Ubuqotho Ekukhonzeni UNkulunkulu Weqiniso
“Ngifundise, Jehova, indlela yakho; ngiyakuhamba eqinisweni lakho.”—IHUBO 86:11.
1, 2. (a) Lingaboniswa kanjani ilungiselelo likaNkulunkulu ngesintu? (b) ImiBhalo iwuchaza kanjani umsebenzi wezandla zikaNkulunkulu nobuhlongandlebe babantu?
AKE uzicabange uhamba ogwadule, olungenalutho oluphilayo. Ngokungazelele uhlangana nendlu enhle. Inendawo yokungenisa umoya neyokwenza kufudumale, ifakwe amapayipi, futhi inogesi. Ifuliji layo namakhabethe kugcwele ukudla. Esakhiweni esingaphansi kukhona uwoyela nezinye izinto eziningi. Ubungasho yini ukuthi konke lokho kwazivelela ngengozi? Ubungabonga yini uma umniniyo ubengakucela ukuba uhlale kuleyondlu uyijabulele?
2 Nokho, lomhlaba ojabulisayo esiphila kuwo ufana nsé naleyondlu. Esikhathini eside ngaphambi kokudalwa kwesintu, uNkulunkulu wethu onothando walungiselela lomhlaba ukuba ube yikhaya lethu futhi wasilungiselela zonke izinto esasiyozidinga ukuze sijabule. (Isaya 45:12, 18) Akumelwe yini simbonge loMlungiseleli ophanayo? NguYe owaphefumlela ukulotshwa kwamazwi eBhayibheli akumaHeberu 3:4: “Ngokuba yileyondlu yakhiwa ngothile; kepha owakha konke nguNkulunkulu.” Okudabukisayo ukuthi abantu abanobugovu baye bawulimaza futhi bayawonakalisa umsebenzi wezandla zikaNkulunkulu.—Duteronomi 32:3-5.
3. Lithini iBhayibheli ngokuphana kukaJehova manje nangesikhathi esizayo?
3 Ngisho nakubaphikisi beqiniso, umphostoli uPawulu wayengathi ngokuqondene noNkulunkulu: “Akayekanga ukuzifakazela ngokwenza okuhle, waninika imvula yasezulwini nezikhathi zenala, egcwalisa izinhliziyo zenu ngokuhle nangokujabula.” (IzEnzo 14:17) Yeka ukuthi uJehova angababusisa ngokwengeziwe kangakanani labo abamkhonza ngobuqotho! Nakuba ubunzima nemithwalo ‘yalezinsuku zokugcina’ ingasicindezela, kunethemba elikhazimulayo lokuthi esikhathini esingekude iNkosi ePhakeme uJehova ngempela uzolungiselela abamthandayo idili elingokoqobo lezinto ezinhle, esula izinyembezi kubantu bonke.—2 Thimothewu 3:1; Isaya 25:6-8.
Isimangaliso Sengqondo Yomuntu
4. (a) Iyiphi inkinga ososayensi bamacomputer ababhekene nayo? (b) UJeremiya 33:2, 3 uthini ngokuqondene noMenzi wengqondo yomuntu?
4 Sekuyiminyaka eminingi, ososayensi bezama ukwenza amacomputer acabanga ngokoqobo. Kodwa manje bayavuma ukuthi babambeke khona kanye esinyathelweni sokuqala. Kungani? Phela, bayavuma ukuthi isimo seso lomuntu siyabehlula. Uma bengakwazi ukulingisa iso, bangaqala kanjani engqondweni, futhi bazoliveza kanjani ikhono lengqondo? Yeka indlela ingqondo yomuntu emangalisa ngayo! Umzuzwana ngamunye, ingqondo yamukela ukwaziswa okuyizigidi eziyikhulu, ukuze kuhlungwe, kuhlelwe, futhi kusetshenziswe ekuphileni okunengqondo. Icomputer eyinkimbinkimbi kakhulu ngeke iqale ngisho nokuqala ukufaniswa nayo. Yeka ubufakazi obuhle bokuhlakanipha okukhulu kakhulu kukaNkulunkulu onothando owasenza! Singajabula ngokuthi uMenzi noMbumbi wethu, uJehova uNkulunkulu, wasinika ukuhlakanipha nangokuthi singasebenzisa izingqondo zethu ekufundeni “izinto ezinkulu nezifihlekileyo” asembulela zona ngesikhathi nangendlela yakhe efanele.—Jeremiya 33:2, 3.
5. (a) Isiphi isimangaliso sokukhula esenzeka kubantu kuphela? (b) Afaneleke kanjani amazwi kaElihu?
5 Lesimangaliso sengqondo yomuntu siqala esizalweni, namangqamuzana engqondo ebumbeka emasontweni amathathu nje ngemva kokukhulelwa. Lawa ayaphindaphindeka ngobuningi, ngezinye izikhathi abe amangqamuzana ayizingxenye ezine zesigidi ngomzuzu. Ngemva kokubeletha, ingqondo yomntwana iphindeka kathathu ngobukhulu ngonyaka wokuqala, iphawuleka njengehlukile, ehluke kakhulu kunengqondo yanoma isiphi isilwane, kuhlanganise nenkawu. Ngokushesha ingqondo yengane yomuntu ingabamba izilimi, izindle ngezinto, yazise izindaba zokuziphatha nezinto ezingokomoya. Kungenzeka kanjani ukuthi lamakhono azivelela ezilwaneni ezinonya? Ngokufanelekileyo, uElihu wathi ngokuqondene noNkulunkulu noMenzi wethu oMuhle: “Osifundisa phezu kwezilwane zomhlaba, asenze sihlakaniphe phezu kwezinyoni zezulu.”—Jobe 35:10, 11.
6. (a) ImiBhalo ikulandisa kanjani ukwenziwa komuntu ngokumangalisayo? (b) Singawasebenzisa kanjani ngothando amandla esiwaphiwe uNkulunkulu?
6 Lesimangaliso, ingqondo yomuntu, siyavumelana noGenesise 1:27, othi: “UNkulunkulu wamdala umuntu ngomfanekiso wakhe; wamdala ngomfanekiso kaNkulunkulu; wabadala owesilisa nowesifazane.” Akumelwe yini sibonge ngendlela uNkulunkulu asenze ngayo? UDavide wabonga. Wadumisa uJehova, ethi: “Ngiyakukubonga, ngokuba ngenziwa ngokwesabekayo nangokumangalisayo; imisebenzi yakho iyamangalisa.” (IHubo 139:14) Asimbongi yini uNkulunkulu wethu ngesizathu esifanayo? Ngaphezu kwalokho, singasebenzisa izingqondo nemizimba esiyiphiwe uNkulunkulu ekuhlangabezaneni nenselele uSathane ayibeka phambi kukaNkulunkulu wethu. Singakhonza uJehova njengabagcina ubuqotho.—IzAga 27:11.
Bambelela Ngokuqinile Eqinisweni
7, 8. (a) Ikuphi ukushayisana okuphawulekayo phakathi kweqiniso nalemfundiso? (b) Ngokuqondene nokuziphendukela kwemvelo, yini abantu abanolwazi abayishoyo manje? (c) Kungani ukuziphendukela kwemvelo kumelwe kuhlanganiswe nokuthatheka kunokholo?
7 Iqiniso kumelwe linqobe! Thina abathanda uJehova kumelwe sibambelele ngokuqinile eqinisweni njengoba sisebenzisa izingqondo zethu ekukhetheni inkambo yobuqotho. Iqiniso ngendalo limisiwe. Liqinile. Liye labhekana nokuvivinywa izinkulungwane zeminyaka. Nakuba eseneminyaka engaphezu kancane kweyikhulu, lawomanga aluhlaza, imfundiso yokuziphendukela kwemvelo, kulindelwe ukuba aqedwe. Lowo akuwona nje umbono wethu. Kuwumbono wososayensi abaningi abanomqondo ovulekile, abameli, abacubunguli, nabanye abantu abanolwazi. Ikhuluma ngenselele “yezimiso zokuziphendukela kwemvelo, njengoba zibhalwe nguDarwin nabanye,” iThe New York Times yafinyeza lesisimo ngokuthi: “Lolulwazi lusenxushunxushwini.” Omunye usosayensi onolwazi uyabhala: “Siyavuma ukuthi kunezikhala ezingavalekile ebufakazini bokuziphendukela kwemvelo. . . . Yebo, ukuziphendukela kwemvelo kumane kuyimfundiso. Khona-ke, ukukholelwa ekuziphendukeleni kwemvelo kuyisenzo sokholo.”
8 Kodwa ingabe ukukholelwa ekuziphendukeleni kwemvelo ngempela kuyisenzo sokholo? Kunalokho, singase sithi kuyisenzo sokuthatheka. Ukholo lunesisekelo esiqinile. AmaHeberu 11:1, NW asitshela ukuthi ‘luwukubonakala okusobala kwezinto ezingokoqobo.’ Ubufakazi bokuthi umlando weBhayibheli usekelwe ezintweni ezingokoqobo futhi uyiqiniso uyamangaza. (2 Thimothewu 3:16, 17; Roma 15:4) Ngakolunye uhlangothi, lapho izazi zokuziphendukela kwemvelo zihlolisisa indaba ngokwengeziwe, kuba yilapho zithola ngokwengeziwe ubufakazi obuphikisanayo ezizama ukubuchaza kubantu abathathekayo.
Ingabe Babekhona Abantu-nkawu?
9. Miningi kangakanani imivubukulo yabantu-nkawu, futhi kumelwe ibe kuphi?
9 Eminyakeni eyi-130 yokucwaninga imivubukulo ukuze kutholakale iketanga elilahlekile phakathi kwenkawu nomuntu, izazi zokuziphendukela kwemvelo ziye zahlola amathambo ayingcosana kakhulu. Ngokukamagazini iScience Digest, “bonke ubufakazi obungokoqobo esinabo bokuziphendukela kwemvelo komuntu bungafakwa ebhokisini elilodwa elincane, kubuye kusale indawo!” Ngokungangabazeki, ubufakazi obunjalo bokuzisholo kufanele bube lapho—futhi isivalo sebhokisi sivalisiswe ngokushayelelwa ngezipikili!
10. Imifanekiso edwetshiwe yabantu-nkawu ithembeke kangakanani?
10 Lezozithombe zomagazini zabantu-nkawu ezisetshenziswa ekusekeleni imfundiso yokuziphendukela kwemvelo zimane ziyizinto zokucatshangelwa nje, ezidwetshwe ngezisekelo zamathambo ambalwa amancane ogebhezi noma ithambo lomhlathi. Ngokwesibonelo, ekhasini 1 leThe New York Times ka-August 16, 1985, kwavela “umfanekiso odwetshiwe weAmphipithecus, isilwane esithile sakudala esaziwayo . . . abantu abavela kuso,” ubonisa ikhanda laso elinezinwele nezandla. Lokhu kwakususelwaphi? Amazwi ahambisana nawo athi: “Ingxenye engemuva yomhlathi wangezansi . . . kanye nethambo langaphambili lomhlathi kwatholakala engxenyeni yekhulu leminyaka ngaphambili.” Kodwa ingabe ikhanda eliphelele, izinwele nokunye, kungenziwa ngempela ngesisekelo samathambo amabili anjalo? Lesihloko sacaphuna isazi somuntu eYunivesithi yaseHarvard sibiza lemivubukulo ngokuthi “umthombo wokukhanya endaweni yobumnyama.” Kodwa ingabe ngempela ingafaniswa nokukhanya?
11. UIsaya 59:15 angasetshenziswa kanjani ngokuqondene nalokho okuthiwa abantu-nkawu?
11 Lokho abanye ababengase bakubize njengomunye “umthombo wokukhanya” onjalo kwakuwugebhezi lomuntu kaPiltdown. Lwahamba imibono yokuziphendukela kwemvelo cishe iminyaka engama-40 kodwa lwadalulwa ngo-1953 njengamathambo ahlanganisiwe, amanye kungawesilwane futhi amanye kungawomuntu, ehlanganiswe ndawonye ngobuqili ukuze akhohlise! Kusetshenziswa amazwi omprofethi uIsaya, kungashiwo lokhu ngemfundiso yabantu-nkawu: “Iqiniso lisilele.”—Isaya 59:15.
Ukufana Okungokwesiprofetho
12. Iziphi izinto ezinengekayo ezabonwa uHezekeli?
12 ELobukholwa lanamuhla elingamesabi uNkulunkulu lafanekiselwa iJerusalema elingathembekile lezikhathi zasendulo. Kwakungonyaka ka-612 B.C.E. lapho iNkosi ephakeme uJehova enikeza uHezekeli umbono asusa kuwo umprofethi waKhe eBabiloni wamyisa eJerusalema. Lapho, egcekeni lethempeli, uHezekeli wabona uphawu olunengekayo lokukhonzwa kwezithombe. UJehova wabuye wamenza ukuba agebhule futhi andise imbobo odongeni. Wayesethi kuHezekeli: “Ngena ubone izinengiso ezimbi abazenzayo lapha.” Wabonani? Phela, emakamelweni angaphakathi endlu kaJehova yokukhulekela, kwakukhona “zonke izimo zezilwanyana ezinwabuzelayo, nezilwane ezinengekayo, nazo zonke izithombe zendlu kaIsrayeli kudwetshiwe odongeni nxazonke.”—Hezekeli 8:1, 7-10.
13. (a) Isiphi isimo esifanayo esikhona kweLobukholwa namuhla? (b) UJesu wayibheka kanjani indaba yeBhayibheli yendalo?
13 Ngokufanayo nalombono, sithola isimo esishaqisayo phakathi kwabefundisi beLobukholwa namuhla. Ngokwengxenye enkulu, ‘lomuntu ongenamthetho’ uye wayilahla indaba yeBhayibheli yokudala. (2 Thesalonika 2:3) Noma, njengalezo zihlubuki zosuku lukaHezekeli, abefundisi balwela ukuhlanganisa ukuziphendukela kwemvelo neBhayibheli, bethi izahluko zokuqala zikaGenesise ziqukethe inganekwane noma umfanekiso. Bengasinaki isisho sesayensi esithi incazelo elula kunazo zonke ngokuvamile iyona eyiqiniso, bathi indaba yeBhayibheli ingeyezingane ayibafanele bona. Izingqondo zabo eziqhoshayo zidinga okuthile okunzima nokuyinkimbinkimbi ngokwengeziwe. Baziphakamisa ngaphezu kukaJesu Kristu, owabhekisela endabeni engokoqobo kaGenesise ngokuthi “iyiqiniso.”—Johane 17:17; Mathewu 19:4-6.
14. “Amalunga” ehluleka kanjani manje ukuhola imihlambi yawo, futhi uzoba yini umphumela?
14 Embonweni wakhe, uHezekeli wabona “abantu abangamashumi ayisikhombisa bamalunga endlu kaIsrayeli” bekhuleka phambi kwalezo zimo “zezilwanyana ezinwabuzelayo, nezilwane ezinengekayo.” (Hezekeli 8:10, 11) Lokhu kufana nalabo befundisi bosuku lwanamuhla abavuma obala ukuthi isintu sazivelela ezilwaneni ezinjalo! ‘Lamalunga’ kumelwe ngabe ahola imihlambi yawo endleleni yeqiniso. Kodwa ingabe incazelo kaJesu ekuMathewu 15:14 ayisebenzi kuwo? UJesu wathi: “Bangabaholi abayizimpumputhe; kepha nxa impumputhe ihola impumputhe, ziyakuyela emgodini zombili.” Bangathola imigodi enjalo, “ezindaweni zobumnyama” lapho izazi zokuziphendukela kwemvelo ziphumputheka khona.
15. Abefundisi abakholelwa ekuziphendukeleni kwemvelo babunikeza kanjani obunye ubufakazi bokuba yingxenye ‘yomuntu ongenamthetho’?
15 UJehova wabuye wabuza uHezekeli: “Ndodana yomuntu, uyabona yini akwenzayo amalunga endlu yakwaIsrayeli ebumnyameni, kube-yilelo nalelo ekamelweni lalo lezithombe, na? Ngokuba athi: UJehova akasiboni, uJehova ulishiyile izwe.” (Hezekeli 8:12) Abefundisi abavumelana nefilosofi yomuntu banikeza ubufakazi obufanayo bokuthi bayingxenye ‘yomuntu ongenamthetho.’ Bayawulahla umthetho kaNkulunkulu, ohlanganisa incwadi kaGenesise. (IzEnzo 7:53) Baholela imihlambi yabo ebumnyameni bokucabanga kwezwe, njengoba kuboniswa imfundiso yokuziphendukela kwemvelo engenabo nengenakuba nabo ubufakazi. “Bathanda ubumnyama kunokukhanya” kweqiniso.—Johane 3:19.
16. Ikuphi ukufana okuphawulwayo phakathi ‘kwamalunga’ osuku lukaHezekeli nabefundisi abaningi namuhla?
16 Njengoba nje labo baholi abangamaJuda baletha ukukhulekela kwabo kwamanga ethempelini eJerusalema, ngokufanayo abaholi benkolo bamanga namuhla bazama ukubambelela egameni nje elithi “umKristu.” Kodwa ukukholelwa ekuziphendukeleni kwemvelo akubona ubuKristu. Ukwamukelwa kwalemfundiso kuye kwabangela abaningi bahlubuka kuNkulunkulu. Kuye kwaba nengxenye enkulu ekuzibuseni, ubudlova, nobuphekula bekhulu lethu lama-20 leminyaka, nezizwe nabantu ngabanye bamukela isaga sokuziphendukela kwemvelo ‘sokuphumelela kwabanamandla.’ Ukuziphendukela kwemvelo kuye kwafundisa ukuthi umuntu akanawo umthwalo wemfanelo kuMdali. (Roma 9:28) Ngakho-ke abantu baye bazizwa bekhululekile ‘ukuzenzela abakuthandayo,’ ngaphandle kokucabanga ngoNkulunkulu.
17. Yiziphi izici abefundisi abakholelwa ekuziphendukeleni kwemvelo abaye bawela ngazo ephutheni elikhulu?
17 Abaholi benkolo abamukela ukuziphendukela kwemvelo kunjengokungathi bathi: “UJehova akasiboni. UJehova ulishiyile izwe.” Ngenxa yokwamukela lefilosofi, abanawo umuzwa wokulandisa kuye. Ngempela, umqondo wabo ngoNkulunkulu usithwe ukukholelwa kwabo konkulunkulu abanguZiqu-zintathu oxakayo, ongachazeki. Ngokuvumelana nalombono, bangase bathande ukuqeda lona kanye igama likaNkulunkulu oyedwa weqiniso, uJehova, bengalithinti nakancane leligama futhi balikhiphe ngamabomu ezinguqulweni zabo zeBhayibheli. Bayesaba ukuphikisa imfundiso yokuziphendukela kwemvelo yezwe ethandwayo.
18. Ikuphi ukulandisa okulindele imfundiso yokuziphendukela kwemvelo nabasekeli bayo?
18 Ngokufanelekileyo, uJehova uthi ngomunye umprofethi: “Ngenxa yokuba lababantu besondela, bangidumise ngemilomo yabo nangezindebe zabo, kodwa bazidedisele kude nami izinhliziyo zabo, nokungesaba kwabo kungumyalo wabantu abawufundisiweyo nje, ngalokho ngiyakubuye ngenzele lababantu izenzo ezimangalisayo, izimangaliso impela; ukuhlakanipha kwabahlakaniphileyo babo kuyakuphela, nokuqonda kwabaqondileyo babo kuyakusitheka.” (Isaya 29:13, 14) Ekugcineni, imfundiso yokuziphendukela kwemvelo edelela uNkulunkulu kanye nalawomaKristu okuzisholo ayemukelayo kuyohlangabezana nalokho kulandisa ngosuku lwentukuthelo evuthayo kaJehova.—Zefaniya 3:8.
Ukukhonza Ngenxa Yeqiniso
19. (a) Kungani abaningi beye bemukela ukuziphendukela kwemvelo? (b) Abathobekileyo bangahlanganyela kukuphi ukujabula manje?
19 Ngempela leli yizwe elingamesabi uNkulunkulu! Inkolo yamanga nokuqhosha kososayensi okuqondiswe kabi kuye kwasiza ekulenzeni libe njalo. Ukuba inhlekisa kwezimfundiso ‘zomuntu engenamthetho,’ abefundisi beLobukholwa, kuye kwahlubula abaningi enkolweni. Abanye balaba baye babambelela ekuziphendukeleni kwemvelo, njengomuntu ominzayo obambelela emcwini wotshani. Abanye baye bamukela inkolelo yokuziphendukela kwemvelo ngoba ukuphika kwayo uNkulunkulu kubonakala kubakhulula emthwalweni wemfanelo kuNkulunkulu onguMdali. (Qhathanisa nabaseRoma 1:21-23.) Kodwa abantu abathobekile, abamnene manje bayajabula ngokwazi ngeNkosi ePhakeme uJehova, ngeNkosi ebusayo uJesu Kristu, kanye nangezinjongo zoMbuso kaNkulunkulu ngokushesha ezizoba yinto engokoqobo ekhazimulayo.—Roma 16:20; 1 Korinte 15:25, 26.
20. (a) Isiphi isithembiso esihle esigcwalisekayo ngisho kwamanje? (b) Lokhu kwaboniswa kanjani phakathi no-1985? (c) Ungabubonisa kanjani ubuqotho ekukhonzeni uNkulunkulu weqiniso?
20 Yeka indlela esijabula ngayo, njengoFakazi BakaJehova, ukuba munye kuwo wonke umhlaba ekulimemezeleni ngentshiseko iqiniso! Umoya kaNkulunkulu usebenza ngamandla nenhlangano yakhe, kangangokuthi kakade sesiyakubona ukugcwaliseka kwesithembiso: “Umhlaba uyakugcwala ukumazi uJehova njengamanzi asibekela ulwandle.” (Isaya 11:9) Ubufakazi bomhlaba wonke abantu bakaJehova ababunikeza phakathi no-1985 baphumela ekusakazweni ensimini kwamaBhayibheli nezincwadi ezichaza iBhayibheli eziyizi-339 351 170, ngezilimi ezingaphezu kwama-200. Kwaba yilungelo lethu esingaphezu kwezigidi ezintathu ukuhlanganyela kulomsebenzi omuhle wokushumayela wembulunga yonke, “phambi kwabantu nakuzo izindlu ngezindlu.” (IzEnzo 20:20) Kwangathi uJehova angaqhubeka esibusisa ngokucebile njengoba silwela ukugcina ubuqotho ekukhonzeni uNkulunkulu weqiniso.
Ithini Impendulo Yakho?
◻ Yiziphi izimangaliso zengqondo yomuntu ezikhomba kuMenzi ohlakaniphe kakhulu?
◻ Kungani kungaqondile ukuthi ukukholelwa ekuziphendukeleni kwemvelo kuyisenzo sokholo?
◻ Bungakanani ubufakazi obukhona bokuthi abantu-nkawu babekhona ngempela?
◻ UHezekeli 8:7-12 angasetshenziswa kanjani kwabanye abaholi benkolo banamuhla?
◻ Ubuqotho ekukhonzeni uNkulunkulu weqiniso buletha miphi imiphumela?
[Ibhokisi ekhasini 21]
Life—How Did it Get Here? By Evolution or by Creation?
Incwadi enesihloko esingenhla yakhululwa ngo-1985 nango-1986 eMihlanganweni eminingi “Yabagcina Ubuqotho” yoFakazi BakaJehova emhlabeni wonke. Manje isikhishwe ngezilimi ezilandelayo: IsiBhunu, isiDanishi, isiDashi, isiFinishi, isiFulentshi, isiJalimane, isiJapane, isiNgisi, isiNtaliyane, isiPutukezi, isiShayina, neSipanishi.
[Isithombe ekhasini 19]
Ingabe kuwukwethembeka ngabadwebi ukwenza imifanekiso yabantu-nkawu ngezingxenye ezimbalwa zamathambo?
[Isithombe ekhasini 20]
OFakazi BakaJehova baye ‘bagcwalisa umhlaba’ ngokumazi uJehova