Ukuqondisisa Izindaba
Ukuthambekela Empini
“Izimpi zehlukahlukene kakhulu, ngesimo, ubungako nangomphumela,” kubhala umhleli wephephandaba uFlora Lewis ku“The New York Times.” Ebonisa izwe ngemva kwelinye elihileleka ohlotsheni oluthile lokulwa ngezikhali, umhleli uyaphawula: “Uhide lufundeka njengezikhombo zebalazwe.” Siyini isizathu? Uthi: “Iqiniso liwukuthi akukho muntu osabusa izwe nogcina ngisho nokuncane ukuhleleka.” Ingabe iZizwe Ezihlangene ziye zavimbela ukuthambekela empini? “Ngokugcizelela kwazo ebukhosini, ekuziqhenyeni kwesizwe, amazwi okukhononda, iZizwe Ezihlangene ziye zaphenduka inhlangano yokulekelela ukuqhubeka kwezingxabano ezincane kulapho imibuso emikhulu iqhubeka ngamandla nokulwa.” Ngemva kwemihlangano eyizigidigidi ngenhloso yokuvimbela impi, “abantu abaningi basafuna ukulwa ukuze bagcine isejwayezi sempi sikhona,” kuphawula uLewis.
Esizukulwaneni esisukela ku-1914, impi ngempela iye yaba isejwayezi. Kungani? Incwadi yeBhayibheli yesAmbulo yabikezela ngomgibeli wehhashi ongokomfanekiso, ophethe inkemba enkulu, ephuma ngehhashi elibomvu eyalwe ukuba ‘asuse ukuthula emhlabeni.’ (IsAmbulo 6:4) Lesosiprofetho siye sagcwaliseka kulelikhulu, ngoba umhlaba awubonanga kuphela izimpi zomhlaba ezimbili ezesabekayo kodwa uye wabona cishe umfula ongashiyo wokuchitheka kwegazi ngenxa yezimpi.
Nokho, abathanda ukuthula abaqotho babheke phambili ekuqedweni ‘kwesijwayezi sempi’ esigqilazayo ngumgibeli wehhashi elimhlophe ongokomfanekiso othwele umqhele wesAmbulo. UnguKristu Jesu, “iNkosi yokuthula.” Kusukela ngo-1914 uye waphuma ngehhashi “engonqobayo.” Okokuqala, wathobisa abaphikisi basezulwini bokubusa kwaphezulu, futhi kamuva ‘uyoqedela ukunqoba kwakhe’ kubo bonke abamelene naye basemhlabeni. Khona-ke umhlaba uyobona isejwayezi sokuthula.—Isaya 9:6; IsAmbulo 6:2; 12:7-12.
“Abantu Bamkhohliwe UNkulunkulu”
Umbhali wezincwadi odingisiwe waseSoviet nomzuzi womklomelo kaNobel uAlexander Solzhenitsyn wabonisa isizathu sokuwohloka okusezweni lonke kwesimo esingokomoya enkulumweni yakhe yokuvula iTempleton Award yonyaka odlule eBuckingham Palace. Wathi: “Uma bengingacelwa ukuba ngibonise kafushane uphawu oluyinhloko lwalo lonke lelikhulu lama-20, khona lapha, akukho okunye ebengingakuthola okuqonde ngokwengeziwe nokuqotho kunokuphindaphinda futhi ukuthi: ‘Abantu bamkhohliwe uNkulunkulu.’ Ukwehluleka kukanembeza womuntu, ongenakho ukujula kwaphezulu, kuye kwaba yisici esiphawulekayo kubo bonke ubulelesi obukhulu balelikhulu leminyaka. Okokuqala kwalokhu kwakuyiMpi Yezwe I, futhi usizi olukhulu namuhlanje lusukela kuyo.”
UMnu. Solzhenitsyn, ephawula “uhlobo olufanayo lokushiyeka” olukhungethe umphakathi kusukela eMpini Yezwe II kuze kube manje, waphawula okulandelayo: “Namuhla izwe selifinyelele izinga lapho, uma lalichaziwe emakhulwini amabili eminyaka, kwakuyothiwa: ‘Lesi isAmbulo!’”
Kusukela ngeMpi Yezwe I isintu ‘besisezikhathini zokugcina’ ngokweBhayibheli—isikhathi esiboniswa isintu ‘esesaba uNkulunkulu kodwa amandla akhe siwaphika.’ (2 Thimothewu 3:1, 5) Kuye kwaba namuphi umphumela? UNkulunkulu wathi ngeJerusalema ngesinye isikhathi emlandweni walo: “Ngokuba wangikhohlwa, wethemba emangeni.” Njengomuzi wasendulo owomile ngokomoya, eLobukholwa, kanye nalelizwe elingamesabi uNkulunkulu, libhekene nembubhiso nakanjani.—Jeremiya 13:25.
Ingabe “Ungumngane”?
“Inganekwane enkulu ngobungane ukuthi buyozenzekela ngaphandle kokuba abantu benze okuthile ngenxa yakho,” kusho uEugene Kennedy, isazi sezolwazi lwengqondo eYunivesithi yaseLoyola eChicago nombhali wezincwadi eziningi ngokuziphatha kwabantu. l“U.S.News & World Report” imcaphuna futhi ethi: “Abantu banobunzima ekwazini indlela yokwenza abangane ngoba umphakathi wethu uye wabatshela ukuthi ukuzithokozisa kuyobenza baphumelele futhi bajabule.”
“Kubusisekile ukupha kunokwamukela,” kwasho uJesu. (IzEnzo 20:35) Ukupha okungenabugovu ngemali, isikhathi nezithakazelo, ikakhulukazi emisebenzini yobuKristu, kuyokusiza ukuba ube umngane futhi ube ‘nabangane abayonamathela kuneselamani.’—IzAga 18:24.