Intsha Iyabuza . . .

Kumelwe Ngijwayelane Kangakanani Nabangane Esikoleni?

“Izingane esikoleni zazixoxa ngobumnandi ezazibujabulela ndawonye ngezimpelasonto. Ngangizizwa ngikhishwe inyumbazane.”—UMichelle.a

“Ngezinye izikhathi ngangibona iqembu lezingane bese ngithi, ‘Bayezwana ngempela. Nami ngifuna ukuba yingxenye yabo.’”—UJoe.

“Ngangingenankinga yokuba nabangane esikoleni. Kwakulula. Yilokho okwakuyinkinga yami.”—UMaria.

INGXENYE enkulu yosuku lwakho uyichitha nofunda nabo. Ubhekana nezinselele eziningi ezifanayo, ukucindezeleka nokufinyelela imigomo enjengeyabo. Ngandlela-thile, ungase ube nomuzwa wokuthi kuningi enifana ngakho nabo kunabazali bakho, izingane zakini noma amanye amaKristu. Kuyaqondakala ukuthi ungase uzizwe ufuna ukuba umngane nofunda nabo. Ingabe akulungile lokho? Ingabe kunezingozi? Uma kuziwa endabeni yokuba nabangane esikoleni, kunini lapho kuba okweqile? Unganquma kanjani?

Uyabadinga Abangane

Wonke umuntu uyabadinga abangane—abantu angaba nabo ngezikhathi zenjabulo futhi athembele kubo ngezikhathi zobunzima. UJesu wayenabangane, futhi wayekujabulela ukuba nabo. (Johane 15:15) Lapho esebhekene nokufa esigxotsheni sokuhlushwa, umngane wakhe omkhulu uJohane, ‘umfundi ayemthanda [kakhulu],’ wayekhona. (Johane 19:25-27; 21:20) Uyabadinga abangane abanjalo—abantu abayoba nawe ebuhleni nasebubini. Isaga seBhayibheli sithi: “Umngane weqiniso ubonisa uthando ngaso sonke isikhathi, futhi ungumfowabo womuntu ozalelwe isikhathi sosizi.”—IzAga 17:17.

Mhlawumbe unomuzwa wokuthi usuthole umuntu onjalo esikoleni, omunye walabo ofunda nabo enizwana kakhulu naye. Nithanda izinto ezifanayo futhi niyakujabulela ukuxoxa. Yiqiniso, lowo muntu kungenzeka akakholwa kanye nawe; kodwa, ngokubona kwakho, akayena futhi umuntu ongamfaka esigabeni ‘sabangane ababi.’ (1 Korinte 15:33) Kuyavunywa, enye intsha engaphili ngezindinganiso zeBhayibheli ezinjengezakho iphila ngezimiso ezinhle. (Roma 2:14, 15) Kodwa ingabe lokho kusho ukuthi kufanele nibe abangane abaseduze?

AmaKristu Awabona Onkom’ idlayodwa

Kusobala ukuthi amaKristu eqiniso awabagwemi abangakholwa. Phela, ukuze afeze umsebenzi wawo ‘wokwenza abantu bazo zonke izizwe babe abafundi,’ amaKristu akhuluma namadoda nabesifazane bazo zonke izinhlanga, izinkolo namasiko. (Mathewu 28:19) Awabaxwayi omakhelwane, asebenza nabo, noma afunda nabo, futhi awazihlukanisi. Kunalokho, amaKristu abonisa isithakazelo esijulile kwabanye.

Umphostoli uPawulu wabeka isibonelo esihle kulokhu. Wayekwazi ukuxoxa ‘nabantu bazo zonke izinhlobo,’ nakuba babengenazo izinkolelo ezifana nezakhe. Kuyiqiniso, injongo kaPawulu yayingekhona ukwakha ubudlelwane nabo. Kunalokho, wathi: “Ngenza zonke izinto ngenxa yezindaba ezinhle, ukuze ngibe umhlanganyeli wazo nabanye.”—1 Korinte 9:22, 23.

Nawe ungasilandela isibonelo sikaPawulu. Yiba nomusa kontanga yakho. Funda ukukhulumisana kahle nabo. Abanye kofunda nabo kungenzeka bafuna ithemba onalo elisekelwe eBhayibhelini. Cabanga ngendaba yentombazane engumKristu okuthiwa uJanet. Yena nafunda nabo banikwa umsebenzi wokubhala umbiko omfushane ngalabo abafunda nabo, futhi kamuva umfundi ngamunye wafunda umbiko okhuluma ngaye. Omunye wemibiko uJanet ayithola wawuthi: “Ubonakala ungumuntu ojabule ngaso sonke isikhathi. Sicela usitshele ukuthi kungani!”

Njengoba le ndaba ibonisa, abanye ofunda nabo bangase bathande ukwazi ngezinkolelo zakho. Ngokuqinisekile, kuhle ukuba nobungane nabanjalo. Ngokungangabazeki, lokhu kuyokunika ithuba lokuchaza izinkolelo zakho. Vumela ofunda nabo ukuba nabo baveze imibono yabo, futhi ubalalelisise lapho benza kanjalo. Ulwazi olutholayo ngokukhulumisana nontanga yakho luyoba usizo olukhulu uma kwenzeka usebenza futhi ubhekana nezimo ezifanayo. Esikoleni nasemsebenzini, ukuba nomusa kuyokusiza ukuba ‘uhlobise imfundiso yoMsindisi wethu, uNkulunkulu, ezintweni zonke.’—Thithu 2:10.

‘Ukuboshelwa Ejokeni’ Lobungane Nomuntu Ongafanele

Kuyiqiniso ukuthi kunomehluko phakathi kokuba nomusa kulowo ofunda naye nokuba umngane oseduze naye. UPawulu wabhala: “Ningaboshelwa ejokeni nabangakholwa.” (2 Korinte 6:14) Ukuze ube umngane oseduze nothile, kumelwe nibe nezindinganiso nemigomo efanayo. Lokho akunakwenzeka ngomuntu ongaphili ngokuvumelana nezinkolelo nezindinganiso zakho ezingokomBhalo. Ukuboshelwa ejokeni nofunda naye ongakholwa cishe kuyokuholela ekwenzeni imikhuba emibi noma konakalise imikhuba emihle.

UMaria wakufunda kabuhlungu lokhu. Ukukhululeka kwakhe kubantu kwamdonsela abangane kodwa kwenza kwaba nzima ukukhetha. Uyavuma: “Ngangikujabulela ukuthandwa, yikho kokubili abafana namantombazane. Ngenxa yalokho, ngazithola ngilokhu ngibisha kancane kancane odakeni lwaleli zwe.”

NjengoMaria, ungase ukuthole kunzima ukubona ukuthi senisondelene kakhulu nothile ongumngane ongenazo izinkolelo onazo. Noma kunjalo, ungazivikela ebuhlungwini benhliziyo ngokubeka imingcele yokuthi ubani ozombheka njengomuntu nje omjwayele nokuthi ubani ozomkhetha ukuba abe umngane oseduze. Ungakwenza kanjani lokho?

Indlela Yokukhetha Abangane Abahle

Njengoba kubonisiwe ngaphambili, uJesu waba nabangane abaseduze lapho esemhlabeni. Lokhu wakwenza ngokuphila ukuphila okuqotho nangokukhuluma ngezinto ezingokomoya. Uma abantu bamukela izimfundiso nendlela yakhe yokuphila, wayesondelana nabo. (Johane 15:14) Ngokwesibonelo, ngemva kokuzwa uJesu ekhuluma, amadoda amane athinteka kangangokuthi ‘ashiya konke, amlandela.’ La madoda—uPetru, u-Andreya, uJakobe noJohane—aba abangane abakhulu bakaJesu.—Luka 5:1-11; Mathewu 4:18-22.

Indlela kaJesu yokukhuluma nezenzo zakhe kwakwenza kwacaca ukuthi izinkolelo zakhe zazibalulekile kuye futhi engenakugudluzwa kuzo. Labo ababengafuni ukumamukela enjalo bamshiya, futhi uJesu wabayeka bahamba.—Johane 6:60-66.

Ngokwesibonelo, ubuqotho benye insizwa bamthinta kakhulu uJesu. IBhayibheli lithi: “UJesu wambheka futhi wezwa emthanda.” Kodwa lapho le nsizwa ithola ukuthi yini uJesu ayeyilindele kubangane bakhe, “yahamba.” Le nsizwa yayibonakala ingumuntu omuhle—empeleni, uJesu ‘wayithanda.’ Nokho, uJesu wayefuna okwengeziwe kubangane bakhe. (Marku 10:17-22; Mathewu 19:16-22) Kuthiwani ngawe?

Ungase uzwane kakhulu nomfundi othile. Kodwa zibuze: ‘Ingabe lo muntu uzimisele ukwenza lokho uJesu ayala ukuba kwenziwe? Ingabe uyafuna ukufunda ngoJehova, lowo uJesu asiyala ukuba simkhulekele?’ (Mathewu 4:10) Njengoba ukhuluma nofunda nabo futhi uphila ngokuvumelana nezindinganiso zeBhayibheli, izimpendulo zale mibuzo ziyoba sobala.

Kuhle ukuba nobungane kulabo ofunda nabo, njengoba nje noJesu ayenobungane kuzo zonke izinhlobo zabantu. Kodwa uJesu waqiniseka ukuthi abangane bakhe abaseduze bangabantu abamthandayo uYise wasezulwini, uJehova. Nawe ungenza okufanayo. ‘Gcina ukuziphatha kwakho kukuhle’ esikoleni, futhi ngobuhlakani, ukhulume nabanye ngezinkolelo zakho. Ngaphezu kwakho konke, qiniseka ukuthi ukhetha abangane abangcono kunabo bonke.—1 Petru 2:12.

[Umbhalo waphansi]

LOKHO OKUDINGA UKUCATSHANGELWA

◼ Yiziphi izingozi zokuchitha isikhathi nofunda naye ongakholwa ngemva kwesikole? Ingabe inkambo enjalo iwukuhlakanipha?

◼ Ngemva kokufunda lesi sihloko, ingabe unomuzwa wokuthi ususondelene kakhulu nomfundi othile? Uma kunjalo, yini ongayenza ngalokho?

[Ibhokisi/Izithombe ekhasini 18]

NGINGAZENZELA KANJANI ABANGANE BEQINISO?

I-video enesihloko esithi How Can I Make Real Friends?, ekhishwa oFakazi BakaJehova, inezingxoxo eziveza amaqiniso nentsha yase-United States, e-Italy, eFrance naseSpain. Itholakala ngezilimi ezingu-36.

[Isithombe ekhasini 18]

Abanye babafundi ofunda nabo bangase bafune ukwazi ngezinkolelo zakho