHarry uthi: “Njalo sithola abantu belilalela iqiniso. Labantu abangabodwa ngokuvamile babonisa umoya wabo wokungenisa izihambi. Bakhwela emthini kakhukhunathi, bakhe ukhukhunathi omusha, bawunqume phezulu ngocelemba, bese bekunikeza isiphuzo esivela kuso kanye ‘isitsha’ sokuqala. Siqabula kakhulu, simnandi, futhi sinempilo.”
Iye yavuzwa kanjani imizamo yokushumayela kwezithunywa zevangeli eBelau? Manje sebenebandla lamaKristu eqiniso angama-42. Ngokwesilinganiso, abayi-10 bebesenkonzweni yesikhathi esigcwele inyanga ngayinye ngonyaka odlule. Futhi abayi-198 baba khona eSikhumbuzweni sokufa kukaKristu ngo-1985.
Ngemva kweminyaka eyi-17 esenkonzweni yesikhathi esigcwele, uHarry uzizwa kanjani manje ngesinqumo sakhe sokusebenzisa ukuphila kwakhe ngokuphelele enkonzweni kaJehova? Uthi, “Ukuba angizange ngilithole iqiniso likaNkulunkulu eminyakeni eyi-17 edlule, isikhathi nokuphila kwami ngabe kwaphelela ekuphishekeleni okwezwe. Bengingeke ngikuthole ukuthula kwengqondo nokulondeka engiye ngakuthola phakathi neminyaka yami njengaphayona nanjengesithunywa sevangeli, kokubili njengomuntu ongashadile iminyaka eminingi futhi kamuva nginoRene engiye ngahlanganyela naye iminyaka eyisishiyagalombili edlule yenkonzo yezithunywa zevangeli.”
Ukutusa Inkonzo Yesikhathi Esigcwele
UMilton wayesesikoleni esiphakeme eHawaii. Abanye babemkhuthaza ukuba alwele umsebenzi omuhle elondekile ngokwezimali, kodwa izibonelo zodadewabo nabafowabo ababili abadala, abase besenkonzweni yamaphayona esikhathi esigcwele kakade, zamkhuthaza. Izibonelo zabo zamkhuthaza ukuba acabangele ukungenela inkonzo yesikhathi esigcwele. Ngokungaphezulu, wezwa inkulumo eyayikhuluma ngezibusiso zenkonzo yesikhathi esigcwele nangendlela uJehova ayolungiselela ngayo izidingo zethu ezingokwenyama uma simethemba futhi simbeka kuqala ekuphileni kwethu. UMilton uyalandisa: “Lokhu kwangishukumisela ukuba ngikhethe inkonzo yesikhathi esigcwele njengomsebenzi wami ekuphileni. Ngakho-ke, ngaphambi kokuba ngiqede esikoleni esiphakeme, ngababhapathizwa futhi ngangenela inkonzo yesikhathi esigcwele.”
Lapho uMilton eqala ukuphayona, ibandla lalinabazalwane abangaphansi kwabayishumi. Yini ayenza ngalokho? Uthi, “Ngamema abazalwane abasha ukuba basebenze nami enkonzweni yasensimini. Ngenxa yalokho, abaningi balaba kamuva bahlanganyela nami enkonzweni yesikhathi esigcwele.”
“Umlamu wami wayengumdala futhi eyiphayona,” kuqhubeka uMilton. “Sasisebandleni elilodwa futhi sasebenza ndawonye ekukhuthazeni abanye ukuba baphayone. Sanquma ukuba mina ngikhuthaze abasebasha, yena akhuthaze omama. Ngemva kwezinyanga eziningana, kwase kunezikhonzi zesikhathi esigcwele ezingama-25 ebandleni. Lapho kufika umbonisi wesifunda, wamema abayishumi balaba ukuba bafake isicelo senkonzo yamaphayona akhethekile bese bethuthela emabandleni aseduze. Khona-ke saxoxa ngomgomo wokusiza abanye abayishumi ukuba bangenele inkonzo yamaphayona ukuze sivale isikhala salabo abasebethunyelwe ngaphandle. Lapho umbonisi wesifunda ehambela ngokulandelayo, abayi-15 futhi base bangenele inkonzo yesikhathi esigcwele. Manje sase sinamaphayona angama-30. Umbonisi wesifunda waphinda wacela abayishumi babo ukuba bathuthele kwamanye amabandla. Saphinda futhi sazimisela ukuthola abazovala izikhala. Ngaphambi kokuhambela okulandelayo kombonisi wesifunda, abangama-20 abengeziwe bafaka izicelo zenkonzo yamaphayona!”
Umoya wenkonzo yamaphayona othelelanayo wawusungene nakwabasha. Ngesikhathi befinyelela esikoleni esiphakeme, cishe bonke base bezibekele umgomo wenkonzo yesikhathi esigcwele. Omunye udade, wanquma ukuphayona eneminyaka eyi-13. Wathi: “Kubonakala kuyinto yokwenziwa engokwemvelo.” Awukho omunye umcabango yena nabanye abasha ebandleni abake bagxila kuwo kakhulu. Kwahlelwa iqembu elalizofakaza ngemva kwesikole, futhi ekugcineni lomsebenzi wawusekelwa abafundi abangama-60 abavela ezikoleni ezintathu ezihlukene kanye namaphayona. Phakathi nezinyanga zasehlobo, kwakukhuthaza kakhulu likubona abayi-130 behlangana ukuze bafakaze njengeqembu!
Ukuphayona Kwaholela Emalungelweni Amakhulu
UMilton uyakhumbula, “ngo-1974, ngamenyelwa ukwamukela umsebenzi wezithunywa zevangeli esabelweni esiqhele ngamakhilomitha ayizi-6 400 ukusuka ekhaya—eziqhingini zaseBelau eMicronesia.” Ukuhamba amabanga amade ngidabula izitshalo zasetropic nokuhamba ngesikebhe kwakuyinselele engajwayelekanga ngokushesha.
Ngolunye usuku olubalele, olunesifudumezi ngemva kokuhamba amahora amaningi ezindleleni ezinothuli, uMilton uyakhumbula, “sase sikhathele lapho sifika ekhaya lomkhaya ethakazelayo. Umama wathuma indodana yakhe ezansi emfuleni. Yasibuyela nekhabe elikhulu, elibandiswe umfula. Sadla ingxenye enkulu yalo, futhi yeka indlela elaliqabula ngayo!”
Ngemva konyaka esesabelweni sakhe sezithunywa zevangeli, uMilton wayenesifiso sokubona imigomo emithathu iphumelela eBelau, okungukuthi, abazalwane bendawo ekugcineni bethatha imithwalo yemfanelo yebandla, abasha bengenela inkonzo yesikhathi esigcwele, futhi ibandla lakha iHholo LoMbuso lalo siqu. Manje uthi: “Ngemva kweminyaka eyishumi ngilapha, imithandazo yami yokuyifinyelela yomithathu lemigomo iyaphendulwa.”
Ingabe uMilton linomuzwa wokuthi wenza ukukhetha okuyikho eminyakeni eyi-14 edlule lapho engenela inkonzo yesikhathi esigcwele njengomsebenzi wokuphila kwakhe? Uyaphendula, “Nansi enye into engiye ngayithola kuyo yonke iminyaka yami ngisenkonzweni yesikhathi esigcwele: Uma sizimisele, uNkulunkulu uyosisebenzisa ngesikhathi esifanele. Akumelwe sidikibale kodwa kumelwe siqhubeke sizinikela ngokuzithandela enkonzweni yakhe. Awusoze wazisola ngokuphishekela umsebenzi wokukhonza uJehova njengesikhonzi sesikhathi esigcwele.”
Uyokusebenzisa Kanjani Ukuphila Kwakho?
Basha, niyolisebenzisa kanjani ikusasa lenu? Niyolisebenzisela izinzuzo zenu noma niyolisebenzisela uJehova ngokugcwele? (Roma 14:8) Cabangela ngomthandazo umgomo wenkonzo yesikhathi esigcwele manje ebusheni bakho. Lingisa uJesu ngokushiyela konke ukuphila kwakho ‘entandweni kaNkulunkulu.’ (1 Petru 4:2) Kuyobonakala kuyisivikelo ezifisweni ezilimazayo zezwe, imisebenzi, nabangane. Hlola izimo zakho bese ubeka usuku oluthile njengomgomo wakho wokungenela inkonzo yesikhathi esigcwele. Sebenzela kuwo. Thandazela usizo lukaJehova ukuze uwufinyelele.—Efesu 6:18.
Ukukhetha umsebenzi wamaphayona kungasiholela emalungelweni enkonzo amaningi amahle obungawalindele. Ukuphila kwakho kuyogcwala injabulo, ukulondeka, nothando. Kuyojabulisa, kuthakazelise, futhi kwanelise. Ngaphezu kwakho konke, kuyoba ukuphila okumthokozisayo uJehova.—IzAga 27:11.