Usuku Ekuphileni Kwesithunywa

“BEKUYINSIMBI ka-6:30 leyo?”

“Mhlawumbe bekuyinsimbi ka-6:55 futhi sesisalelwe imizuzu emihlanu kuphela ukuba sibe setafuleni lebhulakufesi. Cha, ungatatazeli, kusewu-6:30. Isikhathi sisesiningi.”

Lena ingxoxo engokoqobo ekuseni phakathi kwami nengihlala naye endlini. Sisathola u-6:30 eyihora elikahle lokuvuka, ngisho nakuba sesikwenze iminyaka eminingi. NjengoFakazi BakaJehova abahlala ekhaya lezithunywa lapha eTaipei, eTaiwan, sihlangana nezinye izithunywa ezikanye nathi engxoxweni engokomoya ngaphambi kokudla kwasekuseni ngehora lesikhombisa ezimpondweni.

Amalungu ahlukahlukene “omkhaya” wethu ayashintshana ekunakekeleni imisebenzi enjengokupheka, ukuyothenga, ukuhlanza indlu neminye. Lokhu kuhlanganisa nokushaya lezozinsimbi ezisisiza ukuba silungele ukudla neminye imisebenzi.

INJONGO YETHU NJENGEZITHUNYWA

Uma uzwa igama elithi “isithunywa,” ungase ucabange umhlengikazi oshaye ezimhlophe, noma uthisha efundisa ikilasi labantwana emzini othile okude. Kodwa akuwona lowomsebenzi uJesu awunikeza abalandeli bakhe. Wabayala ukuba benze abafundi. (Math. 28:19, 20) Ngakho, njengoba kunjalo ngoFakazi BakaJehova yonke indawo, umsebenzi wethu oyinhloko ungowokufundisa abantu amaqiniso eBhayibheli kulesisabelo sethu sokuthunywa kwamanye amazwe.

Njengezithunywa, sisebenza amahora angengaphansi kuka-140 inyanga ngayinye emsebenzini wokushumayela nokufundisa. Ukuze sithole abafuna ukuzwa okwengeziwe ngeZwi likaNkulunkulu, sisebenzisa cishe ingxenye yalesosikhathi ekuhambeni indlu ngendlu, sibe nezingxoxo zeBhayibheli nabantu emakhaya abo. Sibuye sisebenzise isikhathi esisele ekuphindeleni kulabo ngaphambili ababonise isithakazelo esigijimini soMbuso, siqhube izifundo zeBhayibheli zasemakhaya mahhala nabantu ngabanye nemikhaya efisa ukufunda okwengeziwe. Ngokulandela indlela ehlelekile yesifundo esetshenziswa oFakazi BakaJehova kulolonke izwe, sithola kunokwenzeka ukusiza amaBuddha nabanye, okungenzeka babengazi lutho ngaphambili ngeBhayibheli, ukuba bafunde izimfundiso zalo eziyisisekelo. Lokhu kungase kuthathe izinyanga eziyisithupha kuya onyakeni, kodwa ekutholeni lokhu kuqonda, abantu basesimweni esingcono sokunquma noma bayothanda ukuba amaKristu angofakazi bakaJehova noma qha.

ISIMISO SETHU SANSUKU ZONKE

Ukuphila kwethu kugxile ezintweni ezingokomoya. Lokho kuhlanganisa ingxoxo yethu engokomBhalo ekuseni kakhulu eba ngesiShayina Mandarin, ulimi olungokomthetho lwaseTaiwan. Lezizingxoxo ziqalisa usuku lwethu ngesiqalo esiphaphamisayo nesiqinisa ukholo. Ngezinye izikhathi kuba namahlaya, njengalapho esinye isithunywa esasisisha sikhungathekiswa ukuhleka kwabanye lapho sikhulumela itekisi elithile leBhayibheli. Sasingaboni lutho oluhlekisayo ekukhulumeleni kwaso ukuthi uJesu uwumPristi wethu Omkhulu. Cishe, yilokho esasicabanga ukuthi sikushilo. Ngeshwa, iphutha elincane lashintsha inkulumo yaso yathi uJesu uyitshwele lethu elikhulu!

Ngemuva kokudla kwasekuseni, imizuzu eyi-15 isetshenziselwa ekuzijwayezeni ukusebenzisa amagama athile amasha noma izaga zesiShayina. Sizama ukubamba angama-20 isonto ngalinye. Abhalwa ebhodini, futhi njalo ekuseni, udade ongumShayina ohlala ekhaya lethu uzama ngenkuthalo ukuqondisa ulimi lwethu. Siyalwazisa usizo lwakhe ekuthuthukiseni isakhiwo semisho yethu nokuphimisela (okuhlanganisa iphimbo lesiShayina), ngoba imizamo yakhe isisiza ukuba sibe ngabaphumelela kakhulu ekufundiseni iZwi likaNkulunkulu.

Sibe sesihlukana ngomthandazo bese silungiselela umsebenzi wethu wosuku. Iningi lethu lisebenza amahora amabili kuya kwamathathu ekuseni ekuhambeleni abantu endlini ngendlu ensimini yethu esiyabelwe. Yebo, izithunywa ezingambili zinengxenye emzini okumelwe zigxilise imizamo yazo kuyo. Sizama ukuhlanganisa abantu abathakazelayo futhi kancane kancane bakhe iqembu labadumisi bakaJehova elingase ekugcineni libe umnyombo webandla elisha loFakazi BakaJehova.

Umsebenzi wokufakaza lapha uqhubeka njengakunoma iyiphi enye indawo emhlabeni. Nokho, kunomehluko othile. Omunye umehluko indlela esifinyelela ngayo ensimini. Ngisakhumbula kahle ukuthi enye yezinto zokuqala engayiphawula eMpumalanga ukuthi inabantu abaningi, isiminyaminya sabantu. Mina nomngane wami sihamba ngamabhasi ukuya nokubuya ensimini. Maningi kodwa agcwala ngazo zonke izikhathi. Ngesikhathi sokuphuthuzela, lokhu kudinga ukubone ukuze ukukholelwe! Manje sesinekhono lokungena nokuphuma ngesibhudubhudu ebhasini. Nokho, singakejwayelani nalokhu kwakuvamise ukuba izikhwama zethu zezincwadi zisale ngemuva eminyango yamabhasi siphume sinkonkoshele izibambo! Izithunywa ezimbalwa kakhulu ezakhetha ukusebenzisa izithuthuthu noma izikuta, njengoba kuyizinto ezikahle zokuhamba futhi ezongayo.

Njengoba kunjalo engxenyeni enkulu yomhlaba kulezinsuku, abantu baya bengabathembi neze abanye. Kodwa ubungane obungokwemvelo bamaShayina busaboniswa ngokuvamile uma siya emizini yabo. Sisakuthola kuyinto evamile ukuba singeniswe endlini futhi sinikwe okokuhlala, ngisho netiye noma amanzi ashisa ngendlela yokuba kudingeke selule ingxoxo yethu kuze kube ilapho esephole ngokwanele ukuba siwaphuze! ETaiwan kungokuvamile ukuba abantu ngisho noma benesithakazelo esincane eBhayibhelini bazithathe izincwadi zethu. Ngakho-ke, siyakwazi ukushiya izincwadi eziningi emakhaya, futhi lezizincwadi zingase zifundwe ngisho nangabantu abanesithakazelo esikhulu esingaphezulu ngisho kwesalabo ababesilalele ekuqaleni.

Uma sesenza izimpindelo kubantu, sithola ukuthi abaningi, kuhlanganise nabenkolo kaBuddha noma abanye abalandela inkolelo kaConfucius, bayathanda ukuba nezinye izingxoxo ezengeziwe futhi bavume ngisho nezifundo zeBhayibheli zamasonto onke. Ngakho kungokuvamile ukuqhuba eziyi-10 noma ngaphezulu isonto ngalinye, kuye ngesikhathi enginaso kulomsebenzi. Abaningi balabantu baba khona emihlanganweni yethu zisuka nje, kangangokuthi abantu abangama-20% kuya kuma-50% baba khona ngaphezu koFakazi abakulendawo.

ILUNGISELELO ELANELE

Njengezithunywa, sinakekelwa kahle kakhulu. IWatch Tower Society iyaqaphela ukuthi izithunywa ezihlala ezweni okungelona elakubo azikwazi ukuzinakekela kalula njengoba bezingase zikwazi emazweni akubo. Eqinisweni, emazweni amaningi, ohulumeni bavumelana ngokuthi izithunywa azinakuwenza umsebenzi wokuziphilisa. Ngakho-ke, amalungiselelo ayenziwa ngokwezidingo zezinto ezibonakalayo. Asitholi holo, kodwa iNhlangano ithelela izindlu noma ithenge ikhaya elilingene iqembu lezithunywa ezisebenza emzini othile. Ezimweni eziningi eTaiwan, lokhu kusho ukuthi phakathi kwabantu abane kuya kwabayisishagalombili bayohlala ekhaya lezithunywa. Nokho, njengoba mina nomngane wami sihlala ekhaya lezithunywa futhi elisebenza njengehhovisi legatsha leNhlangano, sinabantu abafinyelela kwabayi-18 abahlala lapha.

Kunemali elinganiselweyo ukuze izithunywa zikwazi ukuthenga ukudla futhi zikhokhe intela yezindlu, izinto esizisebenzisayo, njalo njalo. Ngokungaphezulu, sithola imadlana yethu siqu ukuze sithenge izinto esizidingayo ekuphileni kwethu kwansuku zonke. ETaiwan lemali ingase ilinganiswe noR9,60 (S.A.) ngenyanga. Sithola nemali yokuhlangabezana nezindleko zokugibela, futhi iNhlangano ilungiselela imali elingene yezindleko zomuntu siqu ukuze sikwazi ukuthenga okokugqoka okudingekayo, sikhokhele uhambo lwasemihlanganweni nokunye okunjalo. Ngakho sibonga kakhulu ngokuthi akudingeki sikhathazeke ngezinto ezibonakalayo kodwa singanikela isikhathi sethu futhi sinakekele ngokugcwele ukufeza umgomo wethu njengezithunywa.

Ngokwazi ukuthi onke lamalungiselelo enziwa abe nokwenzeka ngeminikelo yothando yamakholwa akanye nathi angenakukwazi ukuhlanganyela ngokuqondile enkonzweni yokushumayela kwamanye amazwe, sifisa ukubonisa ukubonga kwethu ngezindlela ezimbili eziyisisekelo. Eyokuqala, sizama ukwenza inkonzo yethu yobuthunywa ibe ngephumelela ngangokunokwenzeka. Eyesibili, sibheka imali njengempahla yeNkosi futhi kanjalo sizama ukuyisebenzisa ngokuhlakanipha. Usuku lokupheka lusinikeza ithuba lokwenza lokho kanye.

USUKU LOKUPHEKA

Kunezabelo zomuntu ngamunye ukuba alungiselele ukudla ngosuku oluthile—usuku lokupheka, njengoba silubiza kanjalo.

Ngemva kokuqeda ukudla kwasekuseni sahlanza nezitsha, siya emakethe. Ekuseni, izimakethe ezimbili eziseduze nekhaya lethu zinezilimo eziningi ezisencwaba ngokumangalisayo, inyama, inhlanzi, nezithelo. Abathengisi bamaShayina bayakuthanda ukuthengisa ngendali, futhi lokhu kuyajabulisa, ngoba imali iyongeka. Siye saba amachule okwazi ukuthi yini okumelwe siyikhokhele nasekuthengeni izinto ngezikhathi zonyaka, ukuze sisebenzise ngokuhlakanipha ingxenye yemali yesikhwama sekhaya esinikezwe yona ukuba siyisebenzise ngosuku lokupheka.

Siye sathola izilimo eziningi nezithelo esingakaze sizibone ngaphambili. Ngokuqondakalayo, sasingabaza ukuzithenga ngoba singazi ukuthi ziphekwa kanjani. Kodwa, ungesabi. Lapho sibuza umthengisi wakujabulela ukusitshela indlela yena azipheka ngayo. Kanjalo siye sajabulela imifino emisha enjengamakhasi kabhatata nesiqu esincane esiluhlaza esicije kathathu sase siba nomqumbe omncane phezulu futhi esinephunga elithi alifane neleshaladi lenyoka. Ngokufunda ukusebenzisa ukudla kwasendaweni, sidla kahle futhi singahlaphazi noma iliphi ilungiselelo leNkosi.

Ngezinkukhu eziphilayo, izinhlanzi eziphilayo, nenyama yengulube neyenkomo esanda kuhlatshwa nemifino eseluhlaza ematafuleni, umoya nephunga elimnandi lasemakethe kwehlukile kwesikujwayele kwamanye amazwe. Ngokwesibonelo, kwadinga ukuzibamba okukhulu kimi ukuba ngingabhangalasi lapho ngiqala ngqa ukubona umthengisi ethatha ummese enquma intamo yenkukhu ngokunganaki eyayikhethwe umthengi!

Ngaphandle kwemakethe, kungokuvamile ukubona imigwaqo nezindlela eziyimihume zigcwaliswe ukukhangisa ngezingubo, izindwangu nezinto zokuhlobisa ezidayiswayo. Uma sifuna ukuba singathathwa ilezizinto, sithenga masinyane bese sibuyela ekhaya ukuze siqale ukulungiselela ukudla kwasemini, lokho ekhaya lethu okungokubaluleke kakhulu osukwini. Umuntu uyaziphakela ekudleni kwakusihlwa, njengoba lokhu kwenza kube lula esimisweni sabo bonke abaqhuba izifundo zeBhayibheli ntambama nakusihlwa. Lokhu kusinikeza isikhathi ezinsukwini zethu zokupheka ukuba senze umsebenzi wasendlini nokuziwashela nokulungiselela umsebenzi wethu phakathi nezinsuku eziyisikhombisa ezilandelayo.

UMOYA WOMKHAYA WEQINISO

Ngisho nakuba umkhaya wethu umkhulu kuneminingi imikhaya yezithunywa eTaiwan, sinomoya womkhaya. Ngokwesibonelo, sinesifundo somkhaya wethu siqu ngoMsombuluko ebusuku. Sisebenzisa ihora lokuqala sitadisha iBhayibheli ngosizo lweNqabayokulinda. Bese sitadisha ingxenye yencwadi enkulu yamuva yeNhlangano ukuze kuthi noma singenazo ezinye zalezincwadi ngesiShayina, sikwazi ukuqhubeka njalo nokwaziswa kwamuva. Ngesikhathi sokudla kwasekuseni sifunda okuhlangenwe nakho nemibiko evela kuYearbook of Jehovah’s Witnesses nokwaziswa okukuNkonzo Yethu YoMbuso (yesiShayina) esiyoyicabangela emhlanganweni webandla kulelosonto. Ngezinye izikhathi, siba nokuhlangana nje noma kuphikiniki njengeqembu. Konke lokhu kusenza sifane kakhulu nomkhaya.

INGABE KUNENZUZO?

Abanye abafundi bangase babe nomuzwa wokuthi ukuzikhandla ufunda ulimi olusha kuyokwenza ukuphila kwesithunywa kube umthwalo osindayo kunokuba kube okunenzuzo. Kodwa angizizwa ngaleyondlela, ngisho nakuba ukufunda isiShayina kwakungelula kimi. Ngokwesibonelo, ukwazi ukuthi kunesidingo esikhulu sokumemezela “izindaba ezinhle” ensimini yethu kungishukumisa njalo. Phela, ngisho nakuba inani loFakazi eTaipei seliphindwe kathathu esikhathini ngilapha, asikwazi ukuhlanganisa insimu yethu ngisho kanye ngonyaka! Ngezikhathi eziningi, abalambele ukulunga bayakubona ukuzwakala kweqiniso, ngisho nanxa likhulunywa isithunywa esingalwazi kahle ulimi. Cabangela lokhu okuhlangenwe nakho, okwajatshulelwa ngomunye oyisithunywa kanye nami eminyakeni emibalwa edlule.

Wayenezinyanga ezintathu kuphela eseTaiwan futhi wayesafunda isiShayina lapho ehlangana nomfundi osemusha waseyunivesithi ongowomkhaya wamaBuddha. Ukuphila kwalentombazane kwakugcwaliswe okuhlangenwe nakho okuningi okudabukisayo, kuhlanganise nokufa kwamalungu amabili omkhaya. Yayikade isemasontweni athile eLobukholwa ngomzamo wokuthola ukududuzeka kodwa ngaphandle kwempumelelo, futhi yangabaza ukuthi lesithunywa esisha sasingayisiza.

Kusukela ekuqaleni, lowesifazane osemusha wahlatshwa umxhwele indlela isithunywa, naphezu kokungalwazi kahle ulimi, esakwazi ngayo ukuphendula ngeBhayibheli imibuzo yakhe. Ngokushesha waqala ukuba khona emihlanganweni futhi wathuthuka ngokushesha. Ngemva kwezinyanga eziyisishagalolunye zesifundo seBhayibheli, wajabula ngokuba ufakazi kaJehova ozinikezele nobhapathiziwe. Eminyakeni eminingi lowesifazane wakhonza zonke izinyanga njengephayona elisizayo, enikela amahora angama-60 ngenyanga emsebenzini wokushumayela ngoMbuso, nakuba eqashwe njengothisha wesikole isikhathi esigcwele. Manje usewuyekile umsebenzi waba ilungu lomkhaya waseBethel yaseTaipei. Kuningi okuhlangenwe nakho okufanayo okungalandiswa ukubonisa ukuthi ngempela kunenzuzo ukuba isithunywa ensimini yakwelinye izwe.

Wonke umuntu onenhliziyo eqotho uyakujabulela ukuhlanganyela izinto ezinhle nabanye, futhi yilokho okushukumisa oFakazi BakaJehova ukuba babe abashiseka kanjalo emsebenzini wabo wokushumayela nokufundisa kwabo, kungakhathaliseki ukuthi bazithola bekuphi. Kodwa ngilazisa ngokujulile ilungelo lokukhonza emazweni lapho izigidi zingakaze zilibone iBhayibheli. Yeka injabulo okuyiyo ukusiza abanye ukuba beze ekwazini ithemba elimangalisayo elibekwe eZwini likaNkulunkulu! Nakuba thina zithunywa singalitholi iholo, sinomvuzo omkhulu. Lokho kuhlanganisa ubuhlobo bethu nabaningi eMpumalanga, ngenxa yomsebenzi wenkuthalo wezithunywa ezivela kwamanye amazwe, abaye baphenduka ekukhulekeleni izithombe okuyize beza kokukaNkulunkulu ophilayo uJehova. Nathi ngokwethu siye sabona izibusiso ezinkulu ezingumphumela wokwethembela ngokuphelele kuJehova nasenhlanganweni yakhe ebonakalayo lapho umuntu ekulungele ukusetshenziswa enkonzweni yobuthunywa kwamanye amazwe.

Ngakho, ngokuqinisekile, ngisho nakuba mina nomngane wami engihlala naye endlini singebona abathanda ukuvuka ekuseni kakhulu, siyajabula ngokuthi othile usishayela insimbi njalo ekuseni ngo-6:30. Lokho kusinikeza isiqalo esikahle sosuku esaziyo ukuthi luyogcwaliswa umsebenzi wokushumayela othakazelisayo nonenzuzo.

[Isithombe ekhasini 14]

Isifundo sasekuseni kakhulu solimi sisetshenziswa kamuva enkonzweni yoMbuso