Isifundo 20
Iseluleko Siyakha
1, 2. Kungani sifuna iseluleko, futhi sisamukela kanjani na?
1 Abakhulekeli bakaNkulunkulu weqiniso ngaso sonke isikhathi bathemba yena ngokunganqikaziyo ngokuqondiswa kuzo zonke izindlela zabo. Ngokwethemba omunye wabahubi beBhayibheli waloba: “Uyakungihola ngesiluleko sakho.” (IHu. 73:24) NoJeremiya wasebenzisa lamazwi emkhulekweni oqinisekile: “Akukho-lutho olukwahlulayo . . . Nkulunkulu [weqiniso] omkhulu oyiqhawe, uJehova-Sebawoti, omkhulu emaswini, onamandla ezenzweni.”—Jer. 32:17-19.
2 Kubakhulekeli bakhe bobuKristu namuhla iseluleko sikaJehova sifika ngeZwi lakhe elilotshiwe nangenhlangano yezinceku zakhe zoqobo. Njalo labo ababhalisa Esikolweni Senkonzo esingokwaseZulwini babona masinyane ukuthi iseluleko abasitholayo nomoya esinikelwa ngawo kuphethwe yizimiso ezinhle zeBhayibheli.
3-5. Chaza indlela ipheshana Leseluleko Senkulumo nendaba eseziFundweni kusuka kwesama-21 kuya kwesama-37 okucetshelwe ngayo ukusetshenziswa ndawonye.
3 Iseluleko esithuthukayo. Njengosizo kokubili kubafundi nakumbonisi wesikole, kulungiselelwa ipheshana Leseluleko Senkulumo. Lifaka ohidini amaphuzu angamashumi amathathu nesithupha ayosiza abafundi ukuba bathuthukise amakhono abo okwethula iqiniso ngokuphumelelayo. Indaba enosizo kwelinye nelinye iphuzu iyofunyanwa ngesimo esifingqiwe Ezifundweni kusukela kwesama-21 kuya kwesama-37 salencwadi, isifundo esiqondene-ngqo sikhonjwa yinamba esepheshaneni Leseluleko Senkulumo. Lezizifundo zilungiselelwa impela ukusetshenziswa nepheshana leseluleko. Ngezikhathi eziningi izimfanelo ezimbili noma ezintathu ezihlangene kakhulu zihlanganiswa zibe-Yisifundo esisodwa, ngomqondo wokuthi bekuyokuba-kuhle ukuzinakekela kanye-kanye.
4 Bekuyobasiza labo abasand’ ukubhalisa esikolweni ukulungiselela kahle, bekhumbula amaphuzu abhalwe ohidini epheshaneni Leseluleko Senkulumo. Ngenkulumo yabo yokuqala Esikolweni Senkonzo esingokwaseZulwini, umbonisi wesikole (noma omunye umeluleki uma bebaningi ababhalisile) uyotusa kuphela amaphuzu umfundi awasingatha kahle. Ngemva kwalokho, umeluleki uyogxila ngokuqhubekayo ephuzwini leseluleko elikudinga kakhulu ukunakekelwa ukuze kuthuthukiswe inkulumo yomfundi, futhi uyomabela ngokuqondile umfundi ukuba asebenzele kulelophuzu enkulumweni yakhe elandelayo. Umeluleki uyokwazisa umfundi ngamunye lapho eselungele ukudlulela kwamanye amaphuzu ephepheni leseluleko.
5 Ezinye izikhulumi ezingabafundi zingahle zithuthuke masinyane kakhulu, lapho ezinye kungahle kudingeke ukuthi zisebenzele iphuzu elilodwa kuphela ngesikhathi kunokuzama ukuphatha amaphuzu ahlanganiswa kunoma yisiphi Isifundo esisodwa esiphelele. Eqinisweni, abanye abafundi bangahle bazi kahle ukunikela izinkulumo eziningana lapho besebenzela elilodwa iphuzu elinzima, ukuze bayifunde kahle ngempela imfanelo yenkulumo ehilelwe ngaphambi kokwedlulela kwenye.
6, 7. Umbonisi wesikole uyonikeza iseluleko ngamaphi amaphuzu na?
6 Iseluleko esinikezwa ngemva kwenkulumo ngayinye yomfundi kufanele sibe esinomusa, esicetshelwe ukusiza umfundi ukuqhubeka ukuthuthukisa ikhono lakhe lokukhuluma. Noma yisiphi iseluleko esinikelwe isikhulumi esinikeza inkulumo yokuyala noma amaphuzu avelele eBhayibheli, nokho, sinikezwa ngasese ngemuva kwesikole. Lesisikhulumi besiyokwelulekwa ikakhulu uma beseqe isikhathi esabelwe sona. Isikhulumi senkulumo yokuyala sifanele sizame ukunikeza inkulumo eyisibonelo kuzo zonke izimo, neseluleko sangasese singahle singadingeki.
7 Amaphuzu okumelwe kunikezwe kuwo iseluleko ngokuvamile kuyoba yilawo umfundi ayelulekwe ukuba asebenzele kuwo. Phela, uma esinye isimo esithile senkulumo sisihle kakhulu, umeluleki angahle ngempela asihlanganise ekuncomeni kwakhe, kepha akanakuphawula ipheshana leseluleko kulelophuzu. Izimpawu ezimelwe zisetshenziswe zilandela kanje: “S” (Sebenzela kulokhu) lapho ukusetshenzelwa okuqhubekayo emfanelweni ethile yenkulumo bekuyo-banosizo; “W” (Wenze-kangcono) lapho umfundi esesebenzele iphuzu okungenani kanye ngaphambili futhi ebonisa ukuthuthuka kepha engakwazi ukulisebenzela ngokunosizo ngesinye isikhathi; “L” (Lungile) lapho imfanelo ecatshangelwayo iboniswe kahle ngokwanele ukufanela ukuthuthukela esifundweni sezinye izimfanelo zenkulumo lapho kulungiselelwa isabelo esilandelayo esikolweni. Lapho umfundi enesabelo sokufunda, umeluleki uyonikeza amaphuzu eseluleko afanelana kangcono naloluhlobo lwesabelo.
8-10. Ekuphawuleni ipheshana leseluleko, yini efanele ikhunjulwe umbonisi wesikole ukuze akhuthaze ukuthuthuka na?
8 Ubuhlakani obukhudlwana bufanele busetshenziswe ngumbonisi wesikole ukufeza okuhle kakhulu ngeseluleko esinikezwayo. Uma isikhulumi sisisha kakhulu, okudingekayo nje kunokunye yisikhuthazo. Abanye abafundi, abanesikhathi eside kakhulu esikolweni, bangahle bakhuthale ekulungiseleleni izinkulumo zabo, benakekela izimfanelo zenkulumo ababelwe ukuzisebenzela, kepha bangahle babe-nekhono elilinganiselwe. Ngezikhathi ezinjalo, uma ethile imfanelo yenkulumo iboniswa ngisho ebangeni elilinganiselwe, umbonisi wesikole abengahle ayiphawule ngokuthi “L” epheshaneni leseluleko futhi avumele umfundi athuthukele kwenye imfanelo edinga ukunakekelwa.
9 Ngenye indlela, esinye isikhulumi singahle sibe nolwazi oluningana noma ikhono lemvelo elingaphezulu, kepha, mhlawumbe ngokucindezelwa ngomunye umsebenzi, kungenzeka ukuthi asichithanga isikhathi sokufunda izimfanelo zenkulumo ezabelwe nakanjalo kungenzeka ukuthi asenzanga kahle njengoba besingenza. Ngesikhathi esinjengalesi kuyovimbela ngempela ukuthuthuka komfundi uma umbonisi wesikole ephawula ngokuthi “L” epheshaneni leseluleko nokusitshela ukuthuthukela kokunye. Uma inkulumo ibingeyohlobo lokuthi imfanelo eyabelwe ngabe ibonisiwe, umeluleki uyoliphawula ngokuthi “S” (Sebenzela kulokhu) bese enikela usizo lomuntu uqobo kumfundi ukumsiza ukuthuthuka. Ngalendlela abafundi bayokhuthazwa ukwenza enye nenye inkulumo, hayi ukugcwaliswa nje kwesabelo, kepha okuphawulayo ekuthuthukeni kwabo njengezikhulumi.
10 Khumbula ukuthi lokhukufundisa kwenkulumo kuyathuthuka. Musa ukulindela ukuba-yisikhulumi esiyingcweti ngobusuku nje. Yinqubo ehamba kancane kancane, kepha leyo engasheshiswa ngomzamo okhuthele. Uma uyozindla ngokusikisela okunikelwe kulesisimiso sokufundisa kwenkulumo futhi ume ekulungiseleleni izabelo zakho, ukuthuthuka kwakho kuyobonakala masinyane kubo bonke ababukayo.—1 Thim. 4:15.
11-16. Yimiphi imiyalo umeluleki azama ukuyilandela ukuze akhe eselulekweni sakhe na?
11 Umeluleki. Umbonisi wesikole ufanele afundisise indaba yesinye nesinye isifundo seviki ukuze akwazi ukunquma noma indaba eyabelwe ihlanganiswe kahle nokwazi ukulungisa noma yimaphi amaphutha. Akafanele nanini, nokho, afike lapho engakwazi ukujabulela izinkulumo ngenxa yokusola ngokweqile indlela indaba enikezwa ngayo. Naye ufanele asizakale ngamaqiniso ashiwo.
12 Ekwelulekeni ngokuvamile uqala ngokuncoma umzamo womfundi. Bese eqhubeka ukubeka amazwana ngamaphuzu asepheshaneni leseluleko isikhulumi esiwasebenzelayo. Uma iphuzu lidinga ukunakekelwa okuqhubekayo, kumelwe kugcizelelwe, hayi kakhulu ubuthakathaka besikhulumi, kepha indlela ebesingahle sithuthuke ngayo. Kanjalo iseluleko siyosakha isikhulumi nezinye izilaleli.
13 Akwanele nje ukutshela isikhulumi ukuthi senze kahle noma ukuthi sidinga ukusebenzela futhi imfanelo ethile yenkulumo. Kuyosiza bonke abakhona uma umeluleki eyochaza isizathu sokuba-kuhle kwayo noma isizathu sendingeko yokuthi ithuthukiswe nendlela yokuyithuthukisa. Futhi, kuyomsiza ukuqokomisa izizathu zokuthi kungani imfanelo yenkulumo okuxoxwa ngayo idingeka kakhulu enkonzweni yasensimini noma emihlanganweni yebandla. Lokhu kuyovusa ukwazisa iphuzu ngakulo lonke ibandla futhi kuyokhuthaza umfundi ukuqhubeka elinakekela.
14 Akuwona umsebenzi womeluleki ukubuyekeza inkulumo yomfundi. Ufanele akhulume kafushane futhi ashaye emhloleni ngeseluleko sakhe, esilinganisela ngokunakekela emizuzwini emibili ngenye nenye inkulumo yomfundi. Ngalendlela iseluleko nokusikisela akunakusithezwa ngamazwi amaningi kakhulu. Futhi, kufanele ukubhekisela umfundi emakhasini kulencwadi lapho engafumana khona indaba eyengeziwe exoxiwe.
15 Amaphuthana okuphimiselwa kwamazwi noma ohlelo akuzona izinto ezinkulu zokuqashelwa. Kodwa umeluleki ufanele akhathazeke ngomphumela ovamile wokunikela kwesikhulumi. Ingabe indaba inosizo futhi iyafundisa na? Ingabe ihleleke kahle futhi izwakala kalula na? Ingabe ukunikela kuqinisekile, kunokushiseka, kuyakholisa na? Ingabe ubuso baso nokushukuma komzimba kubonisa ukuthi siyakukholwa lokho esikushoyo nokuthi sikhathazeka ngokudlulisela amaqiniso amahle ezilalelini zaso kunokukhanga esikunikezayo na? Uma lezizindaba ezibalulekile zinakekelwe kahle, okumbalwa ukuphimiselwa kwamazwi okubi namaphutha ohlelo akunakubonwa yizilaleli.
16 Iseluleko esinikezwa esikolweni senkonzo sifanele ngaso sonke isikhathi sinikezwe ngendlela yomusa, enosizo. Kufanele kube-nesifiso esibukhali sokusiza umfundi. Cabangela ubuntu balowo omelwe elulekwe. Uyezwela na? Ufunde kancane na? Zikhona yini izizathu zokuvumela ubuthakathaka bakhe? Iseluleko sifanele senze lowo owelulekwayo azizwe esiziwe, hayi esoliwe. Qiniseka ukuthi uyasiqonda iseluleko nokuba-nengqondo kwaso.
17-19. Ukwenza ukuthuthuka okukhulu kakhulu kwenye nenye inkulumo, yini efanele yenziwe ngomunye nomunye umfundi ngaphambi kokulungiselela enye nenye inkulumo nangemva kokuyinikeza na?
17 Ukuzuza ngeseluleko. Lapho wabelwe inkulumo Esikolweni Senkonzo esingokwaseZulwini khumbula ukuthi isizathu sokunikela kwakho inkulumo akukhona kuphela ukuhlanganisela ibandla indaba eyakhayo, kepha nokuthuthukisa ikhono lakho lokukhuluma. Ukuphumelela kulokhu, kubalulekile ukuchitha isikhathi uhlaziya izimfanelo zenkulumo ocelwe ukuba uzisebenzele. Fundisisa kulencwadi Isifundo esiphethe iphuzu elisetshenzelwayo, ukuze wazi indlela elimelwe lithinte ngayo ukulungiselela kwakho nendlela yokubonisa imfanelo yenkulumo ekunikeleni kwakho. Ukukusiza, izimo eziyinhloko zenye nenye imfanelo yenkulumo zilotshwe ngokugqamile kulencwadi. Lezi yizisusa ezinkulu zokucatshangelwa.
18 Ngemuva kokunikeza inkulumo yakho, lalelisisa iseluleko somlomo esinikezwayo. Samukele ngokusazisa. Bese usebenzela amaphuzu adinga ukunakekelwa. Uma ufuna ukushesha uthuthuke, musa ukulinda uze uthole enye inkulumo. Funda futhi indaba ekulencwadi exoxa ngamaphuzu odinga ukuwasebenzela. Zama ukusebenzisa ukusikisela engxoxweni yakho yansuku zonke. Nangezikhathi lapho unikeza inkulumo yakho yomfundi elandelayo kungenzeka ukuba uwafunde kahle.
19 Omunye nomunye umfundi ufanele abe-nenjongo yokuthuthukisa enye nenye inkulumo elandelayo ayinikeza esimisweni sesikole. Ngempela, lokhu kuyokusho umzamo othuthukayo, kepha kuyoletha isibusiso sikaJehova ngempela. Kulabo abebeyokuthola inzuzo enkulu kakhulu ekufundiseni Kwesikole Senkonzo esingokwaseZulwini, kunokubaluleka okuthile emazwini ezAga 19:20: “Yizwa isiluleko, wamukele ukulaywa, ukuze uhlakaniphe ekugcineni.“
[Ishadi ekhasini 104, 105]
ISELULEKO SENKULUMO
Isikhulumi ․․․․․․․․․․․․․․․․․․․․․․․․․․․․․․․․․․
(Igama Eliphelele)
Izimpawu: S - Sebenzela kulokhu
W- Wenze-ngcono
L - Lungile
Usuku Ina. Yenkulumo
Indaba efundisayo (21)*
Iyakhanya, iyaqondakala (21)
Isethulo sivuse isithakazelo (22)
Isethulo siyavumelana nesihloko (22)
Isethulo side ngokufanele (22)
Izwi (23)
Ukuhlaba ikhefu (23)
Izilaleli zikhuthaziwe ukusebenzisa iBhayibheli (24)
IMibhalo yethulwe kahle (24)
IMibhalo ifundwe ngokugcizelela (25)
Ukusetshenziswa kweMibhalo kukhanyisiwe (25)
Ukuphindaphinda ngokugcizelela (26)
Ukushukuma komzimba (26)
Isihloko sendaba sigcizelelwe (27)
Amaphuzu asemqoka enziwe aqhama (27)
Ukubheka izilaleli, ukusebenzisa okulotshiwe (28)
Ukusetshenziswa kohlaka lwenkulumo (28)
Okuphawulekayo: ․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․
* Inamba ngayinye ekubakaki ibhekisela Esifundweni Encwadini Yokuchasisa Isikole Senkonzo EsingokwaseZulwini esixoxa ngemfanelo yenkulumo ekhonjiwe.
S-48-ZU J.G.
Usuku Ina. Yenkulumo
Ukuqephuza (29)
Imfanelo yengxoxo (29)
Ukuphinyiselwa kwamazwi (29)
Ukuvumelana kwamaphuzu ngezihlanganiso (30)
Okunengqondo, ukuthuthukiswa okuvumelanayo (30)
Indaba ekholisayo (31)
Izilaleli zisiziwe ukuzindla (31)
Ukugcizelelwa kwengqondo (32)
Ukungafani kwezwi (32)
Ukushiseka (33)
Ukufudumala, ukuzwela (33)
Imifanekiso ifanela indaba (34)
Imifanekiso ifanela izilaleli (34)
Indaba ifaneliswe inkonzo yasensimini (35)
Isiphetho sifanele, siyaphumelela (36)
Isiphetho side ngokufanele (36)
Ukulinganiswa kwesikhathi (36)
Isibindi nesizotha (37)
Ukubukeka komuntu uqobo (37)
QAPHELA: Ngenkulumo ngayinye umeluleki uyonikeza iseluleko esiqondile, akabophekile ukuba alandelele isimiso esingenhla kodwa kumelwe agxile kulezozindawo umfundi adinga ukuthuthukisa kuzo. Izikhala ezingalotshwe-lutho epheshaneni zingasetshenziselwa ukweluleka abafundi emaphuzwini angafakiwe ohlwini, njengokushaya emhloleni kwenkulumo, ukuphimisela amazwi ngokuchachile, ukuma, ukukhethwa kwamazwi, uhlelo, izijwayezi, ukuhlangana, amasu okufundisa nemfanelo yezwi nxa kudingekile. Umeluleki kumelwe akekelezele isikhala semfanelo yenkulumo umfundi okumelwe asebenzele kuyo ngokulandelayo uma umfundi eseqedile ukusebenzela imfanelo yenkulumo yangaphambili. Inamba yesifundo yalemfanelo kumelwe iboniswe epheshaneni elilandelayo leSabelo Sesikole Senkonzo Esingokwasezulwini (S-89).
[Ishadi ekhasini 106, 107]
IQOQO LEZIMFANELO ZENKULUMO
Indaba efundisayo (21)
Indaba eqondene-ngqo
Ifundisa ezilalelini zakho
Indaba inosizo lwangempela
Ukushaya emhloleni kwenkulumo
Indaba eyenezelwe ekhanyisayo
Iyakhanya, iyaqondakala (21)
Ishiwo kalula
Amazwi angejwayelekile achaziwe
Indaba engeningi ngokweqile
Isethulo sivuse isithakazelo (22)
Isethulo siyavumelana nesihloko (22)
Isethulo side ngokufanele (22)
Izwi (23)
Likhulu ngokwanele ukuzwakala kamnandi
Izwi limelwe lifanele izimeko
Izwi lifanele indaba
Ukuhlaba ikhefu (23)
Hlaba ikhefu ngokhefu
Hlaba ikhefu ngokuguquka komcabango
Hlaba ikhefu ngokugcizelela
Hlaba ikhefu lapho kubizelwa yizimeko
Izilaleli zikhuthaziwe ukusebenzisa iBhayibheli (24)
Ngokusikisela
Ngokuvumela isikhathi sokufumana itekisi
IMibhalo yethulwe kahle (24)
Ukulindelwa kwemibhalo kuvusiwe
Kukhonjwe esizathwini sokusebenzisa itekisi
IMibhalo ifundwe ngokugcizelela (25)
Amazwi aqondile agcizelelwe
Indlela ephumelelayo yokugcizelela isetshenzisiwe
Amatekisi afundwa ngumninindlu
Ukusetshenziswa kweMibhalo kukhanyisiwe (25)
Amazwi amelwe asetshenziswe ahlukanisiwe
Injongo yesethulo ikhanyisiwe
Ukuphindaphinda ngokugcizelela (26)
Ukuphindaphinda amaphuzu amakhulu
Ukuphindaphinda amaphuzu angaqondakalanga
Ukushukuma komzimba (26)
Ukushukuma komzimba okuchazayo
Ukushukuma komzimba okugcizelelayo
Isihloko sendaba sigcizelelwe (27)
Isihloko esifanele
Amazwi esihloko noma umqondo uphindaphindiwe
Amaphuzu amakhulu enziwe aqhama (27)
Awamaningi kakhulu amaphuzu amakhulu
Imiqondo emikhulu ithuthukiswe ngokwahlukana
Amaphuzwana akhomba emiqondweni emikhulu
Ukubheka izilaleli, ukusebenzisa okulotshiwe (28)
Ukubhekana ngamehlo nezilaleli
Ukubheka izilaleli ngenkulumo eqondile
Ukusetshenziswa kohlaka lwenkulumo (28)
Ukuqephuza (29)
Imfanelo yengxoxo (29)
Izinkulumo zengxoxo zisetshenzisiwe
Eyengxoxo indlela yokunikela
Ukuphinyiselwa kwamazwi (29)
Ukuvumelana kwamaphuzu ngezihlanganiso (30)
Ukusetshenziswa kwezinkulumo eziguqukayo
Ukuvumelana kwamaphuzu kufanele izilaleli zakho
Okunengqondo, ukuthuthukiswa okuvumelanayo (30)
Indaba ilandelana kahle
Kusetshenziswe indaba evumelanayo kuphela
Akukho-miqondo eyisihluthulelo eshiyiwe
Indaba ekholisayo (31)
Sibekiwe isisekelo
Ubufakazi obuqotho bunikezwe
Ukubuyekeza okuphumelelayo
Izilaleli zisiziwe ukuzindla (31)
Isizathu esivamile silondoloziwe
Ukuthuthukiswa okufanele kwamaphuzu
Ukusetshenziswa kwenzelwe izilaleli
Ukugcizelelwa kwengqondo (32)
Amazwi anikeza imicabango emishweni agcizelelwe
Imiqondo eyinhloko enkulumweni igcizelelwe
Ukungafani kwezwi (32)
Ukwahlukahluka ngamandla
Ukwahlukahluka ngokushesha
Ukwahlukahluka ngokuphakama
Ukungafani kwezwi okufanele umcabango noma umzwelo
Ukushiseka (33)
Ukushiseka kuboniswe ngokunikela okushisayo
Ukushiseka kufanele indaba
Ukufudumala, ukuzwela (33)
Ukufudumala kubonakala ebusweni
Ukufudumala nokuzwela kubonakala ngezwi
Ukufudumala nokuzwela kufanele indaba
Imifanekiso ifanela indaba (34)
Ilula
Ukusetshenziswa kukhanyisiwe
Amaphuzu abalulekile agcizelelwe
Imifanekiso efanela izilaleli (34)
Ithathwe ezimweni ezejwayelekile
Ngokunambitheka
Indaba ifaneliswe inkonzo yasensimini (35)
Izinkulumo zenziwe zaqondakala emphakathini
Amaphuzu afanele akhethiwe
Usizo lwangempela lwendaba luqokonyisiwe
Isiphetho sifanele, siyaphumelela (36)
Isiphetho sihlangene ngokuqondile nesihloko senkulumo
Isiphetho sibonisa izilaleli lokho ezimelwe zikwenze
Isiphetho side ngokufanele (36)
Ukulinganiswa kwesikhathi (36)
Isibindi nesizotha (37)
Isizotha sibonakala ngokuma komzimba
Isizotha siboniswe ngokuphathwa kwezwi
Ukubukeka komuntu uqobo (37)
Ukugqoka kahle nokuzilungisa
Ukumiswa okuhle komzimba
Izinto zokusebenza zihlanzekile
Ubuso abunasici