Ukuqondisisa Izindaba
“Benza Kahle”
Owamuva umhleli weSun waseGainesville, eFlorida, waqhathanisa okubizwa ngokuthi “Ukuziphatha Kweningi” [Moral Majority] noFakazi BakaJehova ekuziphatheni kwabo. “Umagazini [woFakazi], unikeza iziyalezo iningi lazo eziphinda izimiso ezamiswa kudala,” kwaphawula iSun. Futhi “isoni esimelana ‘nokukhathalela kothando,’ sifanelwe ‘ukususwa ekuhlanganyeleni,’ okusho ukuxoshwa ebandleni. . . . Lesiyalo singase siwacasule amaMelika athile, kodwa kufaneleke ngokuphelele koFakazi ukuphoqelela imithetho yabo. Bayinhlangano yokuzithandela, futhi ukuphuma kuyo kulula nganoma ubani okufunayo.”
Umhleli waphawula ukuthi ngokuphambene ukuziphatha Kweningi [Moral Majority] ngakwezombangazwe, kufuna ukuphoqelela izimfundiso zakho hayi kuphela emalungwini akho—kodwa kufuna ukumisa izinkolelo zakho njengomthetho wesizwe.” Ngokombono weSun, lokhu kuhlanganiswa kwenkolo nezombangazwe kungokungemthetho, futhi ngakho-ke iMoral Majority yenza kabi futhi oFakazi BakaJehova benza kahle.”
UJesu Kristu wabeka isibonelo ekugcineni izimfundiso zakhe zokuziphatha zingathintene nezombangazwe. Ngokwesibonelo, lapho “ukuziphatha kweningi” esikhathini sakhe kwakufuna ukumhilela kwezombangazwe njengenkosi esinyathelweni sokuthuthukisa uhulumeni, wakwenqaba. “UJesu azi ukuthi bazakuza, bambambe, bambeke inkosi, wamonyukela futhi entabeni yena yedwa.”—Johane 6:15; qhathanisa noLuka 12:13, 14.
‘Ububi Ekhulwini Lethu Leminyaka’
Ingxoxo nombhali owaziwayo uAnthony Burgess maqondana nencwadi yakhe ethengwa kakhulu iEarthly Powers yavela kumagazini wezindaba wesiFulentshi iL’Express. “Incwadi ikhuluma ngezibonakaliso zobubi, ukungena kwazo ekhulwini leminyaka, nokungakwazi kwethu ukulwa nabo,” kwachaza uBurgess. “Abezombangazwe bayabukhuthaza, izazi zibheka kwenye indlela, ngisho nabantu abakhulu besonto bayabuvuna. Sinjalo-ke isimo sezwe lethu kusukela eMpini yeZwe I.”
Umlobi waphawula ukuthi ububi kusukela ngalesosikhathi behlukile: “Akukho mlobi-mlando owake wachaza [izikhathi ezesabekayo emlandweni] njengo“kuvumbuka kobubi”—umonakalo ekuzameni “ukwakha izwe elingcono.” Manje, nokho, kusho uBurgess, “siqala ukukholelwa emandleni angaphezu kwawomuntu lawo umuntu avumelana nawo ngokubhubhisa noma awavumela ukuba ambuse.”
Khona kanye eqinisweni elingokwesiprofetho seBhayibheli sithola ukuthi “lawomandla angaphezu kwawomuntu” aveze emhlabeni “izibonakaliso ezimbi” eziphawulwe umlobi uBurgess. Izehlakalo kusukela ngo-1914 ekugcwalisekeni kwesiprofetho seBhayibheli zibonisa ukuthi uSathane “odukisa izwe lonke, waphonswa phansi emhlabeni, . . . enolaka olukhulu, azi ukuthi unesikhathi esifushane!”—IsAmbulo 12:7-12.