“Izindaba Ezinhle Zokuthula” Ziyathela ESwitzerland
EMLANDWENI iSwitzerland iye yachazwa ngokuvamile njenge“Siqhingi Sokuthula.” Eqinisweni, selokhu uNapoleon ashintsha isimo saseYurobhu ngasekuqaleni kwekhulu le-19, izwe alizange lihileleke empini.
Namuhla, abakhileyo eSwitzerland abayizi-6 000 000 bajabulela elinye lamazinga aphakeme kakhulu okuphila asemhlabeni. Futhi, lokhu kuchuma kuye kwazuzwa ngaphandle kwamacebo amasiko avamile. Endaweni enokuthula okungavamile, umsebenzi onzima, ohlangene nokwenza kahle ngokuphelele, kwakumelwe uveze imiphumela. Nokho, susa imiyocu engaphezulu kwalesisosha sendlela yokuphila kwabantu, nezinkinga ezikhona ngokwemvelo endleleni yokuphila yaseMpumalanga ziyavela. Nalapha futhi, umuntu uthola imishado ebhidlikile nabeve eshumini elinambili beluthwe imilaliso. Abantu abaqotho bayaxwayiswa ngokuqinisekile, futhi “izindaba ezinhle zokuthula” ezisekelwe eZwini likaNkulunkulu iBhayibheli ziyizindaba ezinhle futhi e“Siqhingini Sokuthula” saseSwiss.—Efesu 6:15, NW.
“Izindaba Ezinhle Zokuthula” Zifinyelela ISwitzerland
Ngesikhathi uCharles Taze Russell, umongameli wokuqala weWatch Tower Society, evakashele okukuqala eSwitzerland ngo-1891, waba nomuzwa ojulile ngokuthi ‘okutshaliwe sekuvuthiwe.’ (Mathewu 9:37, 38; Johane 4:35-38) Kodwa ubani owayeyosiza ukuba aqoqe lesisivuno? Kwavela ukuthi uAdolf Weber wayezoba njengethuluzi kulomsebenzi. Njengensizwa, uWeber wayeshiye izwe lakubo waya eUnited States. Wafunda lapho iqiniso leBhayibheli, ngemva kokuba esebenzela uC. T. Russell njengomlimi. Kodwa wazindla ngesikhuthazo sokubuyela eSwitzerland nje“ngomlimi esivinini seNkosi.”
Edolobhaneni lakubo eLes Convers, uWeber waqashwa njengomlimi nomlindi wamahlathi. Manje wayesebuyele esifundeni saseNeuchâtel, phezulu ondini lwaseJura olunezihlukene izigodi zezihlahla ezihlabe uhele, lapho umfula udaleka kanzima ngoba amanzi emvula asheshe ashone ematsheni anezimbobo ezincane. Ashonaphi amanzi? Amachibi amahle aseNeuchâtel nawaseBienne ngaseningizimu ngaphansi kwezintaba zaseJura ayingxenye yempendulo.
Nokho, uAdolf Weber akachithanga isikhathi sakhe ebuka lelizwe elithulile. Phakathi nezinyanga ezinde zasebusika, ngokukhethekile, wathatha uhambo lwakhe ezungeza amathafa ngezinyawo noma egibele ibhayisikili lakhe, yonke indawo eshumayela “izindaba ezinhle zokuthula.” Umsebenzi wakhe wawungalinganiselwe nje eSwitzerland yabakhuluma isiFulentshi engasentshonalanga nendawo ewumngcele waseFrance. Ukwazi kukaWeber isiJalimane nesiNtaliyane kwamenza wakwazi ukusakaza isigijimi soMbuso ekudeni ngaphesheya kweSwitzerland kuze kube sondini lwezintaba iGotthard nangale kweAlps kuya eMilan ngasenyakatho Italy. UJehova akehlulekanga ukumbusisa kanye nezinye izisebenzi zomphefumulo wonke ekuvuneni.
Isigijimi Siyathela
Ngonyaka ka-1899, abantu abayi-14 edolobheni lasemaphandleni laseThun, okungamakhilomitha angama-30 ngaseningizimu-mpumalanga yenhlokodolobha yezwe, iBern, kubikwa ukuthi bagubha iSikhumbuzo sokufa kukaJesu Kristu. Kamuva, amanye amaqembu esifundo aqalwa kokubili ezingxenyeni zesiJalimane nesiFulentshi zakulelozwe, futhi ngokushesha amahhovisi egatsha amabili eWatch Tower Society ayeqondisa umsebenzi wokushumayela ngoMbuso ngokwezilimi. Khona-ke, ngawo-1920, ukuqondisa kwabekwa ehhovisini legatsha elandisiwe eBern, okwenezelwe kulo indawo yokunyathelisa enkudlwana. Eminyakeni engamashumi amahlanu kamuva, isakhiwo segatsha elikhulu sakhiwa eThun, lapho belisebenza khona iminyaka eminingana manje.
Ukushumayela ezisebenzini zangaphandle ezingamakhulu ezinkulungwane amaningana kuye kwaletha isibusiso nakho. Ngenxa yalokho, isiNtaliyane neSpanish ziyizilimi zoFakazi abaningi BakaJehova kulelizwe. Abantu bezinhlanga eziningi ezahlukene baye badonswa amandla e“zindaba ezinhle zokuthula.” Kubashumayeli baseSwitzerland abangaphezu kwezi-11 000, isigamu sikhuluma isiJalimane, i-1/3 isiNtaliyane noma iSpanish futhi cishe i-1/5 isiFulentshi. Ngo-1981 ingqikithi yabantu abayizi-19 785 babekhona ekugujweni kweSikhumbuzo emabandleni angama-231 lapha.
Ushintsho Oluphawulekayo Lwendlela Yokuphila
Izimo “izindaba ezinhle zokuthula” ezafikela kuzo ezinhliziyweni zabanye ngokuvamile ziye zaba ezingavamile ngokuphelele. Ngokwesibonelo, enye insizwa yaseSpain yafika eGeneva, nomngane wayo omkhulu. Ukuluthwa imilaliso kakade kwase kuwumkhuba wabo omkhulu futhi babesebenza njengabagqekezi bezitolo abaphezulu. Ngolunye usuku umngane walensizwa wabanjwa futhi waboshwa, kodwa nokho insizwa yaqhubeka nokuntshontsha ezitolo. Ngokushesha isizungu sayiholela ukuba icabange ngenjongo yeqiniso yokuphila. Yayivame ukulifundafunda iBhayibheli nencwadi ethi IQiniso Eliholela Ekuphileni Okuphakade, incwadi yeWatch Tower eyayiyithole eSpain. Kancane kancane, yaqala ukutusa abamemezeli futhi yaqala ukufuna oFakazi BakaJehova. Ngakho-ke, ngosuku eyabona ngalo amadoda amabili ayegqoke kahle ephethe izikhwama ephuma endlini eyayihlala kuyo, yaqunga isibindi yaya kuwo, yabuza: “NingoFakazi BakaJehova yini?” Cabanga injabulo yayo lapho bephendula, Yebo! Isifundo seBhayibheli saqaliswa ngokushesha.
Ngemva kwezinyanga ezine lensizwa yabe isifunde ngokwanele ukuba yenze izinguquko ezibalulekile ekuphileni kwayo. Yatshela oFakazi eyayifunda nabo indaba yomsebenzi wokuntshontsha kwayo futhi yabayisa ezimpahleni eyayizintshontshile ezazilokhu zifihlwe ekamelweni layo elingaphansi endlini: amabhantshi, amasudu, ontanjana, ngisho nemisakazo namathelevishini. Yayifuna ngobuqotho ukubuyisela lezizinto kubaninizo. Kwabonakala kungcono ukuba kubizwe ummeli, owashaqeka kangangokuba wanikeza usizo lwakhe mahhala. “Angikaze ngilibone isela elithembeke kanje!” wababaza. Lapho kubuyiselwa izimpahla ezazebiwe, ummeli wachaza izikhathi eziningi ukuthi isifundo seBhayibheli sasiholele kulolushintsho lwezehlakalo olwalungalindelekile, futhi kanjalo ubufakazi obuhle banikezwa. (Heberu 13:18) Ngokushesha kamuva, insizwa yabhapathizwa njengomunye woFakazi BakaJehova.
Ukusakaza “Izindaba Ezinhle” Kwezingazodwa Izigodi Zezintaba
Phakathi kweJura ngasentshonalanga neAlps ngasempumalanga, i-1/3 yensimu yeSwiss ithathwe ipulazi eliwumginqika elaziwa ngokuthi iMittelland, “izwe eliphakathi,” lapho ingxenye enkulu yabantu seyakhe khona. Ukusondela eduze ngaphansi kwamagquma aphakeme neAlps, nokho, izinhlobo zamasiko okuphila, ngokuvamile ezihlangene nenkolo yamaKatolika, zivamile. Abantu lapha bahlala emphakathini wezigodi ezincane, ngokuvamile ngezindlela eziphansi. Ukwesaba omakhelwane kuyisihibe esikhulukazi kulezingxenye. (IzAga 29:25) Nakuba amabandla oFakazi BakaJehova emancane futhi embalwa kulezizindawo, akukho mzamo obalekelwayo wokufinyelela abakhileyo ezintabeni ne“zindaba ezinhle zokuthula.” Ngokwesibonelo, eminyakeni embalwa edlule amakhulu oFakazi abavela emathafeni bahlanganyela emkhankasweni okhethekile ekuqaleni kwehlobo.
Ngalesosikhathi, oFakazi babesebenza ngenkuthalo esifundeni saseGrisons esingaseningizimu-mpumalanga sezilimi ezintathu. Ukuze babonise ibhayisikobho, ihholo laqashwa ehhotela entsha eSt. Moritz edume yonke indawo. Eduze nalawo aphakeme kujwayeleke isiJalimane, isiNtaliyane nezindawo zolimi lwesiRoma. Ezilalelini eziningi ngokumangalisayo esimisweni sesiNtaliyane kwakunemenenja yehhotela nomkhaya wayo. Ngemva kwesimiso yabonga abazalwane ngokufudumele, futhi yaze yenqaba nokwamukela inkokhelo yehholo lokuhlangana.
Uma ushiya eSt. Moritz ngemuva, imigwaqo emibili ehlukene iholela eItaly. Ngendlela yeSikhala iMaloja isihambi sehlela esiGodini iBregaglia egcwele amaProtestani, kanti uma sikhetha ukudabula eSikhaleni iBernina—esigcawini esihle iPiz Bernina engamamitha ayizi-4 049—siyongena esigodini sasePoschiavo, inqaba yamaKatolika. IsiNtaliyane sikhulunywa kuzo zombili izigodi. Eduze nesigodi sasePoschiavo, ichibi elincane linjengesibuko sezintaba ezilizungezile. Eduze kwalapho, umkhaya—ubaba ungumKatolika oqinile futhi umama ungomunye wamaProtestani ayimbijana endaweni—waqala ukutadisha iBhayibheli. Ukuhlangana kwabo noFakazi BakaJehova akuqhubekanga kungabonwa, futhi ngokuhamba kwesikhathi abafundisi bamasonto omabili bafika. Nakuba lomkhaya wacindezelwa kakhudlwana, ekugcineni iqiniso leBhayibheli lachuma. Namuhla abazali bangoFakazi ababhapathiziwe, bona nabantwana babo abathathu bahlanganyela njalo namanye amaKristu ngale komngcele weItaly.
Nokho, esepulpitini lesonto lakhe umpristi wesonto lamaKatolika wakhuthaza abantu besifunda sakhe ukuba bangawuvumi umsebenzi walomzalwane. Izihlobo eziningana emphakathini wesigodi zanqamula ubuhlobo bazo nalomkhaya. (Mathewu 10:35) Nokho, amalungu asondelene alomkhaya ayabonga ngobuhlobo bawo noJehova. Futhi, ayabathanda abanye abantu futhi, ngangokuba ngokuxhomeke kuwo, ahlala ngokuthula nabo bonke.—Roma 12:18.
Ukunqoba Ukuluthwa Imilaliso
Insizwa yaseZurich yayingoshisekayo umgijimi nomdlali webhola lezinyawo. Yakholelwa ukuthi ngokuzikhandla emgqeni nasenkundleni yebhola yayiyokwenza ukuphila kwayo kube nenjongo. Kodwa umbango ngisho nenzondo phakathi kwabanye abagijimi ngokuvamile kwayidumaza. Futhi, kwakunokucindezela okungapheli kokwenza okuhle nokudunyiswa kwamarekhodi okugijima nezinsephe, kodwa imizamo yokuphumelela okuncane yayimane inganakwa. Lezizimo zenezela kakhulu ekwamukeleni kwayo imilaliso eyayinikezwa ngolunye usuku umngane wangaphambili wasesikoleni. Imilaliso yabonakala sengathi iyazinciphisa izinkinga zayo okwesikhashana, kodwa empeleni ayizange izixazulule.
Ibuya emsebenzini ngobunye ubusuku, lensizwa yathola ukuthi yayishiyelwe iKingdom News. Izinto eyazifunda ngokuphela okuzayo kwalesimiso sezinto zaphemba isithakazelo sayo. Ya-oda izincwadi ezazishiwo epheshaneni futhi ngentshiseko yatadisha okuphakathi. Ngaphambi kwesikhathi eside, umzalwane omdala nomkakhe bayivakashela. Lodade wayesanda kuqalisa ukufunda nonina walensizwa. Indodana, nayo, yavuma ukuba itadishe iBhayibheli futhi ngokushesha yenza intuthuko, iyeka imilaliso nogwayi. Unina wayo, naye wenza intuthuko enhle ngokomoya futhi bobabili babhapathizwa emhlanganweni wesigodi ngo-1977 eZurich. Ngokwesikhashana, lensizwa yakhonza njengelungu elikhuthele lomkhaya waseBethel yaseThun.
Umkhaya Ojabulayo WaseBethel
“UNkulunkulu akasiye owesiyaluyalu kepha ngowokuthula,” kwabhala umphostoli uPawulu. (1 Korinte 14:33) Kusukela kunezikhuthazo eziningi zokusakaza “izindaba ezinhle zokuthula” ezakhishwa ehhovisini legatsha laseThun leWatch Tower Society, kubalulekile ukuthi izisebenzi ezibambisene lapha zigcine ukuhleleka nokuthula phakathi nomkhaya waseBethel. Usuku nosuku ukuhleleka okumangalisayo ngokuvamile kuso sonke isakhiwo segatsha kuyenezela emzweni wabo ojulile wo“kuthula kukaNkulunkulu” abamkhonzayo. (Filipi 4:9) Yeka ubuhle bezwe elinezintaba ezineqhwa esiqongqweni! Uma ungasemphemeni oncike odongeni, iso lihlaba ebucwazicwazini bechibi iThun, bese likhangwa iphakathi elihlaba umxhwele leBernese Alps, ekathathu i-Eiger, iMönch neJungfrau.
Akumangalisi, umkhaya waseBethel unezilimi eziningi ngangensimu oyikhonzayo. Amalungu omkhaya esiJalimane, esiFulentshi, esiNtaliyane neSpanish angawezizwe ezahlukene eziyisishiyagalombili. Isisebenzi esisha cishe sino-20 futhi esidala—umzalwane owabhapathizwa ngo-1909—ungaphezu kuka-92.
Ukusekela okungokomoya kwamabandla ahlukaniswe izifunda eziyi-13 (eziyisithupha ngesiJalimane, ezine ngesiNtaliyane, ezimbili ngesiFulentshi nesisodwa ngeSpanish) kungesinye sezici zomsebenzi wegatsha. Esinye siwukunyathelisa okuphumayo kwalo. Okwamanje, omagazini abayi-18 000 000 bayanyatheliswa futhi bathunyelwe unyaka ngamunye. Ikakhulukazi, lokhu kuthuthukisa ukushunyayelwa kwe“zindaba ezinhle zokuthula” eSwitzerland, eAustria, eBelgium, ePortugal, eSpain nasemibusweni ekhuluma isiFulentshi eAfrika. Phakathi nonyaka ka-1978, ihhovisi legatsha laseThun landiswa, kwavela indawo eyengeziwe yokusebenzela ngesikhathi esizayo.
Ukuqhubeka Nokuthela Isithelo Sokuthula
Abantu bakaJehova eSwitzerland bakhuthele emsebenzini. Futhi abantu abaqotho bayaqhubeka beqaphela ukuthi “izindaba ezinhle zokuthula” zikaNkulunkulu zinokubaluleka okukhulu kwabakhileyo eAlpine “Isiqhingi Sokuthula,” uma bezojabulela ukuphila okuphakade.
NgoLwesihlanu kusihlwa, ngoJanuary 26, 1979, ubufakazi behora nesigamu obaboniswa esiteshini setelevishini yolimi lwesiNtaliyane eSwitzerland babunikezelwe koFakazi BakaJehova kulelizwe. Uhlelo oluhle ngokuphawulekayo lwabonisa ngokufanelekile ukuphila nomsebenzi woFakazi. Kwakuthinta inhliziyo ukuzwa udade oneminyaka engama-97 ubudala ephendula umbuzo womxoxisi ngendlela ukuphila kwakhe okwashintsha ngayo kusukela amukela iqiniso eneminyaka engama-80. “Ngiyajabula!” kwakuyimpendulo yakhe esheshayo. Futhi lena imizwa yazo zonke izinceku zikaJehova nabangane bazo. Ngokuqhubekayo, izifundo ezintsha zeBhayibheli zasemakhaya ziyaqaliswa. Lababantu, nabanye futhi abengeziwe, bayozuza kanjani ngokubekezela kukaNkulunkulu? Ikusasa lizokukhuluma.
Ngesikhathi esifanayo, abantu bakaJehova bayobekezela ekumemezeleni isigijimi soMbuso. Bayoqhubeka nokuyisa “izindaba ezinhle zokuthula” kubantu bazo zonke izinhlobo, kungakhathaliseki noma bahlala emadolobheni nasezigodini zamathafa noma ezindaweni ezingazodwa nasezigodini ezithulile ezicashe ezintabeni.
[Amazwi acashunwe esihlokweni ekhasini 28]
“Angikaze ngilibone isela elithembeke kanje!” kwababaza ummeli
[Amazwi acashunwe esihlokweni ekhasini 30]
Akusiyo imilaliso kodwa yiKingdom News eyasiza umgijimi osemncane ukuba athole usizo oluhlala njalo ekucindezelekeni