Ukucabanga Ukuthi Wenza Kahle Akwanele!
ODOKOTELA babecababanga ukuthi benza kahle. Kanti nokho, isiguli sabo kwakuyisakhamuzi esibalulekile sasezweni lakubo elalisanda kutholwa. Ngonembeza omhlophe, odokotela balandela inqubo yezokwelapha yangalesosikhathi—ukukhipha igazi. Kodwa esikhundleni sokwelapha isifo, babangela ukuba ukufa kwesiguli sabo esibalulekile saseMelika, uGeorge Washington kufike ngokushesha.
Odokotela ngalezozinsuku babevamise ukusebenzisa ukukhipha igazi njengoba abaningi namuhla besebenzisa ukumpontshelwa kwegazi, okuthi okuningi kwakho kuphumele ekulimazeni isiguli. Yeka ukuthi lokhu kugcizelela kanjani ukuba yiqiniso kwesisho esithi: ‘Ukucabanga ukuthi wenza kahle akwanele!’
Kodwa ake sithi ukushiya umlando wezwe sibuye kongcwele. Evangelini lakhe umphostoli uMathewu waloba isehlakalo okuthiwa siveza iphuzu elifanayo.
UJesu Kristu wayebuze abaphostoli bakhe ukuthi babethi ungubani. UPetru ngesibindi wavela nenkulumo ethi: “Wena unguKristu, iNdodana kaNkulunkulu ophilayo.” UJesu wamncoma uPetru ngalenkulumo. Kodwa ngenkathi uKristu etshela abafundi bakhe ukuthi uzohlushwa ngezinto ezi ningi abulawe eJerusalema, lokhu kwakungalindelekile kangangokuba uPetru wamdonsela eceleni waqala ukumkhuza wathi: “Musa, Nkosi, lokho akusoze kwenziwa kuwe.” UJesu wamphendula ngalamazwi: “Buyela emva kwami, Sathane; uyisikhubekiso kimi ngokuba awuqondi okukaNkulunkulu kepha okwabantu.” (Mathewu 16:13-23.) Ngokusobala, uPetru wayentula ulwazi, nokuqonda. Wayethi wenza kahle, kodwa lokho kwakunganele.
Ukuqonda Nokulinganisela Kudingekile
Akwanele nje ukubona sengathi wenza kahle. Kumelwe futhi sibe nolwazi nokukhanyiselwa, nokuqonda. Kanjalo umphostoli uPawulu watshela amaKristu athandekayo aseFilipi: “Ngikhulekela lokhu ukuba uthando lwenu luvame kakhulu njalo ekwazini nasekuqondeni konke, ukuze nikwazi ukwahlukanisa, nize nibe-mhlophe nabangakhubekisiyo.”—Filipi 1:9-11.
Yebo, uma singenza okuhle ngempela kwabanye, futhi ikakhulu kulabo esibathandayo, akumelwe nje sibone sengathi senza kahle kodwa sidinga ukulinganisela isihawu nokuhlakanipha nokuba nombono okahle. Lokhu kungokubalukile ikakhulu ngobaba nomama. Abazali bavamile ukuyekelela isihawu nomusa kuphela kubuse indlela abaphatha ngayo izingane zabo, ngaphandle kokucabangisisa ukuthi lokhu kuyobathinta kanjani abantwana. Isihawu senza abazali abaningi batotose izingane zabo, babe ngabayekelelayo, eqinisweni babe bezonakalisa. Abazali bangavumela izingane zabo zenze ezikuthandayo noma bazinikeze inkululeko enkulu ngaphezu kokufanele. Kuyiqiniso ukuthi abazali abanjalo bangacabanga ukuthi lokhu kuyokwenza abantwana babo bajabule. Kodwa ngokuvamile, lokhu kuphumela ekubeni izingane zabo zikhungatheke futhi kuziholele enkathazweni njengoba zikhula futhi zizibuse ngokuqhubekayo.
Nokho uma abazali befuna ngempela ukukhombisa abantwana babo uthando, ngokuhlakanipha bayolinganisa uthando lwabo kanye nokuqina nokuyala. Njengoba “ubuwula buboshelwe enhliziyweni yomntwana,” kukhona izikhathi lapho ukubonisa uthando kusho ukumyala. Njengoba iZwi likaNkulunkulu lithi: “Oyeka uswazi uyazonda indodana yakhe, kepha oyithandayo uyayiyala ngesineke.” (IzAga 22:15; 13:24) Futhi qiniseka ngokuthi lesisimiso siyasebenza emadodaneni nasemadodakazini ngokufanayo.
Eqinisweni akuyona yini lena indlela uNkulunkulu asebenzelana ngayo nezingane zakhe zasemhlabeni? “Ngokuba iNkosi iyamlaya emthandayo, ishaye yileyo naleyondodana eyamukelayo.” (Heberu 12:5, 6) UJehova uyasiyala ngoba uyazi ukuthi siyakudinga, futhi lokho kungokwenhlala-kahle yethu. Yebo, isiyalo asijabulisi sona ngokwaso. “Ukuyala konke okwamanje kungathi akusikho okwentokozo, kepha kungokosizi, kodwa ngasemuva kuyabalethela isithelo esihle sokulunga labo abahlakahliswé yikho.”—Heberu 12:11.
Okubonisa ukuthi ukucabanga kwethu ukuthi senza kahle akwanele isimiso esisebenza futhi ebuhlotsheni bamadoda nomkawo. Isazi sokudla okunomsoco saphawula ukuthi indoda eshada umpheki omuhle isengozini ebulalayo. Ngani? Ngoba okuningi ukugula okungokwenyama kungabangelwa ukudla kakhulu noma ukudla ukudla okunomsoco kakhulu. Ngakho-ke ukukhuthaza indoda ethanda ukudla ukuba idle ngokwengeziwe kungase kube ngokulungile. Kodwa ingabe kuwukuhlakanipha?
Ngokuqondene namadoda ukucabanga kwawo ngephutha ukuthi enza kahle kungase kube nomphumela ohlukile. Amanye amadoda awukhathalela kakhulu umsebenzi wawo wokuziphilisa kangangokuthi anesikhathi esincane namandla okusalela imikhaya yawo. Noma indoda engumKristu ingase ifise kakhulu ukusiza abanye ebandleni kangangokuthi ize ingawunaki umkhaya wayo, ingawuniki ukunakekelwa okungangalokho ekunikeza abanye abakudingayo. Ukubona sengathi wenza kahle akwanele. Indoda kumelwe ilinganise izibopho zayo kwabanye nalezo ezihilela umkhaya wayo.
Lezibonelo zigcizelela ukuthini? Isidingo sokulinganisela. UMdali wethu, uJehova uNkulunkulu ulinganisele. Ngaso sonke isikhathi izenzo zakhe zivumelana ngokuphelele nezimfanelo zakhe ezine eziyinhloko zokuhlakanipha, ukulunga, amandla nothando. Ngokwesibonelo lokhu kungabonwa ngendlela uNkulunkulu azichaza ngayo ngenkathi inceku yakhe uMose icela ukubona inkazimulo yakhe. Ngemva kokuba itsheliwe ukuthi akekho ongambona aphile, uMose wezwa izwi lichaza uNkulunkulu kanje: “NguJehova! NguJehova! NguNkulunkulu ogcwele isihe, onomusa, ophuza ukuthukuthela. novame ubumnene neqiniso, ogcinela abayizinkulungwane umusa, othethelela ububi neziphambeko nezono.” Ingabe uNkulunkulu wagcina kulokho? Cha, fuña isihe sikaJehova nomusa wothando basithathe kalula. Ngokufanelekileyo, uMose wezwa lamazwi alinganiselayo: “Ongayikuyekela onecala.”—Eksodusi 34:6, 7.
Isimiso esifanayo siyasebenza kukho konke esikwenzayo njengemaKristu. Ngathi ukuba senze okuhle kakhulu, akufanele nje sicabange ukuthi senza kahle, sibonise uthando nomusa nokungabi nabugovu, kodwa masenze izimfanelo ezinjalo ziholwe ukuhlakanipha nokulunga. Lokhu kudingekile, ngoba ukubona sengathi wenza kahle akwanele.