UJehova—Uyasabeka Kodwa Unothando
“NIYAKUNGIFANISA nobani?” kwabuza uJehova uNkulunkulu. Ngisho nokujula kolimi akunakuwachaza ngokugcwele amandla kaNkulunkulu angenakulinganiswa nenkazimulo. Yena ngokwakhe uyasimema ukuba sibheke ububanzi bamazulu, ethi: “Phakamiselani amehlo enu phezulu, nibone. Ngubani odalile lezozinto na? Nguye okhipha ibandla lazo ngezibalo, abize zonke ngamagama; ngobuningi bamandla akhe nangobukhulu bezikhwepha zakhe ayisilali neyodwa.”—Isaya 40:25, 26.
Izinkulungwane zezinkanyezi esizibona ngamehlo emvelo zimane nje ziyingxenye encane ye-100 lezinkulungwane zezigidi zezinkanyezi ezakha umthala wethu kuphela! Nokho uJehova uye wabala futhi wetha ngamagama zonke izinkanyezi ezikulo lonke izulu! Cabanga futhi ngamandla amakhulu agcinwe kuzo zonke lezizinto. Ilanga lethu linezinga lokushisa eliyizigidi eziyi-15°. Yeka “amandla amangalisayo” uJehova ayengaba nawo okwenza izigidigidi zezikhali ezivuthayo zenyukliye!
Ngakho-ke ukuqonda uJehova ngokugcwele kungaphezu kwamakhono ethu alinganiselwe. UElihu wathi: “USomandla singemqonde: mkhulu ngamandla nangokwahlulela; . . . Ngalokho abantu bayamesaba.” (Jobe 37:23, 24) Nokho, uJehova ufuna okungaphezu nje kokwesaba kwethu noma ukuthuthumela. “Wothanda uJehova uNkulunkulu wakho ngayo yonke inhliziyo yakho, nangawo wonke umphefumulo wakho, nangawo onke amandla akho,” kululeka iBhayibheli. (Duteronomi 6:5) Kodwa singamthanda othile esingenakumqonda ngokugcwele? Yebo, ngoba nakuba indawo kaJehova yokuhlala iphezulu emazulwini, usebenzelana ngothando nabantu abangaphelele futhi abavumele ukuba bazuze okungenani ingxenye yokumqonda—Qhathanisa neHubo 113:5-9.
“Amehlo” Akhe, “Izindlebe,” “Nobuso”
Enye indlela uJehova asisiza ngayo ukuba simqonde ukuvumela ukuba achazwe ngamazwi abantu. Umphostoli uPetru wathi: “Ngokuba amehlo eNkosi aphezu kwabalungileyo, izindlebe zayo zisekunxuseni kwabo, kepha ubuso beNkosi buphezu kwabenza okubi.”—1 Petru 3:12; qhathanisa noEksodusi 15:6; Hezekeli 20:33; Luka 11:20.
Kuyiqiniso, lezi izingathekiso, okumelwe zingathathwa ngokoqobo, njengalapho imiBhalo ibiza uNkulunkulu ngokuthi “ilanga,” “isihlangu,” noma “iDwala.” (IHubo 84:11; Duteronomi 32:4, 31) ‘Kodwa ingabe iBhayibheli alisho yini ukuthi senziwe “ngomfanekiso” wakhe?’ kubuza abanye. (Genesise 1:26, 27) Yebo, kodwa ukuthi uNkulunkulu unomlomo ongokoqobo, ikhala nezindlebe kudala izinkinga ezingathi sína. Ngokwesibonelo, ingabe ukuzwa kukaNkulunkulu uSomandla ngempela kungalinganiselwa ezinzweni zokuzwa ukuba zikuse ezindlebeni ezingokoqobo? Akunjalo, ngoba iBhayibheli libonisa ukuthi uNkulunkulu “angezwa” ngisho noma amazwi eshiwo ngenhliziyo. (Genesise 24:42-45) Nekhono lakhe “lokubona” alixhomekanga ekukhanyeni kwelanga.—IHubo 139:1, 7-12; Heberu 4:13.
Khona-ke umuntu ophelele akafanekiseli izimpawu zomzimba kodwa izimfanelo zikaNkulunkulu ezinjengothando nokulunga. Ikakhulukazi amaKristu ayazibonakalisa izimfanelo ezinjalo njengoba elalela iseluleko somphostoli uPawulu, owanxusa: “Yembathani ubuntu obusha, obenziwe-busha ngokwazi ngokomfanekiso walowo owabudalayo.”—Kolose 3:10, NW.
Imibono Yenkazimulo
Ezikhathini zakudala, izinceku ezithile zikaJehova zaba nelungelo lokwamukela imibono ephefumlelwe yenkazimulo kaJehova yasezulwini. UHezekeli wayengomunye walababantu. (Hezekeli 1:1) Akubona embonweni kwakungachazeki: UHezekeli wasebenzisa izingathekiso nezifaniso, ngokuvamile ethi lokho akubona “kwakufana” nezinto ezibonakalayo ezijwayelekile. Ngokwesibonelo, umprofethi wathi:
“Phezu komkhathi owawuphezu kwamakhanda azo kwakunjengokungathi isihlalo sobukhosi, isimo saso sinjengetshe lesafire. Phezu kokwakunjengesihlalo sobukhosi kwakukhona okufana nomuntu phezu kwaso ngaphezulu. Ngase ngibona okunjengethusi elikhazimulayo kufana nomlilo phakathi kwakho nxazonke, kusukela kokungathi ukhalo lwakhe kuya phezulu; kusukela kokungathi ukhalo lwakhe kuya ngaphansi ngabona okufana nomlilo; kwabengezela nxazonke kwawo. Njengothingo olusemafwini ngosuku lwemvula kwabonakala kanjalo ukubengezela nxazonke. Kwakunjengesimo senkazimulo kaJehova.”—Hezekeli 1:26-28.
Yeka inkazimulo eyachazwa uHezekeli! Umphostoli uJohane waba nombono ofanayo ngoJehova, futhi wabhala: “Bheka, isihlalo sobukhosi sasimi ezulwini nohlezi phezu kwesihlalo sobukhosi; nohleziyo wayefana netshe lejaspi nesardiyu ukubukeka kwakhe, nothingo lwenkosikazi luhaqé isihlalo sobukhosi lufana nesimaragidu ukubukeka kwalo.” (IsAmbulo 4:1-3) Nakuba, uJehova ebonakaliswa ngobucwazicwazi obungako, akachazwa njengoNkulunkulu ononya. Kunalokho, isimo singesobumnene, nokuthula njengothingo.—Qhathanisa noGenesise 9:12-16.
Iqiniso lokuthi uJehova wanikeza ngisho imibono elinganiselwe kanjalo yobukhulu bakhe basezulwini libonisa ukuthi izinjongo zakhe ngesintu ngezokuthula. Khona-ke ngokuqinisekile, labo abathanda uNkulunkulu bangaya kuye ngesibindi ‘njengomuzwi wemikhuleko’ onomusa.—IHubo 65:2.
Indoda uJobe yathi ngoNkulunkulu: “Bheka, lokhu kungamaphethelo nje ezindlela zakhe, izwi lokunyenyeza nje elizwakalayo ngaye.” (Jobe 26:14) Ngempela kuningi kokufundwa ngoJehova uNkulunkulu, oye wabusisa izinceku zakhe ngethemba lokuphila phakade. (Johane 17:3) Ngisho nesikhathi ‘esiphakade’ asinakwenza ukuba “sifumane umsebenzi awenzile uNkulunkulu kwasekuqaleni kuze kube-sekupheleni.”—UmShumayeli 3:11.
Nokho, lokho abanhliziyo ziqotho abakwaziyo noma abakufundayo, kungabashukumisela ukuba bathande futhi balalele uJehova. (1 Johane 5:3) Ingabe ungomunye walabobantu? Ukulalela uNkulunkulu akulula ngazo zonke izikhathi. Kodwa lapho usumazi ngempela uJehova uNkulunkulu kanye nezindlela zakhe zothando, awukho umzamo obonakala umkhulu kakhulu. Ngakho-ke, ingabe uzimisele ukumazi kakhudlwana ngokwengeziwe loNkulunkulu owesabekayo nokho onothando?
[Isithombe ekhasini 6]
Amadoda anjengoHezekeli noJohane abona imibono esinikeza nje umqondo ngenkazimulo kaJehova eyesabekayo
[Isithombe ekhasini 7]
Ukudala, nokwetha ngamagama kukaNkulunkulu izinkanyezi kusinikeza umqondo othile ngamandla akhe angenamkhawulo