Ukuqondisisa Izindaba

INgilandi NeBhayibheli

‘Abayisithupha kubantu abayishumi eNgilandi namuhla abanalo ngisho nolwazi oluncane lweBhayibheli,’ kusho uTom Houston, umqondisi weNhlangano YeBhayibheli YaseNgilandi. Lapho ebhekisela kokutholwe muva nje ekuhlolweni kwesizwe kabanzi kohlobo lukaGallup, waqhubeka: ‘lngxenye yenani labantu bakulendawo alikwazi ngisho nokuqukethwe amaVangeli, kungasakhulunywa ngeTestamente Elidala.’ Kulabo abangaphansi kobudala beminyaka engama-25, oyedwa kwabathathu akakaze alifunde iBhayibheli! Kwenzenjani?

Kuthiwa abantu bashiya inkolo ngenxa yokuthi nje isonto liphuphile futhi alihehi. ‘Cishe ngokwesilinganiso ababili kubantu abahlanu ababuzwa babenomuzwa wokuthi isonto lidinga ukushintsha isimo salo ukuze lidonse abantu,’ kwaqhubeka uHouston. Ngokwalokhu kuhlola, amaphesenti angama-56 enani labantu bakulendawo, uma kwenzeka beya esontweni, bayela kuphela imishado, imingcwabo noma imicimbi yokubhapathizwa nokwethiwa kwabantwana.

Akuyona yodwa iNgilandi eyomile ngokomoya kodwa nezwe lonke. IBhayibheli labikezela incithakalo enjalo ngokuthi: “[Mina, Jehova] ngiyakuthuma indlala ezweni, kungabi-yindlala yesinkwa, kungabi-ngukomela amanzi, kepha kube-ngeyokuzwa amazwi kaJehova.” (Amose 8:11) Ngokuphambene, oFakazi BakaJehova bajabulela ipharadesi elingokomoya. (Isaya 65:13, 14) Ngokwesibonelo: EBrithani kutholakala ukukhula okungaguquki koFakazi abakhuthele—amaphesenti ama-5 ngonyaka odlule—nenani lababa khona emihlanganweni yabo yamasonto onke lifinyelela inani eliphakeme lamaphesenti ayi-110. Imihlangano yoFakazi njalo inesihloko esinamandla esisekelwe eBhayibhelini. Lapho benza abafundi, bafundisa ukugcina konke uJesu ayala ngakho.—Mathewu 28:19, 20.

Ukweyisa—Imbangela Nekhambi

Ingabe ukuthambekela kwentsha ngasekweyiseni kuzuzwa njengefa noma kuyafundwa? Abanye basola izici zofuzo njengembangela yakho eyisisekelo. Abanye basola isimo sendawo sezokuhlalisana. Nakuba kokubili kungase kube nengxenye ekwandeni kokweyisa, ubuhlobo bomkhaya buyisihluthulelo ekubuphembeni noma ekunqandeni ukukhula kwakho. Ephepheni lokucwaninga elisanda kukhishwa ku-“Adolescence,” uDr. Steven A. Anolik woMnyango weSayikholoji, eSt. Francis College, eBrooklyn, eNew York, uyaphawula: “Noma izimbangela zokuziphatha okungathandwa umphakathi ziqondwa njengezinomsuka ezinqubweni ezingokomzimba noma ezingokokuhlalisana kwabantu, izimo ezisekhaya zisaqashelwa njengesici esiyimbangela sokweyisa.” Ukuhlola okwaqalwa eminyakeni engama-30 edlule kuze kube manje kubonisa ukuthi abazali abaningi bezichwensi abanamusa, abanamatheli esiyalweni, futhi bangabonakalisayo ngokomzimba.

Kulolusuku lapho abantwana “bengalaleli abazali” namalungu omkhaya “engenaluthando,” iseluleko seBhayibheli esinengqondo sisasebenza. (2 Thimothewu 3:1-3) Abantwana bafunda ukuthanda ngokuthandwa, futhi injabulo ivela ngokubonisa uthando nangokulwamukela. (IzEnzo 20:35) Nakuba isiyalo nemingcele kudingekile kwabasha, iBhayibheli lichaza ukuthi futhi kuwumthwalo wabazali ukungeqisi, ukuqondisa ngokweqile kuze kube sekucunuleni noma ngisho ukuhlupha. Liyeluleka: “Ningabathukuthelisi abantwana benu ukuba bangadangali.”—Kolose 3:21; Efesu 6:4.

“Umkhami Wezomnotho”

“Izwe lisonqenqemeni lwengozi yabantu nenhlekelele yezombangazwe,” kubhala uCharles Maynes, umhleli womagazini i“Foreign Policy” futhi owayengumsizi kanobhala wombuso eU.S., ku“The Guardian.” Ubona isikweletu esikhulukazi sezwe njengesibeka ubunzima ezinkambisweni ezingokombangazwe zamaZwe Asathuthuka kuze kube sezingeni lokudedela inguqulo yesidlozane. “Amazwe athuthukayo afakwa emshinini wokukhama wezomnotho ochitha izimpumelelo zeminyaka engamashumi amaningana,” kusho uMaynes. “Amazwe athola ukuzimela ekuqaleni kwawo-1960 futhi aqala uhlelo lokwenza izinto ngendlela yesimanje ekuqaleni kwawo-1970 manje enza ngokwesidala. Amacebo okuzalanisa imali awasasebenzi, abantwana abafundiswa, izifo ziyasakazeka, abaphangi bagcwele imigwaqo ebebengekho kuyo emashumini eminyaka, abantu baphanga izitolo zokudla . . . Wonke amazwekazi aye abona amathemba awo ngekusasa enyamalala.”

Kulezizikhathi ezinzima, yeka ukuthi kufaneleka kanjani ukuqaphela amazwi ahlakaniphile omhubi athi: “Ngisho noma ingcebo yakho yanda, ungathembeli kuyo.” Kunalokho, landela akwenza: “Ngethembela kuNkulunkulu yedwa; ngibeka ithemba lami kuye.”—IHubo 62:5, 10, “Today’s English Version.”