ESINGAKWENZA NJENGOBA IZINTO ZIMBA EQOLO

Yisebenzise Ngokuhlakanipha Imali Yakho

Sonke sixakekile ngenxa yokuthi izinto ziyabiza. Kodwa zikhona izinto ongazenza ukuze isimo sakho sibe ngcono. Ungapheli amandla.

OKWENZA KUBALULEKE UKUSEBENZISA IMALI NGOKUHLAKANIPHA

Uma ungayisebenzisi kahle imali yakho, izinkinga zakho zizokwanda futhi ucindezeleke. Ngisho noma ungenayo imali eningi, ziningi izinto ongazenza ezingakusiza uyisebenzise kahle yona le ekhona.

ONGAKWENZA

Phila ngalokho onakho. Uma wenza kanjalo, uzokwazi ukulawula izimali zakho ukwazi nokukhokhela izimo eziphuthumayo ezingalindelekile.

Ukuze ukwazi ukonga imali onayo, yiba nohlelo lokuyisebenzisa. Kulolu hlelo, ungabhala phansi imali ozoyihola nozoyisebenzisa. Uma usukwenzile lokho, hlola ukuthi imali ozoyisebenzisa, uzoyisebenzisela ezintweni ozidinga ngempela yini. Namathela ohlelweni lwakho, udamane ululungisa njengoba umholo nokubiza kwezinto kushintsha. Kusobala ukuthi uma ushadile, lezi zinqumo uyozenza nomuntu oshade naye.

Zama lokhu: Kunokuthenga izinto ngesikweletu, zithenge ngokheshi uma kungenzeka. Abanye bathole ukuthi uma bekhokhela izinto ngale ndlela bayakwazi ukunamathela ohlelweni lwabo, bagweme ngisho nezikweletu. Okunye ongakwenza ukuzinika isikhathi sokuhlola isitatimende sakho sasebhange. Kuzothi ukwehla ukukhathazeka uma wazi ukuthi unamalini ngempela.

Ukuphila ngalokhu onakho kungaba nzima ngezinye izikhathi. Kodwa uhlelo lokusebenzisa imali olucatshangelwe kahle nolusebenzayo lungaba usizo. Ungakwazi ngisho ukuyibona kahle imali yakho engenayo nephumayo.

‘Bala izindleko.’—Luka 14:28.

Sebenza kanzima ukuze ungaphelelwa umsebenzi. Yiziphi izinto ongazenza ukuze ungalahlekelwa umsebenzi? Nazi ezimbalwa: Gcina isikhathi. Wuthande umsebenzi wakho. Yiba wusizo futhi usebenze kanzima. Hlonipha abanye. Landela imithetho futhi uzame ukuthuthukisa amakhono akho.

Gwema ukumosha imali yakho. Zibuze, ‘Kungenzeka yini nginomkhuba wokuthenga izinto ezibizayo nezingenasidingo?’ Ngokwesibonelo, abantu abaningi bamosha imali yabo abayisebenzele kanzima ngokuthenga izidakamizwa, ukugembula, ukubhema nokuthenga utshwala obuningi. Lezi zinto zingabenza balahlekelwe imisebenzi futhi bagule ngisho nokugula.

“Uyajabula umuntu othola ukuhlakanipha . . . ukuzuza ukuhlakanipha kungcono kunokuzuza isiliva.”—IzAga 3:13, 14.

Beka imali ozoyisebenzisa lapho kuvela izimo ezingalindelekile. Uma kungenzeka, yiba nemadlana oyibeke eceleni ozoyisebenzisa lapho kunezimo eziphuthumayo. Le madlana ingakusiza ube nokuthula kwengqondo lapho wena noma elinye ilungu lomndeni ligula, lilahlekelwa umsebenzi noma kwenzeka okuthile okungalindelekile.

‘Isikhathi nezenzakalo ezingalindelekile zisehlela sonke.’—UmShumayeli 9:11.

Amacebiso Angakusiza Wonge Imali

Nciphisa izikhathi odla ngazo ema-restaurant.

Ukudla njalo ema-restaurant nokuthenga ama-take away kungabiza kakhulu. Kuyavunywa ukuthi ukulungiselela ukudla ekhaya kudinga isikhathi namandla kodwa iningi imali ongayonga uma ukwenza. Uzokwazi nokulawula ukuthi ukudla okudlayo kunempilo kangakanani.

Thenga ngokuhlakanipha.

Bhala phansi izinto ofuna ukuzithenga bese uthenga lezo zinto ozibhalile kuphela. Gwema ukuthenga izinto ngokuxhamazela.
Thenga izinto ezinkulu uma zishibhile. Qiniseka ukuthi uthola indawo ekahle yokubeka ukudla ukuze kungonakali.
Cabangela ukuthenga izinto ezingabizi uma izinga lazo likahle.
Thenga izinto kuyi-inthanethi ukuze uthole indali, ugweme ukuthenga izinto obungahlelanga ukuzithenga futhi ukwazi ukulandelela kahle ukuthi imali yakho uyisebenzise kanjani. Uma ukwazi ukuthenga izinto kuyi-inthanethi lapho uhlala khona, ungakuzama?
Bheka izinto ezisendalini futhi usebenzise amakhuphoni uma kungenzeka. Qhathanisa amanani, kuhlanganise awagesi nawamanzi.

Cabangisisa ngaphambi kokuthenga izinto ezintsha lapho ufisa ukuthuthukisa lezo onazo.

Izinkampani ezenza amafoni nezinye izinto zihlale zikhiqiza uhlelo olusha ukuze zenze inzuzo. Ngakho ngaphambi kokuthenga, yima uzibuze: ‘Kuzongisiza ngempela yini ukuthenga uhlelo olusha lwale nto? Ngiludinga manje? Uma ngidinga ukuthuthukisa enginakho, ngidinga ukuthenga okwakamuva ngempela?’

Lungisa onakho noma uthenge izinto ezike zasetshenziswa.

Zinakekele kahle izinto zakho ukuze zingasheshe zife, uma zifa zikhande. Mhlawumbe ungase ucabangele ukuthenga izinto ezike zasetshenziswa abanye.

Zitshalele ukudla kwakho.

Ikhona yini indawana ongayibekela ukuzitshalela ukudla kwakho? Okunye okungakusiza unciphise izindleko zokudla, ukukhulisa okuthile ongakudayisa noma ukuphe abanye.

“Amacebo okhuthele amenza aphumelele.”—IzAga 21:5.

“Sihlale sibheka amanani ezinto esijwayele ukuzithenga futhi siyayigada indlela esisebenzisa ngayo ama-credit card ethu.”—UMiles, waseNgilandi.

“Ngaphambi kokuyothenga igilosa, mina nomndeni wami sizibhala phansi izinto esizidingayo.”—UJeremy, wase-U.S.A.

“Sihlale siyilungisa ibhajethi yethu njengomndeni ukuze izohlale ihambisana nezimo zomnotho zangaleso sikhathi futhi sinemali esiyibekele izimo ezingalindelekile.”—UYael, wakwa-Israel.

“Safundisa izingane zethu ukukhanda izinto ezifile kunokuthenga ezintsha. Lokhu kuhlanganisa imoto nezinto ezisendlini. Mina nomkami sizama ukungazithengi izinto zakamuva.”—UJeffrey, wase-U.S.A.

“Izindleko zami ngazinciphisa ngokuzitshalela amaveji nangokufuya izinkukhu. Ngikwazi ngisho ukucaphunela abanye amaveji.”—UHono, waseMyanmar.