Isifundo 21

Indaba Efundisayo, Inikezwe Ngokukhanyayo

1-3. Kungani kudingeka indaba eqondene-ngqo ukwenza inkulumo yomuntu ifundise na?

¹ Izinkulumo ezinosizo ziqala ngokulungiselela ngokukhuthala, nalokho kubizela isikhathi nomzamo. Kepha yeka indlela okunomvuzo ngayo! Wandisa umtapho wakho wolwazi olushaya emhloleni futhi unokuthile okunosizo ngempela kokuhlanganyelwa nezilaleli zakho. Kunokukhuluma okuyize, unemininingwane ekhanyisayo yokunikezwa, futhi uyazi ukuthi lokho okushoyo kuyiqiniso. Lokhu kwakha ukwazisa kwezilaleli iZwi likaNkulunkulu, nakanjalo kudumise uJehova. Ukucabangela kwethu indaba efundisayo kuhilela ikakhulu lokho okushoyo enkulumweni yakho. Cabangela kafushane imibono eyahlukahlukene yendaba. Yiphuzu lokuqala epheshaneni Leseluleko Senkulumo.

² Indaba eqondene-ngqo. Inkulumo ethinta okuyize ayinasithunzi namandla. Ayizwakali. Ishiya izilaleli zingabaza. Uma imiqondo imelwe ikhunjulwe imelwe iqondane-ngqo, ishaye emhloleni. Lokhu kunikeza ubufakazi bokucwaninga nolwazi lwendaba.

³ Lemfanelo ingatholwa ekulungiseleleni ngokubuza, Kungani? Nini? Kuphi? njalonjalo. Ngokuvamile akwanele ukuthi okuthile kwenzeka. Nikela amagama ezindawo, izinsuku, mhlawumbe nezizathu. Akwanele ukusho amaqiniso athile. Bonisa ukuthi kungani eyiqiniso; bonisa ukuthi kungani enosizo ukwaziwa. Uma uyala, chaza indlela yokwenziwa kwento. Ukuthi ngokungakanani ukuthuthukiswa kwaloluhlobo okudingekayo kuyonqunywa wukuthi izilaleli sezazi okungakanani. Njalo cabangela izilaleli ukunquma ukuthi yimiphi imininingwane engahle idingeke.

4-6. Ukuze inkulumo yakho ifundise ezithile izilaleli zakho, yiziphi izisusa omelwe uzikhumbule na?

⁴ Ifundisa ezilalelini zakho. Lokho obekungahle kufundise ezinye izilaleli bekungahle kungengezi-lwazi kwelinye iqembu, noma bekungahle kulishiye ngisho ebumnyameni bhuqe. Kusobala-ke, indaba imelwe ifanele izilaleli ezithile. Ngokwesibonelo, enkulumweni yendlela umsebenzi wethu owenziwa ngayo, indaba ibingaphathwa ngokwahlukile ngempela emhlanganweni womsebenzi kunasekuxoxeni nomuntu ozilungiselela ukuzinikezela kuJehova, noma enkulumweni yeqembu lezwe.

⁵ Lezizisusa zimelwe zicatshangelwe nasezabelweni ezahlukahlukene Esikolweni Senkonzo esingokwaseZulwini. Indaba enikelwe kunoma iyiphi inkulumo eyabelwe ifanele icatshangelwe ngokwezilaleli, ukuhlelwa nenjongo yenkulumo. Lezizisusa ziyonqunywa wuhlobo lwenkulumo nokuhlelwa isikhulumi esikulungiselele. Phela, inkulumo yokuyala kuyokuba-yinkulumo ebandleni. Ezinye izinkulumo zingahle zahlukahluke, izilaleli nenjongo kuphawulwa wukuhlelwa. Kukho konke, umfundi nomeluleki bangazibuza, Ingabe indaba ifaneliswe izilaleli ezithile ezihileleke ekunikeleni na? Ingabe izilaleli ziyofundiswa futhi ziyaleke ngayo na?

⁶ Ekulungiseleleni zibuze, Yini engifuna ukuyifeza kulenkulumo na? Kungakanani kulokho engifuna ukukusho osekwaziwa yilomuntu noma iqembu na? Yisiphi isisekelo engimelwe ngisibeke ngaphambi kokuthi lamaphuzu akhanyiswe na? Bengingakusho kanjani ngokwahlukile eqenjini elahluke ngokuphelele na? Ukuqhathanisa kuvame ukukhanyisa imibono yethu. Zama izindlela ezahlukene zokusondela emaqenjini ahlukahlukene ekulungiseleleni kwakho ukuthola nje umcabango womahluko ekucabangeleni izilaleli nokwenza indaba ifundise ezilalelini ezithile oyokhuluma nazo.

7, 8. Izinkulumo zethu singazenza kanjani zibe-ngezisizayo na?

⁷ Indaba inosizo lwangempela. Kuningi okumelwe kufundwe, kepha akukhona konke okusizayo. Kithina, indaba efundisayo iphethe lezozinto esidinga ukuzazela ukuphila kobuKristu, inkonzo yethu. Sifuna ukwazi indlela esingasebenzisa ngayo lendaba esiyitholile.

⁸ Umfundi, ekulungiseleleni, nombonisi wesikole, ekwelulekeni, abengahle acabangele leliphuzu ngokubuza: Yiziphi izimiso eziqondisayo ezinokufunyanwa enkulumweni na? Indaba ibingasetshenziswa ekwenzeni izinqumo na? Indaba enikeziwe ingafaneliswa inkonzo yasensimini na? Iyalidumisa iZwi likaNkulunkulu futhi ikhombe enjongweni yakhe na? Zimbalwa izinkulumo ezinganikeza yonke lendaba, kepha ukuba-ngesizayo, indaba enikeziwe ifanele ibe-nokusetshenziswa ngandlela-thize yizilaleli.

9-11. Kungani ukushaya emhloleni kwenkulumo kubaluleke kangaka na?

⁹ Ukushaya emhloleni kwenkulumo. Ofakazi bakaJehova bayinhlangano yeqiniso. Sifanele sithande ukukhuluma iqiniso nokuba-ngabashaya emhloleni kuyo yonke imininingwane ngazo zonke izikhathi. Lokhu kufanele kube-njalo hayi maqondana nemfundiso kuphela kepha nakwesikucaphunayo, lokho esikusho ngabanye noma indlela esibamelela ngayo, nasezindabeni ezihilela izisusa zezindaba zesayensi noma izehlakalo zamaphephandaba.

¹⁰ Izinkulumo ezedukile ezinikezwe ezilalelini zingahle ziphindwe nephutha likhuliswe. Amaphutha abonwa yizilaleli aphakamisa ukungabaza ngobufakazi besikhulumi kwamanye amaphuzu, mhlawumbe engabazisa ngisho iqiniso lesigijimi uqobo lwaso. Umuntu othakazela kabusha ezwa izinkulumo ezinjalo, futhi ezwe umbono owahlukile ushiwo ngesinye isikhathi, abengahle anqume ukuthi kukhona ukwahlukana komcabango phakathi kofakazi bakaJehova futhi ayeke ukuhlanganyela ngaphandle ngisho kokuveza isizathu sakhe.

¹¹ Umeluleki akafanele asole zonke izinkulumo ezishiwo ngumfundi, ikakhulu osemusha eqinisweni nangalokho engakagxili ngokuphelele ezintweni ezijulile zeZwi likaNkulunkulu. Kodwa, ngamasu okungacunuli-muntu uyokwakha ukucabanga komfundi futhi ambonise indlela yokuthuthukisa ukushaya kwakhe emhloleni ngokulungiselela ngokunakekela ngaphambili.

12, 13. Luyini usizo lwendaba eyenezelwe ekhanyisayo na?

¹² Indaba eyenezelwe ekhanyisayo. Imicabango enikezwe ngenxa yokuzindla noma engahle ikhothozwe kokunye ukucwaninga ngendaba inganikela kakhulu enkulumweni nangezinye izikhathi ingaxwayisa ukuphindaphinda okungafundisiyo kwendaba eseyaziwa yizilaleli. Yengeza ubusha ekunikeleni, ivuse isithakazelo sezilaleli, futhi ingenza indaba eyaziwa kakhulu ijabulise ngempela. Futhi, inikeze isikhulumi isibindi. Sisondela enkulumweni yaso ngokushiseka okuvela ekwazini ukuthi sinokuthile kokunikezwa okuthe ukwahluka nje.

¹³ Ingozi emelwe ixwaywe ukuzicabangela komuntu. Izincwadi zeSociety zifanele zisetshenziswe futhi kwencikwe kuzo. Hlolisisa amaIndex eSociety, nezenezelo zangezansi zemibhalo. Qiniseka ukuthi lokho okushoyo kuyakhanyisa, akuhlanekezeli.

**********

14-16. Yini emelwe yenziwe ekulungiseleleni inkulumo ukuze kushiwo izinto kalula na?

¹⁴ Ekulungiseleleni indaba yakho kubalulekile nokuqaphelisisa indlela oyokusho ngayo lokho omelwe ukusho. Lokhu yilokho ipheshana Leseluleko Senkulumo elibhekisela kukho njengokuthi “Iyakhanya, iyaqondakala.” Ukwehluleka ukuqaphela lokhu ngokwanele kungakuvimbela ungafinyeleli ezilalelini zakho, noma kungahle kuzivimbele ekubambeni lokho ezikuzwayo. Kukhona imibono emithathu eyinhloko yalendaba yokucatshangelwa.

¹⁵ Ishiwo kalula. Lokhu akusho ukuthi imishwana idinga ukucatshangwa ngaphambili. Kepha imiqondo emelwe inikezwe imelwe ihlaziywe nezithile izisusa zangempela zicatshangelwe. Lokhu kuyophumela ngokuvamile enkulumweni ehlangene nasekuvezweni komcabango okulula, ikhulunywa ngolimi olukhanyayo. Indaba elukhuni engqondweni yesikhulumi iyoba-lukhuni ekunikeleni.

¹⁶ Ukulungiselela phezulu kumelwe kuxwaywe. Elinye nelinye iphuzu lenkulumo limelwe licatshangelwe kuso sonke isikhathi lize libe-lula futhi lisikhanyele isikhulumi. Ukubukezwa kwalamaphuzu ekulungiseleleni ukunikela kuyowalola engqondweni yaso kangangoba ayovela masinyane lapho edingeka futhi ayokhanya kakhulu ezilalelini njengasesikhulumini.

17, 18. Kungani amazwi angejwayelekile kumelwe achazwe na?

¹⁷ Amazwi angejwayelekile achaziwe. Ukufunda kwethu iMibhalo nezincwadi zeWatch Tower Society kusinike amazwi enkulumo angaziwa ngempela yilabo abangawazi umsebenzi wethu. Uma besimelwe sichaze amaqiniso eBhayibheli kwezinye izilaleli, sisebenzisa amazwi anjengalawa, okuningi kwalokho esikushoyo bekungalahleka noma inkulumo yethu ibiyokuba-ngengezwakali ngempela.

¹⁸ Cabangela izilaleli zakho. Ziqonda kangakanani na? Zazi kangakanani ngomsebenzi wethu na? Zingaki zalezizinkuiumo eziyoqondakala masinyane kuzo njengasesikhulumini na? Amazwi anjengo“mbuso wasezulwini,” “insali,” “ezinye izimvu,” ngisho i“Armagedoni” no“Mbuso,” anganikela umcabango owahlukile engqondweni yesilaleli noma angasho-lutho. Ngisho amazwi anjengo“mphefumulo,“ “isihogo” no“kungafi” adinga ukukhanyiswa uma isilaleli singawazi umsebenzi wethu. Kepha uma inkulumo inikezwa ebandleni, amazwi anjengalawa awadingi ukuchazwa. Njalo ukuhlelwa kufanele kucatshangelwe.

19, 20. Singakuxwaya kanjani ukuba-nendaba eningi ngokweqile na?

¹⁹ Indaba engeningi ngokweqile. Inkulumo ingahle ibe-nendaba eningi kangangoba ubuningi bendaba buzidide izilaleli nokuqondakala kuthuntubezwe noma kungabikho ngokuphelele. Ukufeza injongo yenkulumo, akufanele kungeniswe indaba engaphezu kwengathuthukiswa ngokukhanyayo ngesikhathi esabelwe. Akufanele kushiwo engaphezu kwengangeniswa kahle yizilaleli. Futhi, indaba enikezwa isihambi noma umuntu othakazela kabusha bekuyodingeka ukuthi yenziwe-lula kakhudlwana njengoba iqhathaniswa nendaba enesihloko esifanayo lapho inikezwa ebandleni. Nalapha, umeluleki umelwe acabangele izilaleli isikhulumi esikhuluma nazo.

²⁰ Umfundi uyokwazi kanjani ukuthi ngengakanani indaba amelwe ayifake enkulumweni yakhe na? Ukuqhathanisa kuyosiza ekulungiseleleni. Hlaziya lokho omelwe ukukunikeza. Mangaki alamaphuzu ayokwaziwa kakade yizilaleli, okungenani ngengxenye na? Mangaki ayokuba-masha ngokuphelele na? Lapho sisikhulu kakhulu isisekelo solwazi oselukhona, yilapho okuningi kungakhelwa phezu kwaso ngesikhathi esabelwe. Kepha uma kungekho-lutho ngempela olwaziwayo ngesihloko okumelwe kuxoxwe ngaso, ngakho-ke kumelwe kunakekelwe kakhulu ukuthi ngokungakanani okuyokushiwo nokuthi kuyothatha isikhathi esingakanani ukuchaza lamaphuzu izilaleli ziqonde ngokupheleleyo.