Okwenza Iningi Liphelelwe Yithemba
Emhlabeni wonke, kwenzeka izinto eziphazamisayo ezibangela ukwesaba ngekusasa. Amadolobha amaningi anamakhamera aqopha konke okwenziwa yizakhamuzi. Ngenxa yokwesaba amaphekula, izikhumulo eziningi zezindiza eziphithizelayo sezicishe ziphenduke izikhungo zamasosha. Siyanda isibalo sezigebengu nabanukubezi bezingane abasebenzisa i-Internet ukuze bayenge izisulu ezinganakile. Uma kuziwa kwezemvelo, ukungcola, ukucekelwa phansi kwamahlathi, ukuqothulwa kwezilwane, nokufudumala kwembulunga yonke kusongela ukuphila kwesikhathi esizayo kule mbulunga yethu.
LEZI zinkathazo ezazingacatshangwa nakucatshangwa ezizukulwaneni ezimbili noma ezintathu ezidlule, sezisabalele emhlabeni wonke namuhla. Ngesizathu esifanele abantu bayazibuza ukuthi kwenzekani emhlabeni nokuthi hlobo luni lokuphila olubalindele bona nezingane zabo. Ingabe kuza isikhathi lapho abantu beyokwesaba khona ukuhamba ngamabhasi, ngezitimela noma ngezindiza? Njengoba amanani ekhuphuka namagugu omhlaba eya ngokuya esetshenziswa ngokweqile, ingabe izizukulwane ezizayo ziyokwazi ukukhokhela ukwelashwa okusezingeni elifanele, ukudla okunempilo, nowoyela owanele?
Ungqongqoshe wezempilo waseCanada washo okulandelayo ngokuphathenele nokukhuphuka kwezindleko zezempilo: “Ikusasa libonakala lesabeka ngempela.” Kukhona nokukhathazeka ngokuphathelene nokudla nowoyela. Kungani? Ukuze anciphise ukuthembela kwawo kuwoyela ombiwa phansi, amanye amazwe achitha imali eningi kuwoyela owenziwe ngezinto zemvelo, ezifana ne-ethanol, etholakala emvelweni. Ngakho, ngokokuqala ngqa emlandweni, kokubili abantu nezimoto kudinga umkhiqizo wezinto ezitholakala emvelweni. Umphumela wokukhuphuka kwamanani okudla usuyezwakala.
Phakathi naleso sikhathi, umehluko phakathi kwabacebile nabampofu uya ngokuya uba mkhulu, wenezela ekuhlalisaneni kabi kwabantu. Umbiko we-World Health Organization uthi: “Kuleli shumi lokuqala lekhulu lama-21, intuthuko enkulu ekuphileni kwabantu ihambisana nobuphofu obukhulu. Ubude benkathi yokuphila elindelekile kubantu bunciphe ngesigamu kwamanye amazwe ampofu kakhulu uma kuqhathaniswa nasemazweni acebile.” Ngokuyinhloko izimbangela yizifo, izinxushunxushu kwezenhlalo nakwezomnotho emazweni antengantengayo kwezombangazwe.
Okunye kulokhu ukufudumala kwembulunga yonke, okungase kubangele ukwanda kwezindawo eziphenduka ugwadule nokuvama kwesimo sezulu eseqisayo, futhi akumangalisi ukuthi abantu abaningi abanolwazi banovalo ngekusasa. I-Bulletin of the Atomic Scientists, ehlela lokho okubizwa ngokuthi iWashi Lembubhiso (Doomsday Clock), yaveza umuzwa wokwesaba ikusasa elimfiliba “njengoba ososayensi beqhubeka nokuqapha imiphumela ehlukahlukene [yokufudumala kwembulunga yonke] ekuphileni okuyinkimbinkimbi kwezinto eziphilayo eMhlabeni wonke.”
Ingabe amathemba ethu amfiliba njengoba kubonakala? Ingabe okuwukuphela kwethemba lethu lekusasa eliqhakazile lincike kubaholi bezentengiselwano, bezombangazwe, benkolo nabezesayensi? Abanye bathi, ‘Yini enye esingayenza? Yithina esizifake kulolu bishi; kufanele sizikhiphe thina.’ Abanye banomuzwa wokuthi kungaphezu kwamandla omuntu ukuthola indlela yokuphuma nokuthi uNkulunkulu uwukuphela kwethemba lethu lekusasa elilondekile. Uma kunjalo, yisiphi isiqinisekiso esinaso sokuthi uNkulunkulu unesithakazelo kithina, sokuthi uyosivikela ekuziqothuleni thina ngokwethu? Izihloko ezilandelayo zizophendula le mibuzo.
[Amazwi acashunwe esihlokweni ekhasini 3]
Ingabe okuwukuphela kwethemba lethu lekusasa eliqhakazile lincike kubaholi bezentengiselwano, bezo-mbangazwe, benkolo nabezesayensi?