IArmagedoni—Lokho Engeyikho

Indawo oya kuyo iwuhambo olufushane ngemoto ukusuka eHaifa. Ngaphansi kokuxhopha kwelanga laseMpumalanga Ephakathi, imoto yakho ihamba ngejubane ngaseningizimu yoMfula iKhishon omazombezombe kuze kube yilapho isigodi sincipha. Liphuma esikhaleni esincane esiphakathi kokhahlamba lwaseCarmel namagquma aseGalile kuze kube yilapho ngokushesha lesisigodi sivuleka phambi kwakho njengethafa elibanzi—isiGodi saseJizreyeli. Uhamba ngemoto ngasohlangothini olungaseningizimu lwalesigodi lapho iso lakho libona elinye igquma elinesiqongo esiyithafa ngokungavamile. Yilokho okufunayo! Indunduma yaseMegiddo, umthombo wegama elithi Armagedoni.

ELITHI Armagedoni limbozwe imfihlakalo nokungaqondakali. Imiqondo yencazelo yalo miningi. Nokho elithi Armagedoni, lithathwe egameni elithi Har-Magedon, noma iNtaba YaseMegiddo.a Liyigama leBhayibheli elitholakala kusAmbulo 16:16, esithi: “Wayesebahlanganisela endaweni ethiwa ngesiHeberu iHarmagedoni [noma iArmagedoni].”

Obani ababuthelwa eArmagedoni futhi ngani? IsAmbulo 16:14 siyaphendula: ‘Amakhosi ezwe lonke’ abuthana “ekulweni kosuku olukhulu lukaNkulunkulu uMninimandla onke.”

Lezozimpendulo ziphakamisa inqwaba yeminye imibuzo. Alwa nobani ‘lamakhosi,’ futhi abanga yiphi impikiswano? Ayilwelaphi? Ingabe ayosebenzisa izikhali zenyukliye? Ingabe lempi ingavinjelwa? Ngempela, iyini iArmagedoni?

Akuyona Inkundla Ethile Emhlabeni

IArmagedoni ayinakuba indawo ethile emhlabeni. Akukho ntaba enalelogama ekhona ngempela—indunduma kuphela lapho idolobha lamandulo lake lachuma khona. Nakuba kunjalo, incazelo yangempela yeArmagedoni ibuyela emuva emlandweni empini eyayisendaweni yaseMegiddo.

IMegiddo iye yaba inkundla yezinye zezimpi ezinonya nezingumnqamula-juqu emlandweni waseMpumalanga Ephakathi, Kwaqala cishe ngekhulu le-16 B.C.E. ngokunqoba okuphelele kombusi waseGibithe uThutmose III phezu kwababusi basePalestina nabaseSiriya, futhi kwaqhubeka kuwo wonke amakhulu eminyaka kwaze kwaba unyaka ka-1918 lapho induna enkulu yempi yaseBrithani uViscount Allenby inqoba amaTurks.

Kodwa okubaluleke kakhulu kubafundi beBhayibheli ukuthi eMegiddo yilapho iqembu elincane lamabutho akwaIsrayeli ngaphansi kokuqondisa kukaMahluleli uBaraki lanqoba amabutho anamandla aseKhanani enkosi uJabini ayeholwa isikhulu sempi uSisera. UJehova uNkulunkulu wangenela futhi wanikeza amaIsrayeli ukunqoba okuphelele.—AbAhluleli 4:7, 12-16, 23; 5:19-21.

Ngakho-ke, iArmagedoni iqala ukuthatha isimo sempi ebucayi, enokunqoba okukodwa kuphela okukhanyayo.

Akuyona Impi Phakathi Kwezizwe Zomhlaba

Impikiswano yempi yeArmagedoni—ukubusa umhlaba—iyimpikiswano enkulu yanamuhla. Kodwa, nakuba imibuso emibili emikhulu ephikisanayo manje ilwela ukubusa umhlaba, iArmagedoni ayinakuba yimpi yomhlaba, eqhatha omunye walena nomunye. Kuyiqiniso, izwe asemncintiswaneni wezikhali obiza kakhulu nowubuhlanya ongakaze ube khona emlandweni, owabangela lenkulumo yeIndia Today: “Konke lokhu kuqhubela lonozungezilanga ngokwesabekayo onqenqemeni lweArmagedoni—impi yokugcina phakathi kwezizwe.” Kodwa isAmbulo 16:14 sibonisa ukuthi ‘amakhosi ezwe lonke’ ahlanganiselwa impi “ekulweni kosuku olukhulu lukaNkulunkulu uMninimandla onke.”

Ngakho-ke, iArmagedoni ayiyona impi yomuntu. Iyimpi kaNkulunkulu. IArmagedoni iyothola zonke izizwe zomhlaba zihlanganiselwe ekulweni ‘nezimpi zasezulwini’ ngaphansi kwempi ephethwe “iNkosi yamakhosi noMbusi wababusi,” uKristu Jesu. Ungumbusi ofanele womhlaba, ngoba uNkulunkulu futhi “wakubeka konke phansi kwezinyawo zakhe [uKristu].”—IsAmbulo 19:14, 16; Efesu 1:22.

Akuyona Imbubhiso Yenyukliye

Kubantu abaningi, impi yenyukliye yesabeka kakhulu ukuba bacabange ngayo. Ukuhlola okuhlanganyelwe kwango-1983 kososayensi abangama-40 kulinganisela ukuthi kukhukhulela ngoqo wempi yenyukliye abayingxenye eyodwa kwezintathu kuya kwabayisigamu bengqikithi yenani labantu bomhlaba wonke bangafa khona lapho. Umbiko wabo, owakhishwa kumagazini iScience, ubikezela ikusasa elesabekayo ngabasindayo. Uyaxwayisa: “Kunoma ikuphi ukugalelana ngezikhali zenyukliye ngezinga elikhulu phakathi kwemibuso emibili emikhulu, cishe kungaba nezinguquko ezanele esimweni sembulunga yonke ukuba zibangele ukushanelwa kwengxenye enkulu yezitshalo nezilwane eMhlabeni. Esimweni esinjalo, ukushanelwa kwesintu kuyinto engenzeka.”

Ingabe uNkulunkulu onguMninimandla onke uJehova angavumela into esabisa kanjalo? Cha! Akawudalelanga “ize” umhlaba kodwa njengoba esiqinisekisa, “wawubumba ukuba kuhlalwe kuwo.” (Isaya 45:18) EArmagedoni uNkulunkulu ‘uyobhubhisa ababhubhisa umhlaba,’ ngeke awushise embubhisweni yenyukliye.—IsAmbulo 11:18.

Akuyona Impi Eqhubeka Njalo Phakathi Kokuhle Nokubi

Abanye abaholi benkolo bakholelwa ukuthi iArmagedoni iwukuzabalaza okuqhubeka phakathi kwamandla okuhle nawokubi, emhlabeni wonke noma engqondweni. “IArmagedoni yenzeka ezingxenyeni ezithile zomhlaba nsuku zonke.” kuphawula esinye isenanelo seBhayibheli. Lokhu kungaba kanjani iArmagedoni uma iBhayibheli lithembisa ukuthi iyoletha imbubhiso esheshayo kuzo zonke izizwe ezimbi nabantu? UKristu, njengeNkosi kaNkulunkulu egcotshiwe, “uzakubaphula ngentonga yensimbi, [a]baphahlaze njengesitsha sombumbi,” eArmagedoni.—IHubo 2:9; bheka futhi izAga 2:21, 22; IsAmbulo 19:11-21.

Ayikhona Ukuwa Komhlaba Ngokomnotho

Ohulumeni bezwe abanamandla kakhulu besaba ukuthi ukwehluleka kwaMazwe Asathuthukayo ukukhokha izikweletu kuyoqhubela isimo somnotho sembulunga yonke kulokho umagazini iBusiness Life okubiza ngokuthi “iArmagedoni Yezomnotho.” Ukuwa kwezinhlangano zomhlaba zokugcina imali kuyoba kukhulu ngempela, kodwa ngeke kube iArmagedoni. IArmagedoni yeBhayibheli iyisimo somhlaba wonke esihilela impi hhayi umnotho. Umprofethi uJeremiya uyichaza ngalamazwi asobala: “UJehova uyamelana nezizwe; uyahlulela inyama yonke, kepha ababi uyakubanikela enkembeni.”—Jeremiya 25:31.

Akuyona Impi EseMpumalanga Ephakathi

“Ngesikhathi esithile, impi yokugcina iyokwenzeka eMpumalanga Ephakathi, kushumayela umvangeli odumileyo emhlabeni, uBilly Graham. Kulendaba, uveza imibono yabaningi abangane bakhe benkolo. UGraham futhi ukholelwa ukuthi iArmagedoni ingalibaziseka. Uthi: “Ngicabanga ukuthi izwe liphikelela ngokuqondile manje eArmagedoni, futhi ngaphandle kokuba kube nokuvuselelwa okungokomoya futhi siphendukele kuNkulunkulu, izwe lingase libhekane neArmagedoni yalo kulelishumi leminyaka.”

Isifunda saseMegiddo asinakukwazi ukuqukatha wonke “amakhosi omhlaba, namabutho awo.” (IsAmbulo 19:19) Ngakho-ke, lokhu bekungenakuphikisa yini noma iyiphi imfundiso yobambelela esisekelweni sokuthi iArmagedoni iyoba yimpi yomhlaba ecinaniswe esigodini esingokoqobo saseMegiddo? Umprofethi uJeremiya ubonisa ukuthi iArmagedoni iyohlanganisa ‘imikhawulo yomhlaba’ nokuthi ababuleweyo bayobonakala “kusukela komunye umkhawulo womhlaba, baze bafike komunye.”—Jeremiya 25:32, 33.

Futhi njengoba iArmagedoni isho ‘ukulwa kosuku olukhulu lukaNkulunkulu uMninimandla onke,’ akekho noyedwa ongayivimba. Akukho lutho abantu abangalwenza olungayilibazisa. UJehova uye wabeka “isikhathi esimisiweyo” sokuqala kwalempi. ‘Ayiyikwephuza.’—IsAmbulo 16:14; 11:18; Habakuki 2:3.

Isisekelo Sethemba

IArmagedoni akumelwe yesatshwe abantu abathanda ukulunga. Ngokuphambene, ingaba isisekelo sethemba. iBhayibheli lithi: “Ngase ngibona izulu livulekile; bheka, nanto ihashi elimhlophe nohlezi phezu kwalo obizwa ngokuthi oThembekileyo noQinisileyo; uyahlulela alwe ngokulunga.” (IsAmbulo 19:11) Impi yeArmagedoni iyoshanela umhlaba uhlanzeke kubo bonke ububi futhi ivule indlela yokubuyiselwa kwezimo zokulunga.—Isaya 11:4, 5.

Sekuyiminyaka engaphezu kwekhulu, izwi loFakazi BakaJehova lizwakala limemezela ukunqoba kukaNkulunkulu kwesikhathi esizayo phezu kwababusi abonakele, abalukhuni balesimiso. Ikakhulu kusukela ngonyaka ka-1925 oFakazi baye baba nombono okhanyayo walokho iArmagedoni eyikho, futhi bayenqaba ukuthula ngayo. Isifiso sabo siwukusiza abantu ukuba babe abasindayo eArmagedoni, hhayi ababulawayo. Ngakho bakhuthaza bonke abalalelayo ukuba balandele iseluleko sikaJoweli 2:31, 32, esikhuluma ngokuza kosuku “olukhulu nolwesabekayo lukaJehova,” futhi sinezele: “Bonke ababiza igama likaJehova bakhululwe.”

Nokho, abanye bangase bazibuze futhi: Nakuba iArmagedoni ingeyembulunga yonke, ingabe iyoqala eMpumalanga Ephakathi? UNkulunkulu wothando angayivumela kanjani iArmagedoni? Ingabe ukuthula kweqiniso kuyolandela iArmagedoni? Funda omagazini abathathu abalandelayo beNqabayokulinda, ngoba bayophendula leyomibuzo.

[Umbhalo waphansi]

[Ibhokisi ekhasini 6]

Iyini IArmagedoni?

IArmagedoni AYIYONA. . .

◆ indawo ethile emhlabeni

◆ impi phakathi kwezizwe

◆ imbubhiso yenyukliye

◆ ukuwa kwezomnotho embulungeni yonke

◆ ukuzabalaza phakathi kokuhle nokubi

◆ impi yaseMpumalanga Ephakathi

IArmagedoni IYILOKHU. . .

◆ Isimo somhlaba wonke lapho zonke izizwe zomhlaba ziyokulwa neNdodana kaNkulunkulu, uKristu Jesu, nebutho lakhe lezingelosi “ekulweni kosuku olukhulu lukaNkulunkulu uMninimandla onke”

[Isithombe ekhasini 4]

[Isithombe ekhasini 7]

EArmagedoni iNkosi kaNkulunkulu, uJesu Kristu, ‘iyophula zonke izizwe ezimbi ngentonga yensimbi, iziphahlaze njengesitsha sombumbi.’—IHubo 2:9.