Kungani Ufuna Ukunikeza Inkulumo YeBhayibheli?
UJESU KRISTU ngokuvamile wayekhuluma nezixuku ezinkulu, futhi ngokuqinisekile wayeyisikhulumi esiphumelelayo. Eqinisweni, ngemva kokuba uJesu eqede iNtshumayelo yakhe yaseNtabeni eyaziwayo, “izixuku zamangala ngokufundisa kwakhe.” (Mathewu 7:28) Akunakungatshazwa ukuthi iNdodana kaNkulunkulu yayinezisusa eziphakeme kakhulu nokuthi izinkulumo zayo zeningi zaletha inkazimulo kuYise wasezulwini.—Qhathanisa noJohane 12:46-50.
Ukukhuluma obala nakho kwakungenye indlela abalandeli bakaJesu ababesakaza ngayo izindaba ezinhle ekhulwini lokuqala leSikhathi sethu Esivamile. Ngokwesibonelo, eKorinte umphostoli uPawulu “wayeshumayela esinagogeni ngamasabatha onke, wazuza abaJuda namaGreki.” (IzEnzo 18:1, 4) Ngaphezu kwalokho, uPawulu wakhuthaza isisebenzi esasikanye naye uThimothewu ngalamazwi: “Nakekela ukufunda, nokuyala, nokufundisa, ngize ngifike.” (1 Thimothewu 4:13) Ngakho ukufunda nokukhuluma obala, ngezisusa ezinhle, ngokuqinisekile kwakunendawo yakho phakathi kwezinceku ezithembekile zikaJehova zekhulu lokuqala.
Nokho, kunesidingo sokuqaphela. Lapho uHerode, embethe ingubo yobukhosi, eqala ukunikeza inkulumo yeningi, abantu ababehlangene baqala ukumemeza: “Yizwi likaNkulunkulu, akusilo elomuntu.” Ngaso lesosikhathi ingelosi kaJehova yamshaya uHerode. Kungani? “Ngokuba enganikanga uNkulunkulu udumo.”—IzEnzo 12:21-23.
Isidingo Sesimo Sengqondo Esiqondile
Namuhla, ukunikeza inkulumo yeBhayibheli yeningi ngokuqinisekile kuyilungelo elifiseleka kakhulu elinikezwa amadoda angamaKristu avuthiwe. Nokho, isikhonzi ngasinye siyobe senza kahle uma sihlola inhliziyo yaso ngesisusa saso. (Genesise 8:21; Jeremiya 17:9) Ingabe sishukunyiswa isifiso sokudumisa uNkulunkulu nokuzuzisa esikholwa nabo nabanye? Noma ingabe sifisa ukunikeza izinkulumo zeBhayibheli ezinjalo ngenxa yokuvelela okuhlangene nokukhuluma eningini nangenxa yesifiso saso siqu sokuqhama?
Isisusa esiqondile siyozibonakalisa ngezindlela ezihlukahlukene. Ngokwesibonelo, siyosenza siqaphele ukuthi singenza ukulunga ngelungelo lokukhuluma iqiniso likaNkulunkulu endaweni yesikhulumi ngosizo lomoya kaJehova kuphela. Ngakho-ke, siyoba nesimo esifana naleso sikamphostoli uPetru, owathi: “Uma umuntu ekhuluma, makakhulume njengokwamazwi kaNkulunkulu; uma umuntu ekhonza makakhonze ngamandla awanikwa nguNkulunkulu, ukuze uNkulunkulu adunyiswe kukho konke ngoJesu Kristu.”—1 Petru 4:11.
Uthando kumelwe lube isizathu esiyisisekelo sokufuna ukunikeza inkulumo yeBhayibheli. Okokuqala nje, kumelwe sibe nothando ngoJehova uNkulunkulu, sifise ukumnika udumo nokuhlanganyela ekungcwelisweni kwegama lakhe elingcwele. Okwesibili, isisusa sethu kumelwe sihlanganise uthando ngezilaleli zethu, isifiso esiqotho sokuzifundisa nokuzishukumisela “ekuhambeni okungcwele nasekumesabeni uNkulunkulu.”—2 Petru 3:11.
Isifiso esiqotho sokwakha esikholwa nabo nabanye kumelwe naso sibe isisusa sethu sokunikeza inkulumo yeningi. Lokhu kuyosivikela ekuzameni ‘ukukitaza izindlebe’ zezilaleli zethu ngokuzitshela lokho ezifuna ukukuzwa kuphela. (2 Thimothewu 4:3) Isifiso sokwakha abanye ngokomoya naso siyosishukumisela ukugwema ukusho amahlaya noma ukusho izinto ukuze sijabulise izilaleli zethu noma sizenze zihleke. Ngeke siyisebenzise futhi indlela yokukhuluma ehlotshiswe kakhulu noma sigabise ngokuhlakanipha kwezwe emzamweni wokuhlaba izilaleli zethu umxhwele. Kunalokho, uma sinesisusa esiqondile ekukhulumeni eningini, siyolandela isibonelo somphostoli uPawulu, owanikeza ‘isibonakaliso sikamoya nesamandla, ukuze ukholo lwezilaleli zakhe lungemi ngokuhlakanipha kwabantu, lume ngamandla kaNkulunkulu.’—1 Korinte 2:3-5.
Izici Ezintathu Eziyisisekelo
Ukunikeza inkulumo yeBhayibheli yeningi kuyindaba yengqondo nenhliziyo. Ngakho-ke, izikhulumi ezingamaKristu akumelwe zibe nesimo sengqondo esiqondile kuphela kodwa futhi kumelwe zibe nokuthile okuwusizo ukukusho. Lokho kufuna ukucabangela izici ezintathu eziyisisekelo. Lezi ziyimiBhalo, amaphuzu, nokuhleleka.
Okokuqala, kumelwe kukhunjulwe ukuthi indikimba yenkulumo yeBhayibheli yeningi ngokusobala kumelwe isekelwe imibhalo esetshenziswa isikhulumi. Uma unelungelo lokunikeza inkulumo enjalo, kumelwe ube nolwazi oluhle lwendaba yakho futhi kumelwe ukwazi ukucaphuna imibhalo, uyifunde kahle, futhi uyisebenzise ngokufanelekile. Ngosuku lwePentekoste, lika-33 C.E., umphostoli uPetru ngokuphindaphindiwe wabhekisela emiBhalweni ekusekeleni amazwi akhe. (IzEnzo 2:14-41) AbaseBereya baneliswa ukuthi uPawulu wayesekele amazwi akhe ngokuqinile emiBhalweni. (IzEnzo 17:10, 11) Futhi uApholo ‘wakhomba ngemibhalo ukuthi uJesu unguKristu,’ uMesiya owayesenesikhathi eside elindelwe.—IzEnzo 18:28.
Yebo, isisekelo esingokomBhalo senkulumo yeningi siyanikezwa ohlakeni olulungiselelwa yiWatch Tower Society. Nokho, isikhulumi singasebenzisa imiBhalo eyenezelwe noma efana nayo, uma nje isebenza ngendlela efanayo futhi lokho kungenziwa ngokweqile. Kuleliphuzu, isikhonzi esingumKristu kumelwe siqaphele ukuhambisana nokukhanya okungokomoya okwandayo. Ngokwesibonelo, isikhulumi singase sisebenzise ngokungeyikho eyoku-1 Korinte 2:9 ePharadesi lasemhlabeni elizayo, kuyilapho umongo (1Kor 2 amavesi 7 no-10) ubonisa ukuthi isebenza ezintweni ezijulileyo zokuhlakanipha kukaNkulunkulu.
Okwesibili, kunendaba yamaphuzu asetshenziswa ekusekeleni amazwi esikhulumi seningi. Kumelwe kuqashelwe ukuze amaphuzu anikezwayo angabangeli ukungabaza noma abekelwe inselele. Ikakhulukazi ukuqaphela kubalulekile uma iphuzu libonakala lithinta ngokomzwelo. Kuwukuhlakanipha—futhi kubalulekile—ukuqiniseka ngokuthi lokho okushiwoyo kuyiqiniso ngempela. Ngenxa yalesizathu, ngaso sonke isikhathi kungcono kakhulu ukukwazi ukubhekisela emithonjeni ethembekile yokwaziswa uma kwenzeka ukukhulumela okuthile kungatshazwa. Ngosuku lwePentekoste, uPetru wakhomba emaphuzwini aziwa kahle. Kanjalo nomphostoli uPawulu kuyiAreopagus, noma eGqumeni likaMars, eAthene.—IzEnzo 2:22; 17:22, 23, 28.
Okwesithathu, kunesidingo bangempela sokuhleleka. Isikhulumi seningi esingumKristu kudingeka ukuba sibonisane nezilaleli zaso. Kanjalo sifunda ukuthi uPawulu “wakhuluma esinagogeni kubaJuda nakuwo amakholwa nasesigcawini imihla ngemihla kubo ababesuke bekhona.” (IzEnzo 17:17) Enkulumweni yeningi, ukubonisana kumelwe kube okuhlelekile, okulula, okucacile, okulandeleka kalula. Okuwusizo kakhulu kulokhu, ukusetshenziswa kwezihlanganiso ezibonisa ubuhlobo phakathi kwalokho osekushiwo nalokho okulandelayo.
Uma unelungelo lokuba isikhulumi seningi, khona-ke, qiniseka ukuthi unesimo sengqondo esiqondile sokunikeza inkulumo yeBhayibheli. Yiba nothando enhliziyweni yakho ngoMdali wakho nangabanye abantu. Hlanganisa futhi unikeze imibhalo namaphuzu ngendlela ehlelekile. Khona-ke lesisaga siyosebenza kuwe: “Izilimi zabahlakaniphileyo ziyimpiliso.” (IzAga 12:18) Ngaphezu kwalokho, ukunikeza izinkulumo ezinhle zeBhayibheli ezidumisa uNkulunkulu kungenye indlela ‘yokuzisindisa wena nabakuzwayo.’—1 Thimothewu 4:16.