Izinsuku Ezintathu Zokuqabuleka Okungokomoya
1. Yini esingalindela ukuyithola emhlanganweni wesigodi walo nyaka?
1 Kuleli zwe likaSathane eliwugwadule ngokomoya, uJehova uyaqhubeka eziqabula izinceku zakhe. (Isaya 58:11) Elinye ilungiselelo uNkulunkulu alisebenzisayo ukuze asiqabule, umhlangano wesigodi waminyaka yonke. Njengoba umhlangano wesigodi walo nyaka usondela, singakulungela kanjani ukuqatshulwa nokuqabula abanye ngokomoya?—IzAga 21:5.
2. Yimaphi amalungiselelo okufanele siwaphothule?
2 Uma ubungakazihleli izimo zakho noma ungakaceli emsebenzini, yenza kanjalo ukuze ube khona ngazo zontathu izinsuku zomhlangano. Ingabe ususibalile isikhathi ozosidinga lapho uya emhlanganweni usuku ngalunye ukuze ufike futhi uthole indawo yokuhlala kusenesikhathi ngaphambi kokuba isimiso siqale? Cishe ngeke sithande ukulahlekelwa yinoma yikuphi ukudla okungokomoya okuqabulayo uJehova asilungiselele khona! (Isaya 65:13, 14) Ingabe usuwaphothulile amalungiselelo endawo yokuhlala nezinto zokuhamba?
3. Yikuphi ukusikisela okuyosisiza nemikhaya yethu ukuze sizuze ngokugcwele esimisweni?
3 Yini eyokusiza ukuze ulalelisise ingqondo ingazulazuli phakathi nesimiso? Uma kungenzeka, phumula ngokwanele ubusuku ngabunye phakathi nenkathi yomhlangano. Gxilisa amehlo akho esikhulumini. Vula yonke imiBhalo. Bhala amaphuzu kafushane. Imikhaya iyokwenza kahle ngokuhlala ndawonye ukuze abazali basize izingane zabo zilalelisise. (IzAga 29:15) Mhlawumbe ningase nixoxe ngamaphuzu avelele esimiso kusihlwa ngemva kosuku ngalunye lomhlangano. Ukuze umkhaya wakho uhlale uqabulekile ngisho nangemva komhlangano, kungase kuhlelwe isikhathi phakathi nobusuku bokuKhulekela Komkhaya kucatshangelwe amaphuzu athile okufanele umkhaya wakho uwasebenzise.
4. Singabasiza kanjani abanye ebandleni ukuba bathole ukuqabuleka ngokomoya?
4 Siza Abanye Bathole Ukuqabuleka: Sifuna ukuba nabanye bathole ukuqabuleka ngokomoya. Ingabe kunabamemezeli asebekhulile noma abathile ebandleni abadinga usizo ukuze babe khona emhlanganweni? Ungakwazi yini ukubasiza? (1 Joh. 3:17, 18) Abadala, ikakhulukazi ababonisi bamaqembu, kufanele baqiniseke ukuthi abamemezeli abanjalo bathola usizo abaludingayo.
5. Siyozisakaza kanjani izimemo zomhlangano? (Bheka nebhokisi elingenhla.)
5 Njengasesikhathini esidlule, sizohlanganyela emkhankasweni wokumema abantu kusasele amasonto amathathu ngaphambi komhlangano wesigodi. Amabandla kufanele azibekele umgomo wokuzihambisa zonke izimemo zawo futhi ayihlanganise yonke ngangokunokwenzeka insimu yawo. Izimemo ezisele emkhayeni wakho ekupheleni komkhankaso kufanele niziphathe emhlanganweni ukuze nizisebenzise lapho nishumayela ngokwethukela. Ukwaziswa okwengeziwe ngokuphathelene nalokhu kuyonikezwa phakathi nesimiso sangoLwesihlanu. Izimemo umkhaya wakho ocabanga ukuthi ungase ungazisebenzisi kufanele zinikwe abalindi uma nifika endaweni yomhlangano. Sicela ukuba ngamunye azigcinele ikhophi eyodwa ngoba kuyodingeka ayibheke phakathi nenkulumo yokugcina ngeSonto.
6. Yiziphi izindlela esingabonisa ngazo inhlonipho emhlanganweni?
6 Inhlonipho Iyaqabula: Phakathi nenkathi lapho abantu abaningi ‘bengabazithandayo’ futhi bengenandaba nhlobo nemizwa yabanye, yeka ukuthi kuqabula kanjani ukuba phakathi kwamaKristu esikanye nawo alwela ukubonisa inhlonipho! (2 Thim. 3:2) Sibonisa inhlonipho ngokungena endaweni yomhlangano ngokungaxhamazeli nangokuhleleka lapho ivulwa nangokubeka indawo yalabo esihlala nabo ekhaya, esihamba nabo ngemoto noma esifunda nabo iBhayibheli kuphela. Silandela isiqondiso sikasihlalo lapho esinxusa ukuba siye ezindaweni zethu zokuhlala ukuze silalele umculo owandulela ukuqala kwesimiso ngasinye. Kubonisa inhlonipho ukucupha umakhalekhukhwini noma i-pager ngendlela engabaphazamisi abanye phakathi nesimiso. Sibonisa inhlonipho ngokungakhulumi, ukungathumeli imiyalezo ngomakhalekhukhwini, ukungadli noma ukwehla senyuka ngokungadingekile phakathi nesimiso.
7. Singakwamukela kanjani ukuqabuleka futhi nathi sibaqabule abafowethu lapho siba nobudlelwano nabo?
7 Ubudlelwano Obuqabulayo: Imihlangano isinika amathuba okujabulela ubunye nobuzalwane bobuKristu obuqabulayo. (IHu. 133:1-3) Kungani ungathathi isinyathelo “sokwanuleka” wazane nabanye abazalwane nodade bakwamanye amabandla abakhona? (2 Kor. 6:13) Ungase ukwenze umgomo wakho ukuzama ukwazana okungenani noyedwa noma umkhaya omusha usuku ngalunye. Ikhefu laphakathi nosuku lisinika ithuba elihle lokwenza lokhu. Ngakho phatha ukudla kwasemini okulula futhi ujabulele ukudla nobudlelwano nabanye ngaphakathi endaweni yomhlangano kunokuphuma uyothenga ukudla noma ukuyodla endaweni yokudlela eseduze. Lokhu kungaholela esibusisweni sokwakha ubuhlobo obusha nobuhlala njalo.
8. Kungani kufanele sivolontiye ukusebenza emhlanganweni, futhi singakwenza kanjani lokhu?
8 Yeka ukuthi kuqabula kanjani ukusebenza ngokubambisana nabakhulekeli esikanye nabo enkonzweni engcwele! Ungavolontiya yini ukusiza emnyangweni othile noma usize ibandla okulo esabelweni salo sokuhlanza? (IHu. 110:3) Uma ungakabi naso isabelo, sicela ucabangele ukuya eMnyangweni Wamavolintiya emhlanganweni. Izandla eziningi zenza umsebenzi ujabulise futhi ube lula?
9. Kungani kufanele sinake indlela esiziphatha nesibukeka ngayo phakathi nomhlangano?
9 Ukuziphatha Kwethu Kuyaqabula Kwabasibukele: Siyizihambeli zomhlangano phakathi nazo zontathu izinsuku zomhlangano, hhayi nje phakathi nesimiso. Labo abasibukele njengoba sisedolobheni lomhlangano kufanele bakwazi ukubona umehluko oqabulayo phakathi kwethu nabantu abangebona oFakazi. (1 Pet. 2:12) Indlela esigqoka futhi sizilungise ngayo lapho sisendaweni yomhlangano, endaweni esilala kuyo nasezindaweni zokudlela kufanele idumise uJehova. (1 Thim. 2:9, 10) Uma sifake emabheji ethu, abasibukayo bayokwazi ukubona ukuthi singoFakazi BakaJehova. Lokhu kungasinika ithuba lokubatshela ngomhlangano wethu futhi sifakaze kubo.
10. Singaqiniseka kanjani ukuthi izisebenzi zasehhotela nakwezinye izindawo zokudlela ziba nombono omuhle ngomhlangano wethu?
10 Singabambisana kanjani nezisebenzi zasehhotela noma endaweni yokudlela? Akufanele sibekise amagumbi amaningi kunalawo esizowasebenzisa, ngoba lokhu kwenza abanye abeze emhlanganweni bangayitholi indawo yokulala. Uma ehhotela noma endaweni yezivakashi sithola kumatasa ngesikhathi sifika noma lapho sesihamba, kufanele sibe nesineke nomusa. (Kol. 4:6) Kufanele sibanike ithiphu oweta, izisebenzi zasehhotela noma zasendaweni yezivakashi ezisithwalela izikhwama, ezihlanza igumbi esilele kulo nezenza ezinye izinkonzo.
11. Yikuphi okuhlangenwe nakho okufakazela ukuthi ukuziphatha kwethu kobuKristu kuthela izithelo ezinhle?
11 Ukuziphatha kwethu okuhle phakathi nomhlangano kushiya siphi isithombe kwabanye? Ngokwesihloko esithile sephephandaba, omunye umphathi wendawo okwakuqhutshelwa kuyo umhlangano wathi: “Laba bantu bathobekile. Sikujabulela njalo ukuba nabo unyaka ngamunye.” Ngonyaka odlule umuntu othile ongeyena uFakazi walahlekelwa isikhwama semali ehhotela elalisetshenziswa yizihambeli zomhlangano. Lapho lesi sikhwama sibuyiselwa kumphathi wehhotela, lo mphathi watshela umniniso ukuthi: “Kube kuhle ukuthi oFakazi BakaJehova bebeze emhlanganweni wabo endaweni eseduze nalapha, futhi bekugcwele bona lapha ehhotela. Ngale kwalokho, ubungeke usithole lesi sikhwama sakho.”
12. Njengoba umhlangano wesigodi usondela, kufanele ube yini umgomo wethu, futhi ngani?
12 Imihlangano yesigodi yalo nyaka isondela ngokushesha. Kusetshenziswe isikhathi esiningi namandla ekwenzeni isimiso nesimo somhlangano siqabule. Kwenze umgomo wakho ukuba khona ngazo zontathu izinsuku, futhi ukulungele lokho uJehova nenhlangano yakhe abakuhlelele khona. Zimisele ukuqabula abanye ngokubonisa inhlonipho, ubudlelwano obujabulisayo nangokuziphatha kahle. Ngaleyo ndlela, wena nabanye niyozizwa njengesinye isihambeli somhlangano odlule esabhala sathi, “Ayikho into engiyikhumbulayo eyake yanganelisa ngale ndlela!”
[Amazwi acashunwe esihlokweni ekhasini 4]
Njengasesikhathini esidlule, sizohlanganyela emkhankasweni wokumema abantu kusasele amasonto amathathu ngaphambi komhlangano
[Amazwi acashunwe esihlokweni ekhasini 6]
Indlela esigqoka futhi sizilungise ngayo endaweni yomhlangano, endaweni esilala kuyo nasezindaweni zokudlela kufanele idumise uJehova
[Amazwi acashunwe esihlokweni ekhasini 7]
Zimisele ukuqabula abanye ngokubonisa inhlonipho, ubudlelwano obujabulisayo, nangokuziphatha kahle
[Ibhokisi emakhasini 4]
Esikukhunjuzwa NgoMhlangano Wesigodi
◼ Izikhathi Zesimiso: Isimiso siyoqala ngo-9:00 ekuseni zontathu izinsuku. Lapho kuqala umculo owandulela isimiso, kufanele sonke sihlale phansi ukuze isimiso siqale ngendlela ehloniphekile. Isimiso siyophela ngo-4:15 ntambama ngoLwesihlanu, ngo-4:30 ntambama ngoMgqibelo kanti ngeSonto siyophela ngo-3:05 ntambama.
◼ Indawo Yokupaka: Kuzo zonke izindawo zomhlangano esinelungelo lokupaka kuzo, indawo yokupaka iyotholakala mahhala kwabafike kuqala. Ngenxa yokuthi ngokuvamile indawo yokupaka ilinganiselwe, kufanele sizame ukugcwalisa izimoto.
◼ Izindawo Zokulala: Amafomu e-Sicelo Sendawo Yokulala Sezidingo Ezikhethekile (CO-5) ayatholakala uma kunabamemezeli abawadingayo ukuze bafake isicelo sendawo yokulala. IKomiti Yenkonzo Yebandla kufanele icabangele izimfanelo zommemezeli, isebenzisa iziqondiso ezisefomini nasencwadini yomhla ka-July 15, 2009, eyabhalelwa zonke izindikimba zabadala. Leli lungiselelo elabamemezeli abanokuma okuhle ebandleni kuphela, kanye nezingane zabo eziziphatha kahle.
◼ Ukugcina Izihlalo: Izihlalo zingagcinelwa labo ohamba nabo ngemoto noma ohlala nabo ekhaya kuphela, kanye nalabo ofunda nabo iBhayibheli njengamanje.—1 Kor. 13:5.
◼ Ukudla Kwasemini: Sicela niziphathele ukudla kwasemini kunokuba niphume ngesikhathi sekhefu niyokuthenga ngaphandle kwendawo yomhlangano. Ningawaphatha ama-cooler bag amancane angangena ngaphansi kwezihlalo. Ama-cooler bag amakhulu anjengawamapikiniki kufanele agcinwe ngokuvumelana neziqondiso zabalindi. Izitsha ezifayo nophuzo oludakayo akuvunyelwe endaweni yomhlangano.
◼ Iminikelo: Singabonisa ukwazisa ngamalungiselelo omhlangano ngokunikela ngokuzithandela emsebenzini womhlaba wonke eHholo LoMbuso lethu noma emhlanganweni. Uma ufuna ukunikela ngesheke, siza ubuze igama le-akhawunti eKomitini Yomhlangano. Kwezinye izindawo zemihlangano kuyoba nemishini yasebhange engase isetshenziselwe ukwenza umnikelo ngamakhadi asebhange. Nicelwa ukuba nithintane neKomiti Yomhlangano ukuze nithole ukuthi ikuphi le mishini.
◼ Izingozi Nezimo Eziphuthumayo: Uma kuphakama isimo sempilo esiphuthumayo endaweni yomhlangano, sizani nithinte umlindi oseduze oyokwazisa uMnyango Wosizo Lokuqala ngokushesha ukuze izisebenzi eziqeqeshiwe zosizo lokuqala zikwazi ukuhlola isimo bese zinikeza usizo.
◼ Imithi: Uma kunemithi oyidlayo, qiniseka ukuthi uphatha eyanele, ngoba ayitholakali emhlanganweni.
◼ Izicathulo: Unyaka ngamunye abantu abaningi bayalimala ngenxa yezicathulo. Kuhle ukukhetha izicathulo ezifanelekayo nezikulingana kahle oyokwazi ukuhamba ngazo ngokuphephile ezitebhisini, ezinsimbini ezinezikhala nakwezinye izindawo.
◼ Ukuqopha: Imishini yokuqopha akufanele ixhunywe kugesi wenkundla yomhlangano noma esimisweni se-sound futhi le mishini kumelwe isetshenziswe kuphela ngendlela engeke ibathikameze abanye.
◼ Izinqola Zabantwana: Izinqola zabantwana akufanele zingeniswe endaweni yomhlangano. Nokho, izihlalo zabantwana zokuphepha ezilingana esihlalweni futhi ezingaboshelwa eceleni kwabazali zamukelekile.
◼ Amakha: Imihlangano eminingi yesigodi iqhutshelwa ezindaweni ezivalekile ezinemishini yeziphephetha-moya. Ngakho-ke, siyobe sibonisa umusa uma silinganisela ekusebenziseni amakha anamandla angase abaphathe kabi labo abanezinkinga zokuphefumula noma ezihlobene nakho.—1 Kor. 10:24.
◼ Amafomu Okulandelela: Ifomu elithi Siza Ulandelele (S-43) kufanele lisetshenziselwe ukubhala imininingwane nganoma ubani obonisa isithakazelo lapho sishumayela ngokwethukela phakathi nomhlangano. Abamemezeli kufanele baphathe ifomu elilodwa noma amabili emhlanganweni. Amafomu agcwalisiwe ningawayisa eNdaweni Yezincwadi noma niwanikeze unobhala webandla lakini lapho senibuyele emakhaya.—Bheka INkonzo Yethu YoMbuso ka-November 2009, k. 4.
◼ Izitolo Zokudlela: Dumisa igama likaJehova ngokuziphatha okuhle ezitolo zokudlela. Kuyinkambiso ukukhipha ithiphu engamaphesenti ayishumi kuya kwangu-15.
◼ Inkonzo Yokuzithandela: Injabulo esiyithola ngokuba khona emhlanganweni iyoba nkulu nakakhulu uma sivolontiya ngokusiza emsebenzini ohilelekile. (IzE. 20:35) Bonke abafisa ukusiza kufanele baye eMnyango Wenkonzo Yokuzithandela emhlanganweni. Izingane ezineminyaka engaphansi kuka-16 nazo zingaba nengxenye ngokusebenza nabazali noma abanye abantu abadala abagunyazwe abazali.
◼ Izingoma: Amabandla angase athande ukuprakthiza lezi zingoma zomhlangano wesigodi kusenesikhathi. Izingoma zangoLwesihlanu: 5, 18, 31, 30, 86 no-19. Izingoma zangoMgqibelo: 93, 40, 59, 24, 89 no-134. Izingoma zangeSonto: 109, 99, 133, 69, 64, no-2.
[Ibhokisi ekhasini 5]
Siyozihambisa Kanjani Izimemo?
Ukuze siyihlanganise yonke insimu yethu, kufanele sishaye ngamafuphi. Kufanele sisho into enjengokuthi: “Sawubona. Sihlanganyela emzamweni owenziwa emhlabeni wonke wokusakaza lesi simemo. Nasi esakho. Uzothola ukwaziswa okwengeziwe kuso.” Ingaphambili lalesi simemo livusa isithakazelo, ngakho umninikhaya mnikeze ngendlela yokuthi alibone. Yiba nentshiseko. Lapho nihlanganyela ekusakazweni kwesimemo ngezimpelasonto, ningase nihambise nomagazini uma kufaneleka.