Abamemezeli BoMbuso Bayabika
Abantu Ababesemhlanganweni Batuswa
“YENZA okuhle, uyakubongwa yiwo,” kwasho umphostoli uPawulu kwabaseRoma 13:3. Lokhu kwabonakala kuyiqiniso emhlanganweni wangonyaka odlule “Wokwanda KoMbuso” eBrazil.
Ngokwesibonelo, ngemva komhlangano eJoão Pessoa, umphathi wenkundla watshela ikomiti yomhlangano: “Ngiyanihalalisela ngendlela enhle kakhulu umhlangano oye wasingathwa ngayo nangokuziphatha kahle kwenu nokwabantwana benu. Ayikho enye inhlangano engokwenkolo ebonisa ukuziphatha okuhle okunjalo. Lapho siniqashisela lendawo, asibi nankinga. Amasango alenkundla anivulekele noma nini uma nithanda ukusebenzisa lendawo yethu.”
Abaningi baba nokukhulumela okufanayo:
◻ “Ngiye ngasebenza iminyaka eminingi nezihlwele ezinkulu zabantu, kodwa nina ningabahleleke kakhulu, abahlanzekile, futhi abasebenza ngokubambisana okukhulu.”—Umphathi weNkundla yezemidlalo iMaracanãzinho eRio de Janeiro.
◻ “Ingihlaba umxhwele impela inkolo yenu. Uma uJesu Kristu ubengeza manje, ngikholelwa ukuthi inkolo abengayivumela bekungaba eyenu.”—Umcishi womlilo owayeqaphile komunye wemihlangano yaseRio de Janeiro.
◻ “Anisikhathazi [amaphoyisa] nakancane. Ngifisa sengathi wonke umuntu wayefana nani. Bekungamangalisa. Lapho ngishaya indweba yami, ngiyazi ukuthi ngiyolalelwa ngaphandle kokuphikiswa.”—Iphoyisa lezemigwaqo elalabelwe emhlanganweni eCuritiba.
◻ “Sifuna ukusebenzisa lelithuba sinibonge ngokuhleleka kwenu nangokuqondisa okumangalisayo okuzenzekelayo, futhi sinifisela impumelelo emihlanganweni yesikhathi esizayo, leyo isiFunda salapha [uMasipala] esiyohlala njalo sinisiza kuyo.”—Incwadi eyatholwa ngumbonisi womhlangano eyayivela ehhovisi lemeya eSanto André.
◻ “Kwakunomehluko omkhulu phakathi kokuziphatha kwenu nokwabanye abaye basebenzisa amakamelo ehhotela lethu. Abantu benu baye bagcina zonke izindawo zihlanzekile futhi zicocekile, futhi ukuziphatha kwabo kwabonisa inhlonipho ephelele ngabanye.”—Umphathi wehhotela eNovo Hamburgo.
◻ “Nina kumelwe nikhokhelwe imali enhle.”—Umnikazi webhikawozi owayethengisela umhlangano izinkwa eSorocaba, ngemva kokubona indlela abazalwane abasebenza kanzima ngayo. Lapho ezwa ukuthi bonke babeyizisebenzi zokuzithandela, ezingakhokhelwa, wabuyela esitolo sakhe futhi waletha zonke izisebenzi zakhe enkundleni yezemidlalo ukuze zizobona inkuthalo nokuzinikela kwabo!
Imihlangano yaseBrazil yaze yanakwa ngisho nangabamaphephandaba. ITribuna da Bahia yanikeza lombiko: “Bephethe iBhayibheli, bebheka emavesini alo incazelo ngobudlova besintu namacebo aso, oFakazi abaxoxi ngezombangazwe, abazifaki ezindabeni zezenhlalo, futhi abazi lutho ngokhetho. Ubufakazi balokhu buseqinisweni lokuthi kungakhathaliseki ukuthi ubani ongumbusi, akasoze aba nokulinganisela, njengoba kunguNkulunkulu kuphela ongabusa umhlaba ngokuphelele. . . . Isisekelo sokholo lwabo ukuza komhlaba omusha ongazuzwa kuphela ngokutadishwa okungapheli kweBhayibheli nokuphenduka emikhubeni emibi uphendukele enhliziyweni ehlanzekile.”
Yebo, oFakazi BakaJehova abasho ukuthi baphelele kodwa bakholelwa ukuthi uMbuso kaNkulunkulu uyoletha uhlelo olusha oluphelele. Nokho, baye bazama ukusebenzisa iseluleko seBhayibheli esikweyoku-1 Petru 2:12: “Nibenenkambo enhle phakathi kwabezizwe, ukuze . . . ngokubona imisebenzi yenu emihle badumise uNkulunkulu.”
[Isithombe ekhasini 14]
Ukuziphatha kobuKristu kudumisa uNkulunkulu