Ukunikezela Okwaqopha Umlando

“NGAPHANDLE kokumemezela isakhiwo esisha sendlunkulu yoFakazi BakaJehova baseAustralia, ngokunokwenzeka isakhiwo somsebenzi esikhanga kakhulu esasakhelwa inhlangano engokwenkolo yaseAustralia, siyovulwa ngoMgqibelo . . . oFakazi BakaJehova—abaklami, onjiniyela, opulamba, omeselandi—benze wonke umsebenzi ngokwabo ngokuzithandela.” Yakhulumela kanjalo iThe Sydney Morning Herald kaMarch 16, 1983.

Njengoba sakhiwe endaweni ethambekile, lenkimbinkimbi iyizakhiwo ezintathu ezingxenye yazo inemishini yokungenisa umoya ezixhunyaniswe ndawonye ngamaphaseji namahhovisi ahlanganisiwe. Ngaphezu kwalokho kunezindlu zokulungisa imishini nezindlu zezolimo. Isakhiwo esisekungeneni esiyisitezi esisodwa siqukethe amahhovisi okuqondisa neHholo LoMbuso elingahlala abangama-200.

Ifektri eyizitezi ezimbili inendawo yaphansi engamamitha sikwele ayizi-5 400, eyanele ukuvumela ukwanda kwesikhathi esizayo. Isakhiwo sokuhlala esiyizitezi ezimbili kuya kwezine sinamakamelo okuhlalisa abantu abayi-135. Siqukethe futhi indlu yokudlela nekhishi, indlu yabagulayo, ilondolo, ihhovisi lokuhlolwa kwamazinyo, indawo yokulungisa izinwele nendawo ebandayo yokugcina ukudla. Konke lokhu kwakhiwa ngengxenye yezindleko ezivamile zezentengiselwano ngenxa yomzamo onganqamukiyo wezinkulungwane zezisebenzi zokuzithandela ezizinikezele!

Ukwanda Kwabangela Isidingo

Ngenkathi ihhovisi legatsha laseAustralia lisuka eMelbourne liya eSydney ngo-1929, kwakunamalungu ayi-11 kuphela emkhayeni wegatsha nofakazi abakhuthele abangaba ngama-340 kuyo yonke iAustralia. Ngo-1971 inani loFakazi lase likhule laba ngaphezu kwezi-23 000, futhi kwenziwa isinqumo sokuba kuqaliswe ukunyathelisa omagazini INqabayokulinda nePhaphama! lapha. Ukuze kulungiselelwe lokhu, kwakhiwa isakhiwo esikhulu esiyizitezi ezintathu nehhovisi endaweni efanayo eSydney.

Kungakapheli neminyaka emihlanu kamuva, ukwanda okuqhubekayo kubamemezeli boMbuso kwasho ukuthi umsebenzi owengeziwe wokwakha wawudinga ukwenziwa. Nokho, amalungiselelo esakhiwo esiyizitezi ezine kulendawo eSydney enqatshwa isigungu sakhona. Ngakho-ke, indawo efaneleke kakhulu yokwandisa yabonakala isendaweni igatsha elase linayo kakade iminyaka engama-40, ipulazi elingamahektare angama-40 elingamakhilomitha angama-48 kusuka enkabeni yedolobhakazi. Ingabe isakhiwo sefektri sasiyovunyelwa kulendawo esamaphandle? Isicelo senziwa esigungwini sakhona futhi impendulo yabuya: “Yebo!”

Indaba yavunyelwa iNdikimba eBusayo yoFakazi BakaJehova ngoDecember 1978, futhi umklamo womsebenzi wokulungiswa kwesiza waqala ngokushesha. Ngesikhathi esifanayo kwaphuma ubizo lokubiza izisebenzi zokuzithandela ukuba zizohlala endaweni okwakhiwa kuyo unyaka noma ngaphezulu ukuze zisize. Ukuqonda isinqumo labantu ababhekana naso, umuntu udinga ukwazi okuthile ngeAustralia.

Inselele Yebanga

IAustralia iyizwe lesithupha ngobukhulu emhlabeni. Ubukhulu bayo bulingana neUnited States (kukhishwe iAlaska neHawaii). Nokho, inabantu abayizigidi eziyi-15 kuphela, futhi amaphesenti angama-90 alabo abahlala ezifundeni ezingasogwini ezingamakhilomitha nje ayi-120 ukusuka olwandle. Indawo emaphakathi, ebanzi, esalugwadule eyakhiwe ngokuthé gqwagqwa ibizwa ngokuthi indawo engayodwa. Iningi labaseAustralia lihlala emadolobhakazini ayisithupha alelizwe, futhi kunamabanga amade awuhlukanisayo. Ngokwesibonelo, ukusuka ePerth, eNtshonalanga yeAustralia, kuya eSydney kuwuhambo lwamakhilomitha angaphezu kwezi-4 000.

Nokho amakhulu oFakazi ahamba amabanga anjalo ukuzosiza. Kuso sonke isikhathi sokwakha abayizi-3 000 basabela kulolobizo, iningi lihamba okungenani amakhilomitha ayi-1 600. Bazikhokhela indlela yabo, bezosebenza amasonto, izinyanga ngisho neminyaka. Abanye bathengisa amakhaya, bavala amabhizinisi, bathatha izikhathi zokuphumula futhi benza nokunye ukuzidela. Kwakuyisibonelo sangempela sabantu bakaNkulunkulu ‘bezinikela ngenjabulo.’—IHubo 110:3.

Ezinye izisebenzi zaziyizingcweti zomsebenzi, kanti abanye bezela ukusetshenziswa lapho kudingeke khona. Omunye, onguweta onokuhlangenwe nakho, weza izikhathi ezimbili ukuze asize endlini yokudlela, kanjalo ekhulula enye insizwa ukuba iyosebenza esakhiweni. Ngesinye isikhathi kwathengwa ugandaganda omkhulu wokulungisa umgwaqo, kodwa kwakungekho muntu wokuwushayela. Wawusanda kufika nje umshayeli kagandaganda eshaya ucingo esifundazweni sasesiqhingini saseTasmania ethi wayengatholakala amasonto amathathu—ingabe wayengasetshenziswa?

Olunye usizo lwavela emaqenjini ezazi zomsebenzi ezinokuhlangenwe nakho ezahamba amabanga amade, ngokuvamile ngaphezu kokukodwa, lapho ulwazi lwazo ludingeka. Abakhonkayo bevela kude ngamakhilomitha ayi-1 000 bezela uchungechunge lokuthelwa kukakhonkolo okukhulu; abafaka usilingi bevela kude ngamakhilomitha ayi-1 100 nababiyelayo bevela kude ngamakhilomitha ayi-1 500. Ngaphezu kwalokho, oFakazi bendawo abaseduze ngebanga elingekho ngaphezu kwamakhilomitha angama-200 beza bazosiza ngeMigqibelo, ngokuvamile bekhuphula inani lezisebenzi lisuka kwezingama-200 kuya ngaphezu kwezingama-300.

Kwabanye oFakazi eNyakatho yeQueensland abasebenza ngomshini wokusaha amapulangwe ebangeni lamakhilomitha ayizi-3 200 kwavela amaloli elandelana ethwele amapulangwe amahle endawo, okwathi ngemva kokuba esahwe kahle futhi apholishwa kahle esakhiweni, aba isici esiqhamile salendayo esaheha ukukhulumela okuningi kokwazisa. Amapulangwe angavamile ahlanganisa i“Rosewood,” i“Calophyllum,” i“Red Tulip Oak” ne“Feathertop.”

Futhi kuyo yonke iAustralia kwavela ukusekela okumangalisayo ngeminikelo ukuze kubhekanwe nezindleko zokwakhwa. Intombazane eneminyaka eyisithupha ubudala yabhala ngesandla sayo esinokucophelela. “Ngifuna ukuba nithole imali ebhange lami lesikole. Ngiyonge unyaka owodwa.” Yafaka ama-R41,00! Isheke elivela eQueensland leza nencwajana echaza ukuthi lalivela “komunye wodadewethu okholweni othanda ukuba ahlale engaziwa. Ungumfelokazi, futhi njengomfelokazi oseBhayibhelini, lokhu yikho konke anakho. Ithemba lakhe likuJehova.” Inani elalifakiwe lalingama-R6 283,94! Ngokucacile, uJehova wayeshukumisa ukupha ‘ngokunikela ngenhliziyo epheleleyo.’—1 IziKronike 29:9.

Lilungiselelwe Umsebenzi WoMbuso Wesikhathi Esizayo

Lenkimbinkimbi entsha yegatsha inikeza isisekelo esihle ukuba sikhonze umsebenzi wokushumayela woFakazi BakaJehova abayizi-36 000 abakhuthele emabandleni angama-571 kulo lonke izwekazi elibanzi laseAustralia. Ingxenye enkulu yabantu baseAustralia ingabantu abavela kwamanye amazwe noma abantwana babo. Ukuze kukhonzwe lamaqembu ezinhlanga izincwadi zigcinwa ngezilimi ezingama-52. Ngaphezu kwalokho, ukunyathelisa kwenziwa ngezilimi eziyi-14 kwenzelwa eziningi zeziqhingi zasePacific njengePapua New Guinea, iSolomon Island neFiji.

Ukukhiqizwa kukamagazini wolimi lwesiNgisi ongaphezu kwezi-750 000 ngenyanga kuye kwathathwa umshini wokunyathelisa oyirotary offset omusha owafika ngoApril 1983, uvela endlunkulu yaseBrooklyn. Ukulungiselela ukushintshela ekunyatheliseni ngeoffset, amakamelo amnyama anekhamera yesimanje yecomputer nemishini yokugeza izithombe, nomnyango wegraphics kuye kwakhiwa.

Ezinyangeni eziyi-18 ezidlule kuye kwaba nokwanda okungaphezu kwezi-4 000, noma amaphesenti ayi-13, enanini loFakazi abakhuthele. Ngezifundo zeBhayibheli zasemakhaya ezingaphezu kwezi-16 200 eziqhutshwayo manje, nabayizi-72 457 abaye baba khona eSikhumbuzweni sokufa kukaKristu sika-1983, kunekusasa eliqhakazile lokukhula okusheshayo eAustralia.

Usuku Lokunikezelwa

NgoMgqibelo, ngoMarch 19, 1983, isonto lesimo sezulu esinemvula lanqanyulwa usuku oluthokomele, futhi abangaphezu kwezi-2 000 bezihambeli ezimenyiwe, abaningi babo kungabaye baba oFakazi abakhuthele ngaphambi kuka-1945, babuthana kulezizakhiwo ezintsha ngoSuku lokuNikezelwa. Njengoba usihlalo aphawula, bebonke babemelele inkonzo yokwethembeka yeminyaka engaphezu kwezi-65 000. Yeka okuhle ukuhlangana futhi okwaba yikho! Izivakashi zadlulisela imikhonzo nokuhlangenwe nakho kuvela eUnited States, eFiji, eNew Zealand nasePapua New Guinea.

Igatsha laseAustralia lalingelesithathu ukusungulwa iWatch Tower Bible and Tract Society ngaphandle kwaseUnited States. Kukhona isikhathi lapho langamela indawo engaphezu kwengxenye yesine yomhlaba, kuhlanganise cishe zonke iziqhingi zaseNingizimu Pacific, nalokho manje okuyiThailand, iVietnam, iLaos, iCambodia, iMalaysia, iHong Kong, iSingapore nalo lonke elaseChina. Manje kunamagatsha ayi-13 ahlukene angamela umsebenzi wokushumayela ngoMbuso kulamazwe. Kodwa, ngokwengxenye enkulu, umsebenzi wavulwa okokuqala kuwona emuva ngawo-1930 amaphayona ayevela eAustralia. Amaningi alawa ayekhona ekunikezelweni futhi amalungu angama-88 omkhaya waseBethel yaseAustralia akujabulela ukubonisa abanjalo okhokho babo abangokomoya umoya wokwamukela izihambi!

Ntambama, uLloyd Barry, ilungu leNdikimba Ebusayo yoFakazi BakaJehova futhi owayeyingxenye yomkhaya waseBethel yaseAustralia phakathi nawo-1940, wanikezela lenkimbinkimbi ngokomthetho, hhayi kunoma imuphi umuntu noma inhlangano, kodwa kuJehova uNkulunkulu.

Ngosuku olulandelayo, iSonto, March 20, imvula yana futhi. Nakuba kunjalo, izi-10 468 zabuthanela enkundleni yomjaho yeWarwick Farm ukuba zizwe isimiso esanikeza isikhuthazo sokuqhubekela phambili nokwanda komsebenzi kaJehova phakathi ‘nalezinsuku zokugcina.’ Ezinye izindawo eziyishumi zazixhunywe ngokuqondile kulomcimbi ngocingo, kwenza ingqikithi yonke yabalalele ngeSonto yaba izi-36 757.

Okuningi okuhlangenwe nakho okuhle kwahlanganyelwa futhi isimiso sashiya wonke umuntu enokuzimisela okwandisiwe ukuba ‘aphikelele’ ekushumayeleni “ivangeli loMbuso” emagumbini omane ezwekazi elikhulu laseAustralia. Yilomsebenzi oye waphemba futhi oyoqinisekisa inzuzo eqhubekayo yesakhiwo esisha segatsha laseAustralia.—Luka 13:24; Mathewu 24:14.

[Isithombe ekhasini 14, 15]

Igatsha elisha laseAustralla elanikezelwa ngoMarch 19, 1983

[Isithombe ekhasini 17]

OMUSHA USEKELA UMSEBENZI WOKWAKHA