Ukuphuza—Ingabe Uyahambisana Nombono WeBhayibheli?
WAYENGUMKRISTU obhapathiziwe. Ebuzwa ngabadala ebandleni lakubo, ababekhathazekile ngokuphuza kwakhe, wavuma ukuthi wayephuze obhiya kanye nezingilazi ezimbalwa ze-whiskey. “Kodwa angidakwanga,” washo.
Lensizwa yayinomuzwa wokuthi uma nje kuphela ungakadakwa, akusho lutho ukuthi uphuza kangakanani. Uyavuma? Kuyadabukisa ukusho ukuthi, imibiko ibonisa ukuthi ukucabanga okunjalo kukhona phakathi kwabantu bakaNkulunkulu. Kodwa ingabe kungokomBhalo? Lithini nje iBhayibheli ngokuphuza?
Uphuzo oludakayo ngempela luphakathi kweziningi izipho esazithola kuMdali wethu, uJehova uNkulunkulu. Kanjalo, iBhayibheli lisitshela ukuthi uNkulunkulu unikeza iwayini “elijabulisa inhliziyo yomuntu”; lelowayini “lithokozisa onkulunkulu nabantu”; nokuthi lenza inhliziyo ‘ithokoze.’ (IHubo 104:15; AbAhluleli 9:13; Esteri 1:10) Iwayini elimelelwe“umvini” emiBhalweni lisetshenziselwa ukubonakalisa ukuchuma nokulondeka.—Mika 4:4; Zakariya 3:10.
Nokho, isipho singasetshenziswa kahle noma kabi. IBhayibheli liqukethe izixwayiso eziningi mayelana nokusetshenziswa kabi kotshwala.
Ukuphuza Kokungalinganiseli
Kuthiwani ngombono othi, ‘Uma nje kuphela ungadakwa, akusho lutho ukuthi uphuza kangakanani’? Ngokuqinisekile iBhayibheli liyakulahla ukudakwa, lisitshela ukuthi izidakwa ngeke zi“lidle ifa lombuso kaNkulunkulu.” (1 Korinte 6:9, 10) Kodwa ingabe ubudakwa kuphela esixwayiswa ngabo? Kuthiwani ngokuphuza kakhulu kodwa ungadakwa?
Ku-1 Thimothewu 3:2, 3, sifunda ukuthi umbonisi akumelwe kuphela agweme ukuba ‘ixhwele lewayini’ kodwa futhi kumelwe ‘aziphathe ngokufaneleyo.’ Lokhu kusho yonke imikhuba. Nokho, igama lesiGreki elihunyushwe ngokuthi “oziphatha ngokufaneleyo” (ne.phaʹli.on) lisho ukuthi “ungadakwa, ukuba kahle; ukudeda ewayinini, ngokuphelele noma okungenani ekulisebenziseni ngokungalinganiseli.” (Omalukeke ngabethu.) Thayer’s Greek-English Lexicon of the New Testament.
Ekubaleni izimfanelo zezinceku ezikhonzayo, noma amadiyakoni, uPawulu uqhubeka athi “angabi ngabanaka kakhulu iwayini [angaphuzi iwayini eliningi kakhulu,” Today’s English Version; “alinganisele ewayinini aliphuzayo,” The Jerusalem Bible.]—1 Thimothewu 3:8.
Yebo, ukuze atuswe noma aqhubeke ekhonza njengombonisi noma inceku ekhonzayo, umKristu kumelwe abe yisibonelo sokuziphatha kahle ekusebenziseni uphuzo oludakayo. Eminyakeni emibalwa edlule, ezweni laseLatin-America, idili lomshado laqhubeka kwaze kwaba sentatha-kusa kuphuzwa ubusuku bonke. Lokho kwaphumela ekugudluzweni kwayo yonke indikimba yabadala nezinceku ezikhonzayo zebandla elilodwa.
Kodwa ingabe ukulinganisela kudingeka kuphela kubabonisi nezinceku ezikhonzayo? Akunjalo neze, ngoba kuThithu 2:2, amadoda amadala alulekwa ukuba “aziphathe ngokufaneleyo.” Abesifazane ebandleni banikezwa iseluleko esifanayo “babe-nesizotha, abangahlebi, abazithibayo.” (1 Thimothewu 3:11) Nabesifazane abadala bayatshelwa ukuba “baziphathe ngokufanele abangcwele, bangabi-ngabahlebi, bangabi-yizigqila zewayini eliningi.”—Thithu 2:3.
Khona-ke, ngokukhanyayo, amaKristu kumelwe aqaphele ukuba angagwemi nje kuphela ubudakwa—imiphumela yokugcina yokuphuza kakhulu—kodwa futhi nanoma yikuphi okunye ukusetshenziswa ngokungalinganiseli kotshwala.
Yini Ewukubusebenzisa Ngokulinganisela?
Akunakutuswa isilinganiso esithile esimisiwe ngabo bonke abantu ngoba izici zabantu ngabanye, njengempilo, ubungako bomzimba, kunganqunywa yilokho okwenziwa utshwala emzimbeni. Naphezu kwalokho, kunezinto ezimbalwa okumelwe uzicabangele ekunqumeni lokho okuwukulinganisela.
Eyokuqala iwukuthi—qaphela ukuzithethelela! Kulula ukuphetha ngokuthi izeluleko ezingemukeleki zibhekiselwe kwabanye hhayi kithi. Kodwa uma wonke umuntu ecabanga ngaleyondlela iseluleko besingesebenze kumuntu!
Okulandelayo, cabangela ukuthi umzimba wakho ungasingatha ngokufanele ialkhoholi engakanani. Abantu abadala abaningi (70 kg) bangasebenzisa mhlawumbe ama-13 ml ealkhoholi ngehora (cishe ama-100 ml ewayini lasetafuleni.) Uma kweqa kulesilinganiso izinga lealkhoholi egazini liyanda. Kuvamise ukuthatha izingilazi ezimbili ezikahle kungakaphelia imizuzu emibalwa ngeningi labadala ukufinyelela izinga lealkhoholi egazini elingu-0,05 phesenti, okubangela ukushayela okuyingozi kubantu abaningi.
Isici sesithathu sokucatshangelwa umbono wamanye amaKristu. KumaRoma 14:21 siyafunda: “Kuhle ukungayidli inyama nokungaliphuzi iwayini noma okunye umzalwane wakho aqhuzuka ngakho.” Ngakho-ke ekunqumeni noma ukuphuza kwakho kufanelekile noma cha, zibuze: Ingabe ngivamise ukuphuza ngaphezu kokuphuzwa abanye? Ingabe abanye—amalungu omkhaya noma abazalwane abangamaKristu noma odade—bayathinteka ngesilinganiso engisiphuzayo? Ingabe nginedumela lokuphuza kakhulu? Ngisho noma ungathi, ‘Kodwa buyaphuza ukungingena kunabanye’, amazwi kaPawulu awabonisi yini ukuthi kumelwe sikhathalele umbono wabazalwane bethu? Khumbula amazwi kaJesu kuLuka 17:1, okungukuthi: “Kungeze kwenzeka ukuba kungaveli izikhubekiso; kodwa maye kulowo ezivela ngaye!”
Yebo, kumelwe kuqashelwe ukuthi akekho kithi onelungelo lokulindela abanye ukuba balandele unembeza wakhe. Kumelwe siqaphele ukugwema ukuba ngabagxeka ngokungafanele ngesilinganiso esiphuzwa abanye. Njengoba umphostoli uPawulu asho: “Awunalungelo lokugxeka umfowenu noma ukumbhekela phansi. Khumbula, ngamunye wethu uyokuma phambi kweSihlalo sikaNkulunkulu sokwaHlulela.”—Roma 14:10, The Living Bible.
Esinye isici sokucatshangelwa yilesi: Kungani ngiphuza? Ingabe kungenxa nje yokuphumula, ukuqeda ukoma noma ukwandisa ukunambitheka kokudla? Noma kuwukususa izinsizi, ukukhathazeka, ukukhungatheka, ukuthola isibindi noma ukungisiza ngikhohlwe amaqiniso? Mayelana nalokhu kwamuva, isazi sengqondo uDr. Stanley Gitlow uyaphawula: “Siphila emphakathini, lapho kuthi uma izinto ziba nzima, uphuze; uma ungazizwa kahle, uphendukele emlingweni wamakhemikhali. Akekho othi, ‘Hheyi, bekezelela ukucindezeleka futhi ufunde ukumelana nakho.’” Yini engasiza umKristu ukuba abhekane nezinkinga zokuphila? “Umlingo wamakhemikhali” noma ubuhlobo bakhe noNkulunkulu?—IHubo 4:8.
Ukuyekela Ngezinye Izikhathi?
Yebo! Ngomlutha wotshwala, kungokubalulekile ukuba ubuyeke ngokuphelele funa ukucindezela kokuba weqise kuwehlule. Lokhu kusikhumbuza amazwi kaJesu kuMarku 9:43: “Uma isandla sakho sikukhubekisa, sinqume; kungcono ungene ekuphileni uyingini kunokuba uye egehena.” (Okusho ukubhujiswa). Ngakho-ke, uma ukuphuza kuye kwakubangela izinkinga, kungani ungakuyeki? Kakade, “kungcono ukungena ekuphileni”! Njengoba omunye umdala ongumKristu, umqondisi wenqubo yokulungisa izidakwa, akubeka: “Ukuyeka ngokuphelele akukukhulu kunenani ongalikhokhela ukuphila oHlelweni Olusha lukaNkulunkulu.”
Nokho ukuyeka akukhona okwemilutha yotshwala kuphela; kukhona izikhathi lapho sonke siyobe senza kahle nxa siyeka. KwaIsrayeli wasendulo abapristi namaLevi ababesebenza etarbenakele noma ethempelini babengqatshelwe ukuphuza utshwala nangaluphi uhlobo, bengaphansi kwesijeziso sokufa. (Levitikusi 10:8, 9; Hezekeli 44:21) Namakhosi ayelulekwa ukuba angaphuzi iwayini noma utshwala obudakisayo nxa enza umsebenzi womthetho. Ngani? “Funa baphuze, bakhohlwe izimiso baguqule ukwahlulelwa kwabantwana bokuhlupheka.”—IzAga 31:4, 5.
Kuthiwani namhlanje? Nokho, ubungakhululeka yini wazi ukuthi umshayeli wendiza ohamba ngayo ubephuza? Yebo ubungeke! Ukuphila kuhilelekile. Ngakho, umKristu kumelwe aqaphele ngokuphuza ngaphambi kokushayela imoto. Kodwa kuyoba okungafanele kakhulu ngomKristu ukuphuza utshwala ngaphambi kokungenela imisebenzi engcwele yenkonzo yasensimini noma lapho ekuyo, ngaphambi kokuya emihlanganweni nalapho enika izeluleko zeBhayibheli nokuqondisa kwabanye. Kungani kungafanelekile? Lapha ukuphila okuphakade kuhilelekile!
Ngakho-ke uyahambisana nombono weBhayibheli ngokuphuza? Kusekutheni uyahambisana nawo noma cha. Ukuphila kwakho kusengozini, njengalokho kwabanye abangakhutshekiswa yimikhuba yokuphuza engenangqondo. Ngaphezu kwalokho, sifuna ukuphila kwethu kube okujabulisayo kuNkulunkulu wethu, uJehova. Yebo, uphuzo oludakayo luyisipho esivela kuNkulunkulu—uma lusetshenziswa ngokulinganisela! Kodwa uma wena ngokwakho kungcono uma uluyeka, khona-ke, kwenze ngokusemandleni akho. Khumbula, “kungcono ngawe ukuba ungene ekuphileni”!
[Umbhalo waphansi]
a Ingilazi eyodwa icishe ibe u-45 ml wotshwala obushisayo, ama-12 ml ewayini lasetafuleni noma ama-36 ml kabhiya.
[Isithombe ekhasini 29]
Kokuthathu kuphethe isilinganiso esifanayo sealkhoholi