Intshiseko Yokushumayela—Uphawu LwamaKristu Eqiniso
“ABAZE bathola nasikhathi sokudla.” Lamazwi achaza ngamafuphi intshiseko kaJesu Kristu njengoba ayefeza isabelo sokuthunywa nguYise wasezulwini. (Marku 6:31) Wayezinikele, ezingeni lokuba wayengathi: “Ukudla kwami kungukwenzeka intando yongithumileyo, ngifeze umsebenzi wakhe.” (Joh. 4:34) Phansi phezulu uJesu wahamba eshumayela “ivangeli.” (Luka 8:1) Yeka ukuboniswa kwentshiseko yokushumayela!
Ukuze asheshise lomsebenzi, uJesu wakhetha abafundi abayi-12 ngomthandazo futhi wabathuma ngonyaka ka-31 C.E. Wabayala wathi: “Ningayi ngendlela yabezizwe, . . . kodwa yanini kakhulu ezimvini ezilahlekileyo zendlu kaIsrayeli. Ekuhambeni kwenu shumayelani nithi: Umbuso wezulu ususondele.” (Math. 10:5-7) Ngalesosikhathi akukhona nje kuphela ukuthi kwanikezwa imiyalo ephelele ngokuqondene nendlela yokwenza lomsebenzi kodwa futhi lamazwi anikeza imingcele eqondile yensimu ababezoshumayela kuyo. Bashikashikeka ngenkuthalo neNkosi yabo kulamasimu kwaze kwaba ngonyaka ka-33 C.E.
Benalemingcele yensimu engqondweni, abanye babafundi bakaJesu kungenzeka bamangaliswa yilokho akusho ngaphambi nje kokufa kwakhe. UJesu wabanikeza “isibonakaliso” esiphawula ukuphela “kwezwe” futhi wabikezela ukuthi “ivangeli” laliyoshunyayelwa kuwo wonke umhlaba owakhiwe kube “ngubufakazi ezizweni zonke” ngaphambi kokuba ukuphela kufike. Kamuva, uJesu ovusiwe wagcizelela kubafundi bakhe ukuthi babezokwenza “izizwe zonke abafundi.” Okokugcina, ngaphambi nje kokwenyuka kwakhe, watshela abafundi bakhe: “Nizokwamukeliswa amandla, uMoya oNgcwele esefikile phezu kwenu, nibe-ngofakazi bami eJerusalema, naseJudiya lonke, naseSamariya kuze kube sekugcineni komhlaba.”—Math. 24:3, 14; 28:19; IzE. 1:8.
NgePentekoste lika-33 C.E. kwafika ukuthululwa komoya ongcwele okwakuthenjisiwe, futhi uPetru wanikwa amandla okusebenzisa ‘isihluthulelo sombuso’ sokuqala. Ngenxa yalokho, cishe izi-3 000 zamaJuda namaproselite zaba amaKristu. (Math. 16:18, 19; IzE. 2:1-4, 14-41) Eminyakeni emithathu nesigamu eyalandela, uPetru wasebenzisa “izihluthulelo” ezimbili ezengeziwe, ngakho umsebenzi wokushumayela wawufinyelela abantu bazo zonke izizwe ngokuqinisekile. (IzE. 8:14-17; 10:23-48) Yeka ukuthi kwakuyiqiniso kanjani ukuthi umoya oyingcwele wabanika “amandla” ukuze umoya ofanayo wokushumayela uJesu awubonisa ubuye ubonakale! Indaba yomsebenzi wokushumayela kwalamaKristu okuqala, njengoba itholakala encwadini yeBhayibheli yezEnzo, inikeza ubufakazi obukhanyayo bentshiseko esabekayo. Kumelwe ukuba kwamthokozisa umphostoli uPawulu ukuba akwazi ukuthi, cishe ngo-61 C.E., “ivangeli” seliye “lashunyayelwa kukho konke okudaliweyo ngaphansi kwezulu.”—Kol. 1:23.
INTSHISEKO YOKUSHUMAYELA IVUKA KABUSHA EZIKHATHINI ZANAMUHLA
Nokho, kanye nokuhlubuka okwabikezelwa okuhambisana nokulahlekelwa umoya kaNkulunkulu, leyontshiseko yokushumayela yaphela iminyaka engaphezu kwe-1 700. Esikhundleni sayo, eLobukholwa laphendukela enkembeni yempi, lakha kwamanye amazwe lenza nezinye izindlela eziphambene nemibhalo zokwenza “amakholwa” alo. Ingabe intshiseko yokushumayela kukaKristu nabafundi bakhe beqiniso yayisithé nya unomphela? Akunakuba kanjalo, ngoba uJesu uqobo wayebikezele ukuthi izindaba ezinhle zoMbuso ziyokushunyayelwa kubo bonke abakhileyo ezweni kube ubufakazi kuzo zonke izizwe phakathi nokuba khona kwakhe, okwaqala ngo-1914.
Ngawo-1870 kwaba sobala ukuthi umoya kaNkulunkulu wawunoCharles T. Russell nabafundi beBhayibheli abaqotho ababekanye naye. Ngakho-ke, intshiseko yeqiniso yokushumayela yabuye yaba sobala futhi. Ngokushesha amabandla abaFundi BeBhayibheli avela kulo lonke elaseNyakatho Melika. Ihhovisi legatsha lokuqala leWatch Tower Society ngaphandle kwaseUnited States lamiswa eLondon, eNgilandi, ngo-1900. URussell wathatha uhambo lokuyoshumayela e-Europe, futhi ohambweni lwesibili, ngo-1903, ihhovisi legatsha leNhlangano lamiswa eJalimane. Ngonyaka olandelayo elinye ihhovisi legatsha lamiswa, kulesisikhathi eOstreliya, lapho umsebenzi wokushumayela wawuqale khona onyakeni ongaphambili. Ngo-1911 nango-1912, uRussell nabanye benza uhambo lomhlaba, beshumayela ezindaweni ezinjengeSingapore, ePhilippines, eChina naseJaphani. Ngokuqinisekile, intshiseko yokushumayela eyaboniswa uJesu yayisobala futhi. Nokho, njengakuJesu, intshiseko yabo yokufakaza yavusa ukuphikisa okusobala kukaSathane. Ngakho umsebenzi wokushumayela wawunezinkinga novivinyo.
Ngo-1915 uMzalwane uRussell waveza umbono wokuthi kwakusenomsebenzi omkhulu wokushumayela okwakusafanele wenziwe. Kodwa ngo-1916 waqeda inkambo yakhe yasemhlabeni. Ingabe leliqembu elincane lamaKristu ashushiswayo laliyoqhubeka libonisa intshiseko yokushumayela? Yilokho elakwenza. UJ. F. Rutherford, umongameli wesibili weNhlangano, wakhuthaza ngamandla onke amaKristu (namuhla aziwa ngokuthi oFakazi BakaJehova) ukuba ahlanganyele ngentshiseko emsebenzini wokushumayela. Labo ababekwazi ukuthuthela emazweni angaphandle bamenywa ukuba benze kanjalo, futhi kanjalo amaqembu amancane aya eAfrika, eNdiya, eBurma, eThailand, eChina naseziqhingini eziningi zezilwandle. Ngesikhathi sokugqashuka kweMpi Yezwe II, okungenani isilinganiso esithile somsebenzi wokushumayela sasenziwa emazweni angaphezu kwama-60. Abanye abaya emazweni aqhelile namanje basakhonza kuwo, ngemva kweminyaka engama-40 noma engama-50!
ILUNGISELELO ELISHA LITHUTHUKISA UMSEBENZI WOKUSHUMAYELA KWAMANYE AMAZWE
IMpi Yezwe II yawuvimbela kakhulu umsebenzi wokushumayela owawenziwa kulamazwe amaningi. Ingabe leyompi yayiyoholela eArmagedoni? (IsAm. 16:14, 16) Ingabe umsebenzi wokushumayela owaqaliswa uJesu wawufinyelela isiphelo sawo? Lemibuzo yaxazululwa ukuqondisiswa okukhanyayo kwesAmbulo 17:8, okwanikezwa enkulumweni yeningi ethi “Ukuthula—Ingabe Kuyoba Khona Njalo?” emhlanganweni woFakazi BakaJehova ka-1942. Kulenkulumo oFakazi bafunda ukuthi kwakuzoba khona isikhathi sokuthula emva kwempi. Enalokhu engqondweni, uN. H. Knorr, umongameli wesithathu weWatch Tower Society, nebhodi yabaqondisi beWatch Tower Society, bahlela amacebo okusebenzisa isikhathi sokuthula ababesilindele manje.
Isikole esasiklanyelwe ngokukhethekile ukuqeqesha amaKristu ngenkonzo yokushumayela kwamanye amazwe sahlelwa, ngaphandle kokuqeqeshwa okukhulu kwasemabandleni emsebenzini wokushumayela endaweni yawo. NgoFebruary 1, 1943, ikilasi lokuqala leWatch Tower School of Gilead laqala imfundo yalo. Yeka ukholo okwalumelela! Kwakungekho mazwe lezizithunywa ezazingathunyelwa kuwo. Kodwa, ngethemba lokuthi kwakuzoba nesikhathi sokuthula esasingasetshenziswa, zaqeqeshwa.
Ekugcineni, eziningi zezithunywa zekilasi lokuqala leSikole saseGileyadi zakwazi ukungena emazweni aPhakathi naseNingizimu yeMelika naseziqhingini zaseCaribbean, ukuze zisebenzise ukuqeqeshwa kwazo ukuba zisize abanye. Kulezozinsuku, kwakunezinkinga eziningi okwakufanele zinqotshwe. Ukuthola indawo yokuhlala, ulimi, amasiko, ukudla, ukuphikisa kwabefundisi nezinkolelo eziyize konke kwanezela ebunzimeni lezizithunywa ezintsha ezazibhekene nabo. Kwamaningi alamazwe, kwakuba nomuntu oyedwa noma ababili ababethakazela noma ababekhuthele emsebenzini wokufakaza wamaKristu lapho izithunywa zifika. Naphezu kwazo zonke izithiyo, nokho, eziningi zalezo zithunywa zokuqala zisakhonza kulamazwe. Yeka injabulo ezinayo ngokuthi manje kunoFakazi abangaphezu kwezi-380 000 abakhonza kanye nazo eMelika ePhakathi neNingizimu naseCaribbean!
ISikole saseGileyadi saziqeqesha kanjani lezizithunywa? Esinye isithunywa, esesiye sakhonza iminyaka engama-24 eMpumalanga, sithi: “Njengoba isikhali sethu esiyinhloko emsebenzini wokushumayela kuyiBhayibheli, ukutadisha iBhayibheli ngokulandelanisa izincwadi namavesi, kanye nezifundo zomlando ezihambisana nalo, ezezwe nezalo nendlela ukuphila okwakuyiyo ezikhathini zeBhayibheli, emqondweni wami kwakuyingxenye esemqoka yokuqeqeshwa kwami. Ngokungaphezulu, sasiba nezikhathi zokujwayeza izintshumayelo ukuze silole amakhono ethu okuxoxa nokufundisa abantu. Sasizwa ukuba sibone ukuthi yikuphi ukulungisa okwakudingeka ukuze sijabulele ukuhlala endaweni entsha. Enye into eyangisiza kakhulu kwakuyizinyanga ezinhlanu zokuhlala eGileyadi no‘mkhaya’ omkhulu ovela kuzo zonke izinhlobo zezizinda. Lokho kwangisiza ukuba ngijwayeze ukuhlala no‘mkhaya’ wezithunywa ohlanganisa amalungu avela ezindaweni ezihlukahlukene.” Njengoba iminyaka seyiqhubekile, ihlelo lezifundo eGileyadi liye lahlelwa kabusha ukuze lifaneleke futhi libe ngeliphumelelayo ekusizeni izithunywa ezintsha ukuba ziqeqeshelwe izabelo zazo zakwamanye amazwe.
Khona-ke, ubani ongase afaneleke ukwamukela ukuqeqeshwa okukhetheke kanjalo? Ngokuvamile, izimfuneko ziwukuba labo abenza isicelo babe neminyaka ephakathi kuka-21 no-40 ubudala, bangabi nomthwalo wokondla noma ezinye izibopho eziyobavimbela ekukhonzeni kunoma iyiphi indawo emhlabeni. Bangaba abangashadile, noma okungenani asebeneminyaka emibili beshadile, futhi babe nempilo enhle. Kumelwe babe ababhapathiziwe okungenani eminyakeni emithathu eyedlule, futhi beqhubeka bekhonza okungenani iminyaka emibili ngaphandle kokuphazamiseka njengabamemezeli boMbuso besikhathi esigcwele. Abenza isicelo kumelwe babe nomoya wokushumayela ngempela—kungabi ukushukunyiswa umoya wokufuna ukwazi izindawo, kodwa kunalokho, isifiso sokwenza umsebenzi owabelwe. Lokhu kudinga uthando olujulile ngoJehova uNkulunkulu nangabantu abakanye nabo esabelweni abasinikeziwe. Benaloluhlobo lothando olubashukumisayo bangaba nokweneliseka ngempela esabelweni sabo, ngisho nalapho izinto zixaka futhi sezinzima kunokuba bebezijwayele ngaphambili.—Luka 10:27.
INGABE UNAYO INTSHISEKO YOQOBO YOKUSHUMAYELA?
Ngokusobala, inani elincane kuphela loFakazi BakaJehova elingakhonza njengezithunywa kwamanye amazwe uma kuqhathaniswa. Nokho, zonke izinceku ezizinikezele zikaJehova uNkulunkulu kumelwe zibe nentshiseko efanayo yokushumayela. Kumelwe kuvunywe nokho, ukuthi kufuna umzamo ukuba naleyontshiseko, ngoba kuningi okuphazamisayo.
Ngezinye izikhathi oFakazi abasha ezikoleni eziphakeme babonisa isifiso sokufinyelela umgomo womsebenzi wokushumayela isikhathi esigcwele, ekhaya noma emazweni aphesheya. Kodwa ngesikhathi sebefanelekela inkonzo ekhetheke kanjalo, intshiseko yokuqala isuke isinyamalele. Yini esuke yenzekile? Ingabe basuke bevumele umoya wezwe ubaphambukise? Umoya wezwe ungowokuzitika, ukufuna injabulo nokubalekela umsebenzi onzima nomthwalo wemfanelo. Lomoya uye wahlupha abanye kwaze kwaba sezingeni lokuthi abakutholi ukwaneliseka emsebenzini owenziwe kahle. Kwabaningi ezweni, umsebenzi kumelwe ube “ihlaya,” “uvuse amadlingozi,” noma “okhangayo.” Ngaphandle kwalokho, awubafanele. Ngakho-ke, amaKristu amasha esilisa nawesifazane ikakhulukazi adinga ukuzibuza: Ingabe isilinganiso saloluthando lwempilo ethambile selungingene? Ingabe umoya wezwe—noma yini enye—usuhlambulule intshiseko yami emsebenzini wokushumayela?
Kungakhathaliseki ubudala bakho, futhi ngisho noma ungase ungakwazi ukuhlanganyela emsebenzini wokushumayela isikhathi esigcwele ekhaya noma emazweni aphesheya, kungaba okunenzuzo ukuzihlola ukuze ubone noma unayo yini intshiseko yokushumayela noma qha. Uma unomuzwa wokuthi intshiseko yakho yokushumayela iyasilela ngandlela thile, yini ongayenza?
Mhlawumbe ukuhlola IzE 4 isahluko sesine sezEnzo kuyokusiza ukuba ulungise izindawo ezidinga ukunakekelwa okwengeziwe ukuze ukwazi ukuyilingisa ngokugcwele intshiseko yokushumayela kwamaKristu ekhulu lokuqala. Phawula ukuthi, ngokwevesi le-13, abaphikisi babazi ukuthi abaphostoli babe“kade benoJesu.” Mhlawumbe ukufuna iminako ehlukahlukene yalokhu kuphila iye yakuvimbela ukuba ‘ube noJesu’ ngokufunda iBhayibheli ngezinga lokuthi usuye walahlekelwa intshiseko yakho yokuqala.
IzE 4 Ivesi lama-23 libonisa ukuthi, ngisho nangemva kokubhekana novivinyo, ngokushesha ngangokunokwenzeka abaphostoli bahlangana futhi namakholwa akanye nabo ukuze bakhuthazane ngokomoya futhi bakhe intshiseko yomunye nomunye. Ngokuphambene, uma umuntu evumela ukuzijabulisa neminye imisebenzi engemibi ngokwayo ukuba imvimbele ekuhlanganyeleni njalo namaKristu akanye nawo, kancane kancane uyolahlekelwa intshiseko yeqiniso yokushumayela. Umthandazo omuhle olotshwe IzE 4 emavesini 23 kuya ku-30 unikeza ukuqondisa okwengeziwe kulabo abafuna intshiseko eyengeziwe. Phawula indlela abafundi bakaJesu abathandazela ngayo isibindi ekukhulumeni. Ingabe ufuna amandla omoya kaNkulunkulu ukuba akusize ekukhuliseni intshiseko yakho ngobuqotho njengoba kwenza lawomakholwa kulowomthandazo? Uma kunjalo, khona ungalindela imiphumela efanayo nelotshwe IzE 4 evesini lama-31. UJehova waphendula umthandazo wabo, bagcwaliswa ngomoya oyingcwele futhi “bakhuluma izwi likaNkulunkulu ngesibindi.”
UJesu wathi “ivangeli” liyoshunyayelwa kubo bonke abakhileyo emhlabeni kube ubufakazi. Ekwenzeni lowomsebenzi oyilungelo amanye amaKristu abonisa intshiseko yezithunywa ensimini yakubo, amanye kweyakwamanye amazwe. Ngenkuthalo, ‘bakhuluma izwi likaNkulunkulu ngesibindi.’
Ngomusa kaJehova ongafanelekanga, isigijimi soMbuso manje siyezwakala emazweni angaphezu kwama-200, uma kuqhathaniswa nangama-54 lapho iSikole saseGileyadi simiswa. Ukuphila kwesithunywa kunjani? Kuhlangatshezwana kanjani nezidingo zabo ezibonakalayo? Zizisingathi kanjani izinkinga zolimi? Uma ucabangela inkonzo yokushumayela kwamanye amazwe, indaba elandelayo ingeqinisekisa kakhulu.