Ukuvuselelwa Kwesimilo Emajele AseMexico

Ngumlobeli we-Phaphama! eMexico

UKUVUSELELWA kwesimilo ngezinye izikhathi kuthiwa kuyisizathu sokufakwa kwezigebengu ejele. Nokho, ukuboshwa nje kuphela ngeke kusivuselele isimilo sesiboshwa. Isifiso sokushintsha kumelwe sisuke engqondweni nasenhliziyweni yomuntu, silandelwe ukuphenduka kwangempela ezintweni ezimbi umuntu azenzile kanye nesifiso sokuziphatha ngendlela ehlukile. Emajele amaningi emhlabeni wonke, ukuvuselelwa kwesimilo okuphumelelayo kuye kwafinyelelwa ngenxa yemfundo yeBhayibheli enikezwa oFakazi BakaJehova. Ake sihlole uhlelo lwabo eMexico.

OFakazi BakaJehova bavakashela amajele angu-150 eMexico, benikeza uhlelo lokufunda iBhayibheli nemfundo ngezokuziphatha kanye nezimfundiso zeBhayibheli. Ngokwesibonelo, ejele laseCiudad Juárez, eChihuahua, izikhonzi zoFakazi BakaJehova zishumayela njalo eziboshweni ezingaba ngu-1 200. Iziboshwa zinenhlonipho ejulile ngazo futhi ziyazivikela lapho kuvela izimo eziyingozi. Ngesinye isikhathi, lapho kusuka isiphithiphithi ejele, ezinye zeziboshwa ezesatshwa kakhulu zathulisa isixuku ukuze oFakazi baphume bevikelekile.

I-Phaphama! ka-May 8, 2001 eyayinezihloko eziwuchungechunge ezithi “Ingabe Iziboshwa Zingaguqulwa?” yakhanga iziboshwa kanye nabaphathi bamajele. Ejele laseSan Luis Río Colorado, eSonora, oFakazi abangu-12 basakaza amakhophi omagazini angu-2 149.

Lapho kutholakala isithakazelo esiqotho, oFakazi BakaJehova baphindela masonto onke beyofundisa ngeBhayibheli futhi baqhube imihlangano yenkolo. Lesi simiso sokufundisa ngeBhayibheli siye saphumelela kangakanani ekushintsheni ukuphila kweziboshwa?

Iziboshwa Ziba Izikhonzi EzingamaKristu

UJorge wayeseyisigebengu kakade lapho efinyelela iminyaka engu-20 ubudala. Ngemva kokudonsa isigwebo seminyaka engu-13 ejele e-Islas Marías, wadedelwa. Nokho ngokushesha, wabuyela ebugebengwini bebhizinisi lokushushumbisa izidakamizwa. Njengombulali okhokhelwayo, wafunda ukulandela iziqondiso zokuba abulale abantu futhi wabulala abantu abangu-32. Lapho ephinda eboshwa, watshelwa ummeli wakhe ukuthi abaphathi bakhe abayizigebengu babezimisele ukukhokha imali eningi ukuze bamkhulule. Laba baphathi babefuna aphume ejele ukuze bamnike isabelo sokuba ayobulala umuntu wokugcina. Kodwa ngalesi sikhathi uJorge wayesefunda iBhayibheli noFakazi BakaJehova. Wayesethuthukile ngokomoya kangangokuthi wayesebhapathiziwe futhi engumshumayeli wesikhathi esigcwele, noma isikhonzi esiyiphayona, ejele. Ingabe wayezokhetha inkululeko, asebenzele laba bashushumbisi bezidakamizwa, noma wayezohlala ejele akhulekele uJehova? “Ngikhetha ukuhlala ejele ngibhekane nemiphumela yezinto ezimbi engizenzile,” kuphendula uJorge. “Manje ngikhulekela uJehova uNkulunkulu, iNkosi EnguMbusi.” UJorge waqhubeka eqotho kuNkulunkulu waze wafa enethemba lovuko. Abangane bakhe abangokomoya bathi ngaye, “‘Wayelazi iqiniso futhi iqiniso lamkhulula.’”—Johane 8:32.

UDavid, odonsa isigwebo seminyaka engu-110 ngenxa yokubulala, ukuthumba nokweba, uvalelwe esitokisini engxenyeni yejele yeziboshwa eziyingozi kakhulu. Nokho, ngenxa yoshintsho olumangalisayo ekuziphatheni kwakhe kusukela aqala ukufunda noFakazi BakaJehova, wathola imvume ekhethekile yokuya emhlanganweni ngaphandle, eqashwe unogada. Ukuphila kwakhe kuye kwashintsha kwavumelana nezimfuneko zeBhayibheli, kangangokuthi manje uhlanganyela emsebenzini wokushumayela futhi uqhuba izifundo ezingu-8 zeBhayibheli nezinye iziboshwa. Umndeni wakubo uhlabeke umxhwele ngoshintsho alwenzile kangangokuthi uza kuye ukuze uthole izifundo zeBhayibheli. UDavid uthi, “Angikhathali ukubonga uJehova ngokunginika inkululeko engokomoya.”

Ngenxa yale mfundo yeBhayibheli elethwa oFakazi BakaJehova, iziboshwa ezivuselelwe isimilo ezingu-175 ezisemajele angu-79 aseMexico zingabashumayeli abamiswe ngokusemthethweni futhi ezingu-80 kuzo zibhapathiziwe. Ziqhuba ingqikithi yezifundo zeBhayibheli ezingu-703 nezinye iziboshwa. Ngaphezu kwalokho iziboshwa ezingaba ngu-900 ziba khona emihlanganweni yobuKristu kula majele.

Ukunconywa Okuvela Kubaphathi

Abaphathi bamajele bayawuqaphela umsebenzi oFakazi BakaJehova abawenzayo. Ngokwesibonelo, iziphathimandla zejele laseTekax, eYucatán, zabanika isitifiketi sokubonga ngenxa “yokuzidela nokusiza ekuthuthukiseni inhlalakahle” yeziboshwa phakathi nonyaka ka-2002.

Lapho oFakazi beqala lolu hlelo lokufundisa ngeBhayibheli kuleli jele, imihlangano yabo njengeqembu yayiqhutshwa ngaphansi kweso elibukhali lonogada abaningana. Kodwa ngokuhamba kwesikhathi, njengoba ubuntu beziboshwa babuthuthuka, onogada baqala ukulihlonipha leli qembu, kwaze kwaba yilapho kubekwa oyedwa ukuba abagade.

Ijele eliseCiudad Juárez lineHholo LoMbuso lalo. Kwatholakala imvume yokuba kulethwe izinto zokwakha ukuze kushintshwe isakhiwo sensimbi senziwe indawo yokukhulekela. Wonke umsebenzi wokwakha wenziwa yiziboshwa ezingu-13 ezibhapathiziwe kanye nezifundo zazo seBhayibheli eziyiziboshwa. Ihholo linesikhulisa mazwi, indlu yangasese, nezihlalo ezintofontofo, futhi lingahlala abantu abayikhulu. Abantu abangaba ngu-50 bahlanganyela imihlangano emihlanu njalo isonto ngalinye.

Yebo, isimilo singavuselelwa ngemfundo yeBhayibheli. Njengoba nje umlingiswa waseBhayibhelini uManase—inkosi yakwaJuda eyenza ububi obukhulu futhi yathunjelwa eBhabhiloni—aphenduka futhi wathandaza ecela intethelelo, iziboshwa namuhla zingashintsha ubuntu bazo zibe abantu abesaba uNkulunkulu.—2 IziKronike 33:12, 13.

[Isithombe ekhasini 30, 31]

Ubhapathizo phakathi ejele

[Isithombe ekhasini 30, 31]

Izikhonzi zesikhathi esigcwele nothisha bazo beSikole Senkonzo Samaphayona esaqhutshelwa ejele